AYC-2023 Hla Bu leh Theme Song Music Video Tlangzarh a ni

October 19 – 22, 2023 a Lothazawl, Thenzawl hmuna Adventist Youth Convention neih tur atana Hla Bu leh Theme Song Music Video chu August 12, 2023 hian 7th day Tlang Biak In-ah tlangzarh a ni. He tlangzarh inkhawm hi AYC Praise Team ten kaihruaiin Praise and Worship hun hman nghal a ni bawk.

Pu Lalbiakdika Ralte, Treasurer, Mizo Conference chuan he Inkhawmpui Hla bu hi tlangzarhin Pathian hnenah a hlan a. Pu Lalbiakdika hian Mizo Adventist thalaite rimawi lama an hmasawnna chu hmuhnawm a tih thu leh Hla Bu tha tak mai tlangzarha ni thei chu lawmthu a sawi a. Tin, Pu C. Lalhmuaka’n AYC Theme Song Music Video “Tu nge ka nih” tih hla chu a tlangzarh nghal bawk a ni.

AYC Hla Bu ah hian hla 40 awmin Hla Thar panga dah luh a ni a. Solfa dah tel nghal a ni bawk. Youth Ministries Department hnuaia rimawi lam buapuitu pawl, Mizo Adventist Music Association ten he hlabu buaipui hna hi an thawk ni.

AYC 2023 atana thupui thlan hi Tunge ka nih? tih a ni a. He mi thupui mil hian Theme Song “Tu nge ka nih” tih chu Priscilla L Fanai in phuahin a music video siam a ni a. Adventist zaithiam hrang hrang bakah Adventist Choir ten he hla hi an sa a. MAMA (Mizo Adventist Music Association) Youtube Channel-ah dah luh nghal a ni.

Mizo Conference Youth Ministries Department hi Director Pastor Thangliana Fanai leh Associate Director Pu Lalmuansanga Khiangte ten an enkawl a. Mizo Conference hnuaiah hian thalai active sang nga bawr vel an awm a ni.