Zirlai-10

ISUA A THANGLIAN

TA

Bible Châng:          Matthaia 2:13-15, 19-23; Luka 2:39-52.

Zirlai Tum:   Isua ang nih ka duh a ni.

Nu & Pate Tân:  Naupangin in hmangaih tih a hriat theihna tûr chuan a thil thlîrdân in hriatthiampui a ngai thîn.  A dinhmunah indaha, a ngaihruat anga ngaihruat thiampui tûr a ni.  In fa kum 3 mi vêl lek kha a nautelem engemaw tia a lo chhiat deuh vângin mittui nên i hnên lo kal ta se, “Hetiang thil ho mai maiah tap teh suh.  A dang pawh i la ngah tho a lâwm, khâ phei kha chu a tlâwm si; a dang kan lei leh mai dâwn nia” te pawh kan ti thîn.  Hei aia tihdân tha zâwk niâwma lang chu:  “Ê, a va pawi tak vê!  i duh hlê mai si taka, a lo chhe ta hlauh chu pawi i ti hlê mai mâw.  A to vak lova, naktûkah a thar kan ngaihtuah leh thei mai thei a nia,” han ti la.  He thil pahnih hi inlahlei tak a ni.  Pakhatna hian “Hetiang thil têtham mai maia tahte chu i â êm mai” tiin naupang hlutna tak a  inngaihniamtîr ta hlê a.  A pahnihna hi chuan naupang ngaihdan a hriatthiampuia, a rilru damna tûra han kuah leh hnêmna thu chuan a rilru chu nilêngin awmnuam takin a siamsak leh mai dâwn a ni.

          Harsatna kan neih hian kan mamawh tak chu hriatthiampuina a ni fo.  Hei vâng hian Isua chu kan inhnemna a ni rêng a ni.  Keini angin A lo nungin A khawsa ve a, kan harsatna tawhte A hrethiam êm êm a ni.  Hetianga fâte rilru hriatthiampuina hian nasa takin a tanpui thei thîn a ni.

Tih Tur:   Marin Isua naupanlaia ngun takin Pathian Thu a zirtîr thîn angin nuten an fate chu ngun takin an zirtîr ve thîn tûr a ni.

Bible Thawnthu

          “Josef, Josef, tho thuai teh,” tiin Vântirh-kohin Josefa chu a rawn ko a.  “Lal Herodan nausen hi thah a tum a, chuvângin, zanin lâ lâ hian ram hla takah tlanbopui nghâl rawh,” a ti a. 

          Chuvêleh, Josefa leh Mari-te chu hmanhmawh theihtâwpin an inbuatsaih nghâl char char a.  Nausen Isua leh A nu Mari chu sabengtung chungah a chuantîr a.  Mifingten thil hlu tak tak an pêkte kha an keng bawk a.  Josefa chuan sabengtung chu zân thimah chuan a kai ta hnak hnak mai a.  Hmanhmawh takin an kal sawk sawk a.  Vantirhkoh chuan a vêng zui zêl bawk a.  Rei tak an kal hnu chuan an lo hah ve ta deuha, an châwl ta a ni.  Mahse an awmna chu a hlat tawh avângin lal sual tak chuan a that phâk tawh lovang.  Pathianin A vantirhkoh hmanga A vên zuizêl avâng chuan hmanhmawh takin an kal leh ta a.  Isua leh A nu chu sabengtung chunga chuang an ni a, mahse an kête a kham tawh hlê a ni.  Ni engemawzât hnuah chuan an tlânchhiatna tûr ram, Aigupta chu an thleng ve ta hlawl maia, an thlâ a muang ta hlê a.  Chutah chuan an mikhual ve hrih dâwn a ni.

          Aigupta rama an awmlai chuan Isua pawh a lo thanglian vê ta deuha nangni ang tiat vêl a lo ni vê ta a ni.  A bawkvâka, a thu theia, a hnu deuhah chuan a lo ding thei a.  A hnu leh deuhah chuan a kal vê terh terh mai a.  A nû leh pate chu an hlim êm êm mai a ni.  A hnu deuhah phei chuan a lo tlân ve thei a.   A tlân nal nal ta maia, a fel thei êm êm mai a ni.  A nuin eitûr leh in tûr a pêkte hi hlim takin a eiin a in thîna, thu hi a âwih hlê mai a ni.

          Zankhat chu Josefa hnênah vantirhkoh a inlâr leha, “Lal sual tak kha a thi tawh e, Israel ramah hâwng chho leh tawh rawh u,” tiin a hrilh a.  Isua leh A nu chu sabengtung chungah an chuang leha, a pa chuan a kai a.  A tâwpah chuan an in awmna khua chu an thleng leh ta a ni.  An hlim hlê mai a nih chu!

          Nangmahni ang mai hian a lo thanglian ve zêl a, a nu chuan Bible chângvawnte a zirtîra, tha takin a vawng thîn a ni.  Bible thawnthu a nuin a hrilhte chu ngaihnawm a ti thei êm êm mai a.  Ngun takin a ngaithla thîn a.  Tawngtaite pawh hi nuam a ti thei hlê bawk a ni. 

          Sabbath sikula kala, inkhâwmte hi nuam a ti êm êm bawka, a nu leh pate bulah hian ngawirengin a thu thîn a.  Bengchhengte hi a siam ngai rêng rêng loa, a nu pawh a ngên buai ve ngai rêng rêng lo a ni.  A nu leh paten an koha, an tirhte hian rang takin a chhânga, a kal vat vat thîn a ni.  Zai hunahte ringtak leh thiam ang tâwkin a zaia, ngaihthlâk hunah chuan kut kuangkuahin fel takin a ngaithla kar mai thîn a ni.

          Isua pa chu mistiri a ni a, thil eng engemaw hi a siam thîna, Isua pawh chuan lo dawmpui leh, a tih ve theih ang angte tiin a lo tanpui ve thîn a ni.

          Nangni Isua anga awm hi in duh êm?  In duh phawt chuan in awm ve thei tho a ni.  Isua angin chhûngte leh nu leh pate in tanpui theia, thil in tihpui thei ve tho a ni.  Nuten an tirh cheuin Isua angin phunnawi miah lovin in kal nghâl vat thei a.  Chutianga in tih chuan Isua ang in ni ve mai dâwn a ni.  Sikul kalnaahte zirtîrtute thuawih tûr a nia, inkhâwmnaahte fel taka in awm thin chuan Isua ang in ni ve mai dâwn a nih chu. Isua anga nu leh pa leh zirtîrtute thuawih tum zawng han bânphar teh u le