Zirlai-11

ISUAN MIPA NAUPANG A TIDAM

Bible Châng:          Johana 4:46-54.

Zirlai Tum:   Amah kan mamawh a piangin Isuan min tanpui zêl thîn.

Nu & Pate Tân:   Naupang tâna thanlenna tûr hmun tha  taka kan awmtîr hian kan hmangaih a ni tih an hrethiam thîn.  Pathianin thanlen  theihna tûr A pe theuha, amâ tâna tha tûr ber anga than puitlin châkna lian tak an nei tana, mahse ha nei saa piang an ni emaw, kum khat zetah an nei chauh pawh nise, nausen pângngai an nihna a bo chuang lo.  Nûte hian an fâte hi thang lian thuai thuaia,  thil thiam thuai thuai tûrin an duh thîn.  Midangte an phâk lo deuha an hriatte hian an rilru a hah mai thîn, mahse chutiang tûr chu a ni lo.

          Mahnia zunram inthiar thû-ahte tanpui an ngai thîn hi, “I upa ve tawh sî,” te kan tih khum thîna, mahse engto tehchiam tûr a ni lo.  Anmahniin an la thiam ve chhawm mai dâwn a ni.   Thurâwnte chu pêk tûr a ni a, tihzah leh mualpho taka siam chu pumpelh tûr a ni.  Thil an tihsualin hâu mai lêm suh.  I ring tâwk a ni tih lantîr la, an zun leh êk buaipui thu âiin inrintawkna siam mawlh hi a pawimawh zâwk a ni.  Thlaite thanglian tûra kan duhin leitha, tui leh ni-êng tam zâwk kan dawntîr angin, naupang thanlen nân pawh an vêl boruak kan siamsak zâwk tûr a ni.  Ama dinhmun leh boruak mil zêla awm thiamtîr hian kan hmangaih a ni tih an hrethiam thei thîn a ni.

Bible Thawnthu

          Mipa naupang pakhat chu a dam lova, a tap a tap mai a ni.  Lumte a ti a, a kâ leh hrawk te a nâ a ti a, engmah pawh a ei duh lo.  A nuin a puak leh a awih chauhin a tlei duha, chutiang a nih loh chuan a tap deuh reng mai a ni.  A nu leh pâte chu an mangang êm êm mai a.  A tâwpah chuan Dâktawr an ko ta a.

          Dâktawr chu a lo kala, naupang damlo chu a han en vêl a.  Ani chuan “Hm, ka hrethiam e, naupang hi a hrawk a nâ a nih hi.  Damdawi ka’n pe anga, a dam leh thuai mai ang.  Tuisik tamtak in bawk rawh se.  Mangang rêng rêng suh u,” a ti a.

          A nu chuan damdawi chu a pe ta a.  A chal sa vut vutte chu tui vâwtin a dehsak bawka, rei lo tê-ah chuan a muhil ta siai siai mai a ni.  A nu leh pâte chu Isua hnênah an tawngtaia, an fapa dam lehna tûr chu an dîl mawlh mawlh a.  An chhûngkua hian Isua an hmangaih avângin A tihdamsak thei tih an hriaa, an ring tlat a ni.

          Bible chuan Isuan min tihdam theih thu a sawi a.  Chu mipa naupang pawh chu A tidam theia; rei loteah chuan a lo dam leh ta mai rêng a ni.

          He khawvêla Isua a awmlai khân damlo tamtak A tidam a.  Mitthîte pawh A kaitho hial a ni.  Tu dâktawr mahin an tihdam theih loh phâr natnate pawh a tihdam  zêl a.  Natna tihdam theihloh rêng rêng Isuan a nei vê lo.  Isua chuan mitin hi damin hrisêl êm êm se A ti a, min duhsak êm êm vek bawk a ni.

          Nikhat chu pa pakhat hi Isua hnênah a lo kala, “Isu, Isu, lo kal thuai teh, ka fapa natna khirh takin a mana, tumân min tihdamsak thei tawh lo.  Mahse, nang chuan I tidam thei tih ka hria a ni.  Khawngaihtakin lo kal nghâl rawh, chutilo chuan ka fapa a thi hman hial mai ang,” a ti a.

          Isuan chu pâ chu A khawngaih êm êma, a fapa damlo pawh chu A khawngaih bawka, tihdam ngei pawh A duh a ni.  A hnênah chuan, “Va hâwng ta la, i fapa chu a dam tawh e,” tiin a hrilh a.  Chupa chuan Isua sawi chu a ring ve nghâl mai a.  Hlim takin a hâwng ta vang vang mai a ni.

          In a va thlen chuan a rin ang leh Isua sawiang ngei chuan a fapa chu a lo dam hmiah tawh mai a. An chhûngkua chuan Isua an hmangaih ta êm êm mai a ni.

          Isuan min hmangaih theuha, hlim tak leh dama, hrisêl tûrin min duhsak theuh a ni.  Kan damloh pawhin Isua chuan min tidam thei a. 

          Zânah tui taka kan mut te, tui ti taka châw kan ei te, hlim taka kan infiamte hian a hlim êm êm a ni. Kan damloh palh pawhin Isuan min tidam thei.  Dâktawrte pawh a tanpui zêl thei bawk a ni. 

          Kan nu leh pâte pawh a tanpui thei bawk.  Nangni pawh tanpui in ngaih apiangin a tanpui thei reng che u  a ni.

          Harsatnate, damlohna te leh mangannaten a tlâkbuâk che u hunah chuan, nangmahni tanpui tûrin Isua in sâwm thîn tûr a ni. 

          Tichuan A tanpui ang che u a , in natnate pawh a tidam zêl dâwn che u a ni.  Isua tanpui nih in duh em?  Tanpuitu atân in sâwm thîn angem le? Chutiang a nih chuan in tawngtai thin dawn nia, A chhang zel mai ang che u.