Zirlai-13
ISUA VANAH A LÂWN
Bible Châng: Luka 24:50-53; Tirhkohte 1:9-12.
Zirlai Tum: Vâna min hruai tûrin Isua A lo la kal leh dâwn a ni.
Nu & Pate Tân:
Naupang chu an la têt viau lai chuan thuawihlo hlei theilo khawpin a vêl thil rêng rêng kan siamsak thîn. Kum 3-te an lo tlin hmâ chuan, nêm deuh hleka tih te, tawngka leh engemawti han tih deuh mai pawhin awlsam takin thu chu a awih deuh mai thîn a ni. Tlêma ngaihtuahna an hmanthiam deuh hnu chuan thununna hmanrua atân ngaihruatthiamna pawh kan belh thei ang. Tihdan âwmtak han tihzui zel hi thununna tha a ni a, fâte thunun tha tak chuan vawi tamtak sawi nawn a ngai kher lovang, mahse a lo tul ta a nih pawhin tawngkam thlum takin tih tum hrâm la. A vawikhatnaa phûr taka tihtîr nghâl theih hian naupang pawhin nuam an ti thîn.
I fâte chu thunun an lo ngai a nih pawhin, Pathian khawngaihna a zârah, thinrim chung chuan hrem suh ang che. “Chhungkaw tin hian tumruhna, thutihtlûkna fel, thiltha ti tûra duhnate hi an mamawh theuh a ni.” Child Guidance, p. 264. Chutiangin “fâte thununna kawnga nu leh pa an thinrim chuan, an thunun naupang âi chuan thil an tisual nasa zâwk a ni.” p. 246. “Rilru thâwl takin, thinrimna tel miah lovin ti la, tichuan i thunun mêk naupang chuan hmangaihna nên i thunun a ni tih an hrethiam thovang.” p. 249.
Thil diklo tih chungchângah chuan chêt vat tûr a ni a, thu zûk leh mai mai tûr a ni lo. Tum khat ben chu damchhûng atân a tâwk thei ang, dik taka tih a nih si chuan. Nunnêm leh thuzûk mai mai siloa, hmangaihna nêna enkawl naupang chuan a thinlung chhûng takah hmangaihna dawng a nihzia a inhre tho dâwn a ni.
Bible Thawnthu
Isua chu khawvêla A lo kal hmasak khân nausen tê angin a lo kal a ni. A nu Mari leh a pa Josefate chuan tha takin an enkawl a, vântirhkohte pawhin an vêng thîn. Thu a awih thei hlê a, tirhna apiangah hian phunnawi lovin a kal nghâl vat zêl thîn a ni. A theih ang angin a nu leh pâte chu a tanpui ve zêl thîn a. A lo thanglian zela, nakinah phei chuan puitling a lo ni ve ta a. Midangte pawh a tanpui thîna, an natnate a tihdam bâkah, mitthîte hial pawh A kaitho a nih kha. Mi zawng zawng A hmangaiha, A tanpui zêl thîn a ni.
Khawvêlah rei tak a awm hnuin, misualten an tihluma; mahse thlân atangin A tho leha, chumi hnuah chuan vânah a lâwn chho leh ta a ni. Vâna a lâwn dâwn ni chuan A thiante nên an lêng hova, tlâng chhîp lam an pan a. An kal pah chuan Isuan anmahni A hmangaihzia A hrilh mawlh mawlh a.
Tlâng chhîp an thlen chuan Isua chu zâwite hian A kâng chho ta diâi diâi mai a ni. A sâng tial tiala, a thianteho chuan vanvadâkin an thlîr zui thap a. Chhûm zîngah A chhova an hmu zui zêl thei ta lova, khawhar deuhin khaw lamah an hâw ta a ni.
An hâwn dâwn lai chuan an lungngâiin, an ngui nghiai mai a. An bulah chuan vantirhkoh pahnih hi an lo dinga, “Isua hi A lo kal leh dâwn a lâwm; mangang lutuk suh u,” tiin an hrilh a.
Engtik niah emaw chuan Isua chu A lo kal leh dâwn a ni. A lo kal leh hun chuan vântirhkoh tamtak A rawn hruai anga, chhiarsen pawh an ni lovang. Vân zawng zawng khi vântirhkohin an khat vek dâwn a ni. Isua chu chhûm chungah A thû anga, chhimbâl mawi tak hian a hual vêl dâwn a ni. A mawi hlê ang. Vantirhkohte chuan tawtawrâwt an hâm ri ruâi ruâi anga, chu chu in hre thei dâwn a nih chu!
Isua lo kal hunah chuan engmah hlauhawm a awm tawh dâwn lova, ransa engmah pawh a hlauhawm tawh lovang. Setana pawhin min tina thei tawh lovanga, Isua leh Vântrihkohte nên leitharah kan kal anga. Chutah chuan sakeibaknei te, chinghniate leh ramsa dangte nên in infiamin, in inchai vêl anga, in let tawp tawp mai dâwn a ni. Tumahin hlauh leh intihnat rêng rêng a awm tawh dâwn lova, a nuam êm êm mai dâwn a ni.
Naupang thenkhat chu Isua malchungahte in thû anga, A pawm vêl dâwn che u a ni. Nuam in ti teh ang chu. Thenkhat chuan ramsa kan hlauh êm êm thinte kha hlâu miah lovin in hruai anga, an zui duah duah mai dâwn che u a ni. Thenkhat chu an chungahte in chuâng anga, in duh duhna lamah in kaltîr mai dâwn a ni. Thenkhat chu vantirhkoh ten thla an pe anga, vânsângahte, tlâng chungahte an thlâwk dêr dêr mai anga, an duh leh leiah an tum anga, an duh duhna hmunah an thlâwk vêl dâwn a ni.
Vânah chuan thosi seh tihte, ruahsûr hrehawm te, nisa hrehawm te khawthim te pawh a awm dâwn tawh lo a ni. Boruak lum hrehawmte a awm lovanga, a nuam tâwk chiah dâwn a ni.
Chuta kan kal hun tûr chu a hnai tawh êm êma, nakin lawkah Isua A lo kal anga, chutah chuan kan kal tawh mai dâwn a ni! In kal châk tawh em? Isua hi lo ka tawh se in ti em? Vâna kal in duh tawh chuan in nu leh pâte thu âwih ulang, an tirhna apiangah thuawih deuhin kal zêl ulang. Inkhâwmnaah te fel takin awm ulang. Inkhâwmnaa ninhlei leh, bengchhengte hi Isua chuan fel a ti dâwn lova. Chuvângin thuawih leh fel nih tum theuh tûr a ni. Isua lo kal huna vâna kal ve duh zawng han bânphar teh u le! Vâna kal in duh tak tak chuan fel takin in awm zêl dâwn nia.