Zirlai-2

ISUAN INNEIHNA

 A HMANPUI

Bible Châng:          Johana 2:1-11.

Zirlai Tum:   Isuan min hmangaihna chu tanpui kan ngaih huna min tanpuiin A târlang thîn a ni.

Nu & Pate Tân:      Naupang rilru hrisêl chuan mahni a inzahthiam thîn.  Hmangaih theih leh hlutna nei a ni tih chu rilru chhûngril takah a inhre thîna, midangte tân thil pêk tûr engemaw a nei thîn.  An vêla boruak awmdân a zirin chutiang mahni hlutna an neihdân chu a châwmin, a tithuanawp thei a ni.  Zahawm taka kan cheibâwl chuan mahni an lo inngaihluthiam anga, rinhlelhna leh mahni tlâwm lutuk anga an inngaihtheihna tûr anga kan tih thîn chuan, chutiang rilru chu an pu mai ang.  Mahni inngaihhlutna hrisêl neihna chuan midangte ngaihsakna leh, nitin khawsakna lama chona hmachhawnin, mahni a intheihnghilh thei hial a ni.

          Hetianga mahni hlutna pawimawh tak neihtîr tûr hian i hmangaih reng tih leh tiamkam awm lo a ni tih hriattir la.  I ngaihhlut ang zêlin mahni hlutna chu a hre dâwn a ni.  Hetiang atân hian thilpêk (presents) âiin awmpuina/awmchilhna (presence) chu a pawimawh zâwk ang.  Mamawh tamtak zîngah nu leh pate ngaihsakna hi an mamawhber a ni.  Harsatna neia an rawn pan chein, lo chiauâu vat la, thlamuan ang che.  Chutiang taka i ngaihsakna a zârah chuan i hmangaih tih a inhre mai ang.

BIBLE THAWNTHU

          Inneihnaah in kal tawhin, monu leh moneitu hmêlte in hmu tawh em?  Pangpâr thehtu-ahte in tang tawh em?  Thawmhnaw thar mawi takin in inthuam tawh hlawm ang mâw?  Inneihna hman hi thil hlimawm tak a ni rêng a ni.

          Monu leh moneitu hi an inhmangaih êm êma, chhûngkaw hlim leh nuam tak din an duh thîn a ni.  Naute neih pawh an duh a, an neih phei chuan an hlim thei êm êm a ni.

          Nikhat chu Isua-te awmna kiang khuaah inneihna a awm dâwna, Isua leh A zirtirte pawh an sâwma, an kal vê a ni.  Monu leh moneitute an hmu a.  Midang pawh an tam hlê mai.  Thenkhat an zaia, thenkhat an nuia; ruai te an theha, nuam an ti hlê mai a ni.  Chaw ei tûrte, grape tui in tûrte leh ei tûr thil dang dangte an sema, nuam an ti hlawm hlê mai a.  Isua nu pawh a tel vea, fatuhote thiltihdân a enpui ve thîn a ni.  Nakin deuhah chuan Isua nu chu a lo kal a, a rawn hrilh ru ta a, “Grep tui a zo ta tlat mai.  Engtin nge kan tih tâk ang le?”  a rawn ti a.  Fatute chu an mangang rilru viau tawh a ni.

          Mi zawng zawng chuan grep tui tuitak in tûr an la duhin, an la kham lo êm êm mai sî a.  A awm chhun lah chu fatuhoten an sem zo ta bawk si.  Dâwr lamah lei tûr a awm bawk si lo.  Khawi atangin nge an hmuh belh tâk ang le?  Thenkhat chuan, “Isua hian min tanpui thei a ngem âw?” an ti nauh nauh a.  Mahse an sawi ngam chiah si lo a ni.

          Isua nu chuan Isua hnênah chuan a rawn hrilh tawha, Isua pawh hian mi tanpui hi nuam a tih zâwng tak a ni a.  Mahselang tûnhma lam chuan thilmak chu A la ti ngai si lo.  Isua chuan inneihnaa lo kal mipui zawng zawng chu hlim tak leh nuam taka an awmtheihna tûra tanpui a duh a, mi tanpui hi a hlimna zâwng tak a ni rêng a ni.

          In lehlamah chuan tuibêl lian pui pui mai hi an dah khup mai a.  An bêl chu a lian khawpa, nangni ang hi chu a chhûngah in leng êm êm dâwn a ni.  Chûng bêl lian pui pui chu tuia chhûngkhat tûrin Isua chuan fatuho chu a hrilh a.  Thuawih takin an chhûngkhat ta veka; a vai chuan tam tham tak mai a ni.

          Isua chuan, “Ti khân thâl chhuak ulang, inneihnaah chuan va sem tawh rawh u le” a ti a.  A thu ang chuan an thâl chhuaka, an va sem taa, mite chuan an han in chuan, “Ê, khai! A va tui kher êm”  Engtin nge tun thlenga hetiang grep tui deuh hi in la sem theih reng mai le?  A va mak êm!  A thlum bawk sî” an ti a.  Isua khân grep tui tuiber chî-ah A lo chantîr reng mai a lo ni.  Mite chuan tuisik mai mai emaw an tih kha, grep tui thlumtui berah Isuan a lo chantîr a nih chû!  A lâwmawm viau ang ti r’u?  A hmaa, moneitupain a neihsa, an sem hmasak ai khân a tui zâwk daih a nih chu!

          Isua hian tanpui in ngaihna apianga tanpui che u leh, in hlim theihna tûr hi A duhsak êm êm che u a ni.  A hnênah tanpuina in dîl phawt chuan A lo ngaithla zêl anga,  A tanpui zêl dâwn chê u a ni.  In nu leh pâ te, pi leh pute âi pawhin Isua chuan A hmangaih zâwk mah che u a nih chû!  A hmangaih che u avâng hian tanpui in ngaih hun chuan a tanpui zêl dâwn che u a nih chu, in lâwm em?

          Isua chu a nêlawm êlm êm a, a hnênah engmah kan thlen hreh tur a ni lo.