Zirlai-3

Zirlai 3-na

ZAKAIA’N ISUA

HMUH A DUH

Bible Châng  :        Luka 19:1-10.

Zirlai Tum :  Isua i hmangaihna chu A duhzawng tihin i lantîr thei.

Nu & Pate Tân :  Kan fâte hi ni lo loa, puh leh kohna lakah hian kan fimkhur hlê tûr a ni.  Faten thil hre zâwka min ngaih avângin chutiang dik lo taka kan puhna leh, kohna chu an inngaihbel tlat mai dâwn a; an nungchang leh khawsak dânah pawh lantîr zêl an tum mai dâwn a ni.  Nu leh pâte hian hauh leh zilhna hmang ngawt hian thil an ti a, hetiang deuhte hian an ti thîn:  “I nâu i vêla, i sual hlê mai,” emaw “Hetiang pawh tithei hlei lo che,” tih emaw, “Tih i va har reuh êm! i thatchhe êm maia, tihngaihna che pawh ka hre love,” tihte hi, kan nu leh pâten min lo tihdân ang deuh zêl hian fâte hi kan ti ve thîn.  Kan invên deuh loh chuan kan duh loh dân tak khân fâte kan ti ve leh duh viau a ni.

          In tawngkam hmanah fimkhur ulang, in fâte kha `naupang thâ’ an ni tih hre teh u.  Tihsual chu kan nei thei theuh a lâwm!  Misual tu emaw hmingin ko teh suh u.  An tihsual chuan “Kha thil tih kha chu a dik lovanga, ti lo ang che” titein hrilh ila.  Thlêmna dopuitu i ni tih a hre tûr a ni.  Naupang duhawm, Isua thuâwiha a lo seilen theih nân tanpui hrâm hrâm ang che u.

Bible Thawnthu

          Zakaia hi pa tê ve deuh tak hi a ni a, a thut leh dinte hian a hmalam a hmuh theih loh nân mi hian an hliah zêl mai thîn a ni.  Hmalam a hmuh duh chuan dinglam leh vei lamah a thletawn chhên zêl mai a ni.

          Zakaia chu chhiahkhawntu hotu, Jeriko khuaa awm a ni.  Mite chuan hetiang hnathawk hi an haw êm êma, kawm pawh an kâwm duh ngai lo.  Sorkar tâna an pawisa khawn hi kawng siam nân te, sikul sak nân leh sipai hlawhahte, insak nânte sorkarin a hmang thin a.

          Zakaiate pâwl hi an sual ve hlê a.  Pawisa khawn tûr sorkarin a tih âia tam mi hnênah an khawn thîna, a hlâwkna hi an hlêp ru thîn a ni.  An hausa thei phian a, an ineithâu ve nalh mai thîn!

          Nikhat chu a vahvêlnaah Isua chanchin mi sawi a hre ve ta a, ngaihnawm a ti hlê mai a.  An khuaah a lo kal dâwn tihte a hre leh ta zêl a.  Hmuh a châk ve ta hlê maia, “Lo kal thuai thuai se, lo hmu ve ngei ngei teh ang,” a ti rilru a.  Isuan damlo tinreng a tihdam thûte, lungngâi leh tanpui ngâi A tanpui thûte, tuisik grep tuia A chantîr thûte pawh a lo hre ve a.  A zâuthâu hlê mai.  An khuaa Isua A lo kal huna hmuh ngei dân tûr ngawt chu a ngaihtuah ta a ni.

          Nakinah chuan Zakaiate khuaah chuan Isua chu A lo kal ta tak tak a.  Mipui tamtakin hmuh châkin an zuia, an lo hmuak bawka, A zirtirte pawh an lo kal vê a.  Zakaia chuan va hmuh vê chu a châk hlê maia, a va kal thuaia, mahse mi an lo tam si.  A hmu ve thei ta mai si lo.  Mite khân an dinhliah zêl mai si, hrehawm a ti hlê mai.  A thle tawn a thle tawna, a hmu thei chuang si lo.  Nakin deuhah chuan Isua kalna tûr lam kawngah chuan a lo va tlân a.  Kawng sîra Theipui kûng lian deuh maiah chuan a lâwn ta a.  Isua lo kal hunah chuan chiang deuha hmu thei dâwna a inhriat avângin a hlim rilru ta viau mai a ni.  Tûmahin hliah tawh dâwn hek lo!

          A hnu lawkah chuan chulam kawngah chuan Isua chu a lo kal ta ngei maia, mipui tamtakin an zui dûl dûl mai a.  Zakaia chuan chiang tak maiin a lo enrân maia, a hmu chiang ta hlê mai.  Isua hmêl a han hmuh chiah chuan Isua hmêl chuan a hneh ta hlê maia, a ngaisângin a hmangaih ta hlê mai a ni.

          Chutianga Isua chunga a rilru a sên neuh neuh lai chuan, a awmna thingbuk hnuai chu Isuan a rawn thleng ta a.  Isuan a hmu reng tih a inhre si lo. Isua lah chuan A hmu rân mai bawk si a, a ding ta chawt maia, Zakaia chu enrân chungin, “Lo chhuk rawh, i inah ka lo thleng dâwn a ni,” a ti ta a.  Zakaia chuan a ina Isua a lo thlen duh tak tak a ring ngam chiah lova, “Ka inah mâw?” tiin a zâwt hêhâw a.

          Zakaia chu a hlim hlê mai.  A inah chuan Isua chu a lo thleng dâwn a ni si a.  A theihtâwpa hmanhmawhin a chhuk thlâa, Isua leh A thiante nên chuan a in lam chu an pan ta a ni.

          Isua chuan Zakaia sualnate leh miten an ngaihdânte a hre veka, mahse A khawngaih êm êm a ni.  Zakaia chuan Isua chu a hmangaih êm êma, a sualna zawng zawng chu Isua hmâah chuan puângin a sim ta vek mai a ni.  Isua thuawihin, a lâwmzâwng ang zêla awm a tum ta a.  Isua hênah chuan, “LALPA, ka sum zâtve mi retheite hnêah ka pê anga, ka thiltihsual zawng zawng chu ka rûl leh vek ang e,” a ti a.

          Zakaian a sualte a lo sima, Isua hmâa a inpuan chuan Isua chu A lâwm êm êm mai a.  “He inah hian chhandamna a lo thleng ta a nih hi!” tiin Isuan a sawi ta hial a ni.  Isua kan hmangaih chuan A duhzawng tih kan duh vê ang a.  Zakaia ang hian kan tihsualte kan sim anga, Isua hnênah ngaihdamte kan dil vê thîn tûr a ni.

          Nangni Isua in hmangaih ve em?  In hmangaih chuan A duhzawng ti zêl ang che u.