Zirlai-4

LÂWMTHU SAWI NACHÂNG HRIA

Bible châng :         Luka 17: 11-19

Zirlai Tum:   Isua i hmangaihna  chu A hnenah “Lâwmthu sawiin” i lantîr  thei a ni.

Nu & Pate Tân:      Naupangte hian fakna leh fuihna, tihphûrna hi an mamawh êm êm a ni.  Fakna hi kawng hnih a awm a, kawng khat chuan a châwm laiin, pakhat zâwk chuan a tichhe hlauh thung thin. Entirnan: Naupang pakhat thil lem ziak chu enin a nu chuan, “I va han ziak mâwiin, i va thiam kher êm! Lemziak lamah hian thlilpêk ropui tak i dawng a nih hi!” a ti a.  A ziak nalh vak si loh avangin chu naupang chuan uchuak taka fakna chu phûin a inhre si lova, “Chuti taka thiam chu ka ni lêm sî lova, nakinah phei chuan hetiang pawh hian ka ziak tawh âwm kher si lova, chuvangin ziak tawh tawp lo ila a ni mai,” a ti rilru a.  Hetiang hmaichhana infak hluah hluah hi a uchuakin, a nihna tak nên a inmil duh chiah lêm lo thîn a ni.

          Mihring ni lovin, a thiltih tak zâwk kha fak tûr a ni.  Nu fingvâr deuh chuan khatiang naupang kha heti hian an ti âwm e:   “I lemziak chu duhawm ka ti hlê mai.  Ka rawng ngainat zawng tak i hmanga, i lemziaka pangpârte pawh hi hlim tak hmêl an pû a lâwm!” a ti zawk âwm e. Dik taka, rilru tak sawi chhuahna hi an pawmthiam duh zâwk thin  a ni. Dik taka infakna hi chuan mi a tiphûr thei a ni.

          “Lalpa chuan naupangte hi an têt tê laia an thinlungte A rawngbâwl nâna hlân turin a duh a ni.  Thil ngaihruat thiam lo an la nih cheu lai pawhin, i theih ang tâwkin an rilru chutiang lama khalhsak chu tum ang che; tlêma an lo len deuh hnu chuan zitirna leh entirna hmangin zirtir la, tichuan an duhdân thalo ang zel chuan i lo awmtîr lo thei dâwn nia.” Child Guidance, pp.148,149.

BIBLE THAWNTHU

          Kal kawngah hian mipa sâwm lai mai hi an kal chhuk hnak hnak a.  An lungngâiin, an hmêl chu a hlim lo hlê mai a ni. Phâr natna an veia, tûman an tidam thei si lova, hei vâng hian an lungngâi a ni.

          An kalna apiangah mite chuan an ten êm êm a, “Bawlhhlawh ka ni,” tiin an au lauh lauh mai a.  Mite chuan an natna kâi hlâuin an kiansan duak duak zêl mai a.  Kawm pawh an kawm duh lova, engmah pawh an tihsak duh lo thîn a ni.

          Nikhat chu an zînga pakhat chuan, “En teh u, saw kawnga mi lo kal saw tunge ni?” a ti a.  Midangte chuan, “Isua a nih sâw,” an ti a.  Isuan Phâr a tihdam chanchinte an hre tawha, hmuh an duh ve ta a.  Mahse an bula A lo kal duh leh, A tihdam duh tak tak pawh an ring ngam chiah si lo.  An inngaihtuaha, a tâwpah chuan Isua lo kalna tûr kawnga lo awma, A khawngaihna dîl chu an tum ta a.  Kawng sîrah chuan an lo nghâk ta thap mai a.  Isua a lo thlen hnaih chuan, “Isu, min khawngaih la, min tidam tawh,” tiin an lo ngên a.  An dîlna chu Isua chuan ngaithlain, an vai chuan a tidam ta vek mai a ni.

          Isua chuan, “Ti khân va kal ulang, puithiamte hnênah va inentîr rawh u, tichuan indam tha hmiah mai ang,” a ti a.  Lâwm tak leh phûr tak maiin an tlân ta a.  “Pan vun vâr kha ka nei tawh lo nia,” pakhat chuan a ti a, midangte pawh chuan, “Keini pawh kan nei tawh lo!” an ti a, an hlim hlê mai a ni.  “Ka dam ta, ka dam ta!” tiin an âu hlawm a.

          An zinga pakhat chu Isua hnênah a lo kal leh nghâl a, puithiamte awmna lama kal hmasak pawh ngaihtuah lovin, A ke bulah a bawkkhupa, “Isu, min tihdam avângin ka lâwm e” a ti a.  `Ka lâwm e’ tih zawng chu a sawithiam tâwk a ni.  Isua chuan, “Khawnge i thian dangte kha?” a ti a.  Anniho kha chuan Isua hnêna lâwmthu sawi nachâng an hre lova, A tihdamna chauh kha an duh a  ni.

          Pakhatin Isua hnêna lâwmthu a rawn sawi avâng chuan Isua pawh a lâwm ve êm êm a ni.

          Keini pawh Isuan min tanpui hian lâwmthu hrilh thîn tûrin min duh a ni.  Ei tûr tui tak takte in neiha, in infiam leh inkhâwm theih avângte hian lâwmthu Isua hnênah sawi thîn tûr a ni.  Sava hrâm mawi tak tak in hriat leh, nisa leh ruahsûr avângtein lâwmthu sawi fo tûr a ni.

          In nute leh paten eitûr an hawnsak emaw siamsak emaw cheu te hian in lâwm thîn em?  Thil eng engemaw an leisak che u te hian lâwmthu in hrilh thîn em?  Naupang fel chuan chutiangah chuan lâwmthu an sawi thîn a nih chu!

          Zan mut dâwnte hian thingthîa tawngtaia, “Lalpa, nilênga min vên avângin kan lâwm e, zankhuain min vêng leh ang che,” titein tawngtai ulang; zîng thawh vêleh tawngtaiin, “Lalpa zânkhuain min vênga kan lâwm e.  Vawiin nilêngin min vêng ang che,” tiin tawngtai leh thîn tûr a ni.  Chawei dâwnte hian “Lalpa, chaw-ei tûrte, chawhmeh te min pea kan lâwm e,” tia tawngtai thîn tûr a ni.   Isua chuan a lo ngaithla reng anga, a lâwm êm êm dâwn a ni.  Chutianga tih zel chu in tum theuh tawh dâwn nia!