Zirlai-5

NAUPANGTEN ISUA

AN LÂWM

Bible Châng : Matthaia 21:1-11; Luka 19:29-44.

Nu & Pate Tân:   Fâte lakah hian thil kan phût sâng lutuk fo thîn.  Hei hi an kum mil âwma an awm loh thin vâng a ni mai thei e.  A bîkin fa tîrah hian a ni duh zual.  Pakhatna hi chuan nu leh pate tân zirlai zirtûr–fate chunga mawhphurhna lian tak chu–a siamsak phawt a.  Nu chuan a fa kum thum mi lekin hmun a lo tihnawk nuaih mai leh tuia thil eng engemaw an lo chiah leh thlâkte hian an thin a rim phat mai thîn a ni.  Nâu an han neih leha, an fa pahnihnain chutiang rual vêl a niha, a û tih ang deuh chiah a han tih ve hian, naupang hetiang rual  tân chuan tihâwm tak a niin a lo hriatsak ve thei ta thîn sî a ni.  Enge a danglamna?  Tûnah chuan an laka beisei âwm tâwk a lo hriat tâk vâng a ni.

          Mahni’n kan beisei ang kan hlen loh emaw, duhzawng ang kan puitlin theih si lohte hian naupang chungah kan tuan mai thîn.  Mi mit la deuha fâte chei duh chângte a lo awma, changvawn sawitîr chenin, chubâkah an zirlaiah pawh midang khûmtîr emaw, thiam hmatîr deuh tumin kan nawrseh fo mai.  Midang khûm kher emaw, tluk kher tûr emawte pawh kan ti thîn.  “I rualpuiten chutiang khatiang an ti thei tawha, zun an cheh lova, (leh thil dang dangte) nang engati bîk nge ni teh fo?” te kan ti thîn a nih hi.

          Chutianga tihna chuan mahni inngaih hniam engemaw riauna a neihtîr ta thîn a ni.  Engmah hnial leh zâwt lêm lovin an nihna tûrah an ngai mai si thîn.  Mitling lo, mi tlâktlai lo, rual ban ve zo lo angah a inngai tlat mai dâwn ta a ni.  Chutiang hlîr maia enkawl leh tih an nih chuan Pathianin chutianga ngai vê tûrah an indah mai dâwna, a pawi êm êm dâwn a ni.

Bible Thawnthu

          Ruah sur ngai loh lai, thâl lai hun a ni a.  Ni pawh a sa vawl vawl maia, a lum hlê mai a ni.  Thinghnahte chu an chawrno hlep hlep maia, savâte pawh mawi takin an hrâm a, pangpâr pawh ram tinah chuan an pâr vul chûk maia, a mawiin, a nuam hlê a ni.

          Isua leh A thîante chu Jerusalemah an kal a.  An kal pah leh, thingbuk hlima an chawlh lâite chuan sava hram mawi tak tak leh, pangpâr mawi leh thinghnah mawi tak tak thlifîmin a chhêm bûk siau siaute chu an hmu a.  An rilru pawh a hahdam sawng sawng thîn a ni.

          Isua leh A zirtirte chuan chunglai hmun chu nuam an ti hlê mai a.  A zirtirte chuan Isua chuanna tûrin sabengtung an va kâi a.  An puante chu sabengtung chungah chuan an phah a.  Isua chu Sabengtung chungah chuan A chuang ta vâng mai a.  Lal a ang hlê mai.  Mite chuan an puante an hlipa, Isua kalna tûrah chuan an phah ta sup sup mai a.  Thenkhat chuan chhâwlte an thliakin, an sât a.  An vai ta suau suau mai a nih chu.

          Isua chuanna sabengtung chu Lazara, Isuan thlân atanga a kaihthawh ngei khân a kâia, nuam a ti hlê mai a ni.

          Isua thiante chuan, “Hossana, Hossana, Hossana!” tiin an âuva.  Mipui zawng zawngte pawh chu chutiang chuan an âu ve hlawma, an hlim tlâng hlê mai a ni.

          Naupangten engtin nge an tih ve ang le?  An lo nuar vêlin, an nûte an tibuai em niang?  A ni hauh lo a nih chu.  Sabengtung chunga Isua chuâng an hmuh chuan an lâwm êm êm maia, a bulah an lo tlâna, a kiang hnai tê têah chuan an kal a.  An nû leh pâte hnênah chuan, “Tumkâu leh chhâwlte min thliahsak ve rawh u,” an ti a.  An nû leh pâte chu an hlim hlê mai.  Tûmah ngui hmêl leh tap hmêl hmuh tûr rêng rêng a awm lo.   An nui var var hlawm a.  Hlim êm êmin, “Isua hi Lalber a ni, Hossana! Hossana! Hossana!” tiin theihtâwp tâwpin an âurual a.  Hlim takin Isua chuanna sabengtung hmalamah te, hnunglamah te, sîr tuakah te an kala, an thil ken chu an vai ve suau suau mai a nih chu.  (A nwm hmel hle a, in tel ve châk êm?)

          Naupangho leh puitling chuta awm zawng zawng mai chuan, “Lalpa hminga lo kal chu a eng a thâwl e, Hossana!” tiin an âu rual thuau thuau mai a nih chu.  A hlimawm hlê ang ti r’u?  An thâwm hria midang an lo kal zêla, an tel ve zêla, mipuite chu an tam ta hlê mai a ni.  Isua an hmangaihzia entirnân kawngah puante phahin, thenkhatin an chhâwl kente leh pangpârte an dah bawka, thenkhatin pangpârin Isua an theh bawk.  Naupangte chu a uar uarah an tang nghê nghê a ni.

          Nangni Isua in hmangaihzia entir nân engnge in tih ve ang le?

Hetiang kawngte hian inentir thei ang:

1.  “Lalpa, ka hmangaih che” tih hrilhin.

2.  Fakna hlâ sak saktein.

3.  Lâwmthu sawia tawngtaiin.

4.  Chângvawn vawngin.

5.  Bible thawnthu ngaithlâin.

6. Nu leh paten an koh cheua chhâng nghâl vatin.

7. Unaute nêna hlim taka inkâwm leh infiamho dial dialin.

8. Inkhâwmna a fel taka awmin.

9. Mi tanpui leh thiltha tihsakin.

Nangni khawi khawi khi nge in tih ang le?  Tih theih ang ang ti tûrin in rilru i siam sauh sauh dâwn nia.