Zirlai-6

MARIN ISUA A HMANGAIHZIA

A ENTIR

Bible Châng : Matthaia 26:6-13;  Marka 14:2-9.

Zirlai Tum:   Isua i hmangaihzia midangte i entir thei a ni.

Nu & Pate Tân:   Faten hmangaihna an mamawh tih chu kan hre deuh theuh.  Kan fâte pawh kan hmangaih tlângpui a ni.  Mahse kawhhmuh dân chu kan thiam chiah lo fo a ni.  Ngainâin, duhsakna kawng hran hrangin lantîr bawk mah ilang, kan hmangaihna chu kan hriatthiamtîr lo fo thei a ni.  Chhûngkaw harsa ve tak tak “Ka hmangaih che” tih pawh inhrilh ngai lêm lo, hmangaihna inmansak thiam tâwk tak pawh an awm lawi si.  Eng vâng nge ni ang le?

          Engtin nge naupangtên hmangaih an ni tih an inhriat tâk ang le?  Pakhatna chu a mamawh lai taka ngaihsakna lantîr hi a ni.  Thawmhnâw i hâktir leh châw i pêk pahte hian hlimhmêlpu takin nui saih saih la, a inkhualtelemna thiltihte pawh lâwmpui thîn ang che.  An hlauhzâwngte pawh hriatsak rawh.  Chubâkah mihring an nih angin, chutiang chuan en bawk ang che.  Mibîk an nihna pawh hria la.  “In chhûng hi naupangte tân chuan hmun nuâm leh mihîp ber a ni tûr a ni a, nu awmna phei chu amah hîptu ber a ni tûr a ni.  Naupang hian thil manchakna leh mingainattheihna an nei tha hlê a, tihlâwm leh tihlunghnûr an awlsam hlê a ni.  Zaidam taka thununna, hmangaihna aw nêm leh thiltihin an thinlung hneh theih a ni.  Nute ngaiha ho tak, anni ngaiha thil luâ ni siahte hian ngaihsaklohna vângin an thinlung an hliâmsak tûr a ni lo.  I lainatna leh remtihna hi an tân a hlu êm êm a ni.  Remtihpuina hmêl, fuihna thû leh faknate hi an tân chuan thinlunga ni-êng anga nilênga an nun tinuamtu a ni thîn.”  Tihdam Rawngbâwlna, p. 378.

          “Nu leh pate u, nuihmêlpu rawh u; zirtirtute u hlimhmêlpu rawh u.  In lungngâi pawh lo nise, in hmêlah lantîr teh suh u.  Thinlung hlimna leh hmangaihna nî chu in hmêlah lo êng chhuak rawh se.  Khirh bur lovin, naupangte ngainat leh mamawhna dinhmunah chuan indahhniam ve thîn ang che u.  An thinlunga sakhaw thutakte nemkâi induh chuan an ngainatah tang rawh u.”  Child Guidance, p. 148.

Bible Thawnthu

          Mari chuan Isua A hmangaih êm êm a, khawvêla mi ropui berah a ngai a ni.  Isua hmangaihna neiin, ngilnei leh mite chunga tha tak a lo ni a.  Isua pawhin A hmangaiha, A hmangaihzia târlan chu Mari pawhin a tum thîn rêng a ni.

          Mi tamtak chuan Mari hi misualah an ngai a, an hmangaih lo a ni.  Mahse Isuan Mari sualna ngaidamin, A hmangaih êm êm sî a ni.  Mari pawhin Isua a hmangaihzia hi entîr theih a duh êm êm a ni.

          Mari chuan engtin nge ka tih ang âw? tiin a inngaihtuaha, tih ngaihna a hre mai si lo.  Tawngkâ chuan a hrilh thei thova, mahse chu ngawt chu tâwkin a hre lova.  Thiltha engemaw tak tihsak a duh a ni.  Enge a tih tak ang âw?  A ngaihtuah chhuak ta a.  Thiltha tak leisak a tum ta a.  Rei tak atanga a pawisa khâwl sa chu a chhiar a.  Hmanhmawh takin thil zawrhna dâwr lamah a kal a, Isua tân thil man to deuh mai a va lei dâwn ta a ni.

          Isua duhzawng tûr tak chu a va hmu ta a, chu chu thilrimtui a ni.  A thaber chî leh manto ber chî chu a lei tâ a.  A pawisa khâwl sa chuan a man chu a daih chiah bawk.  Lâwm takin a hâwnpuia, remchânga hman atân a dahtha ta khiau mai a ni.

          Mari chuan Isua tân ruai an thehsak dâwn tih a hria a.  Mi tam tak zîngah chuan a unaupa Lazara pawh a tel vê dâwn tih a hre bawk a.  Chubâkah a unâunu Marthi pawh rawngbâwlpui tûrin a kal dâwn a.  Mari chuan, “Tun hi hun remchâng tha a ni mai ang â,” a ti rilru a, a inbuatsaih tâ a ni.

          Isua chu a lo kala, ruaithehna tûrah chuan A thûa, a bulah Lazara pawh a thû a.  Ruai chu an theh ta a, an hlim tlâng hlê mai a ni.  An thil ei pah chuan Isua leh a sâwmtupa Simona-te chu an titi a, thil ngaihnawm deuh deuh an sawi ho a ni.

          Chutih lai chuan Mari chu zawitein a va kal vê a, engmah sawi set set lo chuan a rimtui bâwm chu a hawnga, Isua lû-ah chuan a thih ta a.  A lû atang chuan Isua ke-ahte a far thla zawih zawiha, chu chu amâ sam sei tak mai chuan a hru mawlh mawlh a.  An titi tui êm avâng chuan midangte chuan Mari lo kal pawh chu an lo hre lêm lova.

          Mahse Mari rimtui rim chu a nam ta rum rum mai si a, mite chuan an hnâr an lên vêl a.  An han envêl chuan Mari thiltih chu an hre ta hlawm a.  Mari’n Isua a hmangaihzia chu a hre ta a ni.

          Isuan Mari thilpêk A lo pawmsak avâng chuan Mari chu a lâwm êm êm a.  Isua chuan, “Mari hian a tih theih tâwk a ti a ni.  Min hmangaihzia hi ropui takin a lantîr ta a nih hi,” a ti a.

          Nangni engtin nge Isua in hmangaihna hi in lantîr vê ang le?  Rimtui leiin kan pe vê thei si lova, Isua chu tûnah vânah a awm daih tawh sî a ni.  Mahse mite hnênah Isua hmangaihna lantîrin, thil kan tihsak ve thei a ni tih kan hrereng dâwn nia!

          Engtin nge Isua kan hmangaihzia kan lantîr ang le?

1.  Inkhâwmnaa thawhlawm thawhin,

2.  Unaute chunga ngilnei leh thatna lantîrin,

3.  Pi leh pûte chunga thatna lantîrin,

4.  Nu leh pâte hnêna hmangaihna thu hrilhin,

5.  Thiante chunga fel taka thiltih leh, kawng dang dangin Isua kan hmangaihna kan lantîr thei a ni.