Zirlai-8

BERAMPUTEN NAUSEN AN ZAWNGHMU

Bible Châng:          Luka 2:8-20.

Zirlai Tum:   Nausen anga Isua chu leia a lo pian vângin Berâmpûte an lâwm êm êma, kei pawh ka lâwm a ni.

Nu leh Pate Tân:   Naupangin in hmangaihna an hriatthiam chiah chuan, an nungchang in chherdiksak thuai thuai zêl mai dâwn a ni.  A thiltih emaw tih loh emaw vânga hlû leh hlu lo an ni lo tih hriattîr la.  Engang pawh lo nise, Isuan A hmangaihin nangni pawhin in hmangaih tih hrilh ang che.  Thil an tihsual pawhin, chu an tihsual chu hneh tûrin nang leh Isuan in tanpui dâwn a ni, in la hmangaihin in la ngaihlu reng tho tih hriattîr ang che.

          Tha lo deuh deuhin in fâte chu ko emaw lam lo ulang, an tihsual tak chu “Hetiang hi chuan ti tawh suh ang che; hetia tih hi a tha lo a nia; hetiangin an ti ngai lo; hetianga hmun tihhnawk hi ka duh lova, tûnah kan tihfai nghâl a ngai a ni” tih ang tea sawi hian naupang chu a inhmu hniâm chuang lovanga, a thiltihdan erawh a tinawn lo mai thei a ni.  A lehlamah fakna pawh an mamawha, mahse anmahni tak fak âiin an `thiltih’ kha fak tûr a ni.  Naupangte hi kan zahthiam hian kan hmangaih tih an inhre thei thîn.  Pathian fâte an niha, mipakhat an nihnaa kan en theih chuan kan tihdânah kan fimkhur deuh mawlh ang le.  “Nu leh pâte hian an fâte hi ngaihtuah finna nei an ni tih hriain, anmahni ngeiin tih an duhdân ang tak chuan an chungah an ti thîn tûr a ni.”  Child Guidance, p. 285.  “Fâte chunga nunrâwng lo tûrin fîmkhur teh u…Hêng thanglaite chunga râwng taka chêtna hian an dam chhûng a nghawng khawlo vek thei a ni.”  p. 216.  “Kan fanaute hi keimahni bungrua, nawm mâka kan tih theih anga an chunga ti tûr kan ni lo tih hi hriatreng tûr a ni.”  Adventist Home, p. 280.  “In fâte chungah tawngkamthâ, thungilnei rawlh rawh u.  Sawisêlna in ngaihtheih loh leh, in beng a verh zar dânte kha hrereng ula, nangni pawhin in tawrh theih loh chu tawrhtîr bîk suh u.”  Child Guidance, p. 217.

Bible Thawnthu

          Zân khuâ chu a thiang nuam hlê maia, arsîte chu an pe chuai mai a ni.  Berampûte chuan ramhnuaiah beramte vêngin an riahchilh a.  Chhûn lamah an thawh hah avângin, zânah chuan meilumte âiin an titiho thîn a.  Thenkhat chuan ramhnuaia riah chu an ning vê hlê tawha, mahni in lama hâwna, khum nuam taka mut vê te an châk hlê a.  Mahse an hâw a la hun sî lova.  Tichuan zânah chuan mahni rilru thil vei zawng zawngte sawiin an titiho a, a châng leh an nui ham ham thîn a ni.

          Chutia an titiho lai chuan Pathian thu-in nausen lo piang tûr a sawi chanchinte leh, a lo pian hun hnâi tawh riaua an hriat thûte an sawi a.  Chutih lai tak chuan berampû pakhat chuan ring takin, “En teh u, en teh û!  Khilai arsî khi a êng bîk lutuk!  Nidangah pawh ka la hmu ngai miah lo!” a ti chûl a.  A thiante chuan a ngaihna an hre lo hlêa, thenkhat phei chuan an hlâu deuh hlek zâwka, an thlîrho thap mai a ni.  Arsi niin an hre deuh sî, vân atanga engdang lo êng niin an hre bawk si a, an hlauh deuh phah a ni.

          Chuvêleh Vantirhkoh pakhat chu an kiangah a lo awm a.  Ani chuan berampute hnênah chuan, “Hlâu suh u, thil tha deuh mai hrilh tûr che u ka nei a nia:  Zaninah hian Bethlehem khuaah chuan in beisei Chhandamtu, Krista chu a lo piang ta a ni!  Tûnah hian kal ulang, ranchawpêkna thlênga nausen mû chu in hmu thei mai ang,” a ti a.  Chumi rual deuh mai chuan Vantirhkoh rual tamtak chu, vân boruakah chuan an lo dingkhat huang maia, hla mawi deuh mai, “Chungnungberah Pathian ropui takin awm rawh se, lei chunga mihring hnênah remthu lêng rawh se” tih hla an rawn sa ta a.  A mawi êm êm maia, berampûte beng chu a tlai hlê a ni.  Tichuan an zai zawh chuan van lam pawh chu a lo thim leh ta a ni.

          Berâmpûte chu an lo tho chhuak hlawma, an inberâwna, “Hawh u, Nausen pianna khua, Bethlehem chu i pan nghâl ang u, chibai kan va bûk dâwn nia,”  an ti a.  An berâmte kalsanin an kal ta nghâl a.

          Bethlehemah chuan an kal ta a, ran in awmna lamah chuan an kal nghâl a.  Ran ina an luh chuan Isua nu leh pâte chu an lo awma, ran chawpêkna thleng chu dim takin an keu dêk dêka, a chhûnga Isua lo mu zân chu an hmua, an hawng  a,  “Hei hi a nih hi mi zawng zawngte nghahhlelh leh beisei êm êm Nausen chu,” an ti a.  Berampute chu an hlim êm êm mai a ni. Vân atanga Pathian Fapa Nausen têa, ranchawpêkna thlenga mû an hmû chu vânnei an inti hlê a, bawkkhupin chibai an bûk a.  An lo hâwn lehna kawnga mi an tawh apiangte hnênah chuan “Israelte lal tûr lo piang, Bethlehem Nausen chu inhmu ve tawh em?” tiin an zâwtin an hrilh nghâl zêl a.  An beram vênna hmun lam an pan lai chuan an hlimin an lâwm êm êm a, Pathian hnênah lâwmthu sawi mawlh mawlh chungin an hâwng leh ta vang vang mai a ni.