Zirlai-9

NAUSEN TÂNA THILPÊKTE

Bible Châng:          Matthaia 2:1-13.

Zirlai Tum:   Mifingte ang khân Isua chibaibûkin, A hnênah thilpêkte kan hlan vê thei a ni.

Nu & Pate Tân:   In khuahkhirh run loh hian in fâten in hmangaihna an hrethiam a.  Naupang tin hi Siamtu hnên atanga thilpêk kan dawn a ni a, nu leh pâte an chhûn vek kher lêm lo a ni.  “Chhûngkuaah mize inang lo tak tak an awmkhâwm thîna, hetianga sûkthlêk inang lo tak tak khawsakho hi Siamtu remtuat dân rêng a ni.  Hei vâng tak hian chhûngkaw member tinin midangte chu an zahin, an chanvo an chantîr theuh tûr a ni…Naupang zawng zawng angkhata en leh, tih theih an ni lova, mipakhat chunga tha kha midang chungah a tha ve kher lo mai thei a ni.”  Child Guidance, p. 205.  Midanglam deuh nih hi sual a ni lo tih hriain, i fâte an danglam deuh pawhin haw lêm suh.  Midang leh nangmah nên pawh khaikhîn fo suh ang che.  An chakna laiah fuihphûr thiam la, an danglamna tak chu hlutpui hlauh zâwk ang che.

          Naupangte an intihhlimna chin tûr leh tih loh tûrah ramri kan kham fel vek thei lovang.  Tluanghrui erawh kan zamsak ngei tûr a ni.

BIBLE THAWNTHU

          Mifingte chuan “Khi arsi danglam deuh khi kan la hmu ngai hauh lo mai, arsi thar a ni khî!  En teh u, khî a kal zêl mai, i zui ang u,” an ti a.  An insiam ta sawk sawka, zin tur chuan an inzui chhuak ta a.  Mihausa tak an nih bawk avângin thil hlu tak takte pawh an keng a ni.  Sanghâwngsei chungah an chuanga; hmanhmawh takin an kal tâ a ni.

          An hmaa arsi êng kal chu an zui zêl a, kawngah te, tlângah te an kala, a tâwpah chuan arsi chu Isua pianna khua Bethlehem chungzâwnah chuan a ding ta a ni.  An han zawng vêla, Isua pianna chu an hre thei ta a, Isua hmêl an hmuh chuan an lâwm êm êm mai a.  Nausen danglam bîk tak a ni tih chu an hre nghâl mai a.  A hmâah an kûna, chibai an bûk ta a ni.

          Isua nû leh pâte chu an hmu a.  Isua tâna thilpêk hlu tak takte chu an pe ta teuh mai a.  Isua nû leh pâte chuan mifingte hnênah chuan lâwmthu an lo hrilh mawlh mawlh bawk a.  Chutianga thilpêkte an hlan zawha, chibaite an bûk zawh chuan anmahni awmna lam panin an hâwng leh ta a ni.

          An hâwnna lam kawng chu thlalêr vaivut tamna lam a ni sî a.  An chuanna sanghâwngsei chuan a pal khu tulh tulh mai a ni.  A chângin tlângah te an lâwna, a chângin kawng pangngai deuhah te an kal zêl a.  An kal pah chuan Isua an hmuh theih avângin lâwm êm êm hian hlâte an sâa, Pathian hnênah lâwmthute pawh an sawi thîn a.  An rilru a hlim êm êm a ni.  Isua an hmuh mai bâkah, A hnênah thilpêk hlu tak takte an pêk theih avâng pawhin an lâwm bawk a.  Isua chu an hmangaih êm êm bawk avângin A hnena thilpêk hlante kha nuam an ti a ni.

          Nangni Isua chu in hmangaih vê em?  Mifingte ang khân Isua hnênah thilpêkte in pe vê phal a ngem le?  In pêk ve duh phawt chuan in pe vê thei a ni.  In inkhâwma, thawhlâwmte in thawhte hian Isua hnênah thilpêk hlu tak chu in pe vê a ni.  Tûnah Isua chu nausên a ni tawh lova, Vânah Lal ropui tak a ni.  Nakinah A lo kal leh dâwna, tûna A hnêna phal deuha thawhlâwmte in pêk chuan A hnênah, Vânah chuan A la hruai vê dâwn che u a ni. Vâna Isua hnêna awm ve in châk em?  Kan châk chuan Isua kan hmangaih anga, phal takin A hnênah thilpêkte kan pê thîn dâwn nia!