2024 4th Quarter Zirlai 1-na

Zirlâi 1                                               September 28–October 4

Kawng Min Kawhhmuhtu Chhinchhiahnate

Sabbath Chawhnu                                            

Chhiar tûrte: Joh. 2:1–11; Joh. 4:46–54; Joh. 5:1–16; Marka 3:22, 23; Mat. 12:9–14;Joh. 5:16–47.

Chângvawn: “Tin, Isuan zirtîrte hmaah chuan chhinchhiahna dang tam tak a ti \euh a, chûng chu he lehkhabu-ah hian ziak a ni lo; nimahsela, hêng hi Isua chu Krista, Pathian Fapa a ni tih in rinna tûr leh, in rina a hminga nun in neihna tûrin ziak a ni” (Johana 20:30, 31).

Johanan a Chanchin |ha bu a ziah chhan hi eng nge ni ang  le? Isua thilmak tihte hi uar deuh taka târ lân a duh vâng em ni? Nge ni a, Isua zirtîrna thu \henkhat hi min hriattîr a duh vâng zâwk ni ang?

Johana hian Thlarau Thianghlim thiltihtheihna leh uapna chang chungin a Chanchin |ha bu a ziah chhan a lo sawi a. Krista chanchin hi a dang tam tak pawh ziah tûr la awm \euh tho mah se (Joh. 21:25), hêng a lehkhabua a ziah lan chin zawng hi Isua chu Krista, Pathian Fapa a ni tih kan rinna tûr leh, kan rina a hminga nun kan lo neihna tûra ziak a nih thu a sawi (Joh. 20:31).

Tûn kârah hian Chanchin |ha Johana ziaka kan hmuh Isua thilmak tih hmasakhote kan thlîr dâwn a. Chûngte chu inneihnaa a kal \uma tui uain-a chantîr te, mi tu emaw fapa pakhat dam lo a tih damsak  te, Bethesda dîl kama mu reng \hîn zeng pakhat a tih dam te a ni ang.

Johana chuan hêng thilmakte hi “chhinchhiahnate” tiin a sawi \hîn a. Mahse, chhinchhiahna a tih hian a sawi tum chu kawtthlêr leh khawi emaw lâia chhinchhiahna intâr kan hmuh ang hi ni loin, Isua chu Messia a ni tih lantîrtu thil thleng mak tak takte a ni zâwk. Hêng thil thleng hrang hrangahte hian rinnaa Isua chhâng lêttu mi hrang hrang kan hmu a. Tin, hêng mite hian an tih anga ti ve tûrin min sâwm nghâl bawk a ni.

Sunday                                                           September 29

Kana khuaa inneihna

Johana 2:1–11 chhiar la. Kana khuaa Isuan chhinchhiahna a tih chu eng nge ni a, chu chhinchhiahna chuan engtin nge amah ring thei tûrin a zirtîrte a \anpui?

Zirtîrten Isuan tui uaina a chantîr lâi an han hmuh chuan amah zui duhna rilru an lo pu ta a. He a thilmak tih hi Pathian laka mi, Pathianin a tirh ngei a ni tih ti langtu chhinchhiahna ropui tak a ni lo thei dâwn em ni? (Hemi hma hi chuan Pathian a ni tih hre thiam tûrin an la inpeih chiah lo a ni maithei.)

Mosia kha Israel-te hruaitu ropui, “chhinchhiahna leh thilmak” tam tak hmanga Aigupta rama tâng mêk Israel fate hruai chhuaktu a ni a (Deut. 6:22, Deut. 26:8). Ani kha Aigupta mite sal nihna lak a\anga Israel hnam chhuah zalên tûra Pathian mi hman a nih avângin an “chhandamtu” a ni pawh kan ti thei ang.

Pathian chuan Mosia kal tlang khân amah Mosia ang bawk zâwlnei dang an lo la chhuah tûr thu a lo sawi lâwk a. Israel-te kha chu mi thu chu lo zâwm tûrin a chah nghâl bawk (Deut. 18:15, Mat. 17:5, Tirh. 7:37). Chu “zâwlnei” chu Isua hi a ni. Tin, Johana 2-ah hian Isuan a chhinchhiahna hmasa ber chu a ti a, chu chu Aigupta ram a\anga Israel fate hruai chhuah an nihna hriat chhuahtîrtu atâna tih a ni nghâl nghe nghe bawk.

Nile lui khu Aigupta mite nunna hnâr ber niin, an pathiante zînga pakhat a ni bawk a. Exodus lâia hremna rawn tla pakhat pawh khân he lui hi rawn bitumin, a tui zawng zawngte chu thisenah a lo chang ta vek mai a nih kha. Hetiang deuh hlek thilmak tak hi Kana khuaah hian Isuan a rawn ti ve leh a; mahse, hemi \uma thil thleng hi chu tui thisena chantîr ni loin, tui uain-a chantîr a ni ve thung.

Uain-a a chantîr tûr tuite hi Juda-ten sakhaw thila insilna atâna an hman \hin lunga siam tui bêl parukin an rawn la a. Hei hian hemi \uma a thilmak tih hi Bible-a kan hmuh chhandamna thupuite nên an inzawm hnaihzia a ti lang nghâl bawk. Johanan tui uain-a chantîr a nih dân a lo ziak leh, chu thilmak tak thleng chu Aigupta ram a\anga Israel-te chhanchhuah a nihna nên a sawi zawm hian Isua chu kan Chhandamtu a nihzia min hriattîr a tum a ni. 

Ruai\heh fatu-in Isuan tui uain-a a chantîr tâkte chu a lo hmuh khân engtin nge ni a tih? Isua thilmak tih avânga lo awm a ni tih a hre si lo a, a fîr \hatzia leh a thlum tuizia a hmuhin mo neitute chhûng chuan “a tâwpah tih \awk a awm” tih ang deuh khân, an uain lo buatsaih sa zînga a \ha ber chu a tâwpa in atân an lo khêk emaw a ti a nih kha.

Grik \awnga uain sawina thumal, oinos tih hi grape rah tui sâwr (um \awk loh) leh a rah um \awk a\anga tui lo chhuak sawina atân hman a ni ve ve a (The Seventh-day Adventist Bible Dictionary, p. 1177 en ang che). Ellen G. White-i chuan hemi \uma Isuan a tih pun uain hi chu zu (alcohol) tel lo a ni a ti (Chatuan Nghahfâk, p. 146,“Kana Khuaa Inneihnaah” tih chhiar ang che). Eng pawh ni se, hemi \uma thil thleng hmutute hian an thil hmuh chu mak an ti hle a ni tih hnial rual a ni lo. 

Isua zui chhan tûr i neihte chu engte nge ni? (thil tam tak pêk kan ni a ni lo’m ni?)

Thawh|anni                                                           September 30

Galili rama chhinchhiahna a tih chu

Isua hian leia rawng a bâwl chhûng khân miten amah an lo rin theihna tûrin thil mak chi hrang hrang tam tak a ti a. Chûng a thilmak tihte Johanan a lo ziah chhan chu a lehkhabu chhiartute pawhin Isua an la rin phah ve a beisei vâng a ni.

Johana 4:46–54 chhiar la. Enga ti nge Johana hian hemi \uma Isua thilmak tih hi a thilmak tih hmasak zâwk, inneihnaa a tih nên khân a sawi zawm?

Johanan Galili rama Isua chhinchiahna tih pahnihna chanchin a sawinaah hian Kana khuaa inneihnaa chhinchhiahna a lo tih tawh kha a sawi chhuak leh zauh a, a chhan pawh Isuan chhinchhiahna a tihte hian amah chu tu nge a ni tih hre tûra anmahni a \anpui theih a rin vâng a ni ang. A hnu-ah pawh heti hian a sawi ta rêng bawk a: “Hei hi Isuan Judai ram a\anga Galili a lo kala chhinchhiahna a tih pahnihna a ni” tiin (Joh. 4:54, NKJV).

Isuan a fapa tih damsak beiseia a hnên rawn pantu upa pakhat a lo chhân dân hi a bung angreng hle mai. Mahse, he upa hian Isuan a fapa a ti dam a nih chauhin Isua rin a tum si a. Chu a rilru put dân chu Isuan a lo hriatin thlarau lama a dam lohna chu a fapa-in thihpui khawp hial natna a vei mêk âia hlauhawm zâwk daih a nih thu a hrilh ta a ni. Chu thu a han hriat chuan vân a\anga \êk rawn tla de zawk ang mai hian a natna vei chu a hlauhawm hle a ni tih a lo hre chhuak ta a. Thlarau lama a pachhiatna chuan ama fapa ngei nunna a lo lâksak hman \helh a ni. 

Isua thilmak tihte hian anmahni ngau ngau ngawt chuan Isua hi Messia a ni tih a finfiah chuang hran lo a. Amah lo mi dangte pawhin thilmak ropui tak tak an ti ve tho. Chûng thilmak titu \henkhatte chu zâwlnei dik tak an ni a, \henkhat erawh zâwlnei der an ni thung. Thilmakte hi chuan mihringte âia thil ti thei zâwk (thlarau khawvêl) an awm a ni tih a ti lang a ni ve mai a; mahse, thilmak a nih avâng ringawtin a titu chu Pathian a ni e tihna a ni chuang lo. (“Thilmak” tih \awngkam hi mihringte âia thil ti thei zâwk engin emaw a rawn tih tihna anga kan ngâi dâwn a nih chuan Setana pawhin chutiang thilmakte chu a ti ve thei tho tih kan hriat a \ha ang.) 

He upa hi rilru hah leh hrehawm ti tak chungin Isua zahngaihna hnuaiah a tlu lût a, a fapa chu ti dam ngei tûrin a ngên a. Isuan a lo chhân dân hi a va han thlamuanthlâk dâwn tak. “Va haw leh rawh; i fapa chu a dam dâwn alâwm” (Joh. 4:50, ESV) tiin a lo hrilh a. Isua \awngkam hman, “dam dâwn alâwm” tih hi a \awng bul lamah (Grik) chuan present tense a ni a. Isuan a hman dân erawh hi chu “futuristic present” niin, nakina thil lo la thleng tûr chu a lo thleng ngei dâwn a ni tih kan hriat avânga thleng tawh reng anga kan lo sawi ang hi a ni. Mahse, he pa hi a haw nghâl mai chuang lo; Isua thu sawi hi a ring hle ni tûr a ni, a tûkah a haw ta chauh a—Isuan a dam tûr thu a hrilh hun vêlah chiah chiah hian a fapa khawsik chu a reh ta tih pawh a hre ta nghe nghe bawk.

Isua rinna chhan tûr a va nei \ha tehrêng kher êm!

Tûn lâi hian thilmak ti thei nia inchhâl apui an tam khawp mai. Chûng mite thilmak tih chu lo hmu ve ta ila, Pathian laka chhuak a nih leh nih loh kan lo hriat theih nân eng tehfung nge kan hman ang?

Thawhlehni                                                    October 1

Bethesda dîla thilmak tih

Johanan Isua thilmak tih pathumna a lo chhinchhiah hi Bethesda dîla thleng a ni a (Joh. 5:1–9). An sawi dân chuan, he dîl tui hi vântirhkohin a rawn tifâwn \hîn a, a fâwn lâi taka dam lo zuang thla hmasa ber chu a lo dam \hîn a ni an ti. Chuvâng chuan, he dîl hulhliap pangaahte hian tui a lo fâwn ve leha zuan thlâk tum dam lo eng emaw zât an mu tlar dul \hîn a ni âwm e. Ni khat chu hemi hmunah hian Isua a rawn kal ve a, damna beiseia lo mute chu a han thlîr kual a.

Chutianga dam lo chi hrang hrang lo mu tlar dul mai chu a hmuhnawm letling phian maithei! An zînga \henkhat hi chu an na hle ang tih a chiang a. Tui rawn fâwn hun chu an lo nghâk thleng zo dâwn em tih pawh hre loin an lo sakuh sêr nghah ve tawp mai a ni ber. Chu tak chu Isua tân Messia a nihzia tih lanna remchâng tak a ni thung a.

Johana 5:1–9 chhiar la. Dîl hulhliapa mute hi dam duha mu vek an ni tih a chiang a. Mahse, enga ti nge Isua hian he zeng chiah hi tih dam a duh leh duh loh a zawh bîk le?

Mi tu emaw, a kum a kum teh meuh khum beta na tawh hriat i nei em? Chutiang mite tân chuan dam loh hi thil nihphung pângngâi ve rêng a ni tawh a, an natna khum leh enkawlna hmun han chhuahsan pawh thil tih phûrawm loh tak a ni letling zâwk tlat thei. He pa hian Isua a lo chhân dânah dam chu a duh hle a ni tih a hriat theih a. A tih fuh tâwk loh erawh damna chu a zawn lohna tûr hmuna a zawng hi a ni. A ke siamtu ngei chu tûnah hian a bul maiah a ding reng a. Mahse, amah rawn betu chu tu nge ni tih rêng a hre si lo. Damna a chan tâk hnu-ah erawh Isua a ni tih a hre chhuak leh hnuhnawh a. Mi namai a lo ni rêng rêng lo tih a hre ta.

“Isua khân he dam lo hi amah ring tûrin a hrilh hran lêm lo a. ‘Tho la, i khum la la, ke-in kal tawh rawh’ a ti mai chauh a ni. Nimahsela, a thu sawi chu he dam lo hian a ring a. A hriatna thazâm tin leh tihrâwl zawng zawng chuan nunna thar leh chakna thar an lo nei ta nghâl a, a ke zeng khawng vek tawh pawh chu chak \ha takin a lo che leh thei ta a ni. Rinhlelhna eng mah nei loin Krista thu sawi chu a âwih a, a tihrâwl zawng zawng pawh a lo ti che leh thei ta. A zuang tho nghâl a, a awm hle hle thei tawh lo. . . . Isua hian a hnênah Pathian a nihna anga \anpuina chu pêk a tiam hran lo a. He dam lo hian Isua thu sawi kha ringhlelin, ti tûra a hrilh pawh kha a duh chuan a ti lo thei reng bawk; chutianga a ti lo a nih chuan damna a chan tâk pawh hi a chang lo maithei nghe nghe. Mahse, Isua thu sawi chu a ring a, a sawi ang chu ring ni mai loin a zâwm bawk a; tichuan, chakna a lo nei ta nghâl a ni.”—Ellen G. White, Chatuan Nghahfâk, pp. 211, 212.

Isua leh he pa hi Pathian biak inah an inhmu leh nawlh mai a. Chumi \um chuan Isuan, “I dam tawh bawk a, thil sual ti tawh suh aw, a nih loh chuan thil \ha lo leh zual i chungah a lo thleng palh ang e” tiin a hrilh a (Joh. 5:14, NKJV). Dam lohna leh sual hi eng nge ni a inzawmna awm? Enga ti nge dam lohna zawng zawng hi thil sual eng emaw kan tih vânga lo thleng vek a ni hran lo tih hi kan hriat thiam a pawimawh?

Nilaini                                                                   October 2

Thinlung sakte

Chhinchhiahna te, thilmak te hian anmahni ngau ngau chuan Pathian a\anga lo thleng an ni tih an finfiah hran chuang lo a. Kawng leh lamah, Pathian laka chhuak an ni a nih erawh chuan lo hnâwl kha thil hlauhawm tak a ni thung dâwn si a ni.

Johana 5:10–16 chhiar la. Sakhaw hruaituten Isua laka thinlung sak tak an pu tlat reng mai leh, Isua thilmak tih zawh chiah pawh an ring ve duh tlat lo hi a mak ngawt mai! Heta \ang hian zirlâi pawimawh tak zir chhuah tûr eng nge kan neih awm le?

Isuan a tih dam tâk chiaha hnêna tu nge a nih a sawi hnu hian a tih dama chuan sakhaw hruaitute hnênah amah ti damtu chu Isua a nih thu a sawi a. Chu thu an lo hriat chuan lâwm hle âwm an nih vei nân, an lâwm hauh lo. Lâwm ahnehin Isua chu an tiduhdah ta hlauh zâwk a, chûng thilte chu Sabbath nia ti a nih avângin tih hlum an tum ta hial nghe nghe a ni (Joh. 5:16, NKJV).

Sabbath nia dam lo tih dam, enkawl dam hi rîkrûm thilah chauh phal a ni a. Mahse, he zeng hi chu kum 38 teh meuh mai lo sil-awng tawh a ni a; chuvâng chuan, tih dam a lo ni ta pawh hi rîkrûm thil vâng chu a ni thei lo. Chu bâkah chuan, Isua hian a mutbu têla pu tûrin a hrilh kher bawk a. Hei pawh hi eng emaw a \ûlna awm le? Pathian a\anga lo chhuak thiltihtheihna hmanga hetiang thilmak ropui tak hi titu chuan Sabbath nia mutbu put haw hi phal a nih leh nih loh hre âwm tak a ni a. Thil chiang tak chu, Isua hian mihringte siam chawp dân leh dûn chi hrang hrang, rinna dik tak hliah fotute âia pawimawh zâwk Bible-in a sawi thutakte chu hriattîr a tum a ni.

Hêng thil thleng hrang hrang kan hmuhte hian finfiahna chiang leh \ha tak tak a awm \euh chunga thlarau lama mi a ngawng theihzia engtin nge min hrilh? (Joh. 9:1–16; Marka 3:22, 23; Mat. 12:9–14).

Engtin nge hêng sakhaw hruaitute hi thlarau lamah an mit a del hneh êm êm theih zâwk le? A chhan chu, an thinlung bawlhhlawh vâng te, Messia chungchângah ngaih dân dik lo tak neiin, Messia chuan Rom sawrkâr lakah a rawn chhanchhuak dâwn nia an rin avâng te leh thuneihna thlahlel hle si, Pathian hnêna inpêk erawh an tum miah si loh avâng te a ni. Hêng zawng zawng hian thutak chu pawm loh tum sa tlatna rilru a puttîr a, an hmaa ding reng Messia pawh chu an lo hnâwl fel ta dêr mai a ni.

Johana 5:38–42 chhiar la. Isuan vaukhânna thu a sawi chu eng nge ni? Hêng thute a\ang hian kan tân zirlâi zir chhuah theih a awm em? A awmzia chu, keimahni-ah hian kan hriat tûr leh kan nunpui tûr thutakte kan hriat theih lohna tûra kan mit min tih delsak thei eng thil nge awm?

Ningani                                                                October 3

Isuan nia a inchhâlte

Bethesda dîla Isua thilmak tih khân, Johana tân Isua nihna sawi chhuahna remchâng \ha tak a siamsak a. Kha thilmak chungchâng sawi nân khân châng kua chauh hmangin, kha thilmak titu chanchin sawina atân erawh châng 40 zet a hmang thung.

Johana 5:16–18 chhiar la. Sakhaw hruaituten Sabbath nia mi a tih dam avânga an tiduhdah ta mai hi eng nge ni a chhan?

Johana 5:18 hi a awmzia hriat thiam a harsat theihna lâi a awm a, a chhan pawh Isua hian Sabbath a bawhchhia nia ngaih theih a nih ve tho vâng a ni. Amaherawhchu, Johana 5:16–18 hi chîk takin han chhiar ila, Sabbath nia hna a thawh hian a Pa nêna an inlaichînna chu a châwisâng zâwk a ni tih a sawi a. Chuvâng chuan, Sabbath nia Isua thil tih pawh hi Pathian a ni tih a inchhâlna kawng khat a ni rêng bawk. Sakhaw hotuten an tihduhdah chhan hi Sabbath bawhchhia nia an ngaih vâng a ni a; tin, Pathian nên intluk reng nia a inchhâl vâng pawh a ni bawk.

Johana 5:19–47 chhiar la. Sakhaw hotuten tu nge a nih tih an lo hriatna atâna thil a sawi chu eng nge ni? A thilmak tih zawh chiah khân a thil sawi hi a dik a ni tih engtin nge a rawn nemngheh nghâl bawk?

Isua hian a thil tihte chu a dik a ni tih tih lan nân thil pathum a ti a. A hmasa ber chu, Pa nêna inzawmna \ha tak an neih dân a sawi fiah hi a ni (Joh. 5:19–30). Amah leh a Pa hian inlungrual takin thil an ti dûn zêl a; chuvâng chuan, Isua hian a Pa-in a neih ang, mite thiam chantîr emaw, thiam loh chantîr emaw chungchâng mai bâkah, mitthi kaihthawh chungchângah thlengin thu a nei ve a ni (Joh. 5:25–30).

Pahnihna chu, Isua hian a nihna a sawi chu a dik ngei a ni tih ti chiang tûrin “thuhretu” pali a ruai a. Chûngte chu Baptistu Johana te (Joh. 5:31–35), ama thilmak tih te (Joh. 5:36), Pa te (Joh. 5:37, 38) leh Pathian Lehkha Thu (Joh. 5:39) te niin, hêng “thuhretu” hrang hrangte hian amah \an zâwngin thil an sawi \heuh bawk.

A tâwp berah chuan, Isua hian an thil tih leh anmahni’n mahni hmasial taka thil an lo tih \hin dân chu a inan lohzia sawiin, Pathian sawichhiaa puhtute chu thiam loh chang tûr zâwk an ni tih a hriattîr a (Joh. 5:40–47). Thiam loh chang tlâk an nihzia hrilhtu tûr pawh an beiseina siamsaktu ber Mosia a ni nghe nghe leh nghâl (Joh. 5:45–47).

Pathian ring ve tho si, thurin dik pawh nei, mahse, Krista hnêna inpe pumhlûm duh si lohna thanga kan awh ve loh nân engtin nge kan invên theih ang? I chhânna neih chu in class-ah i sawi dâwn nia.

Zirtâwpni                                                           October 4

Zir belhna: “Isuan a [zeng a tih dam tâk] hnênah hian Pathian a nihna anga \anpuina pêk a tiam hran lo. He dam lo hian Isua thu sawi kha ringhlelin, ti tûra a hrilh pawh kha a duh chuan a ti lo thei reng a, chutianga a ti lo a nih chuan damna a chan tâk pawh hi a chang lo maithei nghe nghe. Mahse, Isua thu sawi chu a ring a, a sawi ang chu ring ni mai loin a zâwm bawk a; tichuan, chakna a lo nei ta nghâl a ni.

“A rinna ang hi keini pawhin kan nei ve a nih phawt chuan thlarau lam damna kan lo chang ve thei reng mai. Sual avângin Pathian lak ata tih hran kan lo ni tawh a. Kan thlarau nun pawh zeng hri man ang mai a ni. Keimahni ngawt chuan zeng kal thei lo ang chiah hian nun thianghlim kan nei thei lo. . . . Hêng mi lungngâi leh beidawng, harsatna tâwka tâl buai mêkte hi dâk chhuak rawh se. Chhandamtu chuan a thisena a lei tawhte chu anmahni lainat leh hmangaih êm êm chungin, ‘Tih dam i duh em?’ tiin a rawn zâwt a. Hrisêl tak leh thlamuang taka rawn tho chhuak tûrin a sâwm che a ni. I dam hmasak phawt hun nghâk suh. A thu sawi chu ring mai la, a sawi chu a takin a lo thleng ngei dâwn. Krista lamah i thinlung pe la. Ama rawngbâwl thlang la, a thu ang zêla thil i ti a nih phawt chuan chakna i dawng ngei ang. I thil sual lo tih tawhte chu eng pawh ni se, i châkna sualte chuan rei tak chhûng i thlarau leh i taksa a lo phuar bet tawh pawh a ni maithei. Mahse, chûngte lak a\ang chuan Kristan a chhanchhuak thei che a, a chhanchhuak thei che mai pawh ni loin, a chhanchhuak châk zâwk che a ni. Ani chuan bawhchhiatnate leh sualte avânga thi ni tawhte hnênah nunna a pe leh dâwn a. Ephesi 2:1. Chak lohna leh vânduaina, sual khâidiatten an phuar behte chu a chhuah zalên dâwn a ni.”—Ellen G. White, Chatuan Nghahfâk, p. 212.

“Isua hian Pathian sawichhia nia an puhna chu a hnial thla vek a. ‘Pathian sawichhia nia min puh chhan ka thil tihte kha ka tih theih chhan chu Pathian Fapa ka nih miau vâng niin, ka Pa nên chuan nihpung leh duhzâwng leh thiltumahte pumkhat kan ni’ a ti.”—Chatuan Nghahfâk, p.219.

Sawi ho tûrte:

1. Tûn kâr zirlâi hi ngun takin han ngaihtuah lêt leh la. Hêng damna lo chang taten damna an chan theih chhan bulpui ber chu Isua an rinna kha a ni. Chutih lâiin, sakhaw hotute erawh chuan Isua hi ringhlelin a thu sawite pawh an âwihsak miah lo ve thung a. Enga ti nge zawhna neih (chu chu tu paw’n kan nei \heuh a) leh rinhlehna neih tih hi thil thuhmun a ni lo tih kan hriat a pawimawh? Enga ti nge a inan loh dân hi kan hriat thiam a \ûl bawk?

2. Ningani zirlâia zawhna hnuhnûng ber kha chhiar leh la. Enga ti nge he thil hlauhawm tak lakah hian Seventh-day Adventist-te hi kan fîmkhur a ngaih? Entîr nân, Sabbath ni hriat leh chumi serh chu pawimawh êm êm tho mah se, tin, kan thih hnua kan awm zui tâk dân dik tak hriat pawh hi thil \ûl tak ni bawk mah se—enga ti nge hêng thu dikte hian min chhandam theih si loh? Engin nge min chhandam a, chu chuan engtiangin nge min chhandam? 3. Johana 5:47 hi ngun takin chhiar la. Entîr nân, tûnlaia mi \henkhat, Nova hun lâia tui lêt kha khawvêl pum chîm vektu a nih ring lotute emaw, ni ruk chhûngin khawvêl leh a chhûnga thil awmte hi siam a ni tih ring lotute emaw hian engtin nge Isuan vaukhânna a pêk sakhaw hruaitute thil tih ang tho kha an tih ve le?