Pu Lalhlimpuia Colney leh Pi Thankim Colney-te Pension Thlahna Hun Hman A Ni

Vawiin, February 29, 2024 khan, Mizo Conference Committee Room-ah, hun rei tak Mizo Conference Department Director hna lo thawk tawh, Pi Thankimi Colney leh Pu Lalhlimpuia Colney-te pension thlahna hun hman a ni. Pension thlahna inkhawm hi Pu Lalmuansanga Khiangte chuan kaihruaiin, Pastor Biakzidinga Renthlei, Mizo Conference President chuan thlahna thuchah leh an puala tawngtaina urhsun a hmang a. Mizo Conference tana an hun leh tha an lo hman tawhna zawng zawngah lawmthu a hrilh a. Ngaihruihna citation a hlan nghal bawk a ni.

Upa Lalbiakdika Ralte chuan an service record chhiar chhuahna neiin Mizo Conference ten pension-te hnena an pek thin hamthatna hrang hrangte a hlan nghal bawk a. Pi Thankimi Colney hi June 9, 1984 atangin kohhranah a thawk tan a. Typist hna te, office secretary hna te leh Helen Lowry School-ah zirtirtu hna te a thawh hnuin Mizo Conference-ah Director niturin a lut leh a. Childrens Ministries, Womens Ministries leh Health Department enkawltu hnate a thawk thin a. Mission-ah hian kum 40 zet service a nei a. Tunah hian, Mizo Conference-ah hnathawktu service chhiara senior ber niin a pension a ni. Pi Thankimi Colney chuan thu sawiin Mission hnaa a luh tluka nuam tih a neih loh thu leh hna a thawh chhunga vuina a neih loh ziate leh Pathian enkawlna zawng zawngah a lawm zia thu a sawi a. An hun laiin sawrkar hna thawh tur tam tak awm mahse, a nu leh paten kohhran hna thawk tura an fuih avanga kohhrana hnathawh thlang ta zawk a nih dante a sawi a. A nu leh pa thu a awih avanga a inchhir loh zia leh a lawm zawk zia a sawi a ni.

Pu Lalhlimpuia Colney hi February 1, 1991 atangin kohhranah a thawk a. Adventist English School Champhai (Eastern Flower Academy ni ta) ah-te leh Helen Lowry School-ah te Headmaster hna a thawh hnuin Mizo Conference-ah Director hna a thawk a. Health Department, Global Mission leh Education Department-te a enkawl bakah Mizo Conference Building enkawltu hna a thawk thin a. Kum 33 zet kohhranah hian a thawk a ni. Pu Lalhlimpuia Colney chuan thusawiin an naupan laia Armed Veng mawng atanga Helen Lowry a sikul an kal thin dante ngaihtuah chuan vawiin ni a Lalpa hruaina-ah a lawm zia te a sawi a. A nu leh paten kohhran hnathawk tura an duhsak thin zia a sawi a. A nu leh pate duh ang ngeiin an unau zinga pali zet ten kohhranah hna an thawk a. A unaute hian Pastor, zirtirtu leh Press Manager hnate an thawk a ni.

Mizo Conference Office Staff Social Committee Chairman Pastor R. Lalramnghaka chuan Committee aiawhin ngaihhruihna thil pek a hlan a. Tin, an hnathawh pui mimal hrang hrang-ten ngaihhruihna thilpek an hlan bawk a. An thawhpuite hian an ui zia leh, an ngaih tur zia sawiin; mi inngaitlawm leh an hnaa inpe em em mai an nih thute an sawi hlawm a. Tin, hun an vawn dik thin ziate, an office kal an tlai ngai loh ziate an sawi a. Tu-te tan pawh fiam ngam khawpa mi inngaitlawm, mite ber atanga a lian ber thlenga ang khata midangte en thiam an nih zia a thawhpuite hian an sawi hlawm a ni. Pu Lalhlimpuia Colney-te chhungkua hian Mizo Conference Office ten an worship-naa an hman turin Guitar tha tak an present nghe nghe a ni.