2025 1st Quarter Zirlai 1-na

Zirlâi 1 December 28–January 3

Pathian Chuan Ama Duh Thu Rêngin A Hmangaih

Sabbath Chawhnu

Chhiar tûrte: Exod. 33:15–22; Hosea 14:1–4; Thup. 4:11; Joh. 17:24; Mat. 22:1–14; Joh. 10:17, 18.

Châng vawn: “An hnungtawlhna hi ka ti dam ang a, an lak atanga ka thinrimna chu a kian tâk avângin, anni chu ka hmangaih hrim hrim dâwn a ni” (Hosea 14:4).

Petera khân, Isua’n a lo sawi lâwk ang ngeiin, vawi thum ngawt mai Isua a phat a; mahse, hêng a phatnate hi thawnthu tâwpna chu a ni lo thung. Khatia thlân atanga Isua a lo thawh leh hnu khân heti hian Petera hnênah a zâwt a: “Hêngte âi hian nangin kei mi hmangaih zâwk em?” tiin. Petera chuan, “Aw, Lalpa; ka ngaina che tih i hria e” tiin a chhâng a. Tichuan, Isua’n “Ka berâm note-te châwm rawh” tiin a hrilh a. Chumi hnu chuan, Isua’n, “Nangin kei mi hmangaih em?” tiin a zâwt leh a. Petera chuan, “Aw, Lalpa; ka ngaina che tih i hria e” ti bawkin a chhâng leh a. Tichuan, Isua’n, “Ka berâmte enkawl rawh” tiin a hrilh leh a. Chumi hnu chuan, Isua’n a vawi thumna atân, “Nangin kei mi ngaina em?” tiin a zâwt leh a. Chutia vawi thum ngawt mai, “Mi hmangaih em?” a tih avâng chuan Petera hi a lungngâi ta hle mai a. “Lalpa, eng kim i hre vek alâwm, ka ngaina che tih i hria e” tiin a chhâng leh a. Tichuan, Isua’n a hnênah, “Ka berâmte châwm rawh” tih tho kha a sawi leh a. Petera hian vawi thum ngawt Isua a lo phat tawh a, chutiang chiah chuan Isua hian zawhna pawimawh tak, “Nangin kei mi hmangaih em?” tih zawhna hmangin Petera hi vawi thum ngawt a pawm nawn ta a ni.

Kan thil tawn chu Petera thil tawn nên hian a inang lo viau pawh a ni maithei e, a nihphung erawh a inanna lâi a tam hle thovin a rinawm. A awmzia chu, Isua’n Petera hnêna zawhna a zawh hi keimahni hun tawn leh awmna hmun zêla Pathianin mi tinte min zawh theuh a ni a, chu chu, Nangin kei mi hmangaih em? tih hi a ni.

Eng kim hi he zawhna kan lo chhân dânah a innghat vek bawk.

Sunday December 29

Kan beisei phâk loh

Pathian chuan, “Nangin kei mi hmangaih em?” tiin min zâwt a ni mai lo a, amah Pathian hian mi tin hi min hmangaih theuh a, min hmangaih dân pawh ama duh thu rêng a ni bawk. Ani chuan ama duh thu rêngin, keini’n kan lo suangtuah thiam phâk bâka thûk daih lehnghâlin nang leh kei leh mi dang zawng zawng pawh min hmangaih theuh a. Min hmangaihna chu a mite chanchina thil a lo tih tawh dân atangte khân kan hre thei a ni.

Exodus 33:15–22 chhiar la, hêng chângte hian eng chungchâng nge an sawi tih ngun takin ngaihtuah ang che. He lâi thu, a bîk takin, châng 19 hian engtin nge Pathian ruahmanna leh hmangaihna chu a puan chhuah?

Eng kim chu a tâwp ta vek niin a lang. Pathianin mak tak maia Aigupta mite bâwih nihna ata a chhanchhuah hnu rei vak loah khân Israel mite chu Pathian lakah helin, rangkachaka siam bâwng no lim chu chibai an bûk ta mai a. An thil tih chu tlâng atanga lo chhuk Mosia’n rawn hmu-in a thinrim lutuk chuan, Thu Sâwm Pêk ziahna lung phêk pahnih a ken chu a paih keh ta vek mai a ni. Israel mite hian Pathianin a thlâwna a chantîr thuthlung avânga hamthatnate leh malsâwmnate chu chân ta vek mah se, Pathian erawh chuan, ama duh thu rêngin thuthlunga inlaichînna neihpui chhunzawm zêl a la thlang tho a—thuthlungin a ken tel malsâwmnate chu dawn chhunzawm phu tawh miah lo mah se, la pêk zui zêl a tum tlat a ni.

Exodus 33:19 thu, “Ka khawngaih apiang chu ka khawngaih ang a, zah ka ngaihna chung apiangah chuan zah ka ngâi ang?” tih hi Pathianin mi tute emaw chunga khawngaihna leh zahngaihna lantîr bîk a tumna leh mi dangte erawh ngaihsak loh a tumna anga ngaih a ni fo a. Amaherawhchu, a hma lam thute kan en chuan, Pathian hian mi thenkhat chungah zahngaihna leh khawngaihna a lantîr ang a, mi thenkhat dang chungah erawh a lantîr ve dâwn lo tih lam a sawi lo tih kan hre thei ang. Chutiang chu Pathian thil tih dân a ni lo hrim hrim a, mi thenkhat zirtîr dân, mi thenkhat chu boral tûr leh chatuana thiam loh chantîrna hmachhawn tûrin Pathianin a lo ruat lâwk vek tawh tih hi chu Pathian hna thawh dân phung kalh tlat a ni zâwk a ni.

Chuti a nih chuan, hemi chânga Pathianin a sawi hi eng chungchâng nge ni? Pathian chuan eng kim Siamtu a nihna angin a phu lo ber berte chungah pawh ama duh thu rênga khawngaihna leh zahngaihna lantîr tûrin dikna leh thu neihna a nei tih a puang a. Chutiang chuan hemi tum, a lakah hela rangkachaka siam bâwng no lim chibai an bûk hnu pawh hian tiin, khawngaih phu hauh lo mah se, an chungah khawngaihna a lantîr ta tho a ni.

Hei hi mihringte beisei dân ang ni lo leh âwm ang lo lutuk an tih tûr ang hiala Pathianin a hmangaihna a lantîr thinzia kan hmuh tam tak zînga pakhat a ni a. Kan zavâi tân chanchin lâwmawm a ni ti r’u maw?

Engtiangin nge Pathian hian i lo rin dân ang ni lo leh beisei loh dân deuhin i chungah a hmangaihna a lo lantîr ve tawh le?

ThawhTanni December 30

Chhân lêt loh hmangaihna

Pathianin suala tlu tawh mihringte a hmangaih dân mak tak mai chu Hosea chanchinah kan hmu a. Zâwlnei Hosea hnênah hian, “Kal la, nupuiah nawhchizuar nei la, nawhchizuar lakah chuan fa nei rawh; chutiang chuan ka mite hian min kalsan a, min uiresan ta a ni” (Hos. 1:2) tiin a hrilh a. Hosea leh uire chîng tak a nupui chanchin hi Pathianin a mite a hmangaihzia târ lanna a ni. Pathian chuan Israel mite kha a lakah rinawm loin Pathian dang neihsan fo mah sela, a la hmangaih reng tho a. Hosea te nupa chanchin hian Pathianin a phu miah lote chunga a thlâwna a hmangaihna a lantîr thin dân a pho lang chiang hle.

Pathian chu rinawmin hmangaihna pawh ngah hle mah se, Israel mite kha a lakah an hel fo thung a. Chutiang chu a nih avângin Pathian Lehkhabu hian Pathian chu nupui rinawm lo tak hmangaih tlattu ni angin a sawi fo rêng a ni. A mite chu tha famkim tak leh rinawm takin a hmangaih a, chutih lâiin, anni erawh kha chuan hmusit takin a hmangaihna an hnâwlsak thîn a, pathian dangte rawngbâwlin chibai an bûksan fo a, amah ti lungngâiin an inlaichînna pawh siam that leh theiha mâwi ni tawh lo hial tûr khawpin an ti chhe thîn a ni.

Hosea 14:1–4 chhiar la. He thu hian engtin nge Pathianin a mite a hmangaihzia a sawi?

Pathian chuan a mite’n vawi tam tak an helsan hnu pawhin heti hian a la sawi fan a: “An hnungtawlhna hi ka ti dam ang a, an lak atanga ka thin rimna chu a kian tâk avângin, anni chu ka hmangaih hrim hrim dawn a ni.” “Ka hmangaih hrim hrim dâwn a ni” tih thu-a “hrim hrim” tih tawngkam hi Hebrai Bible-ah chuan nedabah tih niin, mahni duh thu rênga thil tih sawina a ni a. Biak bûka Israel fate’n an anmahni duh thu rênga thawhlâwmte an thawh thin thu sawina atâna hman thumal nên hian thuhmun chiah a ni.

Hosea lehkhabu mai bâkah, Bible pum puiah hian Pathianin a mite a hmangaihzia leh an laka a rinawmzia a tih lanna kan hmu tam hle a. Anni erawhin hmangaih dang neihsanin, amah nêna thuthlung an siam pawh chu siam that leh theih ni pawha lang lo hial tûr khawpin an bawhchhe fo thung. Nimahsela, Pathian chuan ama duh thu rêngin an lakah a hmangaihna a lantîr chhunzawm zêl tho a. Israel mite hian Pathian hmangaihna chan an phu rêng rêng lo; a chhan pawh a hmangaihna chu an hnâwl fo a; chu vângin chuan, hmangaihna chang tlâk an ni tawh lo. Chuti chungin, Pathian chuan mi tu emawin hmangaih tûra an tih luih tlat vâng emaw, ama’n hmangaih a bat tlat vâng emaw ni miah loin a hmangaih chhunzawm zêl tho a. Hetah leh hmun dang dangah pawh Pathian Lehkhabu hian Pathian hmangaihna chu a thlâwn leh ama duh thu rênga lantîr a nih dân a târ lang chiang hle a ni.

Mi tam tak chuan, Pathian hi mihringte laka hla taka awm, rorêltu khirh zet ni angin an ngâi a. Pathian chu nupui rinawm loh tak neitu pasal khawngaihthlâk tak, hmuhsit hlawh leh hnâwla awm ni anga târ lan a ni hian engtin nge Pathian nihna chu kawng danga hmu thiam tûrin a tanpui che? Chu chuan Pathian nêna in inlaichînna i thlîr dân pawh a ti danglam daih bawk em?

Thawhlehni December 31

A thlâwna pêk hmangaihna

Pathian chuan Israel mite hnênah khân—a laka an hel fo chung pawhin—a thlâwnin leh ama duh thu rêngin a hmangaihna a la lantîr chhunzawm zêl tho thîn a ni mai lo a, keini chungah pawh mi sualte kan la nih lâi ngei pawh khân a thlâwnin, ama duh thu rêngin hmangaihna a la lantîr chhunzawm zêl ve tho a nih hi. Pathian hmangaihna hi chan kan phu hauh lo a, a hlawh pawh kan hlawh chhuak zo ngâi rêng rêng lo bawk ang. Pathian hian min mamawh hran miah lo a. Bible-a kan hmuh Pathian hian eng mah a mamawh lo (Tirh. 17:25). Pathianin nang leh kei leh mi zawng zawng mi a hmangaihna hi ama duhthlanna liau liau a ni.

Thupuan 4:11 leh Sam 33:6 te hi khâikhin la. Hêng châng pahnihte’n Pathianin ama duh thu rênga lei leh vân a siam thu engtin nge min hrilh?

Pathian chuan he khawvêl hi ama duh thu rêngin, zalên takin a siam a. Chutiang chu a nih avângin ropuina zawng zawng, chakna zawng zawng leh thiltihtheihna zawng zawng hmu tlâk a ni. Pathian chuan he khawvêl hi emaw, khawvêl dang emaw pawh a siam a tûl hran rêng rêng lo a. Leilung din a nih hma hauh khân Pathian chuan Pathiana minung pathum awmte chhûnga inlaichînna duhawm tak awm chu a lo nei daih tawh zâwk a ni.

Johana 17:24 chhiar la. He lâi thu hian khawvêl pian hma pawhin Pathian hmangaihna chu a lo awm tawh tih engtin nge a sawi?

Pathian chuan thil eng emaw hmangaih tûr a neih theih nân mihringte siam hi a mamawh a ni hran hauh lo a. Amaherawhchu, amah hi hmangaihna a nih avâng zâwkin khawvêl hi siam a, a mihring siamte nêna inhmangaih tawn tak nih chu a lo thlang ta a ni.

Pathian chuan he khawvêl hi phal taka a pêk a hmangaihna lo changtu atân ama duh thu rêngin a siam a, chu mai chu ni loin, Evi leh Adama te suala an tlûk tâk hnu leh, mi mal tinte’n thil sual kan tih tâk theuh bawk hnu-ah pawh ama duh thu rêngin mi a la hmangaih chhunzawm zêl tho a ni.

Evi leh Adama te khân, suala an tlûk tâk hnu kha chuan la nung zui zêl tûr leh Pathian hmangaihna la dawng chhunzawm zêl tûrin dikna chanvo an nei tawh lo. Nimahsela, “ama thiltihtheihna thu-a engkim tung dingtu” (Heb. 1:3) Pathian chuan, a hmangaihna, khawngaihna leh zahngaihna ropui tak avângin an nunna a lo zuahsak a, amah nên an la inhmangaih tawn zêl theih nân inrem lehna kawng a siamsak ta zâwk a. Chu inrem lehnaah chuan keini pawh hi kan tel ve a ni.

Pathian chuan he khawvêl hi, suala tlu tawh leh mi sual tak kan ni chungin a la hmangaih chhunzawm zêl tho a. Hei hian a hmangaihna leh a khawngaihna thûkzia leh zauzia engtin nge min hrilh? He thutak hian amah hmangaih lêt ve tûrin engtin nge min siam ?

Nilaini January 1

Sâwmte chu tam tak an ni a, thlante erawh tlêm tê an ni

Pathian chuan mihringte hi ama duh thu rêngin a hmangaih a ni mai lo a, amah hmangaih lêt ve tûr pawhin a sâwm nghâl bawk. Pathianin mihringte hnêna a hmangaihna lo pawm emaw, lo hnar emaw tûra duh thlan theihna zalên a pêkzia chu Isua’n inneihna ruai kîl tehkhin thu a sawiah hian (leh hmun dang dangah pawh) chiang takin a lang a.

Matthaia 22:1–14 chhiar la. He tehkhin thu awmzia hi eng nge ni?

Isua’n inneihna ruai kîl tehkhin thu a sawiah hian lal tu emaw chuan a fapa nupui neih lawm nân ruai buatsaihin, a chhiahhlawhte chu inneihna ruai kîl tûra a lo sâwm tawhte chu va ko tûrin a tîr a; nimahsela, a mi sâwmte chu tu mah an kal duh lo tlat mai (Mat. 22:2, 3). Anmahni ko tûr hian mi dangte pawh a va tîr ve leh a; nimahsela, anni pawh chu an lo ngaihsak duh chuang lo mai ni loin, an lo man a, an lo that daih nghe nghe a (Mat. 22:4–6).

A chhiahhlawh thenkhat lo thattute chunga phuba a lâk zawh hnu chuan a chhiahhlawhte hnênah heti hian a sawi ta a: “Inneihna ruai chu peih a ni ta, ka mi sâwmte erawh kha chu ei tlâk an ni lo. Chu vângin, kawng pêng thuamahte kal ula, mi in hmuh apiangte chu ka inneihna ruai buatsaih hi rawn kîl tûrin sâwm zêl ang che u” (Mat. 22:8, 9, NKJV) tiin. Hemi hnu hian inneihna puan sin lo mi pakhat lo tel ve ngawt chu pâwn thima an paih chhuah tâk thu sawiin, hei hian inneihna ruai kîl tûra lalin a sem inneihna puan chu sin a tûlzia a entîr a. Chutichuan, he thu khuh tawngkam, awmze ril nei tak nei si hian a tehkhin thu sawi chu a tlâng a kâwm ta a: “sâwmte chu tam tak an ni a, thlante erawh chu tlêm tê an ni” (Mat. 22:14).

He thu hi eng nge ni a awmzia le? A tâwpa “thlan” ni tate chu inneihna ruai kîl tûr Lalpa sâwmna lo pawmtute an ni a. He tehkhin thua “koh” ti leh “sâwm” tia lehlin Grik thumal hi kaleo a ni a, a tâwpa “thlan” (Grik tawngin, eklektos) nih theihna tûra tehfung pawimawh tak chu sâwmna lo pawm leh pawm loh a ni ang.

Dik takin, Pathian chuan mi tin hi inneihna ruai kîl tûrin a ko theuh a (chumi awmzia chu, a sâwm vek tihna a ni). Nimahsela, mi tu pawhin Pathian hmangaihna chu kan lo hnar thei thung. Hmangaih thei tûra kan neih tûl êm êm chu zalênna a ni a. Pathian chuan mi tu mah hi a hmangaih lui emaw, inhmangaih luihtîr emaw ngâi lo ang. Pathian nêna inhmangaih tawn leh inlaichînna tha tak neih chu kan lo duh lo tlat thei a. “Thlante” chu Pathian sâwmna lo pawmtute an ni. Pathian hmangaihtute chu Pathianin kan lo suangtuah thiam phâk bâka tha leh ropui zâwk thil min lo buatsaihsak a. Chu pawh chu, hmangaihna leh hmangaihnain a ken tel zalênna nên bawka chan tûr tho a ni.

I nun dân khân, inneihna ruai kîl tûra sâwmna chu i lo pawm tawh a, chu ruai kîl tûr chuan inneihna puan sin chungin i lo kal a ni tih a ti lang em?

Ningani January 2

Kan tâna khenbeh

Pathian chuan mi tin hi inlaichînna tha tak neihpuiah a sâwm theuh a; mahse, anmahni duh thu rênga a sâwmna lo pawmtute chauhin chatuana nunna chu an chang dâwn a ni. Nimahsela, inneihna ruai kîl tehkhin thua kan hmuh tâk ang khân, lalin a sâwmte zînga mi tam tak an lo kal duh dâwn chuang lo tlat mai a (Mat. 22:3).

Chu vâng chuan alâwm, Krista pawh khenbeha a awm hma lawk khân, “Aw, Jerusalem, Jerusalem, zâwlneiho thattu, i hnêna an rawn tirhte lunga lo dênghlumtu. Arpuiin a note a thla hnuaia a awp khâwm angin i fate vawi eng zât nge awp khâwm ka tum kha? Nimahsela, in duh si lo!” (Mat. 23:37) tia a lo tah rêng ni. Krista khân a mite chu koh khâwm a tum ngial thîn a; mahse, tu mahin a hnên an pan duh si lo. Krista’n a mite chhandam a duh thu sawinaah leh anni erawhin chhandam nih an duh tlat loh thu sawinaah te hian Grik tawnga “duh,” “tum” tih sawina thumal, thelo hman a ni ve ve a (he thumal vêk hi a chunga kan târ lan Matthaia 22:3-ah pawh khian hman a ni bawk).

Nimahsela, Krista chu krawsah khân hêng mite tân hian leh keimahni tân pawh a thi ta tho a. Hmangaihna ropui tak a va ni chiang êm! Mihringte hi thil sual kan tih avânga thi tlâk kan nih lâiin, amah Pathian ngei chuan (Kristaah khân) sual man a lo pe tla vek tawh a, vân leh lei inzawmna chat tawh chu zawm thar leh a nih theih nân kawng a lo sial ta a ni. Hetih lâi hian kan chungah a hmangaihna a la lantîr chhunzawm zêl a, chutiang tih chu ba hran miah lo mah se, ama duh thu rêngin mi a hmangaih atin ni.

Johana 10:17, 18 chhiar la. Galatia 2:20 nên khâikhin ang che. Hêng châng pahnihah hian kan tân thuchah pawimawh tak eng nge awm?

Pathian hmangaihna târ lanna chiang ber krawsah khân Krista chu ama duh thu rêngin kan tân a lo inpe ta tih kan hmu a. “Ama rilru puak chhuak” liau liauin a nunna a lo hlân a ni. Mi tu mahin a nunna an lâksak lo a; ama’n a duh thu rêngin, leilung nghahchhante phûm a nih hma hauha a lo remtih tawh tlanna ruahman ang takin a hlân ta a ni zâwk.

“Mihringte tlanna tûr ruahmanna lo awm hi suala Adama a tlûk hnua rawt chhuah chawp chauh a ni lo. ‘Thurûk, chatuan ata thupa lo awm char char thîn puan chhuah tâkna’ a ni zâwk a. Rom 16:25, RV. Chatuan ata Pathian lalthutthlêng innghahna lungphûm lo ni char char thîn dânte chu a hun chiah zêla an lo lan chhuah tâkna a ni. A tîr atang rêngin Pathian leh Krista chuan Setana hi a la hel dâwn a ni tih an lo hre lâwk vek a, Setana bumna avânga mihring tlûkna lo la thleng tûr pawh kha an lo hre sa vek bawk. Nimahsela, sual hi lo awm tûr rênga Pathianin a lo ruat sa chu a ni lo a, chutih rual chuan, a lo la awm dâwn tih erawh hre sain, a lo awm huna harsatna a thlen râpthlâk tak takte lo hmachhawn dân tûr pawh a lo duang lâwk sa vek bawk. Khawvêl a hmangaihna chu a nasat êm avângin a Fapa neih chhun pawh pe tûrin thu a lo thlung hial nghe nghe a, ‘amah chu tu pawh a ring apiang an boral loha chatuana nunna an neih zâwk nân’ Johana 3:16.”—Ellen G. White, Chatuan Nghahfâk, p. 22.

Zirtawpni January 3

Zir belhna: Ellen G. White-i lehkhabu, Krista Tehkhin Thute bung 29, “Mo Neitu Hmuak Tûrin” (phêk 360–374) chhiar ni se.

“Pathian nihna hriat sualna thim chhah tak chuan khawvêl hi a bawh chûn mai a. Mihringte chuan Pathian nungchang hriatna an neih thin pawh an hloh then ta zêl mai bawk. Dik lo taka hriat leh hrilh fiah thin a ni a. Hetih hunah tak hian Pathian atanga lo chhuak thuchah, a lo hretute hnêna ênna thlen thei leh chhandam tûra thiltihtheihna nei bawk chu puan chhuah tûr a ni. A nungchang chu mite hnêna hriattîr ni bawk se la. Khawvêl thimah hian a ropuina êng, a thatna, khawngaihna leh thutak êng chu lantîr ni mawlh rawh se.

“Hei hi zâwlnei Isaia thu hmanga lo puan chhawh tawh hna chu a ni a. ‘Aw Jerusalem, chanchin tha lâwmawm êm êm hril tûr i nei a, ring takin i aw chhuah rawh; ring takin chhuah la, hlau suh ang che, Juda ram khawpuite hnênah chuan, ‘En teh u, in Pathian hi! En teh u, Lalpa Pathian chu a kut chak tak nên a lo kal dâwn a, a bân chuan a tân ro a rêl ang; en teh u, a lâwmman chu a hnênah a awm hi, a hna pawh a hmaah a awm bawk a ni.’ Isaia 40:9, 10, RV.

“Mo Neitu lo kal hun lo nghâktute chuan mite hnênah, ‘En teh u, in Pathian hi’ tiin an hrilh thîn tûr a ni a. Khawvêl hnêna pêk tûr zahngaihna êng zung hnuhnûng ber, khawngaihna thuchah hnuhnûng ber chu a hmangaihna nungchang puan chhuahna hi a ni. Pathian fate chuan a ropuina an lantîr tûr a ni a. Anmahni nun theuhah leh an nungchangah Pathian khawngaihnain an tâna hna a lo thawh tawh chu puang chhuak rawh se.

“Felna Ni êng chu hna tha thawhah lo lang chhuak se la—thutak sawiin leh thil thianghlim tiin lan chhuahtîr ni rawh se.”—Ellen G. White, Krista Tehkhin Thute, phêk 367–369.

Sawi ho tûrte:

1. Pathian a awm lo nia rinna âi pawha la tha lo zâwk chu Pathianin min hua nia ngaih dân neih tlatna hi a ni âwm e. Chu chu thu dik lo ni ta se, kan chênna khawvêl hi engtiang takin nge a danglam ang?

2. Kan tûnlâi khawvêla Pathian nungchang hriat thiam lohna nasa ta êm êm mai hi eng nge a chhan ni ang? Pathian chu hmangaihna a ni tih hi mite’n an lo hriat theihna tûra in tanpui theih dân tûr kawngte chu ngaihtuahin han sawi ho teh u.

3. Tûnlâi huna Pathian nungchang puan chhuahna tûra thuchah chu eng nge ni? Chu thuchah chu Pathian hmangaihna la hre ve ngâi vak lo tu emaw hnênah engtin nge i sawi fiah ang? Pathian chu hmangaihna a ni ngei a ni tih leh, a nungchang ropui tak chu hmuhtîr tûrin finfiahna pêk theih i nei ang em?

4. Pathian hmangaihna chungchâng sawi hi thil pakhat a ni a. Kan nuna chu hmangaihna puan chhuah leh lantîr erawh thil dang daih a ni thung. Kan vêla mite hnênah hian Pathian hmangaihna puang chhuak thei tûr eng ‘thil tih thianghlimte’ nge kan tih ang?