2025 1st Quarter Zirlai 2-na
Zirlâi 2 January 4–10
Thuthlung Hmangaihna
Sabbath Chawhnu
Chhiar tûrte: 2 Pet. 3:9, Deut. 7:6–9, Rom 11:22, 1 Joh. 4:7–20, Joh. 15:12, 1 Joh. 3:16.
Châng vawn: “Isua’n a chhâng a, an hnênah, ‘Miin mi hmangaih chuan ka thu a zâwm ang a; ka Pa-in ani chu a hmangaih ang a, a hnênah kan lo kal ang a, a hnênah kan awm reng ang’ a ti a” (Joh. 14:23).
Mi tam tak chuan Grik thumal, agape tih hian Pathian chauhin a neih hmangaihna a kawh lâiin, hmangaihna sawina thumal dang, entîr nân, phileo tih erawh chuan hmangaihna dang, agape âia chak lo zâwk a kâwk thung niin an sawi thîn a. Mi thenkhat phei chuan, agape tih hi mihringte’n an pêk ve theih loh, Pathian chauhin a pêk theih hmangaihna ni angin an sawi hial bawk.
Amaherawhchu, Pathian Lehkhabu hmun hrang hranga Pathian hmangaihna lo lanna chângte ngun taka han zir hian, chutiang ngaih dân chu a dik chiah lo tih a hriat theih a. A chhan chu, Grik thumal, agape tih hian Pathian hmangaihna chauh ni lo, mihringte pawhin kan neih ve hmangaihna pawh a kâwk ve tho mai a, a châng phei chuan mihringte’n hmangaih/ngainat miah loh tûr thil eng emaw kan hmangaih/ngainat tlat thu sawina atân pawh hman a ni nghe nghe bawk (2 Tim. 4:10 en la). Tin, Pathian Lehkhabu-ah hian Pathian hmangaihna sawina atân agape ni lo thumal dangte pawh hman a nih châng a tam hle bawk a. Entîr nân, Isua pawhin, “Pa ngeiin a hmangaih [phileo]si che u a, nangni’n kei mi hmangaiha [phileo], Paa chhuak ka ni tih mi rin avângin” (Joh. 16:27) a lo ti. Hetah hian Grik thumal, phileo tih chu mihringte hmangaihna sawina atân chauh ni bîk loin, Pathianin mihringte min hmangaihna sawina atân pawh hman a ni tih kan hmu a. Chu vângin, phileo hian hmangaihna famkim lo ni loin, Pathian hmangaihna ngei a kâwk a ni.
Tin, Pathian Lehkhabu hian Pathian hmangaihna chu Pathian chauhin a pêk theih, mihringte erawh chuan lo dawn mai bâk tih theih an neih ve lohna ni loin, Pathian leh mihringte thlun zawmtu ril tak a nih zâwkzia min hrilh a. Mihringte’n Pathian hmangaihna kan lo chhân lêt leh chhân lêt loh emaw, kan mihringpuite kan hmangaih lêt ve leh lêt ve loh emaw hian Pathianah ngaihah kori a tu hle thîn a ni.
Sunday January 5
Chatuana awm reng Pathian hmangaihna chu
Pathian Lehkhabu-in chiang taka a târ lan chu Pathianin mi zawng zawng a hmangaih tih hi a ni. Bible-a châng lâr leh ngainat hlawh ber pawh Johana 3:16 a ni a, chu châng chuan he thu, “Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral loha, chatuana nunna an neih zâwk nân” tih hi a lo puang a ni.
Sam 33:5 leh Sam 145:9 chhiar la. Hêng châng pahnihte’n Pathian hmangaihna, khawngaihna leh zahngaihnain a huam chin an sawi chu eng nge ni?
Mi thenkhat chuan hmangaih theih loh, hmangaih tlâk loh niin an lo inngâi pawh a ni maithei a. A nih loh pawhin, Pathian hian anmahni tih loh mi dang zawng zawng chu a hmangaih vek niin an hria pawh a ni maithei bawk. Mahse, Bible-in a puan ngar ngar ni reng chu, mi mal tin hi Pathianin a hmangaih theuh tih a ni a. Pathianin a hmangaih ve loh mi tu mah an awm lo. Chutianga mi zawng zawng a hmangaih vek avâng chuan, mi zawng zawng hi chhandama awmah a duh vek bawk a ni.
2 Petera 3:9, 1 Timothea 2:4 leh Ezekiela 33:11 te chhiar la. Hêng thute hian Pathianin mi zawng zawng chhandam vek a duhzia engtin nge an sawi?
Johana 3:16 dawt chiah chângah chuan he thu, “Pathian chuan khawvêl thiam loh chantîr tûrin a Fapa chu khawvêlah a rawn tîr lo a, amah avânga khawvêl a dam theihna tûrin a tîr a ni zâwk e” (Joh. 3:17, NKJV) tih hi kan hmu leh a. Pathian kutah eng kim awm vek ni se chuan, mihring zawng zawng hian a hmangaihna pawmin chhandam an ni vek mai dâwn tihna a ni ang. Mahse, Lalpa chuan a hmangaihna lo pawm tûrin mi tu mah a ti lui ngâi dâwn lo a. Lo pawm emaw, lo hnâwl emaw chu keimahni duh thlanna liau liau a ni.
Ni e, mi thenkhat chuan an lo hnâwl rêng a; mahse, Pathian chuan hmangaih a bâng chuang rêng rêng lo. Jeremia 31:3-ah chuan heti hian a mite hnênah a lo puang a: “A ni, hmangaih tâwp loin ka hmangaih che a; chu vâng chuan, lainatnain ka hruai haw leh che a ni” (NKJV). Bible hian Pathian hmangaihna chu chatuan daih a nih thu a sawi tam hle mai a (entîr nân, Sam 136 en la). Pathian hmangaihna chu a kang ve ngâi lo. Chatuana awm reng tûr a ni a. Hei hi kan tâna hriat thiam a harsat hle chhan chu mi dangte hmangaih mai awlsam kan tih loh vâng a ni.
Amaherawhchu, a mi mal ang hian chu hmangaihna chu a taka chan dân hria ni ta ila—a awmzia chu, keimahni ngei hian Pathian hmangaihna chu hria ni ta ila—engtiangin nge kan nun dân a lo danglam ang a, mi dangte chungah pawh that kan chhuah sauh sauh theih ang le?
Pathian hian mi zawng zawng a hmangaih vek a nih chuan, nungchang tha lêm lote pawh a hmangaih tel ve tho dâwn tihna a ni a, a chhan chu mi sual leh nungchang tha lo tak tak an awm nual (dik taka sawi chuan, tam tak an ni zâwk) si a. Pathian chuan hêng mite pawh hi a hmangaih vek a ni tih kan hriatna hian engtin nge anmahni hmangaih theih dân tûr min zirtîr ang?
ThawhTanni January 6
Thuthlung hmangaihna
Bible hian Pathianin a bîk taka mi a hmangaihzia tehkhin nân chhûngkua emaw, chhûngkhat emaw inhmangaihna, a bîk takin nupa kâra inhmangaih tawnna awm emaw, nuin a fa a hmangaihna emaw a hmang fo mai a. Hêngte hi a hman deuh kher chhan chu Pathian leh Pathianin thu a thlunpui a mite inkâra inlaichînna awm chu inlaichînna rau rau-ah pawh danglam bîk leh ril tak a ni tih târ lan a duh vâng a ni. He inlaichînna hi thuthlungin a suih zawm hmangaihna a ni a, chutah chuan Pathianin a mite a hmangaihna chauh ni bîk loin, chu hmangaihna chu a mite pawhin an lo pawm a, amah (leh mi dangte pawh) an lo hmangaih lêt ve beiseina pawh a awm tel bawk a ni.
Deuteronomi 7:6–9 chhiar la. He lâi thu hian engtin nge Pathian thuthlung siamte leh Pathian hmangaih lainatna inlaichîn tawn dân a sawi?
Deuteronomi 7:9 hian Pathianin thu a thlunpui a mite nêna inlaichînna thûk tak a neih dân sawiin, chu inlaichînna chu a laka an rinawm reng leh rinawm reng lohah a innghat a. Pathian hmangaihna hrim hrim hi chu thu delh kilh awm lo ni mah se, a mite nêna an inlaichîn tawnna erawh hi chu thu delh kilh awm a ni ve thung.
“Zahngaihna” tih emaw, “khawngaihna” tih emaw-a lehlin Hebrai thumal, heseh hian Pathian hmangaihnaah chuan thuthlung emaw, thutiam emaw a awm a ni tih a entîr nghâl a, chumi bâk thil dangte pawh a entîr tel tho bawk. He thumal (hesed) hi Pathian khawngaihna, thatna leh hmangaihna sawina atâna hman a ni fo a. Tin, mi tu emaw-in mi dang tu emaw a hmangaih êm êm thu sawina atân pawh hman a ni thîn bawk. Chutiang hmangaihna chu a nei tawh a nih chuan, a tawngka leh chêtziaah a lang chhuak ang a, a hmangaih pawh chuan a lo hmangaih lêt ve a beisei ngei dâwn bawk a ni.
Pathian hesed chuan a hmangaihna leh khawngaihna chu a rin tlâk êm êm a, a nghet a, chatuan daih a ni tih a ti lang a. Chutih rual chuan, hesed-in a ken tel hamthatnate lo dawn erawh thu delh kilh awm a ni tlat mai. Pathian thu chu kan zawma, kan tih ve tûr awmte kan tih ve a ngâi a ni (2 Sam. 22:26, 1 Lalte 8:23, Sam 25:10, Sam 32:10, 2 Chron. 6:14 en la).
Pathian hmangaihna nghet tak mai hi mi dangte nêna kan inhmangaih tawnna zawng zawng innghahna, a tobul a ni a; mahse, chutiang hmangaihna chu keini hi chuan kan nei ve phâk tak tak ngâi lo ang. Pathian chuan a thlâwnin, ama duh thu rêngin nunna min pe a, chu mai chu ni loin, Kristaah khân a thlâwn bawkin kan tân a lo inpe leh bawk. “Miin a thiante tâna a nun a hlan âia hmangaihna ropui zâwk tu ma’n an nei lo” (Joh. 15:13, NKJV). Thil chiang tak chu, Pathian hmangaihna târ lanna chiang ber chu amah a rawn intih tlâwma, thih thlenga thu zâwma a lo awma, krawsa a thih tâk hialnah khân puan chhuahin a awm a ni (Phil. 2:8, NKJV).
Engtin nge Pathian hmangaihna chu i ngaihtuahnaah eng tik lâi pawhin i vawn reng theih ang? Chumi tih chu eng vângin nge a pawimawh êm êm le?
Thawhlehni January 7
Thu delh kilh awm inlaichînna
Pathian chuan mi tin hi amah nêna inhmangaih tûr leh innêl taka inlaichîn tawn tûrin a sâwm vek a (Mat. 22:1–14). Chu sâwmna chu a chhân lêt dân tûr dik taka kan lo chhâng lêt dâwn a nih chuan amah leh kan mihringpuite hmangaih tûra thu min pêk hi kan zawm ngei a tûl tlat mai (Mat. 22:37–39). Pathian nêna kan inlaichînnain a ken tel hamthatnate a taka kan lo chan leh chan loh chu keimahni duh thu rênga a hmangaihna pawm kan duh leh duh lohah a innghat a ni.
Hosea 9:15, Jeremia 16:5, Rom 11:22 leh Juda 21 te chhiar la. Hêng Bible chângte hian Pathian hmangaihnain a ken tel hamthatnate chu lo pawm loh leh, lo chân hial pawh thil awm thei a nih dân engtin nge an sawi?
Hêng chângahte leh châng dang dangahte pawh Pathian nêna inlaichînna neihin hamthatna a kel telte a taka lo chan leh lo chan loh chu mihringte’n Pathian hmangaihna kan lo chhân lêt dâna a innghah thu târ lan a ni a. Hetih rual hian, Pathian chuan mi tu mah hi hmangaih a bânsan tak tak ngâi dâwn lo a ni tih erawh kan hre reng tûr a ni. Kan sawi tâk ang khân, Pathian hmangaihna chu chatuana awm reng a ni a. Tin, Hosea 9:15-ah hian Pathianin a mite chu, “Anniho hi ka hmangaih tawh lo ang” tia a sawi hmu mah ila, he lehkhabu tho bung dangah erawh “Anni chu ka hmangaih hrim hrim dâwn a ni” (Hosea 14:4) tiin a sawi tho bawk a ni tih kan hriat reng a pawimawh hle. Hosea 9:15 thu hi Pathianin a mite a hmangaih lo tawp tawh dâwn tihna a ni thei lo a, a mite nêna an inlaichînnain a ken tel hamthatna emaw, malsâwmna emaw thenkhat chu thu delh kilh awma chan chi a ni tih a kâwk a ni zâwk. Pathian hmangaihna kan lo chhân lêt dân hian amah nêna inlaichînna kan neih chhunzawm zêl theih dâwn leh dâwn lo thu-ah kori a tu thui hle tihna a nih chu.
Isua’n, “Tu pawh ka thupêkte neia zâwm chu mi hmanggaihtu a ni a; tu pawh mi hmangaih chu ka Pa-in a hmangaih ang, kei pawhin ani chu ka hmangaih ve bawk ang a, a hnênah ka inlâr ang” (Joh. 14:21) a lo ti a. Hetiang deuh bawk hian a zirtîrte hnênah pawh khân, “Pa ngeiin a hmangaih si che u a, nangni’n kei mi hmangaih a, Paa chhuak ka ni tih mi rin avângin” (Joh. 16:27) tiin a lo sawi bawk.
Hêng châng pahnihte bâkah, châng dang eng emaw zât paw’n Pathian nêna kan inlaichînnain hamthatna a ken telte chang chhunzawm zêl tûr chuan Pathian hmangaihna kan lo pawm ve ngei a tûl tih min hrilh a (chu chuan mi dangte hnêna Pathian hmangaihna pêk chhâwn ve tumna pawh a huam tel tih hria ila). Mahse, hei pawh hi Pathian hmangaihna chuan tlin loh châng a nei ve thîn tho tihna a ni chuang lo leh bawk. Ni khi êng chhuah lo tûr chuan kan dang thei lo a; mahse, ni zungin min rawn chhun lohna tûr hmunah chuan kan awm sawn thei thung. Chutiang deuh chiah chuan, Pathian hmangaihna lo dang tûr hian eng mah tih theih kan nei lo a; mahse, amah nêna inlaichînna neih chu duh tlat loin leh hamthatna min chantîr a tum, a bîk takin, chatuan nunna min pêk a tum chu kan lo hnar tlat thei thung si a ni.
Mihringte’n a taka Pathian hmangaihna kan hmuh leh chan dân—kan lo chhâng lêt ve emaw, chhâng lêt ve lo emaw pawh ni se—kawng hrang hrangte chu eng nge ni? Entîr nân, engtiangin nge kan chênna khawvêl hian, sual a lo luh tâk hnu-ah pawh Pathian hmangaihna chu a la puan chhuah chhunzawm reng?
Nilaini January 8
Khawngaihna chân
Pathian hmangaihna chu chatuana awm reng leh a hlawha hlawh chhuah chi ni miah lo a ni a. Amaherawhchu, mihringte hian kan lo hnar thei thung si. Chu hmangaihna chu lo pawm emaw, lo hnar emaw tûrin duh thlan theihna zalên kan nei a, a chhan pawh Pathian chuan eng thil mah kan tih hma hauhin, ama duh thu rêngin, chatuana awm reng a hmangaihna tha famkim chuan mi a lo hmangaih tawh vâng a ni (Jer. 31:3). Keini’n amah kan hmangaih ve-na hi chu kan dîl hma hauh pawha pêk kan lo nih tawh sa reng kan chhân lêtna mai a ni a.
1 Johana 4:7–20 chhiar la, châng 7 leh châng 19 hi lo chîk zual deuh bîk ang che. He lâi thu hian Pathianin min hmangaihna chu keini’n amah kan hmangaihna âia a hmasak zâwk dân engtin nge min hrilh?
Pathian hmangaihna chu keini’n amah kan hmangaihna âiin a lo thleng hmasa zâwk zêl a. Ama’n min hmangaih hmasa zâwk lo ta se, keini hian amah kan hmangaih lêt thei hauh lo ang. Pathian chuan hmangaih thei tûr leh hmangaih theih ni tûrin min siam ngei mai tak a, chutih rual chuan, amah Pathian ngei hi hmangaihna zawng zawng innghahna leh a hnâr ni bawk a ni. Amaherawhchu, kan lo pawmin kan nunah pawh kan lan chhuahtîr dâwn em tih chu keimahni duh thlannaah a innghat thung a. Chumi dikzia chu Krista’n ngâidam ve duh lo chhiahhlawh tehkhin thu a sawiah pawh hian chiang takin kan hmu (Mat. 18:23–35 en la).
He tehkhin thu-ah hian, chhiahhlawh hian a pu sum a batsak chu a rulh theihna kawng pakhat mah a awm lo tih kan hmu a. Matthaia bung 18-a kan hmuh dânin, he chhiahhlawhin a pu sum a batsak zât hi talent sîngkhat zet a ni. Talent khat hi denarii sângruk vêl nên intluka ngaih a ni a. Tin, dinarii khat hi inhlawhfate’n ni khat hna an thawha an hlawh zât a ni bawk. (Mat. 20:2 nên khâikhin rawh). Chuti a nih chuan, talent khat thawk chhuak tûra inhlawhfa-in tha a sên ngâi zât chu ni sângruk zet a ni dâwn tihna a ni a. Thawh chhuah theih loh ni a neih tûr zawng zawng paih hnu-in, kum khatah ni zathum vêl zêl a thawk ni tûrah lo ngâi ila; tichuan, kum khatah denarii 300 a hlawh chhuak thei dâwn tihna a ni ang. Chutichuan, talent khat (chu chu dinarii 6,000 a ni; 6,000/300 = 20) rûl tûr hian a lo berah kum sawmhnih vêl tal chu a mawmawh ngei dâwn a. Talent 10,000 zet hlawh chhuak tûr phei chuan kum 200,000 chhûng hna a thawh a ngâi dâwn a nih chu. A tâwi zâwngin sawi mai ila, he chhiahhlawh hian a leibat hi eng ti kawng mahin a rûl thei ngâi dâwn lo a. Mahse, a pu hian a khawngaih êm avângin a ngâidam ta tawp mai a ni.
Amaherawhchu, he chhiahhlawh hian a laka lei ba ve leh chhâwng, a bat zât pawh ani’n a pu a batsak zât âia tlêm daih zawk, dinarii 100 lek ba chu a ngâidam duh ve tlat lo pek a; a man a, tân inah a khung ta mai a. Chu thu chu an pu khân a lo hria a, a thin a rim ta êm êm mai a, a lo khawngaih tawhna leh ngaihdam tawhna pawh kha a sût leh ta hial a ni. He chhiahhlawh hian a pu lainatna leh ngaihdamna a lo chan tawh chu a chân leh ta daih a. Hetiang chiah hian, Pathian khawngaihna leh lainatna chu kang ve ngâi lo ni mah se, chumiin a ken tel hamthatnate chu keimahni hian kan lo hnâwl tlat thei a, kan chan tawh sa pawh kan hloh leh daih theih bawk.
Eng thilah nge Isua ngaihdamna i lo chan tawh tih leh, chu ngaihdamna i chan theih nân chuan eng tianga nasain nge Isua a insên tih ngaihtuah la. Chu chuan mi dangte ngaihdam ve duhna thinlung a puttîr che em?
Ningani January 9
A thlâwnin in dawng a, a thlâwnin pe ve rawh u
Ngâidam ve duh lo chhiahhlawh khân a pu laka a leibat kha a rûl thei ngâi dâwn lo ang chiahin, keini pawhin Pathian laka kan bat hi kan rûl thei ngâi dâwn lo a. Pathian hmangaihna hi a hlawha hlawh chhuah tûr ni ta se, kan hlawh chhuak thei ngâi dâwn lo rêng rêng a ni. “Nimahsela, Pathian chuan a mi hmangaihna chu fak tlâkin a lantîr a, mi sualte kan la nih lâia Krista kan âia a thih avâng khân” (Rom 5:8). Hmangaihna mak leh ropui tak zawng a va ni êm! 1 Johana 3:1 pawhin heti hian min lo hrilh a: “Ngâi teh u, Pa-in min hmangaihna chu a va nasa êm! ‘Pathian faahte’ min vuah tâk hi; chutiang chu kan ni rêng e” tiin.
Nimahsela, kan tih theih leh kan tih ngei tûr ni bawk chu, mi dangte hnênah kan theih anga tam leh nasaa Pathian hmangaihna lan chhuahtîr ve a ni a. Chutiang taka khawngaihna leh ngaihdamna ropui chu kan chang a nih si chuan, keini pawh hian mi dangte chungah khawngaihna leh ngaihdamna a tam thei ang ber kan lantîr ngei tûr a ni dâwn lo’m ni? Ngâidam ve duh lo chhiahhlawh khân, a chhiahhlawhpui chunga khawngaihna leh ngaihdamna a lantîr duh tlat loh avângin a pu khawngaihna leh ngaihdamna a lo chan tawh pawh a chân leh ta a ni tih kha hre reng ila. Pathian hi kan hmangaih tak zet a nih chuan, mi dangte chunga a hmangaihna lan chhuahtîr dân kawng kan zawng lo thei lo ang.
Johana 15:12, 1 Johana 3:16 leh 1 Johana 4:7–12 te hi chhiar la. Hêng thute hian engtin nge Pathian hmangaihna, keimahni’n Pathian kan hmangaihna leh mi dangte kan hmangaihna te hi a inkungkaih kual vek dân min hrilh?
Isua’n Johana 15:12-a kan hmuh thupêk pawimawh tak mai hi a sawi zawh hnu chiahah, “Thu ka pêk apiang che u in tih chuan, kan thiante in ni ang” tiin a zirtîrte a hrilh zui nghâl a (Joh. 15:14). Isua’n an hnêna thu a pêk chu eng nge ni? Ama’n anmahni (keimahni pawh) a (min) hmangaih ang bawkin, mi dang pawh hmangaih ve tûrin thu a (min) pe a. Hmun dang tam takah pawh amah chu hmangaiha, keimahni pawh inhmangaih tawn theuh tûrin thu min pe bawk a ni.
A tâwi zâwnga sawi chuan, kan rulh zawh rual loh tûr leh krawsa Krista thihna chauhin a tlâk theih leibat kan neihah khân ngaihdam kan ni ta tih hi kan hre reng tûr a ni a. Chu vângin, Pathian chu hmangaiha fak tûr leh, mi dang laka hmangaihna leh khawngaihna lantîr ve tûr kan ni. Luka 7:47-a kan hmuh angin, ngaihdamna chang tam chuan a hmangaih nasa nge nge thîn a, ngaihdam tlêm chuan, a hmangaih dân pawh a nêp deuh nge nge thîn bawk. Kan zînga tu hian nge Pathianin min ngaihdamna nasatzia hre lo le? Pathian kan hmangaihna chuan kan mihringpuite kan hmangaihna pawh a keng tel nghâl a nih chuan, Pathian hmangaihna thuchah hi mi dangte hnênah thu leh thil tihin kan lantîr nghâl thuai thuai tûr a ni a. Mite chu an ni tin nun an hmannaah tanpuiin, Pathian hmangaihna an dawn theihna kawng nih kan tum ngei tûr a ni ang. Chu mai ni loin, lei thar leh vân thara chên theihna tûr chatuan nunna thutiam Petu chu kan kawhhmuh bawk ang a. Chu lei thar chu tûna kan chên mêkna khawvêl, sual leh thihnate’n a tih hmêlhem leh a tih chhiat tawh, Pathian hmangaihna lo hnâwl rah lungchhiatthlâk tak takte kan tawrh chamchi-na nên hi chuan inang lo tak a ni ang.
Mi dangte hmangaihna hmanga Pathian hmangaih tûr chuan eng rahbite nge i zawh tan ang? Vawiinah leh ni dang lo la awm leh zêl tûrahte pawh mi dangte hnêna Pathian hmangaihna lantîr tûr leh, chatuan nunna thutiam neitu nih nawmna chang ve tûra sâwm tûrin eng nge tih theih i neih?
Zirtawpni January 10
Zir belhna: Ellen G. White-i lehkhabu, Krista Panna Kâilâwn bung 11, “Tawngtâina Hun Remchâng” (phêk 70–79) chhiar ni se.
“I mamawh te, i lâwmna te, lungngaihna te, i manganna te leh i thil hlauh te chu Pathian hnênah thlen rawh. Ani chu i ti hah thei lo a, i ti chau thei bawk hek lo. I sam zâi zât nên lam hre vektu chuan a fate mamawh a ngaihthah lo e. ‘Lalpa chu khawngaihna leh zahngaihnaa khat a ni’ Jakoba 5:11. A hmangaihna thinlung chu kan lungngaihnate leh kan lungngaih thu kan thlente hian a khawih êm êm thîn a. I rilru ti buaitu zawng zawng chu a hnênah thlen zêl mai rawh. A tân chuan phurh zawh loh khawpa rit eng mah a awm lo; ani chuan khawvêl hi chelh kângin, lei leh vâna thil thleng zawng zawngah hian thu a nei si a. Kan thlamuanna tûr a nih phawt chuan atâna hriat tham loh khawpa thil tê tham pakhat mah a awm lo a. Kan nunin a tawn thil chi hrang hrangah hian atâna chhiar tlâk loh khawpa thim chhah lah a awm hek lo; a tâna chin fel harsa khawp buaina eng mah a awm lo a ni. A fa tê ber chungah pawh eng chhiatna mah a thlen a phal lo a, mangannain an rilru a tih buai, a hlimna tûr dâlsak, tih tak zeta an tawngtâina chhâna a awm loh pawh a phal rêng rêng lo bawk. Kan vân Pa chuan min rawn thlîr reng a, ‘lungchhiatnate chu a ti dam a, hliam te chu a lo tuamsak thîn bawk a ni.’ Sam 147:3. Pathianin mi mal tinte a neihpui theuh inlaichînna chu inlaichînna danglam bîk tak leh famkim a ni vek a, leiah hian ngaihsak dang a nei ve lo emaw tih tûr khawp hial leh a Fapa duh tak a pêk awm chhun an ni emaw tih tûr ang hialin a ngaihsak êm êm theuh a ni.”—Ellen G. White, Krista Panna Kâilâwn, phêk 75, 76.
Sawi ho tûrte:
1. A chunga Ellen G. White-i thu ziah kan târ lan, “Pathianin mi mal tinte a neihpui theuh inlaichînna chu inlaichînna danglam bîk tak leh famkim a ni vek a, leiah hian ngaihsak dang a nei ve lo emaw tih tûr khawp hial leh a Fapa duh tak a pêk awm chhun an ni emaw tih tûr ang hialin a ngaihsak êm êm theuh a ni” tih hi ngun takin a awmzia ngaihtuah la. He thu hian eng ang thlamuanna nge a pêk che a, Pathianin a rawn hnaihzia che leh a ngaihsakzia che hriain engtin nge i nun i hman ang? Chu thutiam ropui tak neitu i nihna chu engtin nge i nunpui theih ang?
2. Tûn kâr zirlâi atang hian engtin nge Sam 103:17, 17 thu hi a awmzia kan lo hriat thiam le? Pathian hmangaihna chu chatuan daih a nih dân leh, chutih rualin Pathian nêna kan inlaichîn tawnnain a ken tel hamthatnate erawh Pathian hmangaihna kan lo pawm leh pawm loha a innghah si dân chu eng tin nge a târ lan?3. Chumi hriatna chuan engtiangin nge Pathian nêna in inlaichîn tawnnaah danglamna a siam? Engtiangin nge mi dangte lungngaihna i ngaih dânah nghawng a neih?