2025 1st Quarter Zirlai 5-na
Zirlâi 5 January 25–31
Pathian Hmangaihna Lantîrtu Thinrimna
Sabbath Chawhnu
Chhiar tûrte: Sam 78; Jona 4:1–4; Mat. 10:8;Mat. 21:12, 13; Jer. 51:24, 25; Rom 12:17–21.
Châng vawn: “Nimahsela, ani chu lainatnaa a khah avângin an khaw lohna chu a ngâidam a, anni chu a ti boral lo: a ni, vawi tam tak a thinurna chu a la kîr a, a thinrimna chu a zain a chawk tho duh thîn lo” “ (Sam 78:38).
Mi tam tak chuan Pathian hmangaihna leh khawngaihna ngahzia hi an sawi tui hle lâiin, thinrim thei a nihna lam erawh ngaihthlâk nuam an ti lêm lo thîn thung. Pathian hi hmangaihna a nih chuan, thinrim ve ngâi miah lo ni tûrah a ngâi a. Mahse, chutiang ngaih dân chu a dik si lo. Pathian hian thinrim châng a nei ve fo tho a, a thinrim chhan erawh mi a hmangaih vâng a ni thîn.
Mi thenkhat chuan Thuthlung Hluia kan hmuh Pathian hi chu thinrim thîn Pathian a ni a, Thuthlung Thara kan hmuh Pathian erawh hi chu hmangaihnaa khat Pathian a ni thung tiin an sawi thîn a. Mahse, Pathian chu pakhat chauh a awm si a, chu Pathian chu Thuthlung Hluiah leh Thuthlung Tharahte hian puan chhuahin a awm ve ve a ni. Hmangaihnaa khat Pathian chu thil tha lo a hmuh leh a hriatin a thin a rim thîn a—a thinrim chhan pawh hmangaihna a nih vâng a ni. Isua pawh khân sual leh thil tha lo a huatzia a ti lang fo a; tin, Thuthlung Thar lehkhabute hian Pathian chu chhan dik leh tha tak avânga a thinrim thin thu kan hmu tam hle bawk.
Pathian thinrimna hi thinrimna dik niin, sual leh dik lo taka thil tihte hmangaihnaa a chhân lêtna a ni thîn a. Thinrimna dik, thatna leh hmangaihnain a thlentîr, a thil siam zawng zawngte tâna tha tûr a duh avânga thinrimna a ni. Sual leh dik lo taka thil tih a chhân lêtna a nih avângin, sual chuan sual vânga tuarte thlavâng hauh tûr leh pawi khawihtute chu hrem tûrin Pathian thinurna a chawk tho ta thîn a. Chutiang chuan, Pathian thinrimna hi a hmangaihna târ lanna a lo ni zâwk.
Sunday January 26
Sualin a ti lungngâi
Bible-in a sawi Pathian hian dikna a ngaina a, sual erawh a haw hle thung. Chu vâng chuan, sual leh thil tha lote hian a thinrimna a chawk tho thîn a, chu a thinrimna chu rah beha awmte leh tihduhdah tuarte a chhanchhuahna hmanga a lan chhuahtîr thin bâkah, keimahni ngei min nghawng tûr thil tha lote kan tih châng pawh hian a hrehawm a ti hle thîn bawk. Pathianin sual a huat êm êm chhan chu a thil siamte ti natu a nih vâng a ni a, a thil siamte chu anmahni leh anmahni an inti na a nih pawhin pawi a ti êm êm tho thîn. Bible-ah hian Pathian chu a laka a mite an hel nawn fo avânga a thinrim thu kan hmu tam hle a. Hetiang hi thil thlen thin dân chu a ni:
Pathian mite chu Pathian lakah helin thil tha lo tak tak an ti a, a châng phei chuan nunrâwnna thil râpthlâk tak tak, naupang hmanga inthâwi te leh Pathian mithmuha tenawm tak tak thil dangte pawh an ti thîn nghe nghe.
Pathian chuan a mite duhthlanna siam chu zahsakin, an laka a inhnûk kîr ta thîn a.
A mite chu ram dang mite’n rawn hnehin an tiduhdah ta a.
Chutichun, a mite chuan amah auvin a chhanchhuahna an rawn dîl a
Pathian chuan a lo khawngaih a, an hmêlmate kut ata a chhanchhuak ta a.
Mahse, a mite chu a lakah an hel nawn leh tho a, a hma âia bâwrâw mah zâwkin a ni fo nghe nghe leh nghâl thîn nghe nghe.
Hetiang hian thil sual râpthlâk tak tak ti nawn fo mah se, Pathian erawh chuan, a rinawm êm avângin an rinawm lohnaah a ngâidam leh nge nge thîn a. An chungah a dawhtheihna, a khawngaihna mak tak leh a lainatna thûk tak chu a lantîr leh tho zêl a ni.
Sam 78 chhiar la. He thu hian Pathianin a laka hel fo thîn a mite a ngaihdam thin dân engtin nge min hrilh?
Bible-in a sawi dân chuan, hmangaihna leh dikna hi thil kal dûn tlat zêl a ni a.
Sual hian Pathianin a hmangaih êm êmte a tih nat thin avângin a thinrimna ngei pawh hmangaih vânga sual a chhân lêtna a ni zâwk. Bible-ah hian Pathian a thinrim thu kan hmu hnem hle a; mahse, hêng a thinrimnate hi ama thu a duh vâng emaw, dik lo taka thil tih a tum vâng emaw a ni ngâi lo.
Pathian mite hian Pathian kalsan thînin, a lakah rinawm lo fo mah se, Pathian erawh chuan anmahni ngei pawhin an beisei ngam lo thlengin a lo nghâk chhunzawm zêl thîn a (Neh. 9:7–33), a khawngaihna a chantîr leh nge nge zêl a, a dawhtheihzia leh a khawngaihna thûkzia chu teh zawh sên rual loh a nihzia a lantîr thîn. Sâm 78:38-ah chuan he thu hi kan hmu a: “[Pathian] chu lainatnaa a khah avângin an khaw lohna chu a ngâidam a: anni chu a ti boral lo; a ni, vawi tam tak a thinurna chu a la kîr a, a thinrimna chu a za-in a chawk tho duh thîn lo.”
Mi dang tute emaw chunga thil tha lo tih a nih avângin i lo thinrim ve tawh ngei ang a. Chu i thinrimna chuan engtiangin nge sual laka Pathian thinrim chhan hi hre thiam tûrin a tanpui che?
ThawhTanni January 27
Pathian chu thinnel tak a ni
Pathian hian sual a haw hle a, a chhan pawh hmangaihna a nih tlat vâng a ni. Tin, Pathian hi lainatna leh khawngaihna ngah tak a ni bawk a, mi a khawngaih thei lutuk hi zâwlnei pakhat phei chuan ngaimawhin a zilh hial nghe nghe.
Zâwlnei Jona chanchin hi ngaihtuah ila, Pathianin a khawngaihna avânga Ninevi khawpuia chêngte a ngâidam ta mai kha engtin nge Johana khân a lo ngaih (Jona 4:1–4). He lâi thu hian Jona mizia leh Pathian mizia engtin nge a sawi?
Pathianin Ninevi khawpuia chêngte a ngaihdam avânga Jona lo lungâwi loh ngawt dân hi kawng hnihin sawi a ni a. Pakhat chu, Jona thinlung sakzia a lantîr hi a ni. Jona hian Assuria mite chu Israel-te chunga thil tha lo tak tak an lo tih tawhte avângin a haw hle a, Pathian chu an chunga khawngaihna lantîr miah lo tûrin a duh a ni.
Hei hi keini tân pawh zirlâi pawimawh tak a va ni êm! A rilru put hmang hi hriat thiampuiawm viau tho mah se, keini erawh chuan kan put ve loh nân kan invêng fîmkhur hle tûr a ni a. Pathian khawngaihna lo dawng tawhtu zawng zawngte chuan, kan phu miah loh khawngaihna kan dawng a ni tih hriain, mi dangte hnênah khawngaihna lantîr ve kan tum ngei tûr a ni zâwk.
Pahnihna chu, Jona ngaihtuahna leh thil sawi hian Pathian nungchang kan hriat thiam theihna tûra Pathian khawgaihna leh lainatna kan mamawhzia a ti lang hi a ni. Jona hian Pathian khawngaihna ngahzia a hre chiang hle a. Pathian chu khawngaihna ngah, thil tha lo laka inlamlêt thîn a ni (Jona 4:2) tih a hriat avângin, Ninevi khawpui chunga rorêlna thlentîr a tum pawh hi an sualte an sim a nih chuan a hnûk kîr leh dâwn tih a hria. Pathian chu khawngaihna ngah tak a ni a, mi zawng zawng leh hnam zawng zawng hi dik tak leh khawngaihna nên a dâwr hrâm hrâm thîn a ni.
“Thinnel” tih emaw, “dawhthei” tih emawa lehlin Hebrai thumal hi a ngialnganin letling dâwn ta ila, “hnâr ngul sei” tih tûr a ni ang. Hebrai mite ngaih dânah chuan thinrimna hi hnâr ngul nên a inzawm tlat a, mi chu a hnâr ngul a sei leh sei loh a zirin a thinrim hmain a thinrim har niin an sawi thîn.
Pathian chu “hnâr ngul sei tak” nei nia a sawi hian a sawi tum tak zâwk chu a thin a rim mai mai ngâi lo a, a dawhthei êm êm bawk tih a ni. Mihringte hi awlsam te-in kan thinrim mai thin lâiin, Pathian erawh chu a dawhthei êm êm thung a, sual chu thiam chantîr miah si lo leh, dik lo taka thil tihna thlengte hi maimichhînsan chuang hauh si loin, mihringte chungah a thlâwnin leh tam takin a khawngaihna a lantîr thîn. Tin, amah Pathian ngei hian kraws hmangin sualna leh thil tha lo tlanna chu a siam bawk a, chumi avâng chuan amah ringtu apiangte tân felna leh thiamchantîrtu a lo ni thei ta a ni (Rom 3:25, 26).
I laka thil sual titute chungah khawngaihna lantîr theih loh tum i lo nei ve tawh em? Pathianin i tâna thil a lo tih tawh i hriat rengna chuan mi dangte chunga khawngaihna i lantîr ve hi i chunga khawngaihna nasa tak a lo lantîr tawh avânga i lâwmzia i lantîrna a ni tih a hriattîr che em? Engtin nge khawngaihna leh lainatna hi thil sual tih chhunzawm zêl phalsak ni chuang si loin kan lan chhuahtîr theih ang?
Thawhlehni January 28
Thinrimna dik
Thinrim dân dik lo leh tha tam tak a awm lâiin, Bible hian “thinrimna dik” a awm thu pawh a lo sawi tho mai.
Entîr nân, nu pakhat chuan an in kawta a fanu kum thum mi infiam lâi chu an bathlâr (varandah) atangin a lo thlîr a. Chutia a infiam melh melh lâi chuan mi pakhat hi lo kalin, a fanu chu a rawn vêl ringawt mai a. He nu hi a thinrim lo ang em ni? A thinrim khawp ang. Chutiangah chuan thinrimna hi hmangaihna lo lan chhuahna a ni thîn a. He kan tehkhin thu sawi hian Pathian “thinrimna dik” tia kan han sawi mai hi a awmzia min hriat thiamtîr âwm e.
Matthaia 21:12, 13 leh Johana 2:14, 15 chhiar la. Pathian biak ina thil zuarte Isua’n a hnawt chhuak ta vek khân Pathian chu sual lakah a thinrim thîn a ni tih engtin nge min hrilh?
Hêng Bible chângahte hian Isua’n hmunhma narân ve mai anga Pathian temple ngâitute leh, hmeithâite leh fahrahte leh mi retheite chan âi lo lâksak thîn “rûkrute pûka” chhuahtute laka a thinrim thu kan hmu a (Mat. 21:13; Joh. 2:16 chhiar la). A thinrimna hi thinrimna dik, “Pathian atanga chhuak thahnemngaihna thianghlim” a ni. Pathianin mihringte min khawngaih avânga min ngaihdamna leh mi sualte a tlen fâina entîrtu tûr temple leh a rawngbâwlnate chu mipuite bumna atân leh pachhe ber berte rah behna hmanruaah an hmang ta hlauh zâwk a. Chutiang thil tenawm tak an lo ti mup mup lâi a a va hmuh chuan a thinrim ta êm êm mai a ni.
Marka 10:13, 14 leh Marka 3:4, 5 kan chhiar chuan Isua thinrimnate hi thinrimna dik leh âwm tak a nihzia kan hria ang. Nu thenkhatin an fa la naupang tê tê-te a hnêna an rawn hruaia, zirtîrte’n an lo hau lâi a hmuh pawh khân a “lungni lo êm êm” a. Heta “lungni lo” tih hi a ngialngana lehlin dâwn chuan a “thinrim hle” tih theih a ni. “Naupang tê tê-te kha ka hnênah han kaltîr ula, hnar suh u” (Marka 10:13, 14) tiin a hrilh ta a nih kha.
Tin, Pharsaite’n Sabbath nia dam lo a ti dam mai kha Sabbath bawhchhiatna a ni ti-a an sawi khân heti hian a zâwt a: “Sabbath-ah hian thil tha tih nge thiang, thil tha lo zâwk? Nunna chhan nge thianga nunna lâk zâwk? (Marka 3:4, NKJV) tiin. “An thinlung sakna chuan a ti lungngâiin, thinrim takin anmahni a en a,” tichuan, dam lo tih dam hna chu a thawh chhunzawmsan ta a ni. Hetah hian Krista thinrimna chu an thinlung sakzia a hriat avânga a lungngaihna nên a inzawm tlat a; hmangaihna avânga thinrimna dik, Thuthlung Hlui lehkhabute’n Pathian thinrimna chu hmangaihna vâng a ni tia an lo sawi ang chiah kha a ni. Hmangaihna chu thil sual tihna, a bîk takin hmangaihte chunga tihna a thlen phei chuan a thinrim lo thei dâwn em ni?
Mahni hmasial avânga kan thin a rim thinna hi “thinrimna dik” tia kan inthiam chawp mai loh nân engtin nge kan invên theih ang? Chutiang tih chu eng vângin nge thil awl tak a nih bawk si?
Nilaini January 29
Pathian chuan a duh thu rêngin mi a ti na ngâi lo
Bible-ah hian Pathianin hnehchhiaha awmte leh rah beha tâwkte a khawngaih thu bâkah, chûng mite chunga thil dik lo tak tak titute laka a thinrim thin thu sawina kan hmu tam hle a. Thil tha lo leh sual hi lo awm lo ta se, Pathian pawh a thin a rim bîk hauh lo ang. A thinrimna hi a mihring siamte ti natu lakah chauh a ni zêl a.
Jeremia Tah Hla 3:32, 33-a kan hmuh dânin Pathian chuan a duh thu rêngin tu mah a ti na ngâi lo a (a ngial a ngana sawi chuan, Pathian hian “a thinlung atangin” tu mah a ti na ngâi lo tih tûr a ni ang). Thil sual titute lakah ngei pawh hremna thlentîr a duh hran chuang hauh lo a; mahse, hmangaihna chuan dik taka rorêlna a phût tlat si atin ni.
He thu dik tak hi Pathianin a mite a ngaihdam ngunzia leh, an sual an lo sima, amah nên an lo inrem leh theih nâna hun tha a pêk nawn fo dân pawh hian chiang takin a ti lang a. Zâwlneite hmang khân a mite chu a sâwm thîn a; mahse, anni lah chuan an lo ngâithla tha duh bawk thîn si lo (Jer. 35:14–17, Sam 81:11–14 chhiar ang che).
Ezra 5:12 chhiar la; tichuan, Jeremia 51:24, 25, 44 nên khâikhin ang che. Hei hian Babulon mite kal tlanga Jerusalem chunga rorêlna/hremna lo thlen chhan kha engtin nge a sawi fiah? (2 Chron. 36:16 pawh chhiar bawk che.)
Ezra bung 5-a kan hmuh dânin, Juda mipuite’n Pathian ti thinrim zâwnga thil sual an tih chhunzawm reng avâng khân Pathian chuan a kalsan ta nge nge a, mipuite pawh “Babulon lal Nebukadnezzara kutah a pe ta bawk a” (Ezra 5:12). Mahse, hei hi anmahni chhan chhuahna tûr kawng dang pakhat mah a awm tawh lo hnu-ah chauh a ti thung (2 Chron. 36:16). Tichuan, a hnu-ah Babulon ngei pawh hi Juda-te chunga a chêt hleihluak êm avângin a hrem ve leh ta tho a ni (Jer. 51:24, 25, 44; Zak. 1:15 nên khâikhin ang che).
Pathianin a thlentîr nia Bible-in a sawi hremna dang tam tak, entîr nân, Israel mite chu an hmêlmate kutah Pathianin “pe” tia (Ror. 2:13, 14; Sam 106:41, 42) a sawi ang te pawh hi a nihna takah chuan Lalpa an hawisan a, hnam dangte “pathian” rawngbâwl an thlan tâk zâwk avâng a ni thîn a (Ror. 10:6–16, Deut. 29:24–26). Sual laka Pathian thinrimna, sual leh thil tha lo zawng zawng boral hlen vekna la thlentîrtu tûr chu mi zawng zawng a hmangaihna leh, lei leh vân pum pui tâna tha ber tûr a duhna atanga lo chhuak niin, chu pawh chuan sualna leh helna leh thil tha lo chi hrang hrang lo thlen thin chhan hriat châkna min neihtîr bawk a ni.
Pathian chuan mi tuma chungah hremna thlentîr a duh lo tih thu hian engtiangin nge Pathian thinurna leh thinrimna i hriat thiam dânah nghawng a neih? Pathian chu thinrim ve mai mai ngâi lo a nih si chuan, keini pawh hi kan bula awmte lakah kan dawhtheiin kan thin a nel tûr a ni ve dâwn lo’m ni? Chutiang chu thil dik lo tih avânga tuarte ngaihsak leh thlavâng hausak pah chungin engtin nge kan tih theih ang?
Ningani January 30
Khawngaihna lantîrin
Pathian thinurna hi thil “râpthlâk” tak ni mah se, thil dik lo tak, âwm ang lo tak leh nunrâwnthlâk tak erawh a ni lo thung. Nih ahnehin, Thuthlung Hlui leh Thuthlung Thar lehkhabu-ahte hian Pathianin sual laka a thinrimna a tih lanna kan hmu tam hle a, a thinrim chhan pawh a hmangaihna vâng a ni zêl thîn bawk. Pathian thinurna hi a râpthlâk êm êm chhan chu sual hi a râpthlâk êm vâng a ni a, Pathian thatna thianghlim tak leh mâwina nên an inrem hlawl lo.
Hemi chungchângah hian kan hriat tûr pawimawh tak a awm a, chu chu Pathianin a ngaih pawimawh chu thinrimna ni loin, hmangaihna zâwk a ni tih hi a ni. Sual emaw, dik lo taka thil tihna emaw a awm lohna hmunah chuan thinrimna pawh a awm ngâi lo a. Khawvêl tâwp hun, Pathian hmangaihna thil tih ropui berin lei leh vân zawng zawng ata sual leh thil tha lo tinrêng a tih boral zawh vek hunah chuan sual leh dik lo taka thil tihna ang chi rêng rêng pakhat mah a awm tawh lo ang. Nuam tihna leh dik taka thil tihna chu chatuanin an inzawm tlat tawh ang a. Pathian thinurna pawh, a thlen a tûl dâwn tawh miau loh avângin a thleng leh tawh ngâi lo ang. A va nuam dâwn êm!
Mi thenkhat chuan Pathian thinrimna tih hi an tum rêng vâng pawh ni bîk chuang loin mi tute’n emaw thil dik lo titu nia an ngaihte chunga thinrim hrîkthlâkna atân chhuanlamah an hmang mai ang tih an hlau thîn a. Deuteronomi 32:35, Thufingte 20:22, Thufingte 24:29, Rom 12:17–21, leh Hebrai 10:30 te hi chhiar la. Hêng Bible chângte hian engtiangin nge keimahni’n phuba lâk ve kan lo tumna kawngah mi a vên?
Pathian Lehkhabu-in min zirtîr dân chuan, Pathian hi mihringte chunga hremna thlentîr theitu ni a, chutianga a thlentîr rêng rêng chuan dik tak leh fel tak zêlin a ti thîn bawk. Thuthlung Hlui leh Thuthlung Thar lehkhabute hian kan chunga thil sual titute laka phuba latu tûr chu Pathian chauh a nih thu chiang takin an sawi hlawm a. Paula pawhin hetiang hian Rom 12:19-ah a lo sawi: “Duh takte u, in phuba la suh ula, Pathian thinurna chu hmun kian zâwk rawh u, ‘Phuba rêng rêng keima lâk tûr a ni, keima’n ka thungrûl ang’ Lalpa’n a ti” (he thu hi Deuteronomi 32:35 atanga lâk chhuah a ni).
Khawvêl tâwp hunah Pathian chuan hleih neihna leh thil tha lo zawng zawng ti tâwp vekin, dikna a la tungding dâwn a ni tih hi thu dik ni tho mah se, Krista’n amah ringtu zawng zawngte tân kawng a lo sial tawh a. Amah hi thinur lo thleng tûr laka min chhanchhuaktu chu a ni (1 Thes. 1:10; Rom 5:8, 9 pawh chhiar bawk angche). Tin, chu chu Pathian ruahman ve rêng a ni bawk a: “Pathian chuan thinurna tuar tûr ni loin, kan Lalpa Isua Krista zâra chhandamna hmu tûr zâwkin min ruat a ni” (1 Thes. 5:9, NKJV). Isua thihna khân Pathian thinurna chu eng mah loah a siam ta a ni lo a, amah ringtute chu amah avângin chutiang thinurna lak ata chu chhanchhuahin an awm dâwn a ni zâwk.
Engtiang kawngin nge Krista inthâwina siam khân Pathian thinurna lak ata min chhanchhuah bâkah, dikna pawh a tun din nghâl bawk? Tlin lohna tam tak i nei chungin Pathian thinurna lo thleng tûr laka ata chu chhanchhuah i nih theihna tûr kawng buatsaihsak i ni tih i lo hre ta a, chuti a nih chuan mi dangte lakah pawh khawngaihna i lantîr ve thîn tûr ni ngei dâwn lo’m ni?
Zirtawpni January 31
Zir belhna: Ellen G. White-i lehkhabu, Thlahtubulte leh Zâwlneite bung 28, “Sinai Tlânga Milem Biakna” (phêk 318–334) chhiar ni se.
Israel fate’n rangkachaka siam bawng no lim chibai bûka thil sual râpthlâk tak an tih chungchângah khân heti hian Ellen G. White-i chuan a lo ziak a: “Israel mite hian, anmahni malsâwma duhsak êm êmtu Lalpa chu a thu an âwih ang a, tih nuam takin an awm ang tih lo tiam tawh mah se, an phatsan leh ta si a. Chu vângin, Pathian sawrkâr chuan dikna tung dingin, phatsantute chu a hrem ngei a tûl ta a ni. Nimahsela, hetah pawh hian Pathian khawngaihna chu lantîrin a awm tho thung a. A dân chu a dinchantîr tho lâiin, mi zawng zawng hnênah duh thlan theihna leh an sualte sim leh theihna remchâng pawh a siamsak tho bawk. Chuti chunga la hel lui tlat zêlte chauh chu sah thlâkin an awm ta a ni.
“He sual hi, an chheh vêla chêng ve hnam dangte’n Pathianin milem biakna a haw hle a ni tih an lo hriat theih nân hrem a nih ngei a tûl a. Mosia hian Pathian hmanrua a nih angin, thil sual titute chunga hremna a thlentîrna hmangin, an thil sual tih chu mi zawng zawng hriatah urhsûn takin lo chhianchhiah tûr a ni. Hrem lohin lo chhuah ta se, nakîn hnu-a Israel mite hian an chheh vêla awm hnamte’n milem an biakna thiam loh chantîr an tum hun a la awm dâwn a, chutih hunah chuan an hmêlmate’n Jehova chu an Pathian nia chhâltute ngeite pawhin Horeb-ah khân bawng no lim siamin chibai an lo bûk ve tawh tho tih an la sawi chhuak mai dâwn a. Chu vângin, he thu dik tak hi hriat nuam lo tak chu ni mah se, bawhchhetute chan râpthlâkzia entîrna atân hmangin, anmahni sual ngei pawh ngaihhnathiam a nih bîkzia an la sawi thei zâwk dâwn a ni.
“Hmangaihna chuan dik taka thil tih a phût tlat a; chuvâng chuan, he sual pawh hi hrem ngei tûr a ni. . . . Mi maktaduai têl chunga hremna lo thleng tûr lo vên nâna mi sâng eng emaw zâtin an tuar hi Pathian khawngaihna a ni a. Mi tam tak chhanhima an awm theih nân mi tlêm azâwng tal chu a hrem a tûl tlat a ni.”—Ellen G. White, Thlahtubulte leh Zâwlneite, phêk 324, 325.
Sawi ho tûr te:
1. Eng vângin nge mi tam tak hian Pathian thinurna tih thu hi a awmzia an hriat thiam loh tlat mai le? Nang erawhin i lo hriat thiam bîk chhan chu eng nge ni?
2. Kan chunga thil sual titute lakah phuba lâk kan tum hian, Pathianin phuba lâk a tuma lo chhuak miah lo tûr eng buaina nge lo chhuak thîn?
3. Israel fate’n rangkachaka siam bâwng no lim an siam chibai an bûk hnua an chunga Pathian hremna lo thleng ta kha engtiangin nge Pathian khawngaihna lo lan chhuahna pawh a ni nghâl tho bawk? Bible-ah hian Pathian rorêlna lo thleng chu a hmangaih thil tih a ni nghâl bawk tih entîrtu thil thleng dang eng engte nge awm?4. Pathian chu mi sualte lakah thinrimna dika thinrimin, an chungah rorêlna dik leh tha famkim a thlentîr ta thîn a ni tih hre tho mah ila, mi dangte thiam loh chantîr leh dem lo tûra kan insûm erawh a pawimawh hle thung. Hemi chungchâng hi 1 Korinth 4:5 chhiar phawt ula, in sawi ho dâwn nia.