2025 2nd Quarter Earliteen Zirlai-1-na

Zirlâi 1 April 5, 2025

HARH RENG ILA

Chângvawn: “In ritphurhte chu inchhâwk tawn rawh u; chutichuan Krista dân thu chu in zâwm a ni ang” (Galatia 6:2).

Chhiar tûrte: Matthaia 26:31–46; Chatuan Nghahfâk, pp. 685–697;

Chakna thu: Krista hmangaihna chuan mamawh chânga intanpui tawn tûrin min   hruai.

Rei tak motor-a chuang angah han inngâi chhin teh u. In chuanna motor khalhtu chu a mut chhuah loh nân in tawng mawlh mawlh hnu-ah zâi rimâwite in ngâithla bawk a. Chutah a rei tak em avângin in mut a lo chhuak a, in meng hlei thei ta lo. Chutah in muhîl ta nge nge a. In rilru chuan la men in duh naa, in taksain a tlin ta ngang lo a ni. Chutiang chiah chuan zirtîrte pawh Isua’n tanpui a ngaih lâi tak khân an lo awm ve tawh asin!

Thian rual sâwm leh pahnihte chu thim zîngah zâwi muangin an kal dam dam a. An hotupa thu sawi hriat tumin an innêk deuh tâlh tâlh bawk a. Ni dang zawng âiin a tawng zâwi lehnghâl. “Zânin hian min tlânchhiatsan vek ang,” a ti sap a.

Petera chuan a unau Andria chu a va melh zauh a. Zirtîrtu chuan a hre sual chhiava a ni. Kum thum zet an lo inkâwm ve tawh a, thil tam tak an lo tuar ho tawh bawk a, an nun pawh a inthlâk nasa tawh hle bawk. Chutiang khawpa inkâwm ngeih chu engtin nge an inphatsan leh mai mai theih ang?

Isua chuan, “‘Berâmpu chu ka vua ang a, a berâmte chu an darh vek ang,’ tih ziak a ni,” a ti a. Petera chu a thaw huai a, Isua hnênah chuan, “Mi dang zawng zawng hian kalsan che mah se, kei chuan ka kalsan ve lo vang che,” a ti a.

Isua’n Petera chu a en a, “Ka hrilh a che. Zânin hian âr a khuan hmain nangin vawithum mi phat ang,” a ti a. Petera chu a hawi phâwk nasa kher mai. A inchhuih tlu thelh a ni. Isua hma lamah kalin a hawi lêt a, a hnênah, “Teuh lo mai. Thi dâwn hial pawh ni ila, ka phatsan miah lo vang che,” a ti leh a. Mi dang pawhin Petera thu sawi chu an pawm hle tih entîr nân an lo thûm hak a. Petera chauh a rinawm bîk lo, heta awm rêng rêng hi chu thian tha tak tak vek an ni.

Isua chuan thu dang sawi tam lovin a huan ngainat êm êm, Olive thing tamna Gethsemani lam chu a panpui zêl a. Olive thingbuk tlar dul mai bulah chuan thutpuiin, “Hetah hian lo awm ula, ka va tawngtâi lawk ang e,” a ti a. Petera leh Johana leh Jacoba te chu a bula kal tûrin a zaizir a. A hmêl an en lâi chuan Isua chu a ngui hle mai. “Zânin hian thi khawp hialin ka lungngâi a ni. Hetah hian lo awm ula, min lo vênpui rawh u,” a ti ta hial a. Tichuan, an piah lawk hnim buk phênah chuan kal hrangin a bawkkhup thlawrh a, a tawngtâi ta a.

Petera te pathum chu a ngaihna hre lovin an inen hê hâw hlâwm a. Chutiang êm êma Isua lungngâi hmêl chu an la hmu ngâi lo. Engin nge khati êm êma han tilungngâi ta chu le? Isua chu a chau tak tak ang em tiin an inzâwt a, an inthut hnaih hriau hriau bawk a. Anni chu an chau khawp mai. Jacoba phei chu a meng lui thei ta ngang lo; a bula thing chu a nghêng a, a chat thla zui ta nghâl a. Petera pawh a dang chuang lo; Jacoba thing nghen lâi chu a sîr lehlama nghêngin a muhîl ve leh nghâl a.

Johana chuan Isua awmna lam thimtham chu a va bih dêk dêk a. Engmah a va hmu si lo. A mangang kher mai. Hetiang taka Isua lungngâi hmêl hi a la hmu ngâi bîk lo va. Tanpui theih dân awm se a ti hle a ni.

Chutih lâi chuan Isua chu a tawngtâi reng a. Hunte chu kal muang hle hian a hria a. A Pa hnêna a duhzâwng thlen mai loh chu tih theih dang rêng a nei lo. “A theih hrâm chuan he no hi la sawn lul rawh; nimahsela, ka thu ni lovin i thu ni rawh se,” a ti a.

A tâwpah Isua chu a tho a, a thiante pathum awmna lam chu a rawn pan a. Thla rawn chhuak chuan a thiante pathum lo muhîl bawrh bawrh lâi chu chiang tak hian a rawn chhun a. A khawhar kher mai. Petera phei chu a hnâr nasa hle. Isua chuan a dârah a zu sâwi lâwp lâwp a, “Dârkâr khat chauh tal pawh min vênpui thei lo amaw?” a zuk ti a. “Harh ula, tawngtâi rawh u, chuti lo zawng, thlêmna chuan a hneh mai ang che u,” a ti leh a. Petera, Johana leh Jacoba te chu mut kham lo tih hriat zet hian an rawn meng a. Isua kal sawn tûr chu chiang lo ruaiin an rawn hmu hman tâwk chauh a ni.

Isua chu bawkkhup bawkin, “A theih hrâm chuan he no hi la sawn lul rawh. Nimahsela, ka thu ni lovin i thu ni rawh se,” tiin a va tawngtâi leh a.

Isua chu a Pa hnênah rei tak a tawngtâi a. Mi pahnih khat tal amah rawn hnêm tûr awm se a ti ngei mai. Thlamuantu a ngâi hle a ni. Petera, Johana leh Jacoba te chu a bul maiah chuan awm mah se, an muhîl bawrh bawrh mai si a. Leia a thian tha ber berte chuan a mamawh lâi takin an tanpui thei lo a nih chu.

A Pa erawh chuan hrehawm a tawrh lâiin a Fapa chu a kalsan lo. Vân atangin Isua thlamuan tûr leh a hmaa tih tûr a hlen theih nâna chakna pe tûr vântirhkoh a rawn tîr a. Petera te, Johana te leh Jacoba te tih theih loh ti tûrin vân ata vântirhkoh chu a rawn tîr a ni.

Tih Tûrte

Sunday          

1. Matthaia 26:29–46 leh tûn kâr zirlâi hi chhiar ang che.

2. Tûna harsatna tâwk maithei i thiante hming ziak tlar la. Tûn kâr chhûng ni tin an tana i tawngtâi hun tûr siamsak theuh ang che. Pathianin an tâna a tihsak theih ngaihtuah bawk rawh.

3. Chângvawn hi zir nghâl la. 

4. Natna tuar leh beidawngte tân tawngtâi ang che.

Thawhtanni   

1. Tirhkohte 20:35 chhiar la. 

2. Aluminium phêk, wire, paper leh gum te’n emaw mi lungngâi hmêl lem siam la. Mite harsatna hrethiam lehzual tûra i rilru a tihharh reng theihna tûr hmunah dah ang che. 

3. Tûn kâr hian mite tân eng thil nge tih i tum? I tum chu hlen rawh. 

4. Chângvawn hi zir leh rawh.

5. Tûn kâr chhûng hian mite mamawh i hriat reng theih nân tawngtâi ang che.

Thawhlehni

1. Matthaia 26:41 chhiar rawh.

2 A chunga Isua’n “inring rengin” a tih awmzia khi eng nge ni ang? Engtin nge i inrin reng theih ang?

3. Chângvawn kha en nawn leh rawh.

4. Hrehawm tuar mêk i hriatte tân tawngtâi la. Chûng mite chu i tanpui theih nân Pathian hnênah finna leh huaisenna dîl ang che.

Nilaini 

1. Galatia 6:2 chhiar la. 

2. Tlâwmngâi pâwl (entîr nân, YMA, MHIP, MUP) i hriat apiang han ziak teh. 

3. Chûng tlâwmngâi pâwl zînga pakhatah tal chuan engtin nge i inhman ve theih ang tih i nu leh pate sawipui la. Chu tlâwmngâi pâwl chu zawng chhuak la. Eng nge i tih theih zâwt rawh.

4. Chângvawn kha zir leh rawh.

5. I tâna tha ber tûr tlâwmngâi pâwl i hriat theih nân Isua dîl rawh.

Ningani          

1. Galatia 6:10 chhiar la.

2. Hla bu atangin Pathian chhûngkaw lam leh kan inhmangaih tawn dân tûr sawina hla zawng chhuak la, sa rawh u. 

3. A hla thu chuan i nunah eng thu nge a sawi?

4. Puitling hnênah mi dang an puih tawh dân leh mamawh an neih chânga min an puih tawh dân zâwt ang che. 

5. Chângvawn kha zir leh rawh.

6. I hun kal tawha miin an fuihna che leh an puihna che avâng khân Pathian hnênah lâwmthu sawi rawh.

Zirtawpni      

1. Thuhriltu 4:10 chhiar ang che.

2. In chhûngkaw inkhâwmnaa sawi tûr Bible thawnthu thlang la.

3. Chângvawn kha en lovin sawi rawh.

4. Tûn hnâi maiah hian mi, rinna kawnga tlu i hmu em? Engtin nge i tanpui ang? 5. Mi i lo tih beidawn tawhnaah ngaihdam dîl la. Inring renga awma i tawngtâi zêl theih nâna nangmah tiharh reng tûrin Thlarau Thianghlim dîl rawh.