2025 2nd Quarter Earliteen Zirlai-10-na
Zirlâi 10 June 7, 2025
FAKNA HUN INTANNA CHAUH A NI
Chhiar tûrte: 1 Korinth 15:51, 52; 1 Thessalonika 4:16, 17; Thupuan 14:1–5; Indona
Ropui, bung 40, pp. 635–652; The Bible Story (1994), vol. 10, pp. 196–200; Kan Kohhran Thurin, no. 25, 27, 10.
Chângvawn: “Lalpa chuan sualna zawng zawng lakah mi chhan chhuak ang a, a vânramah chuan him takin mi thlen ang; amah chu chatuana ropuiin awm rawh se. Amen” (2 Timothea 4:18)
Chakna thu: Kum sâng rorêl chhûngin vânah khian Pathian kan fak ang a, chibai kan bûk bawk ang.
Isua lo kal leh thlenga lo la dam a, tichuan, ama ruala vâna chhoh ve i châk em? Chu ni ropui tak lo thlen hun tûr leh, hmâi chhan ngeia Isua i hmuh hun tûr chu han ngaihtuah lawk la. Chumi hun atâna lo inbuatsaih nân chuan tûnah hian eng nge tih theih i neih le?
Khawvêl hi a boral vek dâwn emaw tih khawp hial a nih hunah chuan chhûm dum chhah tak takte khi a rawn inhawng ang a; tichuan, leia mi zawng zawngin thiltihtheihna leh ropuina nasa tak nêna vân chhûm chunga Isua lo kal chu an hmu ang (Matthaia 24:30). Chutih hunah chuan, “Lalpa ngei chu au thâwm nên, vântirhkoh chungnung ber aw nên, Pathian tâwtawrâwt ri nên vân atangin a lo chhuk dâwn ni” (1 Thessalonika 4:16).
Thlânte chu a lo inhawng ang a, “mi tam tak, lei vaivuta muhîl tawhte chu an lo tho ang a, thenkhat chu chatuana nunna chang tûr an nih lâiin, thenkhat dang erawh zahna leh hmuhsitna chang tûr an ni ve thung dâwn a ni” (Daniela 12:2). “Chumi hunah chuan [Krista’n] a vântirhkohte chu a tîr chhuak ang a, a thlante chu kâwlkil li ata, lei tâwp atanga vân tâwp thlengin a lâwr khâwm ang” (Marka 13:27). Isua zuitu chu an lo tho hmasa ang a. Tichuan, Isua zuitu nung dama lo la awmte nên chuan boruakah khian Lalpa hmuak tûrin boruakah lâk chhoh kan ni dâwn a ni (1 Thessalonika 4:16, 17).
Chumi niah chuan chhandamte chuan sual hnuhma an pu tawh dâwn lo va—dam lohna, pian sualna, leh natna eng mah an nei tawh lo vang. “Rei lo te-ah tâwtawrâwt hnuhnûng ber a rîk hunah chuan mit khap kâr lovah tihdanglamin kan awm vek tawh dâwn a” (1 Korinth 15:51, 52). Tichuan, vâna kan chênna tûr in, “room tam tak awmna Pa Pathian In” lam pan chuan kan chho tawh ang (Johana 14:2).
Khawpui Thianghlim kawngkhâra kan han luh hunah chuan kan thil hmuhte chu a mâwiin a ropui hlâwm dâwn lutuk a, kan rilru hian a hrethiam lo hial ang. Vânrama thil awmte chu leia kan thil hmuh leh hriatte nên a inthlau êm êm dâwn a. Dik tak phei chuan, “mita hmuh ngâi loh leh benga hriat ngâi loh, mihring rilru pawha la lût ngâi miah lo, Pathianin amah hmangaihtute tâna a lo buatsaihate a ni” (1 Korinth 2:9). A kawtthlêrte lah chu leia kan hmuh thin kawtthlêrte nên chuan inthlau tak a ni bawk dâwn a. “Rangkachak hlang hlaka” siam niin, “dârthlalang en tlang theih ang mai a ni ang (Thupuan 21:21 en la).
Khawpui chu kan han fang kual vêl ang a, chhandam kan nih theihna tûra Isua’n a lo kalsan ropuizia chu hre chhuakin, mak kan ti êm êm dâwn a ni. Kan lua a rawn dah lallukhumte chu kan tâna a inhlanna rilru min hriat chhuah thartîrtu a ni ang a (2 Timothy 4:8 en la), amah fakna hla sak kan bâng ngâi lo vang.
Vânah chuan leia kan hriat ngâi loh remna leh muanna a awm dâwn a. Setana leh a tirhkohte chu mi thlêm tûr leh suala mi hruai lût tûrin a awm tawh lo vang.
Thil thar hriat thar tûr leh zir tûr tam tak a awm dâwn a. Zawhna tam tak kan nei ang. Kum 1,000 chhûng chu leia kan awm lâia kan rilrua lo la lût ngâi rêng rêng lo thil thar mit la tak takte zir nân kan hmang dâwn a. Vânthengrengah khian zin kualin kan la thlen ngâi loh hmun thar nuam tak takte kan tlawh ang. Pathian thil siam mak leh ropui tak takte chu kan hmu ang a, chûngte atang chuan Pathian hmangaihna ropuizia kan zir chhuak dâwn a ni.
An awm dân tûr anga thil siamte awmtîrtu science dânte chu kan thlîr thei tawh bawk ang a. Pathian thil siama ri mâwi chi hrang hrang awmte chu hriain, chûngte’na Siamtu fakna hla inchawih mâwi taka an sak rite chu kan ngâithla thîn dâwn a ni.
Kan zir tûr pui ber chu chhandamna ruahman chanchin a ni dâwn a. Isua chanchin kan la hriat lohte chu hriat belhin, Pathian nêna awm dûn reng thîn ni si, khawvêlah lo kala, kan zîngah chêng ve-a, min chhandam nâna kan âiawha a rawn inpêk tâk dânte chu zir nuam kan ti hle ang. Pathian rilru kan lo hriat thiam leh zual hnu chuan, “Krista hmangaihna zauzia leh seizia, thûkzia leh sânzia” kan lo hre tan ang a (Ephesi 3:18, 19 en la). A va han ropui dâwn êm!
Pathian thiltumte leh ruahmannate chu zira kan lo hriat belh hnu chuan, kan thla a muang siai siai dâwn a. Zâwlnei Isaia chuan Isua lo kal lehna leh chumi hnua thil thleng tûrte chuan “Ziona lungngâia awm zawng zawngte chu thlamuanin, vut âiah pangpâr thi hrui te, lungngaih âiah hlimna hriak te, nguina rilru âiah fakna silhfên te” a pe dâwn a ni a ti (Isaia 61:3 en la).
“Hêng thu hriattîrtu hian, ‘A ni, ka lo kal thuai dâwn e’ a ti a.
“Amen. Lo kal ta che, Lalpa Isu!” (Thupuan 22:20).
Tih Tûrte
Sunday
1. 1 Korinth 15:51, 52 leh tûn kâr zirlâi hi chhiar ang che.
2. Chângvawn kha a thlûk siam la, en lova sawi/sak tum an che.
3. Music note siam la, chutah chuan Isua fakna hla thu i ziak dâwn nia.
4.I thinlung khân Isua chu a hmangaihna ropui tak avângin fak rawh se.
Thawhtanni
1. 1 Thessalonika 4:16, 17 chhiar ang che.
2.Isua lo kal leh huna thil thelng tûrte chu han ziak chhuak teh:
_______________________________
_______________________________
_______________________________
_______________________________
3. Chângvawn kha zir leh rawh
4.Isua hnênah a lo kal lehna atâna buatsaih tûr chein ngên rawh.
Thawhlehni
1. Thupuan 14:1–5 chhiar ang che.
2. “An chala a Pa hming ziak” (châng 1) tih hi eng nge ni a awmzia? Isua chanchin hi engtianga zingin nge mi dangte hnênah i sawi thin?
3. I nu emaw, i pa emaw, i u-te emaw hnênah khân mi 144,000-te hi tute nge an nih zâwt ang che.
4. Chângvawn kha zir leh rawh
3.Isua hnênah i rilru-a a Thu rawn dah tûrin dîl ang che.
Nilaini
1. Thupuan 1:7 chhiar rawh.
2. He thu hian engtiangin nge Isua lo kal lehna chu a rûka mi thianghlimte lâwrna a nih lohzia a sawi fiah?
3.Mi tu emaw hnênah Isua chu a lo kal leh thuai dâwn a ni tih thuthiam hi hrilh chhâwng ve ang che.
4. Chângvawn kha chhiar leh rawh.
5.Isua hnênah a lo kal thuai dâwn avângin lâwmthu hrilh rawh.
Ningani
1. Johana 14:1–3 chhiar ang che.
2. Mi tu emaw hnênah Isua chuan lo kala, mi hruai haw thuai thuai a châk tawh a ni tih engtin nge i hrilh theih ang?
3. Chângvawn kha chhiar leh rawh.
4.Pathian hnênah chatuana nunna a pêk che avângin lâwmthu i sawi dâwn nia.
Ningani
1. Thupuan 22:20 chhiar ang che.
2. In chhûngkaw inkhâwmah Pathian fakna hlate sa ula. In thiam phei chuan, Isua fakna hla thar phuah nghe nghe ang che u.
3. In chhûngkaw thlalâkte thlîr ula, vâna Pathian chhûngte zawng zawng nêna intawh khâwmna hun awm tûr chungchâng sawi ho ang che u. 4. Chângvawn kha zir leh rawh.
5.Pathian chu hmâi chhan ngeia i la hmuh dâwn avângin fak ang che.