2025 2nd Quarter Earliteen Zirlai-11-na

Zirlâi 11 June 14, 2025

VÂNA KUM SÂNGKHAT

Chhiar tûrte: Thupuan 19:6–9; 20:1–6; Indona Ropui, bung 41, pp. 653–661; The Bible Story (1994), vol. 10, pp. 196–200; Kan Kohhran Thurin, no. 27, 3, 10.

Chângvawn: ““Tin, dârthlalang, mei nêna inpawlh tuifinriat ni âwm tak ka hmu a; sakawlh te, a lem te, a hming nambar te hneha lo chhuakte chu Pathian tingtang kenga, dârthlalang tuifinriat kama ding ka hmu bawk a. Tin, Pathian bâwih Mosia hla leh Berâmno hla, ‘Aw Lalpa Pathian, Engkimtithei, i thiltihte chu a ropuiin a mak a; nang, hnam tin Lalber, i kawngte chu a felin a dik a ni. . .’ tih an sa a” (Thupuan 15:2, 3)

Chakna thu: Pathian chu dik taka ro a rêl avâng leh khawngaihnaa a khah avângin kan fak ang.

Vânah khian Isua hova kum 1,000 chhûng han chên chu i duh ang em? Kum sângkhat chu vâna Isua hova hun hman bultanna a ni dâwn a. Tûnah hian kum sâng rorêl chu eng nge ni tih kan en ho ang a, chumi chhûng chuan eng thil nge thleng dâwn tih Bible hmangin i lo zir dâwn teh ang.

“Pathianin amah hmangaihtute tâna a lo buatsaih thilte chu mitin a la hmuh ngâi loh, bêngin a la hriat ngâi loh, mihring rilru pawha la lût ngâi lo hrim hrim a ni” (1 Korinth 2:9). Bible hian Pathian vânram chanchin thiam takin min lo hrilh a. Mahse, a tak taka kan hriatthiam hun tûr chu a hmun kan han thlena, kan tâna Pathianin hmun a lo siam chu a ropui a ni tih kan han hriat hunah chauh a ni ang. Kan thil tawnte zînga ropui leh manhla ber tûr ni bawk chu hmâi chhana Isua kan hmu thei tûr leh chatuana a bula kan awm thei tawh tûr chu a ni: “A hmêl an hmu ang a, a hming chu an chalah a chuang bawk ang” (Thupuan 22:4). Chhandamte lâwmna chu a ropui dâwn êm avângin, “Ngâi teh, Pathian biak bûk chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang” (Thupuan 21:3).  

Chhandam ni tûr mipui sâng tam takte chanchin chu hetiang hian Johana’n a lo ziak a: “Hêng mite hi tihduhdahna nasa tak tuar chhuak tate kha an ni a, an kawrfual hâkte pawh hi Berâmno thisena sûk leh chumi hmanga tihvâr chu a ni. Chumi avâng chuan, Pathian lalthutthlêng hmaah an awm ta a, a biak inah chuan chhûnah leh zânah pawh a rawng an bâwl thîn. Tin, lalthutphaha thua chu an zîngah a chêng ve ang a. An ril a tâm leh tawh ngâi lo vang a, an tui pawh a hâl leh ngâi tawh hek lo vang. Niin a em hek lo vang a, a natna pawhin a tihrehawm hek lo vang; Berâmno, lalthutthlêng lâia awm chu anmahni vêngtu a ni ang a, ani chuan nunna tuikhurahte a hruai thîn ang. Tin, Pathian chuan an mit ata mittui zawng zawng a hrûk fâi sak vek bawk ang” (Thupuan 7:14–17). Chumi ni-ah chuan Isua’n a nunna thawh rim rah chu a hmu tawh ang a, a lung pawh a âwi hle dâwn a ni (Isaia 53:11). A tlan tawhte chu a ropuina hma taka nasa zeta hlima, bawlhhlawh kâi lova a hmuha vângin a hlim êm êm dâwn a ni (Juda 24).

Pathian fate chuan mihringte chanchin kal tawha thil thleng zawng zawngte kha a thlen chhan lo hrethiam tawhin, Krista leh Setana indo tawn dân pawh an hrethiam tawh ang a. Ngaihnawm ti taka chhandamna ruahman chanchin zirin, chhandam kan lo nih theihna tûra Pathianin man a pêk hlutzia pawh kan lo hre tawh bawk ang. Pathian thu âwih tûr leh Setana thlêmnate do dâl thei tûra min tanpuitu vântirhkoh thianghlimte hnathawh pawh kan lo hre tawh ang a. Kan sualte min hriat chhuahtîra, Isua hnên min hruai thlengtu Thlarau Thianghlim hna thawh avângin kan lâwm êm êm dâwn a ni. Tin, mi tinte duhthlanna siamin nghawng a neihte pawh târ lan a ni bawk ang.

Vânramah chuan vânram kâi tûra kan lo rin ni miah lote pawh kan hmu nawk dâwn a, hmuh ngei kan beisei si kal ve ta lo pawh an awm bawk ang. Pathian chuan mi a khawngaih avângin rorêlnaa kan tel ve min phalsak dâwn a, min phalsak chhan pawh vânrama hmuh kan beisei mi thenkhatte kan hmuh tâk loh chhan kan hriat theih nân a ni ang. Zâwlnei Daniela khân Hmakhawsânga a lo kala, a hnêna “Chungnungbera mi thianghlimte” hnêna rorêlna pêk a nih hun tûr chungchâng a lo ziak a (Daniela 7:22). Johana pawhin inlârnaah kum sâng rorêl chhûnga vâna rorêlna thleng tûr chu lo hmu-in hetiang hian a ziak: “Lalthutthlengte ka hmu a, chûngahte chuan mi an thu a, an hnênah chuan rorêlna pêk a ni a. . . . Thawhlehna hmasa bera telte chu an eng a thâwlin an thianghlim a ni. Chûngho chungah chuan thih hnihnain thu rêng a nei lo va, Pathian leh Krista puithiamte an ni ang a, amah nên kum sângkhat rorêlin an awm zâwk ang” (Thupuan 20:4–6).

Tichuan, Isua leh chhandamte chuan Setana leh a tirhkohte chungthu an ngaihtuah dâwn a: “Tûn dam chhûng khawsak thute chu sawi loh, vântirhkohte lam pawh kan ngaihtuah dâwn a ni” (1 Korinth 6:3). “Tin, vântirhkohte anmahni tirhkoh nihna pawm lova, an awmna pângngâi kalsan zâwkte chu, ni ropui rorêlna atân thim hnuaiah chuan phuarnaa phuar chungin a khêk a ni” (Juda 6).

Mi tinte nun leh thil tih zawng zawngte chu Pathian chatuan dân leh Pathian Lehkhabu Thianghlima tehfung kan hmuhte hmang hian teh vek a ni dâwn a. Chhinchhiahna lehkhabute chuan Pathian khawngaihna thilthlâwnpêk an hnâwl avânga chhandamna chân tate thutlûkna siam leh thiltihte chu a târ lang vek ang. Mi tinin an thiltih ang zêln lâwmman emaw, hremna emaw an hmu dâwn a. Chutichuan, lei leh vân zawng zawng hian Pathian dikzia, thiamzia, khawngaihna ngahzia leh dawhtheihzia an lo hmu tawh ang. Thil siam zawng zawngte chuan Pathianin amah ringtu apiangte chu chhandam vek tûrin a tih theih zawng zawng a ti a ni tih an hmu tawh dâwn an ni (Johana 3:16 en la).

Tih Tûrte

Sunday

1. Galatia 6:7–10 leh tûn kâr zirlâi hi chhiar ang che.
2. Chângvawn hi en lova sawi thei tûrin zir tan rawh.

3.Pathian hnênah tûnah hian amah chibai i bûk theih avâng leh vâna pawh amah i la fak leh theih dâwn bawk avângin lâwmthu sawi ang che.

Thawhtanni

1. Thupuan 22:4 chhiar rawh.
2. Hmâi chhana Isua i hmuh hunah chuan engtin nge i lâwmna leh hlimna i tihlan ang?

3. Tûn kârah hian mi tu emaw hnênah vânram chanchin i hriat tharte chu hrilh ve ang che.

4. Chângvawn kha zir leh rawh.

5.  Seventh-day Adventist Hla Bu-a number 218-na, “A Lo Kalin” tih kha sa ang che u.

6.Isua hnênah a lunghlute zînga a chhiar tel ve che avângin lâwm thu i sawi dâwn nia.

Thawhlehni

1.  Thupuan 20:1–4 leh 1 Korinth 6:3 chhiar ang che.
2.  Kum sâng rorêla mi thianghlimte’n an tih ve tûr chu eng nge ni? Tute chungthu nge an ngaihtuah dâwn?

3.  I nu leh pate hnênah khân kum sâng rorêl hma, chhûng leh hnua thil thlengte pawimawhna zâwt la. Kum sângkhat chhûng hian leiah hian eng nge lo thleng ang a, vânah pawh eng nge thleng ang?
4. Chângvawn kha zir leh rawh
5.Pathian hnênah a dika a fel avâng leh sualna leh a nghawng zawng zawng pawh kumkhua atâna a tihboral vek dâwn avângin lâwmthu sawi ang che.

Nilaini

1.  Thupuan 20:6 chhiar ang che.
2.  Kum sângkhat chhûnga mi thianghlimte leh Isua’n ro an rêl dân tûr chu eng nge ni? “Pathian puithiamte” an ni ang a, “ama hovin ro an rêl dâwn” tih thu hi eng nge ni a awmzia?

3.  Chângvawn kha zir leh rawh.
4.Pathian hnênah chatuana min awmpui dâwn avângin lâwmthu sawi ang che.

Ningani

1. Isaia 33:22 chhiar ang che.
2. He lâi chângah hian Isua nihna eng engte nge sawi lan a nih? Bible hian engtiangin nge hêng hnate Isua’n a thawh dân chu a sawi?

3.  Chângvawn kha zir leh rawh.
4.  Pathian hnênah i thil tih zawng zawnga amah i châwimâwi zêl theih nân a tanpuina dîl ang che.

Zirtawpni

1.  Sam 66:1–4 leh 98:7–9 chhiar ang che.
2.  Davida Sâm phuahte atang hian kan Pathian chu fak tlâk, châwimâwi phu leh chibai bûk tûr a nih dân eng engte nge kan zir chhuah theih? Engtin nge khawvêl chungah hian ro a rêl (Sam 98:9 en la)? I note bu-ah khân Pathian fakna hla chham chi (Sam) phuah ve la, i chhûngte hriat tûrin in chhûng inkhâwmah i chhiar chhuak dâwn nia.

4.  Chângvawn kha en lovin sawi rawh. 5.In chhûngkuain thingthi ula, Pathian chu a Khawpui Thianghlimah hmâi chhan ngeia i hmuha chibai in bûk theihna tûra buatsaih tûr che u-in dîl rawh u