2025 2nd Quarter Earliteen Zirlai-12-na

Zirlâi 12 June 21, 2025

MI ZAWNG ZAWNG AN THINGTHI ANG

Chhiar tûrte: Thupuan 20:7–10; 21:6–8; Indona Ropui, bung 4, pp. 662–674; The Bible Story (1994), vol. 10, pp. 201–204; Kan Kohhran Thurin, no. 27, 8, 10.

Chângvawn: “Chumi avâng chuan Isua hmingin mi tin—vâna mite, leia mite, lei hnuaia mite nên—an thingthit nân leh Pa Pathian tihropuina tûrin, ‘Isua Krista chu Lal a ni,’ tiin lei tinrêngin a puan nân, Pathianin ani chu nasa takin a châwimâwi ve ta thung a, hming zawng zawnga hming chungnung ber chu a pe ta a” (Philipi 2:9–11).

Chakna thu: Setana hnehtu Pathian chibai kan bûk a, ani chuan kumkhua atân sualna a la ti tâwp vek dâwn a ni.

Kâr hmasa khân Isua lo kal hnu, kum sâng rorêl chhûnga kan nun dân tûr chungchâng kan sawi nual tawh a. Tûn kârah hian kum sâng rorêl tâwp dâwn hnaih lama thil thleng tûrte kan sawi ve leh dâwn a ni.

Kum sâng rorêl chhûng zawng chuan Setana leh a tirhkohte chu leiah hian kum 1,000 an lo awm dâwn a. He an awmna hmun hi Bible chuan “khuarkhurum mawng nei lo”/“leilâwt” (Thupuan 20:3 en la) tiin a sawi. A awmzia chu, he kum sângkhat chhûng hian thlêm tûr tu mah a nei dâwn lo tihna a ni.

Chutah chuan kum 1,000 chhûng awmin, vâna helna a lo chawh chhuah khân nghawng tha lo a neih nasatzia a ngaihtuah chhuak ang a. Amah leh a hnung zuitute’n chatuana an chan tûr bâkah, Pathianin a khawngaihna avânga chhandamna ruahman a lo siam te pawh an ngaihtuah bawk ang. Kum sâng rorêl zawh a nih hunah Khawpui Thianghlim, Jerusalem Thar chu vân atangin a lo chhuk ang a. Lei lam pana Jerusalem Thar a chhuk lâi chuan Isua’n kum sângkhat a vei chhûnga leia lo thi tate zawng zawng chu lo nung leh tûrin a rawn au dâwn a ni. Isua chu an thlîr ang a, lalte Lal hmaah chuan an lo ding reng a ni tih an hria ang. Pathian lalthuthlêng chungah chuan mi tin hmuh theih tûrin chhandamna ruahmana thil thleng pawimawh tak takte chu târ chhuah a ni ang a, Evi leh Adama suala an tlûkna atanga tanin, Isua nun, a rawngbâwlna leh suala bo tawh mihringte chhandamna atâna krawsa a rawn thihna thlengin kan hmu vek dâwn a ni. Setana leh a tirhkohte pawhin an thil sual tihte chu an pawm tawh ang a, Pathian hna thawh an dodâl thin dân zawng zawngte pawh pho lan vek a ni ang. Lei leh vâna awm zawng zawngte chuan Pathian dikzia, dik taka rorêltu a nih dân an hmu vek dâwn a ni.

Setana leh amah zuitute zawng zawng chu Pathian rorêlna hmaah thiam loh changin an ding dâwn a. Pathian sawrkâr paih thlâk an tum avâng khân hrem a ni ang. Tu mahin an thlavâng an hauh dâwn lo va. Chhuanlam siam tûr pakhat mah an nei lo vang. Chatuana thi tûr a nih thu puan a ni ang a, “sual man chu thihna a lo ni ngei” (Rom 6:23) tih chiang takin an hre tawh dâwn a ni.

A mit ngeiin Isua lallukhum khumtîr a ni lâi chu an hmu ang a; chutichuan, Pathian awmna hmun, chhandamte’n Pathian an fakna hmunah chuan inremna leh hlimna famkim a awm a ni tih an hria ang. Pathian chu eng kim chunga lal a ni tih an pawm ve tawh ang a, a hmaah bawkkhupin chibai an bûn dâwn a ni.

Lucifara tlûk thûkzia hi! Vântirhkohte zînga a chungnung ber leh, Pa awmnaa awm ve thîn ni si khân Pathian do tûrin mi a la fuihpawrh dâwn a. Ram tina mi, Pthian hnâwltute zawng zawng chuan Setana hi zuiin hotu-ah an pawm ang. Pathian leh a mite do tûrin an inko khâwm ang a, Khawpui Thianghlim chu lâk ngei tûmin an hual dâwn a ni.

Hetia an buai nuai nuai lâi hian Isua chu lalthutthlêng vârah a thu ang a. Chhinchhiahna lehkhabute chu keuvin, a sâwmna hnâwltute chuan an sualzia hriatna an lo nei ang. “Tin, lalthutphah lianpui vâr tak leh a chunga thu chu ka hmu a, a hma ata chu lei leh vân an tlân bo va, an tân hmun rêng a awm ta lo va. Tin, mitthite, a lian a tein, lalthutphah hmaa ding ka hmu a; tin, lehkhabute an hawng a; tin, lehkhabu dang, Nunna Bu chu an hawng bawk a; tin, mitthite chu lehkhabutea ziak an thiltih ang zêla rêlsakin an awm ta a” (Thupuan 20:11, 12).

Pathian nungchang chu khawvêl hmaah a famkima lantîrin a awm dâwn a. Mi sualte chuan kawng dik lo leh lal dik lo an lo thlang a ni tih an hre chhuak leh hnuhnawh ang. Tlante ang bawkin anni pawh hian Pathian chu hmangaihna a ni tih an hria ang a. “Aw Lalpa Pathian, Engkimtithei, i thiltihte chu a ropuiin a mak a; nang, mi thianghlimte Lalber, i kawngte chu a felin a dik a ni” tiin an puang ang (Thupuan 15:3).

Boral tûr mi tam takte’n an thil tih dik lohzia an hriat chhuah hunah chuan an lo ngaihsân êm êm thin an hruaitu chu huatna rilru nên an en tawh thung ang a. Ama hma a lo sialzia hriain, an haw hluah hluah tawh ang. Nimahsela, Pathian hmangaihna leh ngaihdamnaah chuan an la inpe duh dâwn chuang lo va, Pathian Khawpui Thianghlim chu lâk ngei tumin an pan hnâi dâwn a ni. Khawpui Thianghlim an hual lâi chuan vân ata mei a lo tla thla ang a, an zavâiin a kâng ral vek ang (Thupuan 20:9 en la).

Sualna leh mi sualte laka lei leh vân zawng zawng tlen fâi vek a nih hunah chuan mi zawng zawngin Isua chibai an bûk tawh ang a. Lei leh vân pum puiin Isua chu lalte Lal a ni tih an la puang dâwn a ni: “Chumi avâng chuan Isua hmingin mi tin—vâna mite, leia mite, lei hnuaia mite nên—an thingthit nân leh Pa Pathian tihropuina tûrin, ‘Isua Krista chu Lal a ni,’ tiin lei tinrêngin a puan nân” (Philipi 2:9, 10).

Lei leh vânah hian sual a lo lût leh tawh ngâi rêng rêng dâwn lo va. Setana sawrkâr leh Ptahian sawrkâr inbeihna chu kumkhua atân a tâwp tawh ang. “Ânchhia rêng rêng a awm tawh lo vang a (Thupuan 22:3), “thihna, lungngaihna leh tahna a awm tawh hek lo ang. Natna a awm tawh hek lo vang a, a chhan chu thil hmasate kha chu an ral tâk vâng a ni” (Thupuan 21:4). Tlante chuan, an Siamtu nên engkim an hmu thei tawh ang a, khawvêl siam a nih lâia a tha ang chiah khân a tha leh ta a ni tih an hria ang. Lei leh vân pum puiah remna leh muanna a awm ang a, “Pathian chu hmangaihna a ni” tiin an puang dâwn a ni (1 Johana 4:16).

Tih Tûrte

Sunday

1. Isaia 13:11 leh tûn kâr zirlâi hi chhiar ang che.

2. Chângvawn hi en lova sawi thei tûrin zir tan ang che.

3.Isua hnênah mi dangte hnâna a chanchin tha hrilh theihna hun remchâng siamsak tûr che-in dîl la. Tûn kârah hian mi tu emaw fuih phûrtu atâna a hman theih nân che tawngtâi bawk rawh.

Thawhtanni

1.  Thupuan 20:7–10 chhiar la.
2.  Sual sûlhnu zawng zawng hi, pakhat tih loh chu a vâia tihreh vek a ni dâwn a. Reh ve lo tur awm chhun chu eng nge ni? (Isua kut, ke leh nâka ser awmte kha a ni ang em?). Enga ti nge hêng serte hi Isua a put reng dâwn le?

3. Chângvawn kha zir leh rawh.
4.Pathian hnênah eng tikah emaw chuan Setana leh sual hi kumkhua atân a la tiboral vek dâwn tih a lo sawi avângin lâwmthu sawi ang che.

Thawhlehni

1. Thupuan 21:6–8 chhiar la..
2.Sual leh a nghawng tha lote a awm tawh miah loh hun tûr chu han suangtuah teh. Jerusalem Thara kan nun dân tûr nia i rin chu a lem ziak ang che.

3. Chângvawn kha zir leh rawh.
4.Isua hnênah kan tâna a rawn inrawlh avângin lâwmthu sawi ang che.

Nilaini

1. Daniela 6:25–27 chhiar la.
2. Tawhsual tâwkte (tui tla, kâng leh a dang) chhanchhuah an nih kawng dân hrang hrang ngaihtuah la. Chûng mite chu tute’n nge chhanchhuak?

3. Bo nia langte chhanchhuah dân tûr kawngte ngaihtuah la. Chûng mite hnênah chuan engtin nge Isua hmangaihna i târ lan theih ang?

4. Chângvawn kha zir leh rawh.
5. Pathian hnênah nangmah chhanchhuaktu che a nih avângin lâwmthu sawi rawh.

Ningani

1. Luka 18:16 chhiar la..
2. Isua’n Pathian emaw, vânram emaw neitu a tihte chu tute nge ni? Hei leiah hian Pathian ram âiawhtu i ni a. Enga ti nge i thil sawi leh i thil tih apiang a pawimawh?

3. Chângvawn kha zir leh rawh.
4.Pathian hnênah a lalram chêng thei tûr i nih avângin lâwmthu sawi rawh.

Zirtawpni

1. Thupuan 21:7 chhiar la..
2. Pathianin a khawngaihna rinchhana sual hnehtute pêk a tiam chu eng nge ni? In chhûng inkhâwmah Pathian fate’n sual leh a nghawngte pakhat mah a awm tawh loh huna an neih tûr a sawi chu eng engte nge ni? 3. Chângvawn kha en lovin sawi ang che.
4.Pathian hnênah a duh zâwng i tih theih nâk chakna dîl la. Setana leh sual laka hnehna a chan dâwn avângin a hming fak ang che.