2025 2nd Quarter Earliteen Zirlai-13-na

Zirlâi 13 June 28, 2025

LEI HI SIAM THAR VEK A NI ANG

Chhiar tûrte: Isaia 11:6–9; 65:17–19; 2 Petera 3:13; Thupuan 21; 22:1–5; Indona Ropui, bung 42, pp. 674–678; The Bible Story (1994), vol. 10, pp. 205–208;Kan Kohhran Thurin, no. 28, 2, 11.

Chângvawn: “Tin, lalthutphah atangin aw ring takin, ‘Ngâi teh, Pathian bâwkte chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hru fâi ang a; thihna a awm leh thei tawh lo vang a, lungngaih te, tah te, nat te pawh a awm leh tawh hek lo vang; thil hmasate chu a ral ta,’ a tih ka hria. Tin, lalthutphaha thu chuan, ‘Ngâi teh, thil engkim ka siam thar e,’ a ti a. Tin, ‘Ziak rawh, hêng thu hi a rinawmin a dik si a,’ a ti a” (Thupuan 21:3–5)

Chakna thu: Isua hovin lei tharah kumkhuain kan chêng tawh ang.

Kâr liam taah khân indona ropuia a râpthlâk lâi ber a thlen dân kan zir a nih kha. Setana, sual leh mi sualte chu tihboral an ni ta a. Tichuan, lei hi Pathian mite tân siam thar leh a ni ang. Lei siam thar tâka chêngte nun dân tûr chu i lo en ho ang u.

Sual leh Setana te chu tihboral zawh vek an ni ta a, Pathian mite pawhin chatuana an chênna tûr hmun chu an lo nei ta. He leiah hian kan lo awm reng tawh tho nachungin, lei thar chu kan lo hriat thin lei nên hi chuan a inang lo hle dâwn a. Engkim siam thar vek niin, sualin a nghawng chhuah thil tha lo hrang hrang laka zalên leh fihlîm a ni ang.

Bible hian lei thara kan chênna tûr hmun chanchin chu ngaihawm takin a lo ziak a.

Khawpui lâi takah chuan Pathian lalthutthlêng a inhûng a, chu chu sapphire lung mâwi hmanga chei niin, a êng pawh a pâwl phût mai a ni (Ezekiel 1:26; Ezekiela 10:1 en la). Lalthutphah hnuai atang chuan lui pakhat, a tui lah chu thianghlim êm êm, “krustal lung ang maia fiah fâi tha” hi a rawn luang chhuak a. Lui kama awm kawngah chuan kal kualin, thing mak danglam tak leh mâwi êm êm bawk si awmna chu kan va thleng ta. Chu thing chu a lo mak hle mai a, a bul lamah chuan pahnih ang niin, pakhat chu lui kam leh lama zung kaih niin, pakhat dang chu a kam leh lama zung kaih a ni ve thung. Chung lam kan han en chho ang a, a kûng chu lo inzawmin thingkûng pakhat ang a lo ni ta daih a. He thing hi “chi hrang sâwm leh pahniha rah” niin, “thla tinin” a rah ziah thîn bawk; a hnahte lah chu hnam tin tihdamna tûr a la ni leh ta zêl bawk si a ni (Thupuan 22:1, 2).

Isua khân, “A hnehtu apiang Pathian Paradis-a Nunna Thinga mi ka eitîr ang” tiin a lo sawi a (Thupuan 2:7). Eden huanah khân nunna thing rah chu duh duha lawh ngawt theih ni lovin, Pathian thu âwihte chauhin an lo thei a nih kha. Chuvâng chuan, Evi leh Adama te pawhin thil sual an tih hnu kha chuan nunna thing rahte chu an lo thei ta bîk lo va. Nimahsela, vânah erawh chuan chhandamte chuan eng mah khapna dân awm lovin nunna thing rahte an lo thei tawh ang.

A hlim hnuaiah chuan thu hahchâwlin, phâizâwl zau tak takte leh tlâng mâwi tak takte chu kan thlîr kual ang a, kan thinlungte chu Pathian fakna leh ngaihsânnain a lo khat ang. “Aw Lalpa Pathian, Engkimtithei, i thiltihte chu a ropuiin a mak a; nang, hnam tin Lalber, i kawngte chu a felin a dik a ni” (Thupuan 15:3) tiin kan zâi dâwn a ni.

Boruak pawh pangpâr rimtui tak ang maiin a rim a tui dâwn a; sava hrâm ri-te lah chu hriat a nuam êm êm mai dâwn bawk si. “Ka mite chu râlmuanga awmnaah leh a nghet takahte leh chawlhna hmun muanawm takahte chuan an awm tawh ang a.” “Tin, inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang” (Isaia 32:18; Isaia 65:21, 22).

Kan thinlung pawh a hahdam hle ang a. Hetiang hian Bible chuan vânram nihna mak leh ropui tak dang min hrilh leh bawk. “Tin, chinghnia chu berâm no nên an awm dun tawh ang a, keite chu kêl no nên an bawk dun tawh ang; bawng no leh sakeibâknei vânglâi leh ran châwmthaute chu an awm ho tawh ang a; naupang tê-in a hruai duah duah ang” (Isaia 11:6). Ramsa kawlhte leh hlauhawm tak tak nia kan ngaih thinte hi kan hlau tawh lo vang a; a chhan chu an rilru-ah Pathian hmangaihna a awm tawh dâwn vâng a ni.

Lei tharah chuan ni leh thla leh arsi-te pawh a awm lo vang a, a chhan pawh zân a awm tawh dâwn loh vâng a ni. Pathian ropuina atanga lo chhuak êng chuan ni ênna leh thla ênna chu a hliah vek dâwn a. “Khâwnvâr êng leh ni êng an ngâi lo vang a; Lalpa Pathian chuan anmahni a en dawn si a” (Thupuan 22:5).

Khawpui pâwn lamahte pawh kan lêng chhuak thîn dâwn a, chutia kan lên chhuah nikhua chângte chuan khawpui sak a nih dânte chu thlîrin mak kan ti hle ang. A kulhte lah chu a nghetin a chhah tha dâwn êm êm bawk si a, jasper lung hlang hlaka siam a ni (Thupuan 21:11, 18 en la). A lungphûm lan dân chuan chhimbâl a ang hle dâwn a, lunghlu chi hrang hrang— Jasper, sapphire, chalcedony, emerald, sardonyx, sardius, chrysolite, beryl, topaz, chrysoprase, jacinth, leh amethyst chu inchawih mâwi takin rem a ni ang (châng 19, 20 en la). Khawpui luhna kulh kawngkhârte chu lunghlu vâr chia siam a ni a, chu chuan a chhûnga chêngte thianghlimzia a entîr a ni.

Bible hian Jerusalem Thar ropuizia min hrilh mai bâkah, a pâwn lama awm mual leh tlâng, lui leh ruamte mâwizia pawh min mitthlatîr bawk a. Kan thiante leh kan chhûngkhatte’n an sak in mâwi tak takte, an huan siamte chu kan fang kual ang a, nuam kan ti hle ang (Isaia 65:21 en la).

Kan zavâiin Isua kawmna hun leh, kan rilrua awm thil eng pawh hrilhna hun tha tak kan nei theuh dâwn a. Vâna Pathian thil siam chi hrang hrang mâwi tak tak awmte chu hmu tûr leh dâidar a, an chanchin zir tûrin hun kan hmang thîn ang. A thar diain kan nun kan hmang tawh dâwn tihna a nih chu.

Lei thara thil mak leh nghahhlelhawm tûr ni bawk pakhat chu, chawlhkâr tina Pathian fate an inhmuh khâwma, Sabbath nia Pathian chibai an bûk ho ziah thîn tûr hi a ni. Pathian faka mi, a sâng a sângte’n hla an han sa ho tûr chu han mitthla chhin teh, a ropui dâwn a nia!

“‘Tin, heti hi a ni ang a, thla thar atanga thla thar dang thlengin, Chawlhni atanga Chawlhni dang thlengin mi zawng zawng ka hmaah chibai mi bûk tûrin an lo kal zut zut ang,’ Lalpa’n a ti” (Isaia 66:23).

Remna, inngeih tlânna leh hmangaihna dik tak awm tûr chu leia kan lo chan tawh âia nasa leh ropui zâwk daih a ni dâwn a. Chumi huna thil awm dân tûr chu hetiang hian Ellen G. White-i’n a lo sawi: “Indona ropui chu a lo tâwp ta a. Sual leh mi sualte pawh an awm tawh lo. Lei leh vân pum pui hi a lo thianghlim ta a. Thil siam zawng zawngah hian inremna leh lâwmna thuhmun a inzam chhuak vek ang. Engkim siamtu hnên atangin nunna, êng leh lâwmna lui a lo luang chhuak a, chu lui chuan tâwpin tâi awm lovin hmun tin a hrût chhuak vek dâwn a ni. Thil tê ber atanga khawvêl lian ber thlengin thil siam zawng zawng—nunna neite leh nei lote pawhin hliah khuhtu awm lovin mâwina leh hlimna famkim an pho lang ang a, Pathian chu hmangaihna a nihzia an ti lang theuh dâwn a ni” (Indona Ropui, p. 678).

Tih Tûrte

Sunday

1. Isaia 11:6–9 leh tûn kâr zirlâi hi chhiar ang che.

2. Chângvawn hi en lova sawi thei tûrin zir tan ang che.
3. Tûn kârah hian kan chênna lei vênhim him dân tûr kawng hrang hrang awmte ngaihtuah la. Chûngte chu i tihhlawhtlin theih dân tûr ziak chhuak bawk rawh.

4. Kan chheh vêla thil awm, nungchate leh thing leh maute enkawl kawnga finna i lo neih theih nân Pathian tanpuina dîl ang che.

Thawhtanni

1. Isaia 65:17–19 chhiar rawh.
2. He lâi thu-ah hian engtin nge lei thar awm dân tûr leh nihna a sawi?
3.Lei thara chêng thil siam tinrêngte chu inngeih tlâng leh thlamuang taka an awm lâi lem ziak rawh.

4. Chângvawn kha zir leh la.
5.Pathianin lei thara remna famkim a awmtîr dâwn avângin lâwmthu sawi rawh.

Thawhlehni

1. 2 Petera 3:13 chhiar ang che.
2. I note book-ah Isua hnêna lehkha i thawn tûr ziak la, chu lehkhaah chuan lei thara chên i nghahhlelh chhan i sawi dâwn nia.

3. Chângvawn kha zir leh rawh.
4.Tûnah hi chuan min tibuaitu thil tam takte avângin Pathian hnênah kan tawngtâi thîn a; mahse, vânah chuan kan tawngtâina thu pawh lâwmthu sawina leh Pathian fakna vek a ni tawh ang. Vawiinah hian Isua hnênah a malsâwmna i chan avânga i lâwmzia hrilh ang che. 

Nilaini

1. Thupuan 21:1–4 chhiar rawh.
2. I note bu-ah Thupuan 21:1–4-a thil a sawi thenkhatte avânga i lâwm chhan ziak ang che.

3. Tûn kârah hian mi tu emaw hnênah Pathian ram chanchin tha hrilh la. Phûr takin i Pathian ramin hlimna a pêk dân che kha i sawi dâwn nia.

4. Chângvawn kha zir leh rawh.
5.Isua hnênah a lalramah chuan chatuana i chên ve a phalsak che avângin lâwmthu sawi ang che.

Ningani

1. Thupuan 21:9–14 chhiar rawh.
2. I nu emaw nên khân in thenawmte hnêna in pêk tûr chhang ur ula. In va pêk hunah vânram chanchin hrilh ang che u. Vânramah pawh inthenawma in awm leh theih chuan a lâwmawm dâwn hle a ni tih te pawh in sawi dâwn nia.

3. Chângvawn kha zir leh la.
4.Pathian hnênah khawngaihnaa vânram kawngkhârte min hawnsak avângin lâwmthu sawi rawh.

Zirtawpni

1. Thupuan 22:1–5 chhiar ang che.
2. In chhûngkuain thla tina rah chhuah ziah thîn nunna thing chanchin sawi ho ang che u. 

3. I chhûngte hnênah khân kan khawvêl chhe tûr in ven theih dân tûr sawi la.

4. Chângvawn kha en lovin sawi theih tum ang che. 5.Pathian hnênah Isua chu hmâichhan ngeia i la hmuh theih dâwn avângin lâwmthu hrilh rawh.