2025 2nd Quarter Earliteen Zirlai-3-na

Zirlâi 3 April 19, 2025

KHAWVÂR RUALA INBÂRAKHAIHNA

Chângvawn: “‘Hetah a awm tawh lo ve, a tho leh ta; Galili rama a awm lâia in hnêna a thu sawi kha hre leh rawh u, “Mihring Fapa hi mi sualte kuta mantîrin a awm ang a, kraws-ah an khêngbet ang a, ni thum niah chuan a tho leh tûr a ni,” a tih kha,’ a ti a. Tin, a thu chu an lo hre leh ta a, thlân ata chu an haw leh a, sâwm leh pakhatte leh mi dang zawng zawngte hnênah chuan chûng thil zawng zawng chu an hrilh a” (Luka 24:6–9).

Chakna thu: Chatuana nunna neih kan beisei thu hi Isua a thawh leh avâng khân mi dangte hnênah kan hrilh chhâwng thei ta a ni.

Chhiar tûrte:  Luka 24:1–12; Johana 20:1–9; Marka 16:1–8; Chatuan Nghahfâk, pp. 769–794.

Chanchin thar in zêp zawh mang loh, mi dang hrilh thuai thuai châk êm êm in nei tawh ngâi em? Chu chu Isua chanchin a ni em? He thu in chhiar lâi hian tûn hma Kristian hmasate’n mi dang hrilh an châk êm êm chanchin thar chu mithlaah hmu reng ang che u.

Paula chu khawvâr nghâkin tukverh bulah a thu a. Zâwi sap hian, “Tûn ang hun vêl hi amah zuitu hmeichhehovin Isua thlân an va tlawh hun kha ni tûrah kan dah chhin a. An phûmna huan kha a la reh thiap ang a, khua a rawn vâr dâwn dêk dêk chauh emaw a la ni bawk ang” a ti a.

Lehkha ziaktu rinawm tak Paula chuan Paula thu sawi chu ngâithlâk zêl tumin thingphel thutthlêng ruh zet mai chu a han tinghîng dawt dawt a. Paula titi ngâithlâk hi nuam a ti riau va. Hmun hrang hranga Kristian awm darhte hnêna a thawn tûr lehkha pawh a ziah sak thîn reng a ni.

Paula chuan a sawi zawm leh a, “Chûng nu rethei ve tê têho chu lungngâiin an kun nghiai ang chu. An zînga thenkhatin min hrilh dân chuan kraws atanga Isua an lâk thlâk khân a thlân thlengin an zui ve a. Tichuan, a ruang hnawih atân in lamah rimtui buatsaihin an hawsan ta a ni. Mahse, rimtui buatsaih chhûng chu a rei si a, thlâna an va kîr leh meuh chuan Chawlhni a lo ni dâwn ruai tawh si. Tichuan, Chawlhni chuan an châwl a; mahse, rimtui hnawih thuai thuai an duh avângin an rilru chu a nuam chuang lo va; chuvângin a tûk leh zîng vârtianah an thawk chhuak ta a ni.”

Paula chuan a lehkha ziaktu nuihsak chung hian a sawi zêl a, “Kawng tluanin an tap ang chu. thlân an va thlen chuan a kawngkhâr chhinna lung phêk hlâi pui mai chu a lo lum sawn daih mai a. Eng thil nge lo thleng ta rin ngaihna pawh an hre awm lo ve” a ti a.

Lehkha ziaktu chu a nui sak a. He thawnthu hi ngaihnawm a titâwp thei lo. Maimichhîngin thil thlen dân tûr awm chu a mitthlain a han chhui kîr a. Chiang angreng takin hmeichheho lungngâi hmêl te, an bianga mittui luanna huh pâr te, an thil hmuh âwih ngam lova an mit an han nuai vêl lâi te, vântirhkoh pahnih an rawn inlar lâia an meng phâwk vêl tûrte chu a mitthla chuan a hmu zêl a. Chutianga vântirhkoh rawn lang thut chu a râpthlâk ve thei tho mai.

Paula chuan mûk taka thil ngaihtuah chungin pawn lam chu a bih dêk dêk a. A thianpa chu a bulah dawhthei takin a lo thu rân bawk a. Paula bawk chuan, “Vântirhkoh chu an hmu ngei ang a. Chûng hmeichhe hnêna vântirhkoh tîrtu Pathian chu a va ngilnei tehrêng êm! Tin, chutiang thuchah sawi pawh chu vântirhkohte nuam tih zâwng tak a nih ka ring a ni. Zirtawpnia thil thlen dân zawng zawng kha an hmu ve vek ngei ang a. Mi sualhovin Pathian Fapa meuh an tihlum lâite chu an en reng a. An hmangaih Isua chunga kha tiang thil a thlen tak tak kha an ring phal bîkin ka ring lo thîn.

“Mahse, tûnah chuan a tho leh tawh tih an hria a. Chu chanchin thar chu hmeichheho hnêna hrilh hlân an nghâkhlel ve ngawtin ka ring a ni. Chûng hmeichhehovin an thil min hrilh kha i la hre reng em?” a ti a.

A ziaktu chuan lu bûk zauh pah hian, “A tûk thum tûkah a tho leh dâwn tih a sawi kha an hre reng a. A rawn thleng dik ta tih an hrethiam nghâlin ka ring. Chutah a zirtîrte hrilh tûrin an tlân kîr leh vat a nih kha,” a lo ti ve a.

Paula chuan, “A dik chiah. Chu chu a pawimawh lâi tak, khawvêl hian hrethiam se ka tih êm êm chu a ni. Krista chu a thi a, a tho leh ta tih hi. Chumi avâng chuan chatuan nunna kan nei ve thei si a. Chuvâng chu alâwm rim taka hna ka thawh a, hla tak takah ka zin thîn. Thlân ruak hmutute’n hmanhmawh taka an thil hriat an puang ang khân he chanchin tha hi puan ka duh a. A bâk tih theih ka nei vak lo” a ti leh a.

Paula chuan in chhûng lam rawn hawi paha nui chung hian, “Krista thihna avâng hian zalên kan ni ta; kan sualte ngaihdam a ni” a ti a. A ziaktu en pah chuan, “Chu âia chanchin duhawm chu i hre tawh ngâi em? Kan tân a thi a nih chu! Kan sual man bat tlâkin kan sual chu a ngâidam a. Chatuan nunna min pe ta. Ka thinlung hi a lâwm lutuk a, a châng phei chuan puak keh zâwk dâwn hial hian ka hre thîn” a ti a.

Ziaktu chu a ding a. Pindan kal tlângin pâwn lam chu a va thlîr a. Zîng vârtian boruak nuam tak hîp luh vang vang pah chuan, “Ka pu, Korinth khuaa Kristiante tân lehkha thawn ziah leh i tum em?” tiin a zâwt a.

Paula chu a han zi mar vêl a. Tûkkin chu a sil deuh thûm mai. Nghâkhlel taka a chhânna lo nghâktu a thianpa hnênah chuan, “Tehrêng mai. I tan nghâl mai ang hmiang” tiin a sâwm zui ta nghâl a.

Tih Tûrte

Sunday:

1. Luke 24:1–12 chhiar la; tin, tûn kâr zirlâi hi chhiar bawk rawh. 

2. Chângvawn hi zir tan ang che.

3. Enga ti nge Isua thawhlehna hi i tân a pawimawh êm êm?

4. Mi tu emaw hnênah Isua thawhlehna chanchin hi sawi ang che.

5. Isua hnênah a thawhlehna chanchin tha mi dangte i hrilh theih nân tanpui tûr chein sâwm rawh.

Thawhtanni

1. Matthaia 5:15 chhiar la. 

2. Mi dangte hnênah êng i pe thin a ngâi a ni tih entîr nân i room-ah bati chhi ang che. Engtin nge i êng chu i lantîr ang?

3. Mi pahnih kawrfual vâr hate khân hmeichhiate hnên Isua’n a lo hrilh tawhte kha an hriattîr leh a. Isua’n min hrilhte min hriat rengtîr theitu chu tu nge ni?

4. Chângvawn kha zir leh rawh.

5. Pathian hnêngah mi dangte hnêna êng i chhua theih nân a tanpuina dîl ang che.

Thawhlehni

1. Johana 14:26 chhiar la.

2. Tukverh bulah bûrin thlâi chi kui la. A lo tiah hun chuan Isua thawhlehna nêna an inanna ngaihtuah ang che.

3. Isua thawhlehna lam hla zawng chhuakin rimâwi hmanrua nên sa rawh. 

4. Tûn kâr chhûng ngei hian mite hnêna Isua’n a hmangaih tih hrilh tûrin eng emaw tal ti ang che. 

5. Chângvawn kha zir leh rawh.

6. Mite hnêna Isua hmangaihna huai taka i hrilh ngam theih nân tawngtâi rawh.

Nilaini

1. Luka 24:9–12 chhiar la. 

2. I kuttum tiat vêl lung keng la. Han chul vêl la, a rih zawng awmte bûk chhin teh. Mari Magdalini angah inngâi la, i ngaihtuahna pakhat, “Isua thlân a lo ruak ka hmuh tûk kha he lung hian min hriat chhuahtîr thîn,” tia bul tanin ziak rawh. 

3. Isua thlan ruah thu hmeichhe hovin an hrilh lâia zirtîrte hmêl awm dân awm kha a lema entîrin han ziak teh. 

4. Chângvawn kha zir leh la.

5. Bible-a Isua thawhlehna thu inziak avâng hian Pathian hnênah lâwmthu sawi rawh.

Ningani

1. Sam 22:22 chhiar la.

2. I thiante leh chhûngte nên in intâwm theih tûr Pathian fakna thu ziak, i phuahchawp emaw, Bible châng emaw pawh ni se lehkha themah mâwi takin ziak la. Chutiang chu mi hnêna sem tham siam ang che. 

3. Chângvawn kha zir leh rawh.

4. Chatuan nunna thilthlawnpêk min pêk avângin Isua hnênah lâwmthu sawi rawh.

Zirtawpni

1. Marka 5:19 chhiar la.

2. In chhûng inkhâwmnaah zirlâi thawnthu hi a lem chang rawh u.

3. En lovChângvawn kha sawi la. 

3. In chhûng inkhâwmah Pathian thatna, malsâwmna leh ngaihsakna in lo chan tawh dân inhrilh rawh u. 4.  I tâna a thiltih zawng zawng avângin Isua hnênah lâwmthu sawi rawh.