2025 2nd Quarter Earliteen Zirlai-4-na
Zirlâi 4 April 26, 2025
MITTHI THOLEHIN CHHANG A PHEL
Chhiar tûrte: Luka 24:13–35; Chatuan Nghahfâk, bung 83, pp. 795–801; The Bible Story (1994), vol. 9, pp. 156–164; Kan Kohhran Thurin, no. 1, 9, 5.
Chângvawn: “Ama ropuina leh thatna zâra min kotu, a chanchin hriat avângin a Pathian thiltihtheihnain nunna leh Pathian ngaihsakna lam kawngah chuan thil zawng zawng min pe si a” (2 Petera 1:3)
Chakna thu: Isua’n mi dangte hnena ama chanchin sawi dan tûr min kawhhmuh.
Beiseiina chu rinna nêna a inkawp hian phûrna nasa tak kan lo nei thîn a, mi dangte hnêna hrilh chhâwn ve ngei kan duh thîn.
Isua zuitute tân chuan chawlhkâr tâwp chu rilru nat vawng vawngna hun a va ni chiang tak êm! Isua an man a, a chhungthu ngaihtuah a ni a, thiam loh chhantîr niin tihhlum hial a ni ta. Isua hmangaihtu hmeichhe tlêmtê-te chuan vântirhkoh an hmu a; Mari Magdalini chuan a hmuh chu Isua ngei a nih thu a sawi a! Isua zirtîr hmangaih Johana chuan a lo ring a.
Vawilehkhata hriatthiam vek theih pawh a ni lo.
Isua thawh leh ni chuan, Isua zuitu pahnihte chu Emau khuaa an chênna inah kîr leh tûrin tlâi lamah Jerusalem an chhuahsan a. He khaw te reuh tê hi Jerusalem atanga mêl riat vêla hlaa awm a ni. Kawnga an kal lâi chuan mi tu tih hriat loh pakhat hian a rawn zawm ve a; mahse, an lungngaihna leh beidawnna chauh loh chu engmah ngaihtuahna dang an nei lo. An ngaihtuahna la pêng tlattu pawh kar tâwp lama thil thleng—Isua thihna chungchâng kha a ni.
Luka 24:13–33 kan chhiar chuan, mi tu tih hriat loh anmahni rawn zawmtu chu Isua a ni tih kan hre thei a. Mahse, he mite pahnih hi chuan an kianga lo awm ve chu Isua a ni tih an hre miah lo nia! An rilru la pêngtu lama an insâwrbing lutukna lamah an kianga kal ve Isua pawh chu an lo hre chang lo a ni ngei ang! Kawnga an kal lâi chuan mi lungngâi pahnihte hi Isua’n thlamuan a duh hle a. An ngaihtuahna luahtu chawlhkâr tâwpa thil thleng kha Pathian Lehkha Thu (Bible) thlen famkimna a ni tih an hriatthiam theih nân puih a duh hle bawk.
Isua chuan a rawngbâwl tan tirh lamah khân heti hian a lo puang tawh a: “Lalpa Thlarau chu ka chungah a awm, a chhan pawh ani chuan mi retheite hnêna chanchin tha hril tûrin hriak min thih tawh a, mi lungngâite hnêm tûrin min tîr a ni” (Luka 4:18) tiin. Dik tak chuan hêng zirtîr pahnihte thinlung hi a na ngawih ngawih a ni.
An hnênah hian, “Kal paha in sawi dun kha eng thu nge ni?” tiin a zâwt a (Luka 24:17).
Anni chuan an Zirtîrtupa chanchin chu an hrilh ta a: “Nazareth Isua, Pathian leh mi zawng zawng mit hmuhah a thu-ah leh a thil tiha zâwlnei hmingthang tak chanchin thu. . . . Puithiam lalte leh kan hotute’n thah thupek tûr in an hruai a, krawsa an khenbeh zia thute pawh kha.” Thinlung na tak leh hmûi khur der der chungin, “Keini’n Israel-te tlantu tûr kha a nih kan beisei tehlul nên. Eng pawh ni sela, chûng thil thlenna chin chu vawiin nên ni thum a ni tawh” (châng 19–21) an ti a.
Zirtîrte hian Isua’n a tuar tûr thu te, a thih tûr thu te, a thawh leh tûr thu te a lo sawi lâwk vek tawh kha an lo theihnghilh tawh a ni tih a chiang hle. Chuvâng chuan, “Mosia leh zâwlnei zawng zawngte’n a lo ziah atangin a sawi tan ta a, Pathian Lehkha Thu zawng zawnga ama chanchin ziak apiang chu anmahni a hrilh fiah ta vek a ni” (châng 27). A finna hmangin Isua chuan an rinna chu Pathian Lehkha Thu-a innghat ni tûrin a duh a; chuvâng chuan, ama nihna leh a rawngbâwlna hriatpuitu atân Thuthlung Hlui lehkhabute hi a pawimawhzia a hrilh ta a ni. Hemi tum hi chuan Isua’n thilmak a ti lo va. Thuthlung Thar hmun hrang hrangah Isuaa a lo famkim tâk dân kan hmuh ang hian, Thuthlung Hlui hrilhlâwknate hmangin Chhandamtu chu a puang chhuak ta mai zâwk a ni.
Isua hian Messia an beisei dân, khawvêl lalte ang ni tûra an lo thlîrna chu Pathian Lehkha Thu Thianghlim zirtîrna nên a inmil loh thu a hriattîr a. Mi sual, an sualte avânga inchhîrte tlan chhuak tûrin Messia chu a thih a ngei a ngâi a ni tih a hrilh fiah bawk. Zirtîrte chu ama’n a lo tih thin dân anga Pathian Lehkha Thu zir châkna nei tûr leh, thlân ata tho leh ta an Chhandamtu chanchin tha chu mi dangte hnêna hrilh chhâwn ve châkna nei tûrin a chah ta a ni.
Zirtîr pahnihte’n an in an thlen dâwn hnaihah chuan Isua chu an ina thleng tûr leh an hnêna zânriah ei ve tûrin an sâwm a. “Kan hnênah awm ta che. Khua pawh a tlâi dâwn ta a, ni pawh a tlâk dâwn tawh hi” (châng 29) an ti a. An sâwmna chu Isua’n a pawm a. Zânriah ei tûra an inbuatsaih lâi chuan, an mikhualpa chu chaw malsâwm tûrin a kut a phar chhuak ta a. Zirtirte mak tih ber mai chu, Isua’n a tih thin dân ang chiah maia chaw malsâwmna a nei chu a ni. A kut, pereka an kilhna serte chu an hmu ta a. Mahse, amah chibai bûk tûra a ke bula an kûn hniam lâi chuan Isua chu a bo leh ta daih mai!
Dawhkân bula Isua thutna hmun ruak ta chu mak ti takin an an en ha mai a, “Kalkawnga min biak lâia Pathian Lehkha Thute min hrilh fiah lâi khân kan thinlunga a harh huai rêng lo’m ni kha?” (châng 32) tiin an inzâwt a.
An thinlung chu hlimna leh phûrnaa lo khatin, an chaw kîl lâi pawh chu an thawhsan a, hmanhmawh takin Jerusalem lamah an tlân phei leh ta nghâl a ni. An thil tawn chu Jerusalem-a la awm mêk zirtîrte hnênah hrilh thuai thuai a tum a. An lungngâi tawh lo. An ngui tawh lo va. An beidawng tawh hek lo. Tahna tûr chhan pawh an nei tawh lo va, a chhan chu Isua a tho leh tawh tlat alâwm. Chu thu chu an thu dawn tawha zawnga ropui ber niin khawvêl pum pui tâna beiseina thuchah a ni bawk.
Kleopa leh a thianpa thil tawn atang hian thil tam tak zir chhuah theih kan nei a. Pakhat chu, Isua hian amah chu eng tik lâi pawha thlîr thîn tûrin min duh tih hi a ni. Ama lam chu kan hawi reng a nih chuan, kan mittuite min hrûk hulsak ang a. Ni tin amah kan ngaihtuaha, amah chu kan ring chhan tlat a nih chuan, hlimna leh lâwmna min chantîr thîn ang. Chutichuan, beiseina leh rinna thar kan lo nei ang a, mi dangte hnênah a chanchin hrilh chhâwn ve zêl kan lo duh dâwn a ni.
Tih Tûrte
Sunday
1. Luka 24 :13, 14 chhiar la; tin, tûn kâr pawh hi chhiar ang che.
2. Chângvawn kha en lova sawi thei tûrin zir la; tichuan, nangma irâwm chhuak tawngkamin ziak chhuak ang che.
3. Pathian hnênah ama chanchin i lo hriat thar tâk pakhat avângah lâwm thu sawi rawh.
Thawhtanni
1. Luka 24.15, 16 chhiar ang che.
2. I note bu-ah Kleopa leh a thianpa’n an hâwn kawnga thil an sawi dun nia i rin chu ziak rawh.
3. Enga ti nge Isua hian Emmaua kawnga kal mêk zirtîr pahnihte hnênah khân a nihna a sawi mai loh le?
4. Chângvawn kha zir leh rawh.
5.Mi dangte zah taka i en theih nân Pathian tanpuina dîlin tawngtâi ang che.
Thawhlehni
1. Luka 24. 17–24 chhiar ang che.2. Mi tuin emaw, a hriat tawh reng a ni tih i hriat ni si, “Eng thil nge thleng a?” tiin a lo zâwt ve tawh che em? Isua’n Jerusalema thil thleng kha a hre lo der hi eng nge a chhan ni le?
3.Hêng Bible chângte hi chhiar ang che: Genesis 3:9; Genesis 4:9; Genesis 16:7, 8; Genesis 18:1–15; 1 Lalte 19:1–9. Hêng zawhnate hi eng vânga zâwt nge an nih?
4. Chângvawn kha chhiar nawn leh ang che.
5.Bible-in a sawite a awmzia chiang taka i lo hriatthiam theih Pathian hnênah a tanpuina dîlin tawngtâi rawh.
Nilaini
1. Luka 24:25–27 chhiar ang che.
2. Mi tuin emaw Isua nun, a thihna leh a thawhlehna chungchânga hrilhlâwkna thu awmte hi a awmzia zâwt ta che se la, Bible atangin engtin nge i hrilh fiah ang?
3. “Thlarau Thianghlim” tiha hawrawp maltinte hmang hian thu emaw, hla emaw han phuah teh.)
4. Chângvawn kha zir leh rawh.
5. Thlarau Thianghlim hnêna Isua chanchin zirtîr tûr che-in dîl rawh.
Ningani
1. Luka 24. 28-32 chhiar ang che.
2. Eng vângin zirtir pahnihte khan Isua kha zânriah enpuiah an sawm? Engin nge Isua a ni tih hriat chhuahtîr?
3. Chângvawnkha zir leh rawh.
4. I note bu-ah in thiante zînga tel ve tûra mi i sâwm theih dân kawng hrang hrangte ziak chhuak ang che.
5.Pathian hnênah mi dangte chunga hmangaihna leh ngilneihna lantîr theihna hun remchâng pe tûr che-in dîl rawh.
Zirtawpni
1. Luka 24:33–35 chhiar ang che.
2. Chaw eipui tûra i sâwmna chu Isua’n pawm ta se, engtin nge i lo dawnsawn ang?
3. Chanchin lâwmawm tak hre ta la, tu hnênah nge i sawi chhâwn ve ang?
4. Vawiin hian mi pakhat hnênah tal Isua chanchin hrilh ang che.
5. Chângvawn kha en lovin sawi han tum teh. 6. Isua hnênah a hmangaihna chanchin tha chu phûr taka i sawi chhâwn theih nân a tanpuina dîlin tawngtâi rawh.