2025 2nd Quarter Earliteen Zirlai-5-na

Zirlâi 5 May 3, 2025

RIN MAI HI HMUH NÊN THUHMUN A NI

Chhiar tûrte: Johana 20:24–31; Chatuan Nghahfâk, bung 84, pp. 806–808; The Bible Story (1994), vol. 9, pp. 165–169; Kan Kohhran Thurin, no. 10, 9, 7

Chângvawn: “Isua’n a hnênah, ‘Nang chuan mi hmuh avângin i ring a ni; hmu lova ring apiangte chu an eng a thâwl e,’ a ti a” (Johana 20:29).

Chakna thu: Isua kan rinna hi kan chhehvêla mite hnêna hriatpuitu kan nihna a ni.

Kleopa leh a thianpa, Emau panna kawnga Isua hmutte kha i la hre reng em? Isua’n Thuthlung Hlui hrilhlâwknate’n Messia chanchin an lo sawi dân zawng zawng a hrilh fiah dâwna an lo phûrzia te pawh kha i la theihnghilh lo ang ti raw?

Khami zân khân Kleopa leh a thianpa chu phûr tak chungin pindan chhûngah an lût a. An thiante hnêna hrilh tûr an va ngah êm! Thlân ata lo tho leh ta an Lalpa Isua chu hmua an biak mai bâkah, amah ngei hian Thuthlung Hlui lehkhabute’n an lo sawite chu a hrilh fiahsak ta vek bawk a nih kha.

Zirtîr dangte pawhin Lalpa chu a tho leh ngei a, Simon Petera hnênah a inlâr a ni tih an lo sawi ve bawk a (Luka 24:34). Chutia an thil tawn theuh makti êm êm leh phûr tak chunga an inhrilh tawn lâi mêk chuan mi pakhat hi an hmaah chuan a lo ding reng mai tih an hmu ta.

Chu mi chuan, “In chungah thlamuanna awm rawh se” (Luka 24:36) a ti lo ti a. A âw atang chuan an Zirtîru a ni tih an hre nghâl mai a. Chu mi chuan a kut leh a nâka ser awmte chu a hmuhtîr a. Tin, ei tûr an neih leh neih lo a zâwt a. An neih ang pe-in a ei lâite chu ngun takin an lo thlîr a. A ei zawh chuan an hnênah thu a sawi a; tichuan, zâwi muangin rinna an lo nei leh ta a, an hlauhthâwnna zawng zawng pawh kha lâwmnaah a lo chang ta. Sawi hleih theih loh khawpa lâwmna thinlung pu chungin tho leh an Lalpa chu an lo dawngsawng ta a ni.

A zirtîrte hnêna Isua a inpuan hian, a thih hmaa an hnêna a lo hriattîr tawh zawng zawngte kha a hriat chhuahtîr leh ta vek a. Mosia lehkhabu-ah te, zâwlneite lehkhabuah te, Sam bu-ah te kan hmuh Messia chungchânga hrilhlâwkna zawng zawngte chu a takin a lo thleng ta tih an hrethiam a. Messia chungchâng hrilhlâwknate Isuaa a lo thlen famkim tâk dân an han hmu chu an va hlim tehrêng êm!

Hemi zân hian zirtîr pakhat awm ve lo a awm a, chu mi chu Thoma kha a ni. Thoma hian mi dangte’n tho leh Isua an hmuh thu an sawi chu an lo hre ve a, a tho leh ngei a ni tih finfiahna pawh an hrilh tam hle nghe nghe. Nimahsela, an han hrilh ngial hnu-ah pawh a âwih thei tlat lo mai a, a hlim ve thei chuang hek lo. Isua chu thiante hnênah a inlâr a, anni chu a be bawk a; ani hnênah erawh a inlâr ve lo hi a rilru a dam chiah lo a ni. Chuvângin, Isua a tho leh a ni tia an sawi pawh chu a âwih ta lo rêng a, a âwih loh avâng chuan a inthâwina siam lo pawm leh amah ringtute chhandam tûra lo kal Tlantu leh Chhandamtu Isua malsâwmna pawh a chang ve ta lo rêng a ni.

Thoma hian mahni inkhawngaihna leh Isua laka vuivâina rilru a nei tlat a; chuvâng chuan, a rilru pawh rinhlelhnain a thunun ta tlat mai a ni ber. “A kuta thîr khenna serte kha ka hmuha, thîr khenna serte chu ka kutzungtanga ka khawih ve ngeia, a nâkah chuan ka zen ve phawt lo chuan ka âwih lo ang” a ti tlat mai a (Johana 20:25). A rilru puthmang hi zirtîr dangte rinna leh hlim dân nên chuan a inang lo kher mai.

Tichuan, zan khat chu zirtîr dangte nêna an awm khâwm lâi takin Isua a lo kal a, an zîngah chuan a lo ding ta thut mai. “In chungah thlamuanna awm rawh se” a ti a. Tichuan, Thoma lam hawiin, a hnênah, “I kutzungtang khân han khawih la, ka kutte hi en teh; i kut han ban la, ka nâkah hian zen rawh. Ring lovin awm tawh lo la, ring ve tawh mai rawh” (Johana 20:26, 27)

a ti a

Chutah zet zawng, Thoma a thingthi a, “Ka Lalpa leh ka Pathian” a ti ve thei ta a ni (châng 28).

Tichuan, Isua’n a hnênah, “Thoma, nang chuan mi i hmuh avângin i ring a. Mi hmu lova lo ring maite chu an eng a thâwl êm êm asin? (châng 29) tiin a hrilh ta a ni.

Hmu lova ring mai, chuvânga eng thâwl tate zîngah chuan tel ve i duh em?

Isua chuan, Thoma a duhsak ang khân nang leh kei pawh hi amah ring mai tûrin min duh a. A awmzia chu, amah chauh en tûrin min duh tihna a ni. A Thu-ah hian kan rinna kan nghah ngam a tûl a. A thutiamte hian kan rinna tichakin, kan rilhlelhan zawng zawng a tikiang vek ang.

Isu chuan Thlarau Thianghlim hmangin beiseina leh lâwmna min chantîr dâwn a. Thil sawisêl leh phunnâwi chîng kan ni tûr a ni lo. Thil a kal fuh loh chângte hian kan beidawngin kan hnual vek zêl tûr a ni lo va. Beiseina nung neiin, Isua chu eng tik lâi pawhin kan hnênah a awm zêl a ni tih rinna kan nei tlat zâwk tûr a ni.

Rinnaa lo thang lianin, Isuaah kan beiseina kan nghat tlat ang a, chuti a nih chuan mi dangte hnênah pawh Isua thawhlehna thu hi hrilh chhâwn ve zêl kan duh ang. Amahah chuan chatuana nunna thuthiam kan hmu a, “Hei hi chatuana nunna chu a ni, nang Pathian tak chauh leh i tirh Isua Krista hriat hi” (Johana 17:3) tih hi a takin kan lo chang tawh ang. Hei hi beiseina thuchah ropui ber chu a ni a. Chuvângin, he nun thlâk danglam thei thuchah hi kan hmuh apiangte hnênah hrilh chhâwng ve zêl tûrin mawhphurhna ropui tak pêk kan ni.

Tih Tûrte

Sunday

1. Johana 20:24–31 leh tûn kâr zirlâi hi chhiar ang che. 

2. Changvâng hi en lova sawi thei tûrin zir tan rawh.

3.Bible-a thutiam awmte zînga engte hian nge i hlauhna leh rinhlehnate hneh tûrin lo tanpui che? I thil tawn engte’n Isuaa i rinna tinghet sawt a, amah chu ring zêl thei tûrin tanpui che?

4.Pathian hnênah a hmangaihna i chan theih nân a tanpuina dîl rawh.

Thawhtanni

1. Sam 32:8 chhiar ang che.

2. Engtiangin nge i kawng zawh tûr chu i zawh ngei theih nân Pathian zirtîrna leh kaihhruaina i lo chan tawh?

3. Pathian i rinna tinghet sawt thei tûr Bible chângte zawng hmuin chiar la. Bible thutiam i hmuhte chu Pathian ringhlel tlat reng tu emaw hnênah hrilh chhâwng ve ang che.

4 Chângvawn kha chhiar leh rawh

5. Pathiana hnêna tu emaw rinna tihchaksaktu i nih theih nân a tanpuina dîl ang che.

Thawhlehni

1. Sam 78:52 leh Johana 16:13 chhiar rawh

2. Mi tu emaw hnênah Pathianin amah a lo kalhhruai tawh dân hrilh tûr chein ngên rawh. Puitling tu emaw nên Thlarau Thianghlimin mi a zirtîr dân sawi ho rawh u.

3.Chângvawn kha chhiar leh rawh.

4. Pathian hnênah a kaihruai dân che hmu thiam tûra a tanpui tûr che-in dîl rawh.

Nilaini

1. Matthaia 7:7–11 chhiar ang che.

2. I note bu-ah i tâna Pathianin thil tha a lo tih tawhte ziak chhuak la. Chu chuan Pathianin puih che a duhzia engtin nge a hriattîr che?

3. I thian tu emaw hnênah Pathianin a ngaihsakzia che tilangtu hrilh rawh.

4. Chângvawn kha chhiar leh rawh

5.Pathian hnênah i nuna a rawn inrawlh avângin lâwmthu hrilh ang che.

Ningani

1. Matthaia 14:25–31 chhiar ang che.

2. Thuthlung Hlui emaw, Thuthlung Thar emawa mi tute emaw rinhlelhna nei tlatte chanchin chhiar la. An rinhlelhna chu an hneh ta em? Engtiangin nge an hneh?

3. Chângvawn kha chhiar leh rawh.

4. Pathian hmangaihna leh khawngaihna in chân avânga lâwmna hla sa ho rawh u.

Zirtawpni

1. In chhûngkaw inkhâwmah Thufingte 3:5, 6 chhiar ang che.

2. Pathianin a kaihhruaina a chantîr dân che u sawi ho rawh u.

3. I chhûngte hnênah in leh a chheh vêla Pathian hmangaihna hriattîrtu eng thilte nge awm tih zâwt la. Chûngte chuan engtiangin nge Pathian hmangaihna an lantîr tih sawi tûrin ngên bawk rawh.

4. Chângvawn kha en lova sawi theih tum ang che. 5. Pathian hnênah amah chu in rin zêl theih a hmangaihna a chantîr theuh che u avângin lâwmthu in hrilh dâwn nia.