2025 2nd Quarter Earliteen Zirlai-6-na
Zirlai 6 May 10, 2025
VÂNLAM THILTHLÂWNPÊK CHU
Chângvawn: “Tichuan, vân thar leh lei thar ka hmu a; vân hmasa leh lei hmasa chu an boral tawh a, tuifinriat pawh a awm tawh lo. Khaw hianghlim Jersualem Thar chu, mo a pasal ela a inchei anga peih diamin Pathian hnêna mi vân ata lo chhuk ka hmu bawk a,” (Thupuan 21:1, 2).
Chhiar tûrte: Thupuan 21, 22; Indona Ropui, p. 674–678.
Chakna thu: Pathian thilthlâwnpêk kan pawmin, chatuan nunna chu kan tâ a ni.
Aw, ni hrehawm bawk maw, engmah thil nghahhlelhawm tûr awm bawk si lo! Chutiang rilru chu put châng i nei tawh ngâi em? Chutiang deuh chuan zirtîr Johana kha Patmos thliarkârah khân a lo awm pawh a ni maithei e. Mahse, ni khat chu thil hlimawm tak mai a tawng ta hlauh maia, inlârnain vân thar leh lei thar a hmu ta a nih chu! Han ngaihruat chhin ve teh!
Sabbath a ni a, Johana chu Patmos thliarkâr lungpui khawkrawk tak zîngah chuan khawhar takin a thu a. Isua Krista chanchin tha mi dangte hnêna a hrilh thin avângin amah hrem nân he thliarkâr khawhar takah hian an tântîr daih mai a ni. Mahse, a beidawng chuang lo. He thliarkâr khawhar takah hian a hun zawng zawnga Pathian chibai bûkna leh tawngtâina hun remchâng a nei thei zâwk si a.
Tuipui kam lungpui khawkrawk tak lam a thlîr vâng vâng lâi chuan, tâwtawrâwt ri ang mai hian a rawn thâwng deuh thut mai a, “I thil hmuh leh hriatte hi lehkhabu zialah ziak la, Asia rama kohhran pasarihte hnênah thawn rawh,” (Thupuan 1:11) tih aw hi a hria a.
Johana rilru chu tlêmin a’n buai deuh nak a, tu nge rawn bia a hre mai bîk lo. Aw lo chhuahna lam chu a hawi nghâl vat a, rangkachak khâwnvâr pasarih zînga mi kal vêl chu a hmu a. Chu chuan kawrfual vâr hi a kelêr thlengin a inthuam a, a âwm vêlah chuan rangkachak âwmhrênnain a inhrêng bawk a. A hmêl chu a êng mâwi hle mai, a âw chu tui khawh thla ropui tak ri hum hum ang deuh hi a ni a. Hetianga tihbaiawm taka Johana’n a hmuh hi Isua a ni.
Tichuan, Isua’n Johana dârah vuanin, tihian a bia a, “Hlau suh ang che, kei hi Hmasabera leh Hnuhnungbera chu ka ni. Minunga chu ka ni a, ka thi tawh a, ngâi teh chatuan atân ka lo nung leh ta!” (châng 17, 18) a ti a.
Hun lo la awm tûra Pathian mite leh Kristian kohhran awm zêl dân tûrte chu Isua’n Johana hnênah a hrilh a. Film chhuahna puanzâr hlâi taka thil chhuah en ang mai hian, thil lo thleng tûrte chu Isua’n a hmuhtîr ta zut zut mai a ni.
A thilhmuh thenkhat chu Johana tân chuan manthiam mai hleih theih pawh a ni bîk lo va. Pathianin a fate tâna lei thar leh vân thar a buatsaih hmun ropui tak mai chu hmuh manhla tak a ni. Johana chuan, “Jerusalem Thar, vân atanga lo chhuk, mo a pasal ela (nalh thei ang ber) inchei anga Pathian hnên atanga lo chhuk chu ka hmu a,” (21:2) a ti a ni.
He khawpui mâwi leh ropui tak mai, ni anga êng tle sût mai a thlîr lâi chuan Johana’n, “Pathian ngei chu a mite zîngah a chêng tawh ang,” tih aw a hre leh ta a. An mit ata mittui zawng zawng A hrûk hulsak anga, lungngaihna te, thihna te leh natnate pawh a awm leh thei tawh lo vang, thil engkim a siam thar vek tawh ang.
Johana chu khawpui ropui tak a thlîr reng lâi chuan khawpui chu a lo chhuk a, Jerusalem khawpui chu Pathianin lei a tihthianghlim leh siam thar hmaa a awmna hmun ngeiah chuan a rawn inhûng leh chat mai a ni. Chu a thil hmuh chu a ropui leh a mak êm avângin Johana’n mihring tawngkam, chutiang hrilh fiah zo thei tûr a hre lo hial a ni. A thil hmuh tawh zawng zawng zîngah a tehkhin zo tûr pawh a awm lo. Hetiang deuh hian a sawi a: “Rangkachak khawpui chu kil li nei, inbial hi a ni a, a sîr tinah chuan kawngka pathum a awm zêl a, tuikeplunga siam a ni. Khawpui chuan hungna bang sâng a nei a, chu chu lungmâwi tle sep sep nalh tak a ni. A kawtthlêr chu rangkachak hlîr hlaka siam a ni a, an langtlang thei tho bawk si a ni!
“Pathian leh Isua chu, chu khawpuiah chuan an chên tâk avângin a êng nuam êm êm a, ni leh thla êng pawh an mamawh tawh lo bawk. He khawpuiah hi chuan kawngka pawh khâr/kalh a ngâi tawh lo vang, a chhan chu zân a awm tawh dâwn lo va, rûkru leh hmêlma hlauhawm tûr a awm tawh dâwn lo. Chu khawpuiah chuan sualna hnehtute, Nunna Bu-a an hming chuangte chauh chu an lût dâwn a ni.
“Lui pakhat—Nunna Tuilui chu ka hmu bawk a, Pathian lalthutthlêng atanga lo luang chhuak, thil fîm ber (crystal) anga fîm a ni. Khawpui lâi taka Nunna Lui kam tuakah chuan Nunna Thing, kum tina rah chi hrang 12 chhuah thîn chu a awm bawk a.” Chutiang chu han ngaihruat chhin teh. Kum tluana thei kûng khata thla tin rah chi hrang hrang a han rah ziah mai tûr chu!
Mahse, chumi nia Johana thil hriat zînga duhawm ber chu Isua lo kal leh thuaina tûr thu hi a ni. “Ngâi teh, ka lo kal thuai dâwn e! In rin âia hmain ka lo kal dâwn a ni!” tiin Isua’n a sawi a nih chu.
Isua lo kal hunah chuan chatuana chênpui atân nang leh kei hi min hruai hâwn a duh a. Chatuan nunna thilthlâwnpêk hi pawm tûrin i rilru i siam mêk em le?
Tih Tûrte
Sunday
1. Thupuan 21:3–8 leh tûn kâr zirlâi hi chhiar ang che.
2. Chângvawn hi en lova sawi thei tûrin zir tan rawh.
3. Hmêltha eltiang pahnihte inneihna chu ngaihruatin a lem ziak/chei ang che.
4. Pathianin chatuan nunna min pêk lâwm taka pawm theihna tûrin a tanpuina dîlin tawngtâi ang che.
Thawhtanni
1. Thupuan 21:1–14 chhiar la.
2. Vân thlen hun i nghahhlelh chhan pathum chu i thianpa/thiannu hnênah phone-in hrilh la, Isua hmangaihna thu mi dangte hnêna in hrilh theih nâna a tanpuina dîlin in inbiakna chu titâwp ang che u.
3. Adventist Hla Bu atangin vânram nawmzia tûr sawina hla pathum emaw thlang chhuak la, chîk takin chhiar la, sa zui lang a nih loh leh rimâwiah tum ang che.
4. Chângvawn kha zir leh rawh.
5. Mi dangte hnêna a hmangaihna i hrilh chhâwn theih nân tawngtâi ang che.
Thawhlehni
1. Thupuan 21:15–27 chhiar la.
2. Khawpui Thianghlimah chuan Pathianin i tân hmun a buatsaih a ni tih i hriat khan engtin nge a i rilru a awm?
3. Mi tute’n emaw Pathian thilthlâwnpêk chatuan nunna leh Isua chu an nunna Lalpa atân lâwm taka an pawm theih nân engtin nge i tanpui ang?
4. Chângvawn kha zir leh rawh.
5. Mi dangte’n vân lam thilpêk hi an pawm duhna tûra tanpui tûrin Pathian hmanrua i nih theih nân tawngtâi ang che.
Nilaini
1. Thupuan 21:19, 20 chhiar la.
2. Vawiina chhiar tûr Bible chânga târ lan lunghlute hi eng rawng nge ni hlâwm tih hriat tum ang che.
3. Khawpui lungphûm atâna hman lunghlu chi hrang hrang 12-te lem ziak la, an rawng dik tak tûr angin i chei bawk dâwn nia.
4. Chângvawn kha zir leh rawh.
Ningani
1. Thupuan 22 chhiar ang che.
2. Isua lo kal lehna tûr atân leh a lalramah chuan chatuana chêng ve tûrin i inpeih tawh em? Isua hi Alpha leh Omega, Hmasa Ber leh Hnuhnûng Ber, a Bul leh a Tâwp (Thupuan 22:13) a ni tih hi eng nge ni a awmzia?
3. Thupuan 21–22-a vânram awm dân kan hmuh hi a lem han ziak dâwn chhin teh.
4. Chângvawn kha zir leh rawh.
5. Pathian hnênah vâna kan chan tûr thil nuam leh ropui tak tak a lo sawi avângin lâwmthu sawi la. A chatuan lalramah chuan chatuana i chên ve ngei theih nân a malsâwmna dîl ang che.
Zirtawpni
1. Thupuan 22:20, 21 chhiar ang che.
2. In chhûng inkhâwmah vânram in thlen huna in thil tawn hmasak ber tûr chungchâng sawi ho rawh u.
3. In khaw dâiah lêng chhuak ula, Pathian thil siamte in thlîr kual dâwn nia.
4. Vânram in thlen huna Pathian thil siam i ngainat deuh deuh tûr 10 vêl han ziak teh.
5. Chângvawn kha en lovin han sawi teh. 6.Pathian hnênah khawvêl mâwi tak a lo siam avâng leh, i chênna tûra lei thar tha zâwk a lo siam avângin lâwmthu sawi ang che.