2025 2nd Quarter Earliteen Zirlai-7-na

Zirlâi 7 May 17, 2025

VÂNRAM: HAN FAN LÂWK ZAWKNA

Chhiar tûrte. Johana 14:1–3; Thuziak Hmasate, pp. 11–20; The Bible Story (1994), vol. 9, pp. 9–14; vol. 10, pp. 205–208; Kan Kohhran Thurin, no. 18, 28, 17.

Chângvawn: “In thinlung mangang suh se, Pathian in rieng e, kei pawh mi ring ve rawh u. Ka Pa inah chênna awmna tam tak a awm a, a awm loh chuan ka hrilh tawh tûr che u a ni; in tân hmun siamin ka kal dâwn hi. Tin, in tân hmun ka han siam chuan, ka lo kîr leh ang a, ka hnênah ka la ang che u; ka awmnaah nangni pawh in awm theihna tûrin” (Johana 14:1–3).

Chakna thu: Pathian khawngaihna avângin amah nên kumkhuaa chêng tûrin kan inbuatsaih a ni.

Nangma puala in thar neih emaw, room thar neih emaw i lo suangtuah tawh thîn em? In thar emaw, room thar emaw chu lo nei tak tak ta la, eng ang rawng nge ni se i duh? A chhûngah eng engte nge i dah ang? Isua’n i tân hmun a buatsaih mêk a ni tih i hria em?

Isua’n a zirtîrte a kalsan hma khân an hnênah sawi duh tam tak a nei a. A kalsan hnua amah an ngaih tûrzia pawh a hre sa vek bawk. An awmna lamah chuan va kal hnâiin, “In thinlung mangang suh se; Pathian in ring e, kei pawh mi ring ve rawh u. Ka Pa inah awmna tam tak a awm a, awm lo ni se chu ka hrilh daih tawh ang che u. In tân hmun siamin ka kal dâwn a. Tin, in tân hmun siama ka kal chuan ka lo kîr leh ang a, ka hnênah ka la ang che u; ka awmnaah chuan nangni pawh in awm ve theihna tûrin” (Johana 14:1–3) tiin a hrilh a. Johana khân hêng thu Isua’n a sawi hi a la hre reng a; tichuan, a Chanchin Tha bu ziahah hian a lo dah tel ve ta a ni. Johana’n a ziah atanga kum za eng emaw zât a liam hnu-ah tleirâwl pakhat, a hming Ellen G. White-i chuan a mimal Chhandamtu leh Thian atân Isua a lo pawm a. Ni khat chu Isua’n rawn tlawhin a hnênah vânram awm dân a hmuhtîr ta a ni.

A inlârna hmuhah chuan Isua a lo lang a. Tâwtawrâwt a lo rîk chuan, thlâna an ruang zalh tâk mi thianghlimte chu nunna thar neiin an lo tho ta a. Isua chu mei alh vut vutin a tuam chhûm chungah thu-in lei lamah a rawn chhuk a. Tichuan, a mite zawng zawng nên an inhmu khâwm ta a ni. Vân lamah chho hovin, ni sarih chhûng an thang a. A tâwpah chuan han thleng chhovin, dârthlalang tuifinriat chungah an inkhâwm ta a. Amah Isua ngei hian lallukhum a sem theuh a. Tichuan, mi thianghlim, sual lak ata Isua’n a tlan tâkte zîngah hian vântirhkohte pawh lo tel ve-in dârthlalang tuifinriat chungah chuan khawpui hungna kawngkhâr panin an kal ho ta a.

Isua chuan vânram kawngkhâr êng tle sût mai chu hawngin, mi thianghlimte chu lût tûrin a ti a. A chhûnga an luh chuan Pathian lalthutthlêng ropui tak lo inhûng chu an hmu a. Chu lalthutthlêng atang chuan lui pakhat, a tui fîm êm êm mai hi a lo luang chhuak a. Chu lui kam tuakah chuan nunna thing a awm a. Chu thing chu thing pahnih niin lang mah se, a chung lamah inzawmin thing pakhatah a lo insiam ta a ni. He thing hi a mak khawp a, a rah pawh a lan dânah chuan rangkachak leh tangkarua inpawlh a ang hle.

Ellen White-i leh mi dangte chu lui kamah chuan thu-in, leia an awm lâia buaina an tawhte kha ngaihtuah chhuah an han tum ngial a. Nimahsela, an ngaihtuah chhuak zo tawh lo rêng rêng. Tûna an hmuh mêk leh hriat mêk thil ropui tak takte nêna khâikhinin, leia an thil lo tawn thinte kha chu eng tham mah a ni lo.

Chutichuan, Ellen White-i leh mi dangte chu Isua hovin lei thar lamah an kîr leh ta a. An han thlîr chho a, vân ata Khawpui Thianghlim ropui êm êm rawn chhuk thla lâi chu an hmu a. Khawpui pâwnah chuan inte awmin, chûng inte chu tangkarua ang maiin a tle sût hlâwm mai a ni. A bante lah chu lunghlua cheimâwi vek a ni leh nghâl a. Hêng inte hi Isua’n a inthâwina siam hmanga a chhandam tâk mihringte chênna tûra sak vek a ni. In tinah hian Isua’n a pêk an lallukhum dahna tûr chhuar a awm zêl a. Chutah chuan huana hna an thawh chhûng chuan an lallukhumte an dah rih thîn a ni. Nimahsela, huana hna an thawh hi khawvêla an awm lâia hna an thawh thin ang kha chu a ni lo va. Thlan tlâk zawih zawihna tûr leh taksa chauh vek phahna ang tûr chi kha chu a ni lovin, nuam ti taka thawh tûr a ni tawh zâwk ang.

Ellen G. White-i chuan huan zau tak, pangpâr mâwi chi hrang hranga khat vek hi a hmu bawk a. Chûng pangpârte chu lovin, engtikah mah an chuai ngâi dâwn lo a ni tih a hria. Mual dangah chuan rante leh ramsa chi hrang hrang—sakeibâkneite, berâmnote, keite-te leh chinghniate an awm tlâng a—tu mah intihnat an tum lo. Ngaw dur khup mai chhûngah a lût leh a. Mahse, chu ngaw chu leia ramngaw anga thim leh tihbâiawm tak ang hi a ni ve lo va. Niin a chhhun avângin a êng ut mai a, a thlamuanthlâk êm êm a ni.

Zion Tlângah chuan temple lian leh ropui tak, a ban pawh rangkachak lang tlang thei ngat ni leh nghâl leh, lunghlu mâwi ber ber hmanga chei hi a awm a. Temple hual vêltu mualahte chuan rose leh lily chi hrang hrang a khat tlat bawk. Naupangte chu tlângahte chuan lâwnin pangpârte chu an lo va. A châng chuan kea kal lovin an thlâwk zâwk thîn bawk.

Ellen G. White-i chuan mi thianghlimte chu Isua’n zânriah kîl tûa khawpuia a koh kîr leh vek thu pawh a sawi a. Khawpui chhûng an han luh chuan tangkaruaa siam dawhkân sei êm êm mai, a seizia pawh mêl tam tak ni ngei tûr hi an hmu a. Chu dawhkânah chuan nunna thing rah te, manna te, theite rah te, theipui rah te, theibuhfâi te, grep te leh thei dang chi hrang hrang chhawp a ni a.

Hêng thei tuihnâi tak takte hi Ellen G. White-i pawhin ei ve a châk khawp mai; nimahsela, Isua’n leia kîr leh a, a thil hmuhte chu mi dangte hnêna hrilh ve tûrin a tih avângin a ei ve ta lo a ni. Inlârna atanga a lo chhuah hnu chuan, leia thil awmte chu inlârnaa a hmuhte nêna khâikhinin a lo ngui riau hlâwm a. Eng emaw chen chhûng chu lungngâi leh khawhar takin a awm rih nghe nghe. Engkim hlimawm leh êng mâwi êm êm vek a nihna hmun vânramah khân kîr leh mawlh a châk thîn a ni.

Ellen G. White-i hi chuan vânram hi inlârna hmang chauhin a hmu a. Chumi rama nang leh kei kan han thlen hunah chuan eng emaw kan châm rih ang a, vânrama thei tuihnâi tak takte chu lovin kan ei ve ang. Pathian khawngaihna chuan chatuanin min awmpui dâwn si a.

Tih Tûrte

Sunday

1. Johana 3:16 leh tûn kâr zirlâi hi chhiar ang che u.

2. Ellen G. White-i vânram awm dân a sawi ang hi a lem ziak la. A hnuaiah chângvawn hi i ziak bawk dâwn nia. Tichuan, in chângvawn hi en lova sawi thiam tum ang che.

3.Pathian hnênah Isua zâra chatuan nunna i neih theih tâk avângin lâwmthu hrilh rawh. 

Thawhtanni

1. Rom 5:21 chhiar ang che.

2. Chângvawn kha zir leh rawh.

3. Vânram kan han thlena, chutah chuan kumkhuaa chên reng nawmzia tûr chu han suangtuah teh. Ellen G. White-i kha chu inlârna a hmuh zawh hnu-ah a lo kîr leh kha a ni a, nang erawh chu i kîr ve dâwn tawh si lo.

4.Pathian hnênah chatuan nunna a pêk che avângin lâwmthu sawi rawh.

Thawhlehni

1. Isaia 11:6–9 chhiar ang che.

2. I thian tu emaw hnênah vânrama tih leh hmuh i châkte hrilh rawh.

3. Chângvawn, Johana 14:1–3 kha zir leh rawh.

4.Mi tu emaw hnênah vânram chanchin i hrilh theih nân tawngtâi ang che.

Nilaini

1. Johana 5:24 leh 1 Johana 5:13 chhiar rawh.

2. Chatuana nunna hi eng tikah nge a intan chiah le? Ringtu i nih angin, i nunah khân chatuana nunna chi chu i pâi tawh a ni tih engtin nge i hriat theih ang?

3. Tu hnên atangin nge chatuana nunna hi kan dawn? 1 Johana 5:11; 1 Johana 5:20 chhiar rawh.

4. In chângvawn kha zir leh rawh.

5.Pathian hnênah i nuna chatuana nunna chi a lo tuh avâng leh, Isua nêna nun dûn chu tûnah ngei hian i tih tan theih nghâl vângin lâwmthu sawi rawh.

Ningani

1. I nu leh pate hriat theih tûrin 1 Korinth 2:9 chhiar ang che.

2. I nu leh i pate hnênah khân hemi chângin vânram chanchin a sawi dân hi eng nge ni tih zâwt rawh. Vânram kal tichâk zualtu che eng thil nge a sawi?

3. Vânram luhna chahbi i nei a ni tih engtin nge i hriat theih ang? Johana 3:16; Juda 21.

4. Chângvawn kha zir leh rawh.

5.Pathian hnênah chatuana nunna pêk che a tum chu i lo pawm theih nân a tanpuina dîl ang che.

Zirtawpni

1. Johana 14:2: “Ka pa inah awmna tam tak a awm” tih thu hi chhiar la. Paper-ah vâna i in tûr lem chu ziak ang che. I inah chuan eng thilte nge awm se i tih? Tute nge chênpui ve i duh? 

2. In chângvawn kha en lovin han sawi teh? 3.Pathian hnênah a khawngaihnain kumkhuaa a chênchilh che avângin lâwmthu sawi rawh.