2025 2nd Quarter Earliteen Zirlai-8-na

Zirlâi 8 May 24, 2025

HMANGAIHNA LALRAM KHUA LEH TUITE

Chhiar tûrte: Exodus 20:1–17; Matthaia 22:34–40; Johana 14:15; 314; Thlahtubulte leh Zâwlneite, bung 27, pp. 303–314; The Bible Story (1994), vol. 2, pp. 153–158; vol. 10, pp. 161–164, 128–131; Kan Kohhran Thurin, no. 19, 14, 11.

Chângvawn: “‘Chûng ni hnua Israel chhûngte hnêna thu ka thlun tûr erawh chu hei hi a ni’ tih hi Lalpa thu chhuak a ni: ‘An chhûngrilahte ka thupêk ka dah ang a, an thinlungah ka ziak bawk ang a, kei hi an Pathian ka ni ang a, anni chu ka mite an ni ang’” (Jeremia 31:33).

Chakna thu: Pathian chuan vân khua leh tuite kan lo nih ve theih nân kan thinlungah hian a hmangaihna dânte chu a ziak dâwn a ni.

Tirhkoh Johana leh Ellen Harmon-i te’n inlârnaa vânram a hmuh khân tute nge awm ang: tute nge lût tûr leh Pathian lalram khua leh tuite ni tûra inbutsaih ang tiin an ngaihtuah ve i ring em?

Brada chuan a Pate Darren-a bula awm nuam a ti êm êm a, a bîk takin restaurant-a thil ei tûra han chhuah dun phei chu nuam a ti leh zual khawp mai.

Ni khat chu a patea nên bawk hian an chhuak dûn leh a; mahse, tûn tuma an chhuak hi chu ni danga an lo chhuah dun tawh dân ang kha a ni lo.

A Pate Darren-a chuan, “Kan haw leh hmain pangpâr zawrhna dâwrah kal kâwl lawk ka duh a, i Nute Barb-i tân pangpâr lei ka duh a ni” a ti a.

Brad-a chuan, “Nga ti nge i lei dâwn a? A birthday pawh a ni si lo va. Mother’s Day lah a ni bawk si lo” tiin a lo zâwt a.

A Pate Darren-a chuan, “I nute hian pangpâr a ngaina lutuk a, a rin loh deuhin ka’n leisak ang e. Mi tu emaw hmangaih i nei a nih chuan, amah i hmangaihzia leh i ngaihhlutzia entîrtu tûr thil tih i duh thîn a ni lo’m ni? Mi dangte hlimna siamsak hi thil tha tak a ni a. Chutiang tih chu Pathian rawngbâwlna ang a ni. Dik tak phei chuan, Bible-a châng hriat lâr ber pakhat pawh Luka 6:31 hi a ni a. He châng hi dân rangkachak ti hiala sawi a ni nghe nghe. Miin kan chunga ti se kan duh ang thilte chu mi chungah pawh ti ve thîn tûrin min zirtîr a ni” a ti a.

Brad-a chaun, “Khawngaih takin han sawifiah leh deuh teh a” tiin a ngên a.

Chutah a Pate Darrena-a chuan, “Aw le, sawifiah ka’n tum ang e. I nu-in chaw ei tûr a rawn chhawpsak che emaw, i room a rawn tihfelsak che emaw khân ‘Ka lâwm’ tiin i lo sawi em?” tiin a zâwt a.

Brad-a chuan, “Aw, sawi deuh ziah thîn e” tiin a chhâng a.

Darren-a chuan, “A nih leh, restaurant-a thawkte’n i ei tûr lam an rawn pêk che emaw, mi tu emaw-in lêng tûra a sâwm che-in emaw lâwmthu i hrilh thîn em?” a tih leh a.

Brad-a chu a lo bu nghauh a.

Darren-a chuan, “‘Ka lâwm e’ tih sawi hi kan lâwm a ni tih tihlanna a ni” tiin a sawifiah a. “Pathian dânte pawh Pathian kan châwimâwia, kan mihringpuite kan hmangaih a ni tih kan tih lanna tûra siam a ni” tiin a hrilhfiah ta bawk a.

Brad-a chuan ngaihnawm a ti hle mai.

Darren-a chuan sawi chhunzawm zêlin, “Thu Sâwm Pêka a hmasa ber hian, ‘Keimah lo chu pathian dang rêng rêng i nei tûr a ni lo’ tiin min hrilh a. Pathian chauh hi chibai bûk tûr leh zahna kan lantîr tûr awm chhun a ni tih kan hriat a ngâi a. Kan hun, kan rilru leh kan ngaihtuahna latu thil dang rêng rêngte chu Pathian kan hmangaihna rawn chuhpui vetu vek an ni. Heti hian han ngaihtuah mah the: Kristiante hian Pathian zahin, Isua Krista nun dân angin nung ve ni ta ila, ama tân leh mi dangte tâna hun hman kan duh ngei ngei ang. Mi dangte rawngbâwlsakna hmangin a rawng kan bâwl ang a. Amah chu hmangaih bera neiin, chu hmangaihna chu mi dangte chunga kan thil tih hmangin kan lantîr dâwn a ni.

“Thupêk pahnihna kal tlang hian Pathianin mi mal tinte mi rawn biak pawh theuh a duhzia kan hmu a. Milem emaw, Pathian entîrtu thil rêng rêng eng pawh chibai lo bûk chu Pathian dân bawhchhiatna vek a ni.

“Thupêk pathumna awmzia hi chu a chiang nghâl mai a. Pathian hming hi ho mai maiin, nawmngah takin kan lam tûr a ni lo. Kan Siamtu hi Pathian thianghlim a ni a, a hming pawh zah leh tih takin kan lam thîn tûr a ni.

“Thupêk pali-na hian Pathian chhinchhiahna a pu a, he thupêk hi kan Siamtu a nihna anga a thuneihna tilangtu chhinchhiahna a ni. He thupêka a tawngkam hmasa ber hian Lalpa Chawlhni thianghlim, ni sarih ni Sabbath hi hre reng tûrin min chah a, he ni hi Pathian chibai bûkna hun atân leh ringtute thlarau nun châwmna hun atâna hmang tûrin min hrilh bawk. Pathian Chawlhni thianghlim a nih anga rinawm taka Sabbath serhna chuan tawngtâi, chibai bûk leh Bible zir hona hun remchâng tha tak min siamsak a, chu mai chu ni lovin, inpâwl ho leh mi dangte tâna che chhuak ho thei tûrin hun tha min pe bawk.

Sawi chhunzawm zêlin, “Pathian chuan chhûngkuate hi kan khawvêl hnêna a hmangaihna lan chhuahtîrtu ni tûrin a duh a. Chuvâng chuan, thupêk pangana pawh hi thupêk sâwm zînga thutiam nei awm chhhun a ni rêng bawk. Pathian chuan an nu leh pate zaha, an thu zâwmtute hi a châwimâwi thîn a, rei tak dam tûra malsâwmna vûr a tiam bawk.”

Chutia a sawi lâi chuan Brad-a chu a lo kun ngaih mai a. “Ka nu’n a sawi dân chuan a thu ka âwih lo va, kan awm dânin amah a châwimâwi lo a ni tih min hrilh a. Chu chu hun khawhralna a nih thu pawh a sawi” a ti a.

A Patea Darren-a chuan ngilnei taka enin heti hian a hrilh ta a: “Kan nu le pate châwimâwi tih awmzia chu, kan duhzâwng a nih chiah loh pawha an thu zâwm tho hi a ni a, a chhan pawh kan tâna tha ber duhtu an nih vâng a ni” tiin.

“‘Tual i that tûr a ni lo’ tih awmzia chu mi tu pawh zah taka en tihna a ni a, a chhan pawh mi zawng zawng hi Pathiain ama anpuia a siam kan nih theuh vâng a ni. Isua pawh khân mi dangte huatna rilru leh ngaihtuahna put chu a duh lo khawp mai. Mi dangte huatna kan neih hi Isua’n a hmangaihnaa mi a luah khah kan ngên a nih chuan kan hneh theih a. Ani chuan ama nun leh thil tih ngei hmangaih kan hmêlmate pawh hmangaih theih tûrin mi lo zirtîr tawh si a [Matthaia 5:44, 45 en la].

“‘I uire tûr a ni lo’ tih thupêk hian kawppuite taka rinawm pawimawhzia uar takin a sawi a, chu mai bâkah, kan chhûngkaw member-te zaha an laka rinawm tlat tûrin mi a chah bawk.

“‘Rûk i ru tûr a ni lo’ tih awmzia chu nangma ta ni lo chu i la tûr a ni lo tihna a ni. Pathian chuan mi dangte thil neih zahsak tûrin min hrilh a, chu chauh chu ni lovin, thilpêk leh talent min kawltîrte hmanga amah châwimâwi tûrin min duh bawk. Min duh anga awm loh hi rûkrûkna chi khat a ni a, a chhan pawh hun, talent, rosum leh a hnên atanga thilpêk kan dawn dangte hi fing leh thiam taka kan hman loh hian amah kan rawk tihna a nih vâng a ni.

“ ‘Thuhretu derah i tang tûr a ni lo’ tih awmzia chu mi rinawm tak, zah tlâka awm thu dik chauh sawi thîn tihna a ni a. Mi dangte chanchin a dik lovin kan sawi ngâi tûr a ni lo. Mi dangte chanchin a chhe zâwngin emaw, phuahchawpin emaw kan sawi tûr a ni lo va. Kan ngaihtuahna, kan thil sawi leh thil tihte chu a dikin a rin tlâk tûr a ni [Philipi 4:8 leh Jakoba 3:2 chhiar la].

“Thupêk sâwmna kha eng nge ni kha? ‘I vêngte thil i awt tûr a ni lo’ tih a ni a, a awmzia chu nangma thil neihah i lungâwi tûr a ni tihna a ni. I neih theih bâk thilte awt tûr leh mi dangte thil neih awt hial tûra thlêmna chu i do hneh tûr a ni tihna a ni a, dâwra thil an zawrhte leh television vêla thil an rawn fak apiangte hi neih ve zêl tum loh tûr tihna pawh a ni bawk.

Brada chuan, “Ka hrethiam niin ka hria. Pathian dânte hi ka zâwm vek a nih chuan, ka thil ngaihtuah dân, thil ka sawi dân leh ka nungchang pawh a lo danglam ang” a ti a. A Pate Darren-a chu a lo bu nghat a. “Isua chuan, ‘Nangni’n kei mi hmangaih a nih chuan, ka thupêkte in zâwm ang [Johana 14:15] a ti a.

Isua khân leia a awm chhûng zawng khân Pathian dân a zâwm tluan zak a, kan tân entawn tûr tha tak a lo hnutchhiah a ni. Thlarau Thianghlim chuan Pathian Dân, Thu Sâwm Pêk hi zâwm thei tûrin min tanpui ang a. Pathian kan châwimâwia, mi dangte tâna malsâwmna kan nih hian Pathian ram khua leh tuite la ni ve tûrin kan inbuatsaih tihna a ni.

Tih Tûrte

Sunday

1. Exodus 20:1–11 leh tûn kâr zirlâi hi chhiar ang che.
2. Chângvawn, Jeremia 31:33 hi en lova sawi thei tûrin zir tan ang che.
3.Pathian hnênah a Thu hi inkaihhruaina fiah leh chiang tak a nih avângin lâwmthu sawi rawh.

Thawhtanni

1. Exodus 20:12–17 leh Johana 14:15 chhiar ang che.
2. Engtin nge thupêk hmasa pali-te hian Pathian nêna kan inlaichînna chungchâng a sawi a, engtin nge a hnuhnûng parukte hian mi dangte nêna kan inlaichînna chungchâng a sawi bawk?

3. Thu Sâwm Pêk hi “Hmangaihna Kawng 10-te” tiin ziak tha la. A awmzia chu thil tha ti tûra inhrilhna ang vekin ziak rawh tihna a ni (entîr nân, “Pathian châwimâwi rawh” tiin)

4. Chângvawn kha chhiar leh la.
5.Pathian hnênah a dânte’n nun a tihhlim avângin lâwmthu sawi rawh.

Thawhlehni

1. Matthaia 22:34-40 chhiar ang che.
2. Isua’n thupêk ropui ber pahnih a tihte leh nimina Thu Sâwm Pêkte i lo ziah that ve kha khâikhin rawh.

3. Châwngvawn kha zir leh la.

4.Pathian hnênah a lalram dânte chu zirtîr tûr chein dîl la, i thinlunga “ziak” tûrin ngên bawk rawh.

Nilaini

1. Thupuan 14:12 chhiar ang che.
2.He Bible châng hian eng chungchâng nge a sawi? “Chhel taka awm” a tih ang hi i lo ni ve tawh em?

3. Ram tin hian an ram puanzâr an nei vek a. Vânram puanzâr tûr han siam chhin teh.
4. Chângvawn kha zir leh rawh.
5.Pathian hnênah atâna chhel taka i awm theih nân huaisenna dîl ang che.

Ningani

1. Johana 14:15 chhiar rawh.
2. Kum thar thutiam i lo siamte kha eng nge ni? Chûng thutiam i siamte zînga engte khân nge i thlarau lam nun nên inzawmna nei? A eng ber khân nge Pathian hmangaihna lalram khua leh tui tha zâwk i lo nih theih dân tûr lamah hruai che?

3. Mi tu emaw hnênah Isua laka rinawm taka awm reng tih awmzia hrilh fiah rawh (Thupuan 14:12 en la.)
4. Chângvawn kha chhiar leh ang che.
5.Isua hnênah amah chu eng tik lâi pawha ena, i thil tih engkimah a laka i rinawm zêl theih nân a tanpuina dîl ang che.

Zirtawpni

1. Jeremia 31:33 chhiar la.
2. In chhûngkuain Pathian thupêkte hi sawi ho rawh u. Thupêkte zînga engte hi nge mite’n an ngaihthah tlângpui thin?

3. Inkaihhruaina hi awm ta lo se, khawtlâng nun leh mi mal nun pawh engtin nge awm ang? Engtin nge dânte hian mi hlim zâwka mi a siam thin? Engtin nge keimahni ni lovin, mi dangte ngaihsak tûrin mi a tanpui? 4. Chângvawn kha en lovin sawi rawh.
5.Pathian hnênah vân khua leh tuite ni tûra a dânin min lo buatsaih avângin lâwmthu sawi ang che.