2025 2nd Quarter Earliteen Zirlai-9-na
Zirlâi 9 May 31, 2025
ISUA’N MIN VÊNG
Chhiar tûrte: Daniela 7:9, 10; Matthaia 22:1–14; Hebrai 4:14–16; 7:23–26; 8:1, 2; 9:22–28; Thupuan 5:9; 12:10; 21:27; 180–182; Indona Ropui, bung 23; 24, pp. pp. 409–432; The Bible Story (1994), vol. 10, pp. 157–160, 180–182; Kan Kohhran Thurin, no. 24, 10, 8.
Chângvawn: “Ka naute u, thil in tihsual loh nân hêng thu hi in hnênah ka ziak a nih hi. Tin, tu pawhin thil a tihsual chuan Pa hnêna mi sawipuitu, Isua Krista mi fel chu kan nei e; ani chu kan sualte thupha châwina a ni; keimahni sual chauh ni lovin, khawvêl zawng zawng sual thupha châwina pawh a ni” (1 Johana 2:1, 2)
Chakna thu: Isua’n a khawngaihnain vân biak bûkah khian min vêng a ni.
Thubuai remna pindanah i awma, chutah chuan i chungthu ngaihtuah a ni mêk angin han suangtuah chhin teh. Rorêltute chuan thil sual i ti ngei nge ngei lo tih an hriat theih nân finfiahna awm ang angte chu an en kual a. Dân bawhchhia tia thiam loh chantîr lo ni ta la, engtin nge i awm ang? Chu thubuai atang chuan chhuah zalên i nih theih nân ukil hnênah sum tam tak pêk ngâi ta se, engtin nge i tih ang?
Bible hian vâna rorêlna a thlen thu a sawi a. Chu rorêlnaa thil thlengte chu zâwlnei Daniela khân inlârnaah hmu-in, Hmakhawsânga, Pa Pathian chuan mihringte hi hriat rengna bua thil lo chhinchhiahte beh chhanin an chungthu a rêlsak a. Rorêlna chu a lo awma, lehkhabute chu an han keu chuan mi pakhat, vân chhûmte nêna lo kal, Mihring Fapa ang hi lo langin, Hmakhawsânga hnênah chuan a lo kal a, a hmaah chuan ani chu an rawn hruai hnâi a (Daniela 7:9, 10, 13, 14). Hetiang deuh tho hi Daniela 8:14-ah pawh sawi ve leh niin, chutah chuan biak bûk “tlen fâi” a nih thu sawi a ni ve thung.
Hemi awmzia hi chîk zâwkin i han bih dâwn ang aw. Vâna awm biak bûk chanchin khi hre tûr chuan leia awm thîn biak bûk chanchin kha kan zir chian hmasa pahwt a ngâi a. Kha biak bûk kha vâna awm biak bûk entawna Mosia’n a sak a ni (Exodus 25:9, 40 en la). Mi in thil sual lo ti ta se, thil sual titu chu biak bûkah lo kalin, sualna nei lo Pathian Berâmno thianghlim Isua (Thupuan 13:8) entîrtu tûr ran thianghlim, hmêlhemna pakhat mah nei lo a rawn keng ang. Berâmno lu chungah chuan kut nghatin a thil sual tih chu a puang ang a, chutia a tih chuan berâmno hnênah a sual a hlân chhâwng tihna a ni. Chutichuan, chu berâmno chu mi sualte thâwi nâna Isua inhlanna entîr nân mi sual âiah hlan a ni ang (Leviticus 1 en la).
Kum khatah vawi khat Tlanna Ni an hmang thîn a, chumi ni chuan Israel fate zawng zawng chu biak buk kawtah lo kal khâwmin an sualte an puang vek thîn a. Hemi ni hian biak bûk chu Israel mipui zawng zawng sualte lak ata “tlen fâi” a ni thîn a ni. Biak bûkah chuan kêl pahnih an rawn keng a, a khawi zâwk nge Pathian pual ni ang a, a khawi zâwk nge Azazela pual ni ve thung ang tih hriat nân thum an vûr thîn a. Kêl pakhat zâwk, a chungah an sualte an puan ve miah lohna chu talhin inthâwi nân an hlân a. A thisen chu kum tluana sual thâwina atâna an lo hman ran thisente’n a tihbawlhhlawh biak bûk tlen fâi nân an hmang thîn a ni. He kêl hi kan tâna Isua’n inthâwina a siam entîrtu a ni a. Krawsah khân Isua chuan kan tuar âi tuarin, kan sual man batte chu mi lo tlâksak tawh a, sual ânchhia lak ata min chhuah zalên ta a ni.
He sual tlen fâina kêl thisen hi biak bûk bang vêla tah a nih hnu chuan, mipuite sualna chu sual bul Setana entîrtu kêl lu chungah nghah a ni a. Tichuan, thlalêrah thi tûra vahvaihtîr niin, chu chuan khawvêl sualte hremna Setana’n a la phurh tûr chu a lo entîr a ni (Leviticus 16 en la).
Hetah hian thil pawimawh tak pakhat kan hriat tûr awm chu, lei biak bûk rawngbâwlnaa Tlanna Ni hi Israel mite zawng zawng tel vek tûra beisei an nihna inkhâwm awm chhun a ni a (Leviticus 23:29, 30 en rawh). Tin, hemi ni hi Hmun Thianghlim Bera puithiam lal ber a luh theih ni awm chhun a ni bawk. Hemi ni hian Israel mite sual tlanna hna bîk thawk tûrin a lût thîn a. Kum tluana puithiam rawngbâwlna chi hrang hrangte khân kan puithiam lal ber a nihna anga Krista rawngbâwlna a entîr. Nimahsela, Tlanna Ni bîk hi chuan hrilhlâwkna ni 2,300 tâwpna, kum 1844-a biak bûk Hmun Thianghlim Bera Isua a luhna a entîr a (Daniela 8:14 en la). Khami kum atang khân vân biak bûka kan puithiam lal ber ropui tak a nihna angin rorêl lâwkna hna a thawk tan ta a ni (Leviticus 16:30 en ang che).
Eng tikah emaw chuan he khawvêla lo piang chhuak tawh zawng zawngte chu Pathian hmaah an la inlan theuh ang a. Mi zawng zawngin thil ti sual tawh vekin, Pathian ropuina pawh chang zo lo theuh tawh tho mah ils, (Rom 3:23), kan sualte kan puana, Isua inthâwina siam kan pawma, a thu âwih taka kan nun bawk chuan kan phu hauh loh chhandamna thilthlâwnpêk chu kan dawng thei thung si a ni. Thil lâwmawm tak chu, he rorêlnaah hian Isua chu an mimal Tlantu atâna pawmtute leh a thupêk zawng zawng—Sabbath thupêk pawh hi telin—zâwmtute tân sawipuitu a ni tûr hi a ni a (Thupuan 14:12 en la). Heti hian Johana chuan a lo sawi: “Tu pawhin thil a tih sual chuan, Pa hnêna min sawipuitu Isua Krista, mi fel chu kan nei e” tiin (1 Johana 2:1). Kan sual man hremna chu Isua thinsen hlu tak hmang khân pêk tlâk a lo ni daih tawh a. Isua Krista zârah zalên kan lo ni ta. A va lâwmawm êm! Kan tih tûr awm chhun chu a inthâwina siam kha lo pawm tawp mai a ni.
Vân rorêlnaah chuan chhinchhiahna bute chu an han keu va, mi tinte ngaihtuahnaa awm, an thil sawi leh an thil tih hrang hrang leh an sualnate chu hmuh vek a ni ta. Rinnaa Pathian dân zâwmtute hming chu “Berâmno Nunna Bu-ah chuan ziah vek a ni a (Thupuan 21:27), chuta ta chu an hming thâi bo a ni tawp lo vang” (Thupuan 3:5). Nunna Bua an hming ziah ni ve lote leh he rorêlna neih chhûnga an hming thâi bo ni tate chungchâng thu chu a hnu, kum sâng rorêl chhûngin ngaihtuah that leh a ni dâwn a ni.
Chuti a nih chuan, “Pathian tiha, a thupêkte vawn” hi thil pawimawh tak a ni tihna a ni ta a. Chu chu mi zawng zawng tih tûr pawh a ni rêng bawk. “Pathian chuan thil tih zawng zawng chungah ro a la rêl dâwn si a, thil inthup engkim, a chhia emaw, a tha emawte pawh” (Thuhriltu 12:13, 14).
Rorêlnaah chuan eng tik hunah pawh kan hming lam a ni thei a. Eng tin nge kan hun leh kan sum leh pâite hi a tha thei ang berin kan hman theih ang? Pathianin min pêk thilthlâwnpêkte leh talent-te hi eng tin nge kan hman thin le? Eng tin nge Isua lamah kan thinlung kan hawna, kan nun a tihdanglam kan lo phal ang? Isua chu kan mimal Chhandamtua kan pawm a nih chuan, a felna kawrfual min hâktîr ang a. Amah ringtu apiangte hnênah chuan “chatuana nunna” pêk a tiam a ni (Johana 3:16 en la).
Tih Tûrte
Sunday
1. Matthaia 22:1–9 leh tûn kâr zirlâi hi chhiar ang che.
2. Chângvawn, 1 Johana 2:1, 2 hi en lova sawi thei tûrin zir tan rawh.
3. Mi tu emaw hnênah nunna bu-ah chuan kan hming ziah a ni tawh tih hrilh ang che.
4.Pathian hnênah nunna bua i hming a chuan tawh avângin lâwmthu sawi rawh.
Thawhtanni
1. Matthaia 22:10–14 chhiar ang che.
2. He tehkhin thu-a inneihna puan tih hian eng nge a entîr? Isua a ruai buatsaih kîl tûra a sâwm hunah che eng tin nge i lo chhân ang? A felna kawrfual chu i lo inbel ve tawh em?
3. Chângvawn kha zir leh la.
4. Isua hnênah a felna kawrfual a hâktîr che avângin lâwmthu sawi ang che.
Thawhlehni
1. Hebrai 4:14–16 chhiar ang che.
2. I note bu-ah khân tuin emaw dik lo takin a puh che a, mahse, i thian pakhat chu i tâna lo ding chhuak a rawn chhan che tuma thil thleng kha ziak ang che. Chumi zawhah chuan, Isua chu nangmah chhantu i thian tha tak a ni tih i hriat avânga i rilru thlamuan dân kha ziak ve leh bawk rawh.
3. Chângvawn kha chhiar leh rawh.
4.Isua hnênah mi a hriatthiam avâng leh mi a vên avângin lâwmthu sawi ang che.
Nilaini
1. Sam 35:22–24 chhiar rawh.
2. Chângvawn kha chhiar leh la.
3. Bible-a hrilhlâwkna kan hmuh eng engte hi nge lo thleng famkim tawh awm?
4.Isua hnênah a thutiam zawng zawngte a vawn avâng leh, Bible-a hrilhlâwknate a lo thlen famkim tâk avângin lâwmthu sawi ang che.
Ningani
1. 1 Johana 4:16–18 chhiar la.
2. Bible-a an chanchin kan hmuhte zîngah hian tu chanchin nge hriat belh i châk ber? Chu mi chanchin chu chhiar la; tichuan, a chanchina chhinchhiah tlâk deuh deuh pathum sawi ang che.
3. Chângvawn kha chhiar leh rawh.
4.Isua hnênah amah i tihlâwm theih nân a tanpuina dîl ang che.
Zirtawpni
1. 1 Johana 2:1, 2 chhiar leh la; tichuan, en lovin sawi ang che.
2. Inneihna puan sin tehkhin thu hi a lem han chang teh u.
3. In ina chaw ei tûrin mi tu emaw sâwm ula, i chhûngte hnênah in mi sâwm chuan eng thil nge a rawn tih an beisei zâwt rawh. 4.Pathian hnênah a ruai buaitsaih kîl ve tûra a sâwm che vângin lâwmthu hrilh ang che.