2025 2nd Quarter Kindergarten Zirlai-2-na

Zirlâi 2                                                                      April 12, 2025

|hian |ha berte

Chângvawn: “Jonathana chuan amah a inhmangaih angin (Davida) a    

                      hmangaih a . . .” (1 Samuela 18:3, NIV).

Chhiar Tûr:  1 Samuela 18:1–5; 20:1–42; Thlahtubulte leh Zâwlneite (2nd

                      Edition, 2014), pp. 688–695.

Zirlâi Tum:  Naupangte chuan:

· Pathianin an \hiante chunga rinawm tlat tûrin a duh tih an hria ang.

· |hian an neih avângin hlimna rilru an pu ang.

· |hian rinawm leh dikah an \an phah ang.

Thuchah:  |hian \ha chu an inhmangaih tawn \hîn.

Tu nge ni i \hian \ha ber chu? Eng thil nge tih dun i duh ang le? Davida leh Jonathana te pahnih pawh inkâwm ngeihin, an inhmangaih êm êm a ni.

Lal Saula’n Davida a chah a. “Lo kal la, lal inah lo chêng rawh. Sipaia \anga hna min thawhsak tûrin ka duh che a ni,” a ti a.

Tichuan, Davida chu lal in mâwi takah a chêng a. Davida chuan Lal Saula fapa upa ber, Jonathana chu a hmu thuai a. An pahnih chuan an inngaina hle a, \hian bul takah an inchhar tawn ta a ni.

Jonathana chuan, “Hawh thal kah i zir dûn ang,” tiin Davida chu a sâwm chhuak fo \hîn a.

Davida pawhin, “Hawh sakawr chungah chuangin i lêng ang,” tiin Jonathana chu a sâwm ve fo bawk a.

Israel mite pawhin Davida chu an ngaina tlâng hle bawk a. Chutiang chu Lal Saula’n a lo hriat chuan, amah âiin Davida chu an hmangaihin an ngaina zâwk niin a hria a. Chuvâng chuan a thin a rim a, Davida chu thah a tum ta mai a ni.

Davida chuan a \hian Jonathana hnênah, “I pain min thah a tum tlat mai!” tiin a hrilh a.

Jonathana chuan uar deuh takin, “Chu chu a dik ang!”  a ti a.

Davida chuan, “Tak tak a nia! Hei kût hun a lo thleng \êp tawh a, lal chuan awm ve ngei tûrin min beisei dâwn a ni. Ka chhûngte hmu tûrin ka kal teh ang. Kût hnu ni hnih vêlah ka lo kîr leh ang a, ramhnuaiah ka biru ang. Kût chawhlui kîlnaah ka awm lo tih lalin a hriat chhuah chuan, ka chhûngte tlawh tûrin ka kal a ni tih lo hrilh ang che. Chutah a thinrim chuan, min thah a lo tum ngei a ni tih hria ang che,” tiin a chah a.

Jonathana chuan, “A \ha e. Lung chhêk khâwmna kiangah khân i biru dâwn nia. Ka pain tihnat che a lo tum tak tak a nih chuan, ka hrilh ngei ngei ang che. Ka ruahman dân chu hetiang hi a ni:  lung tian khâwmna bulah thal ka kâp ang a. Chutah ka naupang hruai chu thal chhar tûrin ka hrilh ang a. Mipa naupang hnêna, ‘Kal ta che thal chu i hmaa saw a awm saw,’ ka tih chuan, ka pain thah a lo tum ngei che tihna a ni ang. Nang pawh hmun him lam panin i insaseng dâwn nia,” a ti a.

Lal Saula chu kût ruai kîl tûra a \hut chuan, Davida \hutna chu a ruak tih a hria a. Mahse, eng mah a la sawi rih lo. A tûka chawhlui kîl a lo hun leh chuan, lal chuan Davida \hutna chu a ruak fo tih a hmû a. Jonathana hnênah chuan, “Khawiah nge Davida hi a awm?” tiin a zâwt a.

Jonathana chuan, “Davida chu kût chhûngin a chhûngte hnênah a hâwng ta a nih kha,” a ti a.

Lal Saula hmêl chu thinrim lutuk vângin a sen ta \âwn \âwn a. Jonathana hnênah chuan, “Davida hi lal atâna siam i duh tih ka hre lovin i ring em ni? Davida chu kohtîr nghâl vat la, ka lo that a nge!” tiin a vîn hlur mai a.

Jonathana chuan a pain chutiang thil râpthlâk tak chu tih a lo duh ngei a ni tih a hre ta a.

A tûk zîngah chuan Jonathana chu ramhnuaiah chuan a va kal a. Thalngul leh thal a keng a, lung tian khâwmna lam chu tinin, a thal chu a kâp a. Chhiahhlawh naupang hnênah thal chu va zawng nghâl vat tûrin a tîr a.

Jonathana chuan mipa naupang thal chhar tûra kal chu au zuiin, “A piah lamah pawh kal rawh. Thal chu i hmaah pawh a awm saw!” a ti a.

Mipa naupang a lo kîr leh chuan, Jonathana’n khuaah a hâwntîr a. Chutah amah leh Davida chu inchibaiin, an inthlah a. Jonathana chuan, “Hun eng emawti chhûng chu kan inhmu thei kher lo vang. Mahse, kan in\hianna hi kan vawng reng dâwn nia,” tiin a tiam a.

Davida pawhin, “Ni e, i \hian ka ni kumkhua ang!” a ti a. Chutiang chu an ni zui ta rêng a ni.

Tih Tûr leh Sawi Tûr

Sabbath

• Tûn kâr ni tinin Zirlâi thawnthu hi chhiarin, in chângvawn pawh en nawn ang che u.

   Jonathana’n . . . . . Mi dang kâwk la

   Mahni a inhmangaih angin. . . .. . .Mahni inkâwk a, âwma kut pahnih dah.

   [Davida] a hmangaih. . . . . . . . . . .Mi dang kawh a, âwma kut pahnih dah.

   1 Samuela 18:3 . . . . . Kutphah pahnih inthlawptîr a, chutah pharh leh.

Sunday

• 1 Samuela 18:1–5 leh 20:1–42 hi chhiar ho ula. Inzawh tûr:  Jonathana’n Davida \hian a nihzia lantîr nân eng thil nge a pêk? Engtin nge Davida kha a \anpui zui? Enga ti nge an lungngaih dun? In fate chu an \hian \ha ber lem ziahtîr ang che u.

Thawh\anni

• 1 Samuela 18:1–3chhiarin, in fate hnênah hrilhfiah ang che u. Chutah in chhûng zînga tu emaw chu kuah a, an hmangaih thu hrilh tûrin tihtîr ula. Sabbath Sikulah thal lem siamtîrin, Davida leh Jonathana chanchin sawi pahin, mi dangte sem tûrin in fuih dâwn nia. (A nih loh leh lehkhakhawngah thal lem ziakin, chutah chuan Chângvawn thu ziahtîrin, mâwi taka cheiin in chehthlâksak dâwn nia.)

Thawhlehni

• 1 Samuela 18:4 chhiar ho ang che u. In fate chu an thawmhnâwte enfiah a, mi dang rethei leh harsate hnêna sem atâna community Services hnêna pe tûrin in fuih dâwn nia. Chutiang pe tûr chuan in kalpui dâwn nia.

Nilaini

• In fate chu an \hiante hming lam a, chhiar zêl tûrin ti ang che u. Inzawh tûr: |hian kawm ngeih bîk tak in nei em? Enga ti nge chu mi chu in ngainat bîk riau chhan? Isua pawhin an \hian \ha bera \an ve a duh a ni tih hrilh nghâl ang che u.

Ningani

• In fate chu an \hian \ha bîk hming sawitîr ula, chu mi tâna thil eng emaw tak tihsak an duh chu sawitîrin, hlen chhuak tûrin in \anpui dâwn nia. (A nih loh leh, in fate chu Zirtawpni tlâia zanriah kîlpui tûr leh inkhâwmpui nghâl atâna sâwm tûrin \anpui ula. Isua’n an \hian \ha bîk atâna lo \an a duh avângin lâwmthu sawipui ula. In fate pawh chu Isua tâna \hian \ha a nih ve theihna tûra a \anpuina dîlsak ang che u.)

Zirtawpni In chhûngkaw worship-naah, Davida leh Jonathana-te thawnthu kha lemchanah hmangin, in chang tlâng \heuh dâwn nia. Hmanrua in hmuh theih ang ang tûr hmangin thalngul leh thal lem in siam dâwn nia. Inzawh tûr:  Engtin nge in \hiante hnênah in hmangaihna in lantîr ang? |awng\âi hmain ‘in\hianna’ lam hla sa ho ula. Isua chu in chhûngkaw \hian a nih avângin lâwmthu sawi ang che u.