2025 2nd Quarter Kindergarten Zirlai-4-na
Zirlâi 4 April 26, 2025
thutiamte vawng zêlin
Chângvawn: “In\hian zêl tûrin Lalpa hminga chhia kan chham dun tawh
kha” (1 Samuela 20:42, ICB).
Chhiar Tûr: 1 Samuela 20:14, 15, 42; 2 Samuela 4:4; 9:1–13; Thlatubulte
leh Zâwlneite (2nd Edition, 2014), pp. 750–751.
Zirlâi Tum: Naupangte chuan:
· Pathianin a thutiamte a vawng reng \hîn tih an hria ang.
· Mahni thutiam siamte hlen ngei duhna rilru an pu ang.
· Ti tûra an lo tiam tawh chu a takin an hlen zêl ang.
Thuchah: Isua hmangaihtute chuan an thutiamte an vawng \hîn.
Lal Davida chuan vân dumpâwl ruih lam chu a thlîr a. A tlangvâl lâi hunte kha a hre reng a. A pa berâm rual a vên lâi hunte pawh a ngaihtuah lêt a. Ni pawimawh bîk tak mai hmanpui tûra zâwlnei Samuela an khuaa a lo kal a, olive hriak a rawn thih a, Pathianin lal thar atâna a thlan thû a hrilhte pawh kha a ngaihtuah neuh neuh a.
Davida chuan Lal Saula lal ina a chên lâi hunte pawh a ngaihtuah a. Chutah a \hian \ha ber, a kawmngeih êm êm, Lal Saula fapa Jonathana pawh a ngaihtuah chhuak a.
Davida a thaw huai a. A \hian duh tak Jonathana chu indona hmunah a thi tawh a. Davida chuan a ngâi thei êm êm a ni. An pahniha sakawr chung-chuanga an tlân dun lâite, thal kah an zir dun lâite a ngaihtuah a. Kumkhuaa \hian ni tûra thû an intiam dun lâite leh, Jonathana chhûngte chunga ngilneihna lantîr zêl tûra a intiam thute pawh a ngaihtuah bawk a.
Chutah Davida chuan thil dang a ngaihtuah chhuak thut a: ‘Jonathana chhûngte zînga mi dam an la awm em?’ tih a ni. Lal Davida’n Saula chhiahhlawh Ziba chu lo kal tûrin a chah a. Ziba chu rang takin lal in lam panin a lo tlân nghâl a. Lal Davida’n a hnênah, “Saula chhûngte zînga mi tû emaw dam an la awm em? An chungah Pathian ngilneihna lantîr ka duh a ni,” a ti a.
Ziba chuan, “Aw, awm e. Jonathana fapa pakhat, Mephiboseta, a naupan lâi a\anga kebâi chu a la awm e. A ke pahnih a zeng a,” tiin a hrilh a.
Lal Davida chu hlim takin a nui var var a. “Amah chu hmuh ka duh e,” a ti a. Tichuan, lal chuan a lal in lama Mephiboseta rawn hruai tûrin chhiahhlawhte a tîr a.
Mephiboseta chuan Lal Davida thuchah a hriat chuan a pumte a inlûmlet but but a. A pu Lal Saula’n Davida tihhlum tuma nasa taka a beih thûte kha a hre ve reng a. Lal Davida’n a lal ina kal tûra a tih chhan chu eng nge ni ang? Lal chuan amah chu tihhlum a duh nge ni dâwn? Mahse, hlau chung chung pawhin lal thu chu a hnial ngam bawk si lo.
Mephiboseta chu lal in a lo thlen chuan Lal Davida hmaah chuan a bawkkhup a, “I chhiahhlawh ka ni e,” a ti a.
Davida’n ngilnei takin, “Hlau rêng rêng suh ang che! I pa, Jonathana kha ka \hian bul a ni a. Chuvâng chuan ka hnêna lo kal tûrin ka ko mai che a ni. I pu lal Saula ram zawng zawng kha ka pe leh vek a che u. Nang erawh chu lal inah hian, ka hnêna chêng tawh tûrin ka duh che a ni,” tiin \ha takin a bia a.
Mephiboseta chuan mak ti lutuk, a ngaihna hre lovin a âng hau mai zâwk a. “Enga ti nge chutiang thil ropui lutuk te chu min tihsak duh kher le aw?” a ti a.
Lal chuan, “I pa kha ka hmangaih êm vângin a hnênah khân a chhûngte chu ka enkawl ang tih ka lo tiam tawh a ni!” tiin a chhâng a.
Chutiang chuan Mephiboseta chu lal inah chuan a chêng ve ta a. Davida pawhin Mephiboseta chu amâ fapa ang maiin a duat a. Anni pahnih pawh chu an inkâwm ngeih leh ta êm êm mai a ni.
Tih Tûr leh Sawi Tûr
Sabbath
- Tûn kâr ni tinin Zirlâi thawnthu hi chhiarin, in Chângvawn pawh en nawn ang che u.
In\hian zui zêl tûrin. . . . . Kutzungchal kawm la.
Lalpa hmingin . . . . . . .Chung lam kâwk la.
Chhia kan chham . . . . Mahni inkâwk a mi dang kâwk lehin, lung zâwnah
kut dah.
Dûn tawh kha. . . . . . . . . . Mahni inkâwkin, mi dang kâwk leh la.
1 Samuela 20:42 . . . . Kutphah pahnih inthlawptîr a, chutah pharh leh.
Sunday
- Chhiar ho tûr: 1 Samuela 20:14, 15, 42; 2 Samuela 4:4; 9:1–13. Inzawh tûr: Davida’n Jonathana hnêna a thutiam a vawng em? In fate chu Sabbath sikula chhimbâl lem an siam kha tûnkâr chhûnga mi dang tû emaw hnêna pe a, Bible thawnthu hrilh nghâl tûrin fuih ang che. (A nih loh leh, lehkha phêkah chhimbâl ang tûra lazâi rawng chi hrang hrang bel kual tûrin emaw, a lem ziaka chei tûrin emaw in ti dâwn nia.
Thawh\anni
- Sabbath sikula in fain thutiam a lo siam tawh chu sawi ho ula. Chu thutiam chu vawn a ni ve em? Eng nge a chhan? A remchân chuan, in fa hnênah chuan inneih thlalâk entîr la. Inneihnaa Pathian leh mi dang hriatpuitute hmaa thutiam an siam chungchâng hrilh ang che.
Thawhlehni
- Thil inrih hleih dân tehna/enna leh hman dân chu in fa hnênah hrilh la. Inzawh tûr: Enga ti nge hêng hi a uai fual zêl \hin? Boruak rihna thû-ah Pathianin a thutiam a vawng em? Boruak rihna hi awm ta lo se, engtin nge ni ang?
Nilaini
- Ramhnuai lamah lêng chhuakin, Pathian thutiamte entîr thei tûr hmuh tum teh u (Kan zâa chunga ni–êng leh ruah sûr te, thlâi \hang lâi te, chhimbâl leh thil dang dangte pawh). Pathian thutiamte min hriat chhuahtîr thei thil lemte chu la khâwm ang che u.
Ningani
- In fa tân thutiam siamin, hlen ngei bawk ang che u. Matthaia 5:45 chhiar ho ula. Inzawh tûr: Hetah hian eng thutiam nge Pathianin a siam? Vawiin thlengin Pathianin a thutiam chu a la vawng reng em? Khawdur ni pawhin chhûm Chung lamah chuan ni a êng reng tho a ni tih in hrilh dâwn nia.
Zirtawpni In chhûngkaw worship-naah Zirlâi thawnthu hi in fa chu sawitîr ula. Chhiar ho tûr: Thlahtubulte leh Zâwlneite (2nd Edition, 2014), pp. 750–751. Engtin nge in chhûngkua kha Davida ang deuh in nih ve? Isua’n vâna min hruai tûra lo kal leh a tiam chungchâng kha sawi ho ula. Isua thutiam chungchâng hlate sa ho teh u. Tûin emaw in hnêna thutiam an siam a, an hlen/bawhchhiat chungchâng sawi ula. Chuta in rilru awm dân chu sawi bawk teh u. Inzawh tûr: Thutiam vawn hi a pawimawh em? Isua’n a thutiamte a vawn avângin lâwmthu sawi ang che u. Nangni pawhin in thutiamte in vawn theih nân a \anpuina dîl ang che u