2025 2nd Quarter Puitling Zirlai-10-na

Zirlâi 10 May 31–June 6

Tâwpna Lo Thlên Tâknate Chungah

Sabbath Chawhnu

Chhiar tûrte: Thup. 6:12–17; Mat. 24:36–44; Gen. 6:1–8; 2 Pet. 2:4–11; Gen. 18:17–32; Dan. 7:9, 10.

Chângvawn: “Tin, chûng chu entîrna tûrin an chungah a lo thleng a nih kha; keini, hun tâwp lo thlennate hi min zilhna tûrin an ziak a ni bawk a. Chuvângin, dinga inring chu fîmkhur rawh se, chuti lo chuan a tlu dah ang e” (1 Korinth 10:11, 12).

Bible hi nakîna thil lo la thleng tûrte min hriattîrtu leh, “tûn hun atâna thutak” kan lo hriatthiam theihna atâna min tanpuitu tûr Pathian mite chanchinin a khat tlat a ni ber mai. Dik tak phei chuan, hêngte zînga thenkhat hian ni hnuhnûnga thil lo thleng tûrte chu chipchiar takin a lo sawi lâwk nghe nghe a. Daniela lehkhabu leh Thupuan bua hrilhlâwkna thute hi chiang taka kan lo hriatthiam theih nân tanhmun rem tha tak min siamsak bawk.

Pathian chuan mi mal tinte’n chhia leh tha hriatna thiang tak kan neih hi min rawn namnûlsak chuang hauh si lovin, zâwlneite’n ni hnuhnûnga thleng tûr nia an lo sawite chu rem takin a rawn thlen dik chhohtîr zat zat thîn a. Chûng thawnthu pawimawh tak tak zîngah thenkhat, entîr nân, Sodom leh Gomorra chhiat thu te, tui lêt thu te phei hi chu kan hriat lâr êm êm, Thuthlung Thar lehkhabute pawhin ni hnuhnûnga thil thleng tûrte an sawina lama an sawi lan deuh kherte a ni hlawm nghe nghe. Thawnthu thenkhat erawh chu ngunthlûk deuh hleka ngaihtuah phawt ngâite a ni hlawm thung a, chûng thawnthutea Pathianin thutak a lo phûmte hâi chhuak tûr chuan tih tak zeta ngaihtuahna kan sên pawh a tûl thîn.

Tûn kârah leh a leh pêk kârahte hian thawnthu pawimawh tak takte’n Isua Krista lo kal lehna te, rorêl lâwkna chungchâng te, buaina hnuhnûng chungchâng te leh thil dang dang te pawh an lo sawi dân hriat tumin kan zir dâwn a. Chutianga kan zirnaah chuan, Isua Krista hi hrilhlâwkna thu kan zir zawng zawngte innghahna lungphûm leh hriat kan tum ber tûr a nih tlat avângin, amah chu a pawimawh berah a awm zêl a ni tih kan hre dâwn a ni.

Sunday June 1

Berâmno thinurna

Thupuan 6:12–17 chhiar la. Hêng mite’n ni hnuhnûnga thil lo thlengte an hmuha an thil tihte leh an thil sawite hi ngaihtuah la. Eng nge i rilru-ah lo awm?

______________________________________________________

_______________________________________________________

Thil mak leh ngaihnawm angreng tak ni bawk si chu, boral tûrte hian, “Hei hi eng nge ni?” tiin emaw, “Hemi phênah hian tu nge awm?” tiin emaw an sawi duh chuang hauh lo hi a ni. Thil lo thleng mêk chu eng nge ni tih an hria ni ngeiin a lang a, a chhan pawh Isua chu “Berâmno” tia an sawi vâng niin, he tawngkam hmang tûr hi chuan Isua chanchin eng emaw zât tal hriat ve a ngâi tlat atin ni. Tin, “Berâmno thinurna ni ropui chu a lo thleng ta a ni” tih pawh an hre bawk niin a lang a, chu chuan an dinhmun beidawnthlâkzia rawn hriattîrin, “Tu nge ding thei ang ile” an ti ruai mai a ni!

Tâwpna a thlen hma hian chanchin tha chu khawvêl ram tinah puan chhuah a ni dâwn a (Mat. 24:14); tin, vântirhkoh pathum thuchah pawh hi lei pum puiah hril darh vek a ni bawk ang. Chuti chung chuan, lo inpeih lo mi tam tak a la awm tho dâwn a—chûng mite chuan vaukhânna thu hi an lo hre ve lo pawh ni lovin, an hriat ang chu an rin duh loh leh pawm duh tlat loh vâng zâwk a ni ang. Hei hi ni hnuhnûnga chûng mite boral chhan tûr chu a ni dâwn a ni.

Matthaia 24:36–44 chhiar la. Nova chanchin atanga zirlâi kan zir chhuah tûr Isua’n min lo hrilh chu engte nge ni?

_____________________________________________________

Isua hian tui lêt chanchin kha a lo kal lehna chu mi tam takte rawn thâwng thuttu a nih tûr thu sawina atân a hmang a. Isua lo kal lehnaah pawh a ni leh dâwn ang chiahin, tui lêt kha vaukhânna thu puan lâwk awm miah lova lo thleng thut a ni rêng rêng lo. Nova khân a thu hril âwih duh hauh lo khawvêl hnênah kum 120 chhûng zet thu a hril a. Eng nge lo thleng dâwn tih kha hrilh an ni chiang khawp mai. Mahse, an âwih duh tlat si lo atin ni.

Hetih lâi hian mi tam tak chuan khawvêl hi kum maktaduai tam tak lo awm tawh nia ngâiin, hrilhlâwkna thute pawh phuahchawp mai mai niin an sawi thîn a. Petera chuan hêng mite chungthu hi tui lêt chanchin hmang khân heti hian a lo sawi: “Hei hi hre hmasa ula, ni hnuhnûngahte chuan nuihsantute chu anmahni châkna anga awmin, nuihsan chungin an lo kal ang a, ‘A lo kal lehna thutiam chu khawiah nge? Siam tirh atangin eng kim a awm pângngâi angin chi thlahtute muthilh ni ata tawh kha a la awm zêl alâwm,’ an la ti ang” (2 Pet. 3:3, 4) tiin. Nimahsela, tâwpna hun chu kan hnaih chho zêl angin, hetiang ngaihdân neitute hi an la pung zêl dâwn zâwk a ni.

Mi tin hian Isua Krista lo kal lehna chu (a lo kal vawi thumna ti pawhin a sawi theih ang) kan hnuk chah rual chiaha lo thleng zui ve nghâl mai ni angin kan hre dâwn a. Chuti a nih chuan, eng tiangin nge Isua lo kal lehna “tih khawtlâi” nia lang hi a awmzia kan lo hriat thiam theih ang?

Thawtanni June 2

Nova’n chanchin tha a hril

Petera chuan Krista lo kal lehna atâna lo inbuatsaih lo mi tam tak awm tûr thu min hrilh a, an inbuatsaih loh chhan pawh tui lêt tuma thil thleng kha “an hai der luih” tlat vâng a ni a ti (2 Pet. 3:5). Chûng mite chuan khawvêl pum chîm pil vektu tui lian râpthlâk tak a thleng tawh ngei a ni tih hriatna nei reng mah se (hnam hrang hrangte hian, hmasâng Grik mite atanga Mayan-ho thlengin an thawnthu-ah chhiatna râpthlâk thlentu tui lian nasa tak a lo awm ngei tawh thu an sawi hlawm), Bible-a kan hmuh Nova chanchin hi a taka thleng ni lova ngâiin an nuihzat lui tlat nia maw le! Petera’n a lo sawi lâwk tawh ang ngei khân khawvêl hian Nova hun lâia tui lêt thleng kha thawnthu phuahchawp mai mai a ni a ti tlat a. Thuthlung Hluiin chiang leh uar taka a sawi chung leh, Thuthlung Thar lamah pawh vawi eng emaw zât sawi chhâwn a ni chung pawhin a âwih duh tlat chuang lo.

Isua khân a lo kal leh dâwn hnaiha khawvêl dinhmun chu “Nova hun lâi” ang kha a nih tûr thu a lo sawi a (Mat. 24:37–39). He lâi thu hi Genesis 6:1–8 nên khâikhin ang che. Tui lêt thlentîrtu an sualna kha eng nge ni a. Khatih hun lâia an an sualna ang kha tûn lâi hunah hian a thleng ve leh mêk em?

____________________________________________________

__________________________________________________

He lâi thu hi ngun taka kan zir chuan, ni hnuhnûnga Pathian mi la bângte tâna zir chhuah tûr zirlâi pawimawh tak dang pakhat a lo lang tih kan hria ang. Hebrai 11:7-a kan hmuh angin, Nova khân “a chhûngte chhandam nân lawng a tu a; chumi hmang chuan [a hun lâi] khawvêl kha thiam loh chantîrin, rinna avanga felna awm chu rochungtu a lo ni ta a ni” (NKJV).

Kum za leh sawmhnih chhûng zet thu a hril a; mahse, a thu hril chu lawnga lût ve ta a nupui fanaute bâk khân an âwih miah lo va nih chu! Nova kha tûnlâi huna rawngbâwl ni ta se, “thu hriltu hlawhtling lo” tiin kan sawi ngei ang: kum za chuang daih chhûng rawng a bâwl a; mahse, tu mahin a thu sawi an âwihsak tlat lo.

Nimahsela, vânneihthlâk takin tûnah hi chuan khawvêl hmun tam takah vântirhkoh pathum thuchah kan puan hi mite’n an lo ngaihven êm êm thung a. Chanchin tha hrila rawng kan bâwlna—kohhran pâwl dangte’n neih ve loh a la bâng thuchah kan puan—hi hmun tam takah a sâwt hle, hemi avâng hian mi tam takin Lalpa an lo hriat phah a ni. Rah seng loh thlâwt tum chu kan la nei tam lo hle a, hetih lâi hian “khawngaihna kawngkhâr a nih hun a la thleng ngei dâwn” tih erawh hrilh sa kan ni tho thung. “Chutih hunah chuan chuan he thu, ‘A inpeihate chu lâwi chaw kîl tûrin amah nên an lût a, kawng chu an khâr ta a’ tih hi lo thlengin, mihringte chhandamna hna ropui tak chu thawh zawh a nih hun kan thleng tawh ang.”—Ellen G. White, Indona Ropui, p. 429.

Chumi hun a thleng hma chu kohhran kan nihna angin hna kan la thawh zêl rih a tûl a ni.

Chanchin tha kan hrila kan beisei ang rah kan hmuh nghâl mai loh chângte hian hnual mai lova rawngbâwl chhunzawm zêl dân eng tin nge kan zir theih ang? Eng vângin nge chanchin tha hril chhunzawm zêl hi kan tih tûr, kan kova tla a nih? (Joh. 4:37.)

Thawhlehni June 3

Sodom leh Gomorra chanchin

Petera’n ni hnuhnûnga thil thleng tûrte a sawi hian, Thuthlung Hlui lama thleng thawnthu pawimawh tak dang pawh sawi tel a nei a, chu chu Sodom leh Gomorra tih boral a nih thu kha a ni. Hêng phâizâwl khawpui pahnihte hi an suahsual avânga hriat zui hlawh a ni a; chu mai bâkah, vân atanga lo tla meiin a tih boral tâk vek khawpui hmasa berte a ni bawk.

2 Petera 2:4–11, Juda 5–8, leh Ezekiela 16:46–50 te chhiar la. Hêng khawpuia chêngte hian tih boral a nih phah tâkna thil sual eng engte nge an tih? An thil sual tih ang kha tûnlâi mite pawh hian tih ve kan nei em?

__________________________________________________

Ni hnuhnûnga chêngte’n Sodom leh Gomorra chanchin atanga vaukhânna thu an dawn chu: suahsualna hi, Thupuan bung 20-a kan hmuh ang hian, mei hmanga tih boral vek a la ni ngei dâwn tih hi a ni. Sualin mi a bum ât theihzia mai chu, keimahni thinlunga ngaihtuahna tha lo tak tak awmte hi kan hmuh theih loh nân kan mit min tih delsak a, kan bawhchhiatnate pawh mahni inthiam chawpna kâwr hmangin a hliah khuh tlat bawk, chutih lâiin mi dangte sualna erawh kan hmu langsâr leh êm êm thung si thîn. Pathianin a hnam thlante chunga a hmangaihna a lantîr nasat thu a sawina bungah vêk hian, a mite chu Sodom khawpui chêngte thil sual tih ang chiah kha ti ve lêm lo mah se, anni âia sual mah zâwk an nih thu pawh a sawi lang tho bawk a ni (Ezek. 16:47).

Israel hnam chu “hmeichhe lepchiah tak” ang mai a ni thîn a, thlarau lamah a uire fo thîn (Ezek. 16:41). An suahsual êm avânga hmingthang letling Sodom âi pawha sual zâwk mah an nih thu an han hriat khân mak an tiin an thin a thâwng hle ngei ang.

Hei hi hmânlâi Israel-ah chauh ni bîk lovin, mihring zawng zawngah hian thil thar leh thil mak vak pawh a ni hran lêm lo. Rom 1:18–32-ah chuan Paula’n mihringte suahsualna thil tih chi hrang hrang a lo ziak chhuak a. Hêng Jentail mite suahsualna a sawi hi Juda mite’n Jentail-te âia chungnung zâwk nia inhriatna an lo neih phahna atân ni lovin, an thil sual tih pawizia an lo hriat theih nân a ni zâwk. Zâwlnei Nathana’n Davida hnêna thu a sawi pawh khân hetiang hian a lo ti a: mi hausa tak pakhat chuan mi rethei tu emaw berâm chhuhsakin a talhsak tih a hrilh a. Chu thu chuan Davida thin a ti ur kher mai! (2 Sam. 12:5). Chu pa chuan thil dik lo tak a ti a ni ngeiin a ngâi a; nimahsela, Nathana’n, “Chu mi chu nangmah hi i ni asin” (2 Sam. 12:7) a han tih hnu-ah chauh khân ama chanchin a sawi a ni tih a hre thiam ve ta a nih kha.

Bible-a thu tam zâwk daih hi chu hnam dangte tân ni lovin, Pathian mite tâna ziah a ni tih kan hriat a pawimawh a. Entîr nân, Thupuan bung 13 leh 17-a kan hmuh hnam dangte sualna a sawite hi keini pawhin kan ti ve thei a ni tih vaukhânna atâna lo ziah a ni tih i hria ang u.

Nilaini June 4

Lei chung zawng zawnga Rorêltu chu

Sodom khawpui tih chhiat a nih hma lawk hian Mamre phâi zâwlah thil ngaihnawm deuh mai thleng a awm a. Chu chu Abrahama hnêna Pathian rawn inlan kha niin, vântirhkoh pahnihin an rawn tâwiâwm nghe nghe a ni. Chûng mite chu Abrahama’n a lo hmuh khân a ina chaw ei tûrin a sâwm a. Hemi tum hian Pathian chuan Abrahama leh Sari te hnênah khân Messia lo pian chhuahna tûr fapa an la neih tûr thu a hrilh ta a ni. A sawi ang ngei hian Isua kha Abrahama thlah atanga lo piang chhuak a ni a (Gal. 3:16 nên khâikhin ang che). He thu a hrilh hnu hian thu dangah pakâiin, Sodom leh Gomorra khawpuia chêngte sualzia an sawi ta a ni.

Genesis 18:17–32 chhiar la. He lâi thu-ah hian Pathian hmangaihna chungchâng leh, kan chênna khawvêla suahsualna awm chin fel a tum dân eng tin nge sawi a nih?

___________________________________________________

____________________________________________________

Pathian hian a thil tih chhante chu kan laka sawi fiah a ba rêng rêng lo va; chutih rualin, a thil tih tumte leh mihringte tâna ruahmanna a siamte chu thup tlat reng a tum hran lo bawk. Zâwlnei Amosa khân heti hian a lo sawi a, “Thil chiang tak chu, Lalpa Pathian hian a rawngbâwltu, a zâwlneite hnênah a thurûk hrilh lovin eng mah a ti lo vang” (Amosa 3:7, NKJV) tiin.

Sodom leh Gomorra a tih chhiat dâwn pawh khân thil dik tak tih tûr awm chhun chu Abrahama hnêna thil lo thleng mai tûr hriattîr a ni tih a sawi a. Chutianga hriattîr a nih chuan, a lo thlen hunah a thâwng lutuk dâwn lo va ni.

Vântirhkoh pahnihte’n Sodom khua fang kuala, an vaukhânna thu lo bengkhawntute chu khua ata chhuak tûra an va hrilh hlân khân Pathian chu Abrahama kiangah a lo awm a. Hetiang deuh hian ni hnuhnûngah chuan vantirhkoh pathumte’n vaukhânna thu puangin, Pathian mi Babulona la awmte chu Babulon chhûng ata chhuak tûrin an la sâwm dâwn a ni (Thup. 14:6–12, Thup. 18:1–4). Vântirhkoh pathnihte’n vaukhânna thu hnuhnûng ber an puan khân Pathian chuan Abrahama hnênah Sodom chunga thil lo thleng mai tûr chanchin a sawi ta a, Abrahama hian zawhna a neihte chu chhâng zêl tûrin a inhawng sa vek bawk a ni.

Abrahama chuan, “Nang êm chuan chutiang chuan mi felte chu mi sualte anga an awm ve-na tûra mi felte chu mi sualte zînga tih hlum ve mai te chu i ti âwm êm si lo va; nang êm chuan i ti âwm êm si lo: lei chung zawng zawng Rorêltu chuan fel takin a ti dâwn lo’m ni?” (Gen. 18:25) tiin a zâwt ta rêng a. Hetia a zawh hian, Sodom chungchâng hriat a duh a ni mai lo va, Pathian nungchang pawh hriat a duh tel bawk a ni. Hetiang chiah hian tâwpna a thlen hmain Pathian chuan vân lehkhabute chu a keu ang a (Thup. 20:4, 11–15), leia mei a sûrtîr hma ngeiin khawvêl a tih boral chhan kan hriat ve ngei theihna tûr hun tha min siamsak ang. A awmzia chu, tûna a chhânna kan la neih rih loh zawhna tam takte hi a chhânna kan hmuh theih nân kum sângkhat chhûng hun kan nei dâwn tihna a ni.

Lalpa’n boralte chunga rorêlna hnuhnûng ber a rawn thlentîr hma hian mi tin chunga thil thleng tûr leh a thlen chhan tûrte kan lo hriatthiam theih nân kum sângkhat chhûng hun min pe dâwn a. Chu chuan a nungchang bâkah, a thil siam—amah avânga lo awm leh nung ve mai leh, hêng thilte hre tûra dikna chanvo nei chuang miah lote’n a thil tih dân dik leh dik loh kan lo hriat theihna tûra a inhawn zauzia eng tin nge min hrilh?

Ningani June 5

Isua lo kal hmaa ro lo rêl lâwkna

Daniela bung 7-a kan hmuh rorêlna hian puan zâr phêna thil awm chu min thlîrtîr a—Pathianin amah nêna thuthlunga nun duhtute tlan chunga, sual avânga harsatna thleng hi a chin fel dân tûr chu kan lo hmu thei ta a ni.

Daniela 7:9, 10, 13, 14, 22, 26, leh 27-a kan hmuh rorêl lâwkna chungchâng hi ngun takin chhiar la. He rorêlnain a tinzâwn ber tûr chu eng nge ni? Rorêlna zawh a nih hunah chuan eng ang thu tih tlûkna nge siam a nih ang? Chu chuan chhandamna ruahman chungchâng eng tin nge min hrilh?

____________________________________________________

___________________________________________________

Mihringte chungthu hi Pathianin a la ngaihtuah ngei dâwn tih a chiang a. Thuhriltu 12:14 chuan “Pathianin thil tih zawng zawng chungah ro a la rêl dâwn” tih sawiin, Paula pawhin Pathian rorêlna thutphah hmaah chuan kan zavâia kan la din vek dâwn avângin tûnah hian kan lo insawisêl tawn emaw, inhmuhsit tawn emaw a tûl hauh loh thu min hrilh bawk (Rom 14:10). Pathian hian tute nge chhandam ni ang a, tute nge boral ang tih a hriat theih nân a lo chhinchhiah thlap a tûl hran miah lo va; nimahsela, a tîr ata chhandamna ruahman lo zir ngar ngartu vântirhkohte (1 Pet. 1:12) khi chuan zawhna tam tak an nei ngei dâwn a ni. Pathian laka Setana’n helna a chawh chhuah dân leh, vâna vântirhkoh hmun thuma thena hmun khat lâi mai vân ata hnawhchhuah a ni ta te kha an hre vek a (Thup. 12:4)—tin, tûna Pathianin a hnêna mi hruai a duhzia pawh an hre chiang hle bawk. Tichuan, Pathianin lehkhabute a hawng ang a, mi thianghlimte chu eng kim an hmuh vek a phalsak dâwn a ni.

Abrahama’n Sodom leh Gomorra tâna a dîl khân rorêlna chungchânga kan hriat tûr thil pawimawh tak tak awmte chu min hrilh a. An chunga rorêlna thlentîr a nih hma khân an thil sual tihte chu ngun taka eng dik a ni ngei ang tih a chiang. Pathian pawhin Sodom leh Gomorra khawpui suahsualzia sawiin, mi rêng rêng pawhin sual an tih tlawk tlawk khawp an ni a ti hial (Gen. 18:20). Nimahsela, tih boral an nih hma hian an sualna chu ngun takin a en phawt a ni mai lo va, an sual êm avânga hrem mai a tum chu a ti dik nge ti dik lo tih Abrahama’n a lo hriat ve theih nân kawng a hawnsak bawk a ni.

Hetih lâi hian vân rorêlna pindanah chuan “mihring Fapa” Isua lo langin (Dan. 7:13; Mat. 20:28 pawh en rawh), ani lo lan avâng chauh hian Chungnungbera mi thianghlimte chan thatna tûr zâwngin rorêlna thu pawh tih tlûk a ni ta nghe nghe bawk (Dan. 7:22). Ama fel famkimna chauh hian a mite chu rorêlnaah pawh thiam a chantîr ta a ni.

Rorêlnaah chuan dingin, Pathian hmaa i thurûk zawng zawngte pho lan a ni vek tûr chu han suangtuah chhin teh. Chu rorêlna a thlen huna i beisei theih awm chhun chu eng nge ni? (Zirtawpni zirlâi en ang che.)

Zirtawpni June 6

Zir belhna: Ellen G. White-i lehkhabu, Thlahtubulte leh Zâwlneite bung 7, “Tui Lêt” (phêk 70–85) chhiar ni se.

“Puithiam lalber hi Setana’n amah leh a mite a puhna laka ata a insawi fel thei lo va. Israel mite chuan thil tih sual pakhat mah a nei lo ti pawhin a sawi thei hek lo. A mite âiawhtu a nihna angin an sualte entîrtu silhfên bawlhhlawh tak chu a inbel a, Vântirhkoh hmaah chuan dingin, an thil sual tihte a puang ta a ni. A silhfên bawlhhlawh tak inbel hian an sual an sim tawha, inngâitlâwm taka awmin, sualte ngâidam thîn Tlantu khawngaihnaah chuan an innghat tawp mai a ni tih a ti lang. Rinnain Pathian thutiamte chu a beisei ngam ta a ni. . . .

“Setana’n Lalpa zawngtute a hêk chhan hi an sualna a huat vâng a ni lo. Huat chu sawi loh, an nungchanga fel lo lâi awmahte chuan a lâwm êm êm zâwk a, a chhan pawh Pathian dân an bawhchhia a nih chauhin an chungah thu a nei thei dâwn tih a hriat vâng a ni. A hêkna thute hi Krista a huatna rilru atanga lo piang chhuak a ni a. Setana’n mihringte chunga thu a neihna hi Isua’n chhandamna ruahman kal tlanga paih thlain, a thiltihtheihna ata a la chhanchhuak dâwn a ni. . . .

“Mihringte hian keimahni chakna chuan hmêlmapa’n min puhnate hi kan chhâng thla thei ngâi dâwn lo va. Pathian hmaah chuan sual kâi dum thawmhnaw inbelin leh kan sualte puangin kan ding ang. Nimahsela, Isua, kan âiawha ding chuan an sualte sima, amah rin chhan apiangte chu a ngensak thîn a. Kalvaria Isua thihna kha tanchhana hmangin anmahni puhtu chu a hneh dâwn a ni. Pathian dân a zawm famkimna chuan leiah leh vânah thuneihna famkim a lo pe tawh a, a Pa hnênah mi sualte tân khawngaihna leh inremna a dîlsak thîn a ni.”—Ellen G. White, Zâwlneite leh Lalte, pp. 583–586.

Sawi ho tûrte:

1. Isua khân a zirtîrte chu khawvêla awm, khawvêl mi erawh ni si lo an ni tih a hrilh a (Joh. 15:19, Joh, 17:14–16 en la.) Khawvêl hneh tûr kan nihna leh “khawvêl bawlhhlawh kâi lo” (Jak. 1:27) tûra kan invawn reng a tûlna hi eng tin nge inbûk tâwk takin kan kal kawptîr theih ang?

2. Tui lêt hmaa Nova’n kum za leh sawmhnih chhûng zet thu a hril khân indona ropui beih a nih dân eng nge min hrilh? Eng tiang kawngtein nge vawiinah hian Nova hna thawh ang kha thawktu kan nih?

3. Pathian chuan mi sualte chu vân ata lo chhuk mei hmanga a kan raltîr vek hmain thlân ata a kâi tho leh phawt ang a, hun rei vak lo chhûng chu Setana hna an thawpui leh rih a phalsak dâwn a ni (Thup. 20:7–9). Eng kim a siam thar vek hmaa hetiang thil a tih leh rih a tûl chhan nia in rinte chu eng nge ni?4. Tûn kâra kan zir thawnthute kha ngaihtuah la, nangma tâna vaukhânna thu awm theite chu eng nge ni? Hêng thawnthute hian Kristaa beisei i neih dân a hrilh che u em?