2025 2nd Quarter Puitling Zirlai-11-na

Zirlâi 11 June 7–13

Ruthi leh Estheri

Sabbath Chawhnu

Chhiar tûrte: Ruthi 1:1–5; Ruthi 2:5–20; Job 1:6–11; Mat. 4:8, 9; Estheri 3:1–14; Thup. 12:14–17.

Chângvawn: “Tin, Estheri chu lal kawt hung chhûnga a ding lalin a han hmuh chuan a chungah a lâwm a; lal chuan a rangkachak laltiang ken chu Estheri lamah chuan a han lek a. Chutichuan, Estheri chuan a va hnaih a, laltiang hmâwr chu a han khawih a” (Estheri 5:2).

Tûn kârah hian ni hnuhnûnga thil thleng tûrte lo entîr lâwk thu thawnthu ngaihnawm tak tak kan zir ho leh dâwn a. Pathian chuan a taka thil thleng ngei leh a taka mi lo awm tawh ngeite chanchin hmangin ama thlîrna atanga thilte hmu thiam tûra min tanpui thin bâkah, kan rinna ti chak sawt tûra min pêk hrilhlâwkna thute hrilh fiah dân pawh min hrilh bawk.

Tûn tuma kan zir tûr hi chu chhuan tam tak liam ta atanga vawiin thlenga mite thinlung lo khawih tawh êm êm thîntu hmeichhe pahnih chanchin a ni a, chu mite chu: Ruthi leh Estheri te an ni. Pakhat zâwk hi hmeithâi eng mah neih nei lo, amah tlan chhuak tûra lo kal, a laichîn ngilnei tak Boaza nêna intawng ta a ni a. Tichuan, innei ta-in an chanchin hian Krista’n mi a hmangaihzia a târ lan chian êm avângin Kristiante thawnthu ngaihnawm tih leh ngainat hlawh ber pakhat a lo ni ta hial a ni. Hmeichhe dang pakhat chu ram danga awm nula a ni ve thung a. He nula hian a mite chu thah chimih vek an nih theih nân ruahmanna râpthlâk tak siam a ni tih hre chhuakin, a mite chhanchhuak tûr chuan a inpe ta a ni.

Ni e, hrilhlâwknaah chuan, “hmeichhia” tih hi Pathian kohhran entîrtu chhinchhiahna a ni thîn a, a chhan pawh Pathianin a mite a ngaihsakzia a tih lan chian êm vâng a ni ngei ang. Chu chu rilru-a hre chungin Pathian Thu-a ngaihnawm tak lo lang hmeichhe pahnihte chanchin hi ngun takin lo zir ila, an thil tawnte atanga zirlâi kan zir chhuah theih apiang chu zir chhuah i tum ang u.

Sunday June 8

“Chhang Inah” tâm a tla

Kristian thurin leh zirtîrna sawisêltute chuan mihringte nuna thil tha lo leh râpthlâk tak tak lo thlengte hi: (a) Pathian a awm lo emaw, (b) a awm a, mahse hêng thil tha lo thlengte hi a ti tâwp thei bîk lo emaw, (c) hêng thil tha lote kan tawrh hi a pawi ti lêm lo emaw tih ti langtu a ni tiin an thîn. Amaherawhchu, Bible-a kan hmuh thawnthu tam tak hian Kristian thurin sawisêltute thu vuak thlâk hi pakhat mah dik a awm lohzia chiang takin a ti lang. Ni e, Pathian chuan mihringte hi a laka kan helna nghawng tha lote chu kan tawrh a phal ngei rêng a. Nimahsela, chutiang hunah pawh chuan keimahni’n duhthlan theihna zalên tak kan neih hi min palzûtsak si lovin, kan hnênah a awm zêl tho a, sual leh hrehawm tawrhna thleng thînte chin fel a nih theih nâna ruahmanna a siam lamah chuan mi hruai a tum reng thîn. Chumi ti lang chiang êm êmtu pakhat chu Ruthi chanchin hi a ni.

Ruthi 1:1–5 chhiar la. Naomi leh Ruthi te chunga harsatna thlengte chu eng nge ni a, chu thil chu eng vânga thleng nge ni? An thil tawn hian eng tiangin nge tûna mihring zawng zawngin kan hmachhawn vek harsatna hi a târ lan?

________________________________________________

____________________________________________________

He thawnthu tîr lamah hian thil inhmeh lo tak pakhat a thlen thu kan hmu a, chu chu khawpui pakhat, a hming awmzia Mizo tawnga dah dâwn chuan “chhang in” tih tûr Bethlehem-a tâm a tlâk mauh mai thu a ni. Eden huan kha eng kim hnianghnâr taka ei tûr a awmna hmun niin, a mi chêng Evi leh Adama te hnênah khân Pathian chuan, “Huana thing tinrêng rahte hi in duh duhin in ei thei ang” (Gen. 2:16) tiin a hrilh nghe nghe a. A awmzia chu, mihringte hian a tîrah chuan Siamtu thilphal tak enkawlna hnuaiah an mamawh tinrêng an nei vek tihna a ni. Nimahsela, Pathian thil siamte enkawltu a nihna chu sual bâwih nihna nên an thleng ta si a. Chuvâng chuan, Pathian pawhin Adama kha, “Leia i kîr leh hma loh chuan i hmâia thlan tui luang zawih zawihin chaw i ei tawh ang” (Gen. 3:19) tiin a hrilh ta a nih kha.

Naomi ang deuh hian, a tîra Pathianin kan rochan ni tûra a lo ruahmante chu kan chân ta vek a, kan nun hi a hrehawmin a lo harsa ta hle mai. Eden huan kha kan nu leh pa hmasa berte’n thilthlâwnpêk anga an dawn ni mah se, thu delh kilh awm lova pêk erawh chu an ni lo. Mihringte kha an duh chuan Pathian laka hel thei an ni a; mahse, an hel a nih chuan anmahni hmakhaw thim leh ên thu-ah mawh an phurh a tûl dâwn thung a ni. A tîr takah chuan suala la tlu lo khawvêl kha a zavâiin Pathian malsâwmna hnuaia “thunun” tûra tih kan ni a; nimahsela, tûnah erawh hi chuan suala tlu ta thil chi hrang hrang hnuaia kûn thei kan lo ni ta zâwk a nih hi. Mi, anmahni hma sial tak takte chuan sum leh pâi leh thil tha dang zawngte pawh an inchuh zo va; chumi avâng chuan khawvêlah hian natna leh tawrhna chi hrang hrang a lo awm ta thîn a ni.

Chumiin a thlen lungchhiatna chu sawiin a siak lo hial zâwk: lei hian thil tha chi hrang hrang tam tak a la chhuah reng tho a, chûngte chu Pathianin mihringte a hmangaihzia ti langtu ropui tak pawh a ni bawk. Nimahsela, mihringte duhâmna leh sual hnuhma chhe tak takte avângin a châng chuan khawvêl hian min tukzal ta thîn a, keimahni’n kan tuk zal tûr a nih zâwk vei nên. Amaherawhchu, eng tikah emaw chuan hêng zawng zawng hi a la tâwp vek dâwn a ni.

Kan khawvêl hian, kum sâng ruk chhûng zet sual leh thihnate’n thla an zâr hnan hnu-ah pawh eng tiangin nge Pathian hmangaihna leh thiltihtheihna a la puan chhuah chhunzawm zêl tho?

Thawtanni June 9

Ruthi leh Boaza

Naomi hian a hming chu Maraii tia thlâk a duh a, a chhan pawh a nuna harsatna nasa tak lo thlen vâng kha a ni (Ruthi 1:20 en la). Kan Siamtu nêna kan inlaichîn tawnna chu siam that leh theiha mâwi lo hial khawpa nasain sualin a lo ti chhe tawh a, thlarau lama pachhe takah mi a siam lui ta a nih hi. Kan hma lam hunte chu a thim hle a, lova mi buh lâk bâng chhar khâwma nung ve tâwk tâwk ang chauh niin, suala tlu tawh khawvêla kan hmuh theih chhun hlimna tê tham tê tê hi kan lungâwipui ve êm êm mai chu a nih hi. Nimahsela, thu pawimawh tak kan han hriat chhuah chiah hian eng kim a inthlâk danglam ta vek thîn a, chu chu eng dang ni lovin, Pathian chuan min lo theihnghilh hauh lo tih hi a ni.

Ruthi 2:5–20 chhiar la. Enga ti nge he lâi thu hi Ruthi chanchina a pawimawh lâi ber a nih? Naomi’n Ruthi lo duhsaktu chu an lam hnâi Boaza a lo ni reng tih a hre chhuak hi enga ti nge an tân chanchin lâwmawm tak a nih?

____________________________________________________

Naomi hian eng mah neih a nei tawh lo va, Moab rama an chhuk leh hmain a leibatte rulh nân a ram hralh tûrin Judai ramah hian a lo kîr leh a nih hmêl. Hmânlâi Israel mite zîngah khân retheih luattuk avânga an ram hralh ta hial pawh an awm thîn a. Nimahsela, an ram hralh tâk chu an neih lêt leh theih nân hetiang hian Pathianin ruahmanna a lo siamsak sa vek a ni: an laichîn hnâi tak tu emawin an ram hralh chu a rawn tlan thei ang. “I unau chu a lo retheiin, a ram thenkhat lo hralh sela, a laichîn bul berin a lo hralh chu a rawn tlan tûr a ni” (Lev. 25:25). Boaza hi lo neitu ngilnei tak a ni mai lo va, a laichîn hnâi tak Naomi ram tlansaktu pawh a ni bawk.

Naomi’n Baoza hi pa ngilnei tak leh thil phal tak a ni mai lo va, a laichîn hnâi a lo ni reng bawk tih a han hre chhuak hi a tân chuan chanchin lâwmawm ber a ni hial âwm e. Tûnah chuan Naomi leh a monu Ruthi te hi rethei taka an nun reng a ngâi dâwn tawh lo.

Kristiante chuan Boaza hi Krista lo entîrtu niin kan ngâi a. Krista chu kan Siamtu a ni mai lo va, keimahni tlan chhuaktu ni tûra rawn inpe pawh a ni bawk. Ani chu mihring dik tak, keimahni ang bawka tisa leh thisen nei ve tho a ni a, chu tak chu amah ngei pawhin “Mihring Fapa” tia a insawi thin chhan pakhat pawh a ni rêng bawk (Mat. 12:8, Marka 8:31, Luka 22:22, Joh. 3:14).

Mi tam tak chuan Pathian hi mi khirh tak niin an ngâi thîn a. Thil dik leh tha apiang kan ti a nih chuahvin vânramah min luhtîr dâwn niin an sawi thîn. Chu pawh hreh tak chungin a la ni leh nghâl a, kan laka a phûtte kan tih ve miau si avângin min dang thei lo mai chauh a ni an ti a ni ber mai. Nimahsela, Boaza nuna Krista rilru puan chhuah a lo ni ta hian chutiang ngaihdân chu a dik lohzia a rawn ti lang chiang hle a. Pathian hian min hria a ni mai lo; thlarau lama pachhe tak kan ni chung hian a mo atân min duh tho a ni.

Siamtu chu ama thil siamah a rawn chang ve a ni mai lo va, an tân a thi ta nghe nghe bawk a ni tih hi ngun takin ngaihtuah la. He thu mak tak mai hian eng tiangin nge kan nihna hre thiam tûrin mi a tanpui?

Thawhlehni June 10

Tlantu entirtu Boaza

Boaza hian Ruthi hi a hmangaih hle mai a, nupuia neih ngei pawh a duh; nimahsela, an inneihna tûr dâltu thil khirh tak pakhat a awm tlat mai. Amah âia Ruthi laichîn hnâi zâwktu mi dang a awm a, chu mi chuan a duh a nih chuan Ruthi hi neiin, Elimeleka ram pawh a tlan thei bawk. Boaza hi Kristiante chuan Krista lo entîrtu nia kan ngaih thu kha kan sawi tawh a, chuti a nih chuan, a hmaa harsatna lian tak awm pawh hian indona ropuia harsatna awm chu hrethiam tûrin min tanpui ngei ang. Krista hian min hmangaih êm êm a; nimahsela, ani âia min hnaih zâwktu chhûngkhat dang kan nei tlat mai. Chu mi chu chu Setana a ni a, ani hian a ta liau liau niin min chhâl ve tlat bawk si a ni.

Hêng Bible chângte hian Setana’n mihringte min ta neih dân eng tin nge an sawi? (Joba 1:6–11; Mat. 4:8, 9; Juda 1:9; Luka 22:31).

_________________________________________________

________________________________________________

Vâna Pathian fapate inhmuh khâwmna a awm tuma Setana a han inlan ve khân, Pathianin khawi lam atanga lo kal nge a nih tih a lo zâwt a, ani chuan, “leia a vah vêlna atang leh a chhohna atanga” lo kal a nih thu a hrilh a nih kha (Joba 1:7). Tin, Pathianin a chhiahhlawh fel tak Joba chu a hriat leh hriat loh a han zawh khân, ani chuan ama ta, a thu hnuaia awm ni angin a sawi hmiah mai pek a, Joba thinlung neitu chu Pathian ni lovin, amah Setana zâwk nia ngaih theih tûrin a sawi tihna a nih chu. A chungah i tha êm a; chuvâng chuan alâwm a zui mai mai che. A chunga i that chhuah hi ti tâwp mah teh, i laka a rinawm tak tak leh tak tak loh chu i hmu mai ang a ti a ni ber.

Juda Lehkhathawnah chuan, Israel hnamte’n an hriat bel êm êm thawnthu pakhata mi thu tlêm tê thâi lan a ni a. Chu chu Mosia a thiha Pathianin a phûm hnu khân (Deut. 34:6) kaihthawhin a awm leh tih hi a ni. A chipchiar chuan hre kîlh kêlh hran lo mah ila, Mosia ruang chungthu-ah Setana leh Pathian an inhnial thu a sawi a, heta tanga thil lang chiang tak chu, Mosia meuh pawh kha Setana hian a lo ta neih ve tho mai tih hi a ni.

“Krista chuan tûnah hian a tum khatna atân mitthi tawh hnênah nunna a pe leh dâwn mêk a ni a. Nunna Lal a nihna anga Mosia phûmna lam a pan lâi chuan Setana hian a lo hlauthâwng hle mai. A tirhkohte nên lo ding tlarin, ama ram chhûnga rawn luh luih tum nia a ngaih chu lo dan ngei an tum a. Pathian chhiahhlawh Mosia hi a sala tâng tawh nia sawiin, a chhuang hle nghe nghe bawk. Pathian dân chu Mosia meuh pawhin a zâwm thei bîk lo tih a sawi a; Jehova chauhin a chan tûr châwimâwina chu a lo chuhpui ve a ni a ti. He sual hi amah Setana pawh vân ata hnawhchhuah a lo nih phah tawhna kha a ni a, chu ngei chu Mosia hian a rawn tih ve leh chiah avângin a thu hnuaiah a intu lût ta ni-ah a ngâi a ni.—Ellen G. White, Thlahtubulte leh Zâwlneite, p. 499. Krista erawh chuan Setana thil sawi hi a pawmpui lo hle mai a; chuvâng chuan Mosia hi a kâi tho ta a ni (Mat. 17:3 en la).

Ruthi 4:1–12 kan chhiar chuan, Krista’n kan laina hnâi tak a nihna anga kan khawvêl a rawn luhna khawpui Bethlehem kulh kawngkaa kal tûra Boaza a han chhoh thu kan hmu a. A han thlen chuan upaho lo kal khâwmin, Elimeleka ram tlan theitu an lam hnâi tak nên chuan an inbia a. An inbiak fel hnu chuan a neitu zâwk nihna entîrtu pheikhawk chu an inpe ta a ni.

Hmânlâi chuan khaw kulh kawngka hi thu buai hla buai an remna hmun ber a ni a. Daniela 7:13, 14, 22, 26, 27-a kan hmuh rorêlna pawh kha mitthlaah a lo lang âwm e. Daniela lehkhabu-a kan hmuh rorêlnaah hian thil pawimawh tak pakhat lo lang awm chu “mi thianghlimte chan thatna tûr zâwnga” thu tih tlûk a ni tûr hi a ni a, a chhan pawh Boaza’n a nupui tûr tâna a tih ang chiah khân Krisita’n kan tân a man a lo pêk tlâwk tawh vâng chauh a ni ang.

Nilaini June 11

Hamana leh Setana

Estheri chanchinah hian dinhmun tha leh thiltihtheihna thlahlel êm êm mai Hamana a lo lang ve a. Persia ramah khân mi challang tak niin, lal ber lakah pawh mi lian dang zawng zawngte âiin a tlatlum zâwk bawk (Estheri 3:1).

Lucifera chanchin sawina Ezekiela 28:11–15 leh Isaia 14:12–15 te kan chhiar chuan, Pathian hnam thlante dodâltu, Pathian chungnung ber hnuaia kûn duh miah lo mi sual tak Hamana nên khân an inang hle tih kan hmu ang a. Setana thiltum lian ber berte chu Krista’n thlêmna a tawh thu-ah hian lo langin, Isua kha khawvêl lalramte a hmuhtîr theihna tûr hmun sâng takah a hruai chho a nih kha (Mat. 4:8–11). Kan sawi tâk ang khân, Krista chu khawvêl tlan tûra lo kalin, mihringte hi ama ta-ah min ngâi tlat a—chutiang chu keimahni ang lo ni ve-a a tih a ni nghe nghe bawk. Isua hi kan leibat min tlâksaktu kan laina hnâi a ni a, khawvêl tlanna atâna a man a pêk pawh hi a sâng êm êm a ni.

Thupuan bu-ah hian Setana’n thuneihna leh chibai bûk nih a thlâkhlelh avânga khawvêl hi buaina hnuhnûng bera a hnuh luh tâk dân kan hmu a. A bumna thu vawrh darhte chuan khawvêl hi sakawlh hliam dam leh chu “mak” tia zui hum hum tûrin a hmin dâwn nghe nghe bawk (Thup. 13:3, 4). Hetih lâi hian chutiang ti ve duh lo chu mi tlêm azâwng an awm tho dâwn bawk a. Chûng mite chu tih luihna hmanga chibai bûk ve tûrin a nawr ang.

Hamana hian Pathian hnam thlante zînga mi Mordekaia khân a thu a zâwm ve dâwn lo va, ama duh tak chauh “chibai bûk” tûrin dikna chanvo a nei tih a hria tih a hre chiang a. Chuvâng chuan, “thinrimin a khat” a (Estheri 3:5, 6), lei chung ata Mordekaia chipui awm zawng zawngte chu tih hlum vek a tum ta a ni.

Estheri 3:1–14, Thupuan 12:14–17, leh Thupuan 13:15 te chhiar la. Hêng thu pathumahte hian eng thil thuhmun nge sawi theuh a nih? Johana’n Krista kohhran la bangte nihna a sawi dân leh Hamana’n Pathian mite nihna a sawi dân hi eng nge a inanna lâi awm?

_____________________________________________________

Setana chuan he khawvêl hi ama ta ni-ah a chhâl a; nimahsela, khawvêlah hian Pathian laka rinawm, a thupêkte zâwm tlat reng mi eng emaw zât an awm hian khawvêl pum pui hi Setana ta vek chu a ni bîk lo tih a ti lang. “Kristian ram hrang hrangah Sabbath hi inhnialna ti chhuaktu a lo nih hunah chuan mi tam zâwkte’n an phût ang tih hlawhtlinsak duh tlat lotu mi tlêm tê-te chu mi zawng zawng huat rawn an la ni dâwn a ni.”—Ellen G. White, Signs of the Times, February 22, 1910.

Tûna i rinna fiahtu thil “tê tham tê tê-te” kha han ngaihtuah la. Khâng thil tê tham tê tê-ahte pawh khân i tlu mai a nih chuan, thlêmna lian zâwk a lo kal hunah eng tin nge i tih ang?

Ningani June 12

Hetiang hun atân hian a ni

Vânduaithlâk takin Kristiante zîngah hian Bible hrilhlâwknaa a harsa lâi leh hlauhawm lâi chauh sawi thîn an awm a. Ni e, kan hma lamah hian hun khirh tak tak a lo la thleng dâwn a ni tih hi chu kan hria alâwm. Hrilhlâwkna zir pawh hi, harsatna chin fel a nih dân tûrte ngaihtuah chang ta lova, a harsa lâi chauh lo buaipui chiam mai chuan hlauhna min thlentu pawh a ni ve thei a ni rêng a ni. Pathian hian kan hma lama thil lo thleng tûrte chu a tha lam vek a ni dâwn tiin min hrilh lo va; tin, tûn hun leh indona ropui tâwp dâwn hnaih inkâra thil lo thleng tûrte chu zêp nei hauh lovin min lo hrilh vek bawk. Chutiang chu ni mah se, a harsa lâi leh hlauhawm lâi chauh kan ngaihtuah tûr a ni lo va, eng tiangin nge a tâwp dâwn tih hi kan hriat a pawimawh zâwk a ni.

Hrilhlâwkna rêng rêngah hian Pathian laka mihringte kan helnain a thlen buaina chungchâng târ lan a ni deuh zêl a; tin, kan hel avânga thil tha lo lo thlengte pawh min hmuhtîr thîn bawk. Nimahsela, beiseina min pe zui leh zêl tho thîn thung a ni. Mi thenkhat chuan buaina hnuhnûng ber—”Jakoba mangan hun”—lo thlen tûr thu sawina lâite hi an han chhiar a, an hlauvin an thin a thâwng thîn hle. Ni e, tâwpna huna thil lo thleng tûrte hi Pathian mite tân chuan thil awlsam a ni dâwn hauh lo tih a chiang a. Nimahsela, hun harsa lo thlen tûr thu a sawi hi a rin tlâk ang chiahin, chhanchhuah kan nih tûr thu a sawi pawh hi a rin ngamawm êm êm tho a ni.

Thupuan bung 12-ah chuan Setana’n phuba lâk châkna nêna Krista nupui hual a ûm chiam thu kan hmu a. Mahse, Pathian rawn inrawlh thuaiin, a chhanchhuak ta a ni. Estheri chanchinah pawh hian lalnu berin a mite chhanchhuak tûra theihtâwp a chhuah dân kan hmu a, ani hi Pathianin a mite a chhanchhuak dâwn a ni tih lo entîrtu a ni.

Estheri 4:13, 14; Estheri 5:1–3; leh Estheri 9:20–28 te chhiar la. Hêng thute atang hian tâwpna huna harsatna kan la tawh tûr chungchângah eng zirlâite nge zir chhuah theih kan neih?

___________________________________________________

_____________________________________________________

Pathian chuan a kohhran la bângte hi a lo chhuah hun tûra a lo ruat saah tak a din a. Hun thim lâia ni 1,260 hrilhlâwkna a zawh dâwn hnaihah khân a nupui tûr chu khawvêl hnêna khawngaihna thuchah hnuhnûng ber, vântirhkoh pathum thuchah puang darh tûrin a bîrûkna hmun ata a hruai chhuak ta a (Thup. 12:14 nên khâikhin rawh). Chutiang chuan, a la bângte hi “hetih hun atân ngeia” lo piang kan ni (Estheri 4:14).

Estheri hian Hamana’n a chipuite tihduhdahna a kalpui mêk a hmachhawn lâi khân a mal tlat ngawt lo tih a hria a. Lalber duhsakna a dawn miau avângin a mite pawh chhanchhuah a ni ta rêng bawk. Keini pawh hi khawvêl chanchina a tâwp khârna kan luh mêk lâi hian kan mal tan bîk lo va. Lalber chu kan lama tang niin, Pathian mite chu chhanchhuah kan ni ngei ang.

Estheri chanchinah hian Pathian mite’n chan tha an chan theihna tûr zâwngin thil a rawn inher chhuak ta hlauh a. Amaherawhchu, hetiang hi a ni ziah lêm lo a ni lo’m ni? Chuti a nih chuan, Krista beiseina kan neih hi kan vawn reng theih nân enga ti nge thui taka thil kan thlîr thin a pawimawh?

Zirtawpni June 13

Zir belhna: Ellen G. White, Thlahtubulte leh Zâwlneite bung 59, “Israel Lal Hmasa Ber” (phêk 637–651) tih chhiar ni se.

“Setana chuan mi tam zâwkte kalphung leh tih dân tâwmpui ve duh lotu mi tlêm tê-te chu haw tûrin mi fuihpawrh ang a. Dinhmun sâng luah leh mi hming tha tak takte pawhin Pathian mite dodâl tûra intêl khâwm, pawisak nei miah bawk si lote leh mi tawrawt tak takte chu an la thlâwp ang. Sum leh pâi, finna leh lehkha thiamna te hian mi tam tak chu tawrhhlelhawm takah a siam dâwn a. Mite tih duhdah nuam ti êm êm rorêltute, rawngbâwltute leh kohhran member-te chuan tang rualin Pathian mite hi an la do rawn ang. An thu sawi leh thu ziahte hmangin, uankhumna, vauna leh nuihzabûra siamna nên Pathian mite rinna chu paih thlâksak an tum dâwn a. Thuhretu derte hmang leh thinrim taka ngenna nên mipui an fuihpawrh ang. Bible-in serh tûra min hrilh Sabbath serhtute hnial thlâk nân, ‘Pathian Lehkha Thu-in a sawi alâwm’ tih tûr neih miah si lovin, anmahni dang chattu tûr dân khirh tak tak siam tûrin sawrkâr an nawr ang a. Dân siamtute lahin mite lawm hlawh leh ngaihsân nih an duh avângin Sunday serh luihtîrna dân siam duhtute chu an la thlâwp ang. Nimahsela, Pathian tihtute chuan Thu Sâwm Pêk bawhchhiatna tûr dân tu siam pawh ni se an pawm thei dâwn chuang lo va. Hetah chiah hian thutak leh dâwt indo tawnnaa inbeihna ropui ber chu a thleng ang. Nimahsela, hemi chungchângah hian kan tân hlauhthâwn tûr a awm lo va. Lalpa chuan, Etheri leh Mordekaia te hunah pawh a lo tih tawh ang khân, thutak leh a mite chu thiam a la chantîr ngei dâwn a ni.”—Ellen G. White, Thlahtubulte leh Zâwlneite, p. 512.

Sawi ho tûrte:

1. Enga ti nge Pathian hian a mite chu hun harsa tak tak an pal tlang a phal le? A phal chhante chu eng nge ni ang?

2. Ringtute hian Krista laka an rinawm tlat avânga harsatna an la tawh theihte chu hmachhawn tûrin eng tin nge an lo buatsaih ang? Harsatna an tawh lâi hian khawiah nge beiseina an chhar theih ang?

3. Engati nge hrilhlâwknate hi zau zâwka thlîr lova, a harsa lâi leh a hlauhawm lâite ringawt mai lo buaipui chiam a awl êm êm?

4. In thiannu/thianpa pakhat chu Thupuan bu a chhiar zawh hnu-ah lo kalin, a thu hriatte chu “hlauhawm” a tih thu a hrilh che u a. Thupuan bu ziah a nih chhan a lo hriatthiam a, thlamuanna a lo neih theih nân eng tin nge in tanpui ang?5. Mi tu emaw chuan, “Pathian hian min hmangaih emaw, min duh emaw ka ring miah lo. Ka thil tih kha hria ula chu, Pathianin min hmangaih loh kan rin chhan hi in hrethiam mai ang” tiin a sawi a. Eng tin nge in chhân ang? A chhânna tûr in hriat theih nân Ruthi leh Estheri chanchin hian a pui che u em?