2025 2nd Quarter Puitling Zirlai-12-na
Zirlâi 12 June 14–20
Tâwpna A Hnâi Tawh Tih Entîrtute
Sabbath Chawhnu
Chhiar tûrte: Dan. 2:31–45; Dan. 3:1–12, 17, 18; Thup. 13:11–17; Rom 1:18–25; Tirh. 12:1–17; Mat. 12:9–14.
Chângvawn: “Pathianin, hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a” (2 Timothea 1:7).
Tûn kârah hian ni hnuhnûnga thil thleng tûrte chipchiar taka lo entîrtu Bible thawnthu pahnih kan en ho leh dâwn a.
A hmasain, Thupuan bung 13-a kan hmuh tâwpna huna buaina lo thleng tûrte entîrtu ni ngeia ngaih theih Sadraka, Mesaka leh Abednego te chanchin kan zir phawt ang a. Chumi zawhah chuan, tûn hun leh Krista lo kal lehna inkâra thil thleng tûrte hriatthiamna min neihtîr thei tûr Kristian hmasate thil tawn inziahna Thuthlung Thar lam kan zir ve leh bawk dâwn a ni.
Hêng mi huaisen tak takte nun atang hian buaina khirh ber ber kârah pawh thlamuang taka awm theih a nihzia chiang takin kan hmu a.
Isua pawh khân, “Hlau suh u” tih thu leh “Enga ti nge in rilru a buai ni?” tih thu te a sawi fo a nih kha. Hrilhlâwknain a sawi ber chu Isua Krista chanchin a ni tih kan hriat reng a pawimawh a; chutiang chu a nih avângin, khawvêl chanchin tâwp dâwn hnaiha thil thleng tûr hrang hrang a sawiah hian a zirtîrte hnêna a lo sawi, “In thinlung mangang suh se; Pathian in ring e, kei pawh mi ring ve rawh u” (Joh. 14:1) tih hi keimahni tân pawh a pawimawh a ni tih kan hre tûr a ni.
Tawngkam dangin sawi ila, ni hnuhnûnga thil thleng tûrte chu Pathian laka rinawm tlat tumtute tân a khirhin a buaithlâk hle dâwn a. Nimahsela, hêng thil thlengte hi hlauhna nên ni lovin, beiseina nên kan thlîr zâwk tûr a ni.
Sunday June 15
Daniela bung 2 hrilhfiahna
Bible-a hrilhlâwkna ropui ber pakhat chu Daniela bung 2 hi a ni. Isua Krista pian hma kum zanga chuang mahah khân zâwlnei Daniela chuan khawvêla thil lo thleng tûr tlângpuite chu a lo ziak chhuak vek tawh a. A hun lâia khawvêl ram ropui ber Babulon atanga tanin, chumi zawhah chuan Medo-Persia a lo lang a, chu chu Grik leh Rom te’n rawn zui ve lehin, a tâwp berah tûna Europe ram hrang hrang lo ni ta Rom lalram keh darh tate khu a lo lang ta a ni.
Dik tak phei chuan, hêng Europe ramte chungchâng hi sawiin, châng pakhat chuan, “anni chu mihring chiin an inpawlh ang a; mahse, thîr leh hlum a inpawlh tak tak thei lo ang bawkin an inzawm reng lo vang” (Dan. 2:43) a ti a. He hrilhlâwkna hi mak tak maiin a lo thleng famkim ta. A awmzia chu, hêng ramte hi inrem tumin han inneih pawlh sateh thîn mah se (an lal fapte leh fanute an inneihtîr thîn a), tûn thlengin an la inthen darh zêl zâwk chu a nih khu.
Entîr nân, British lalte khu English hming mâwi tak, The House of Windsor (Windsor Chhûngkua) tia koh an ni a. Amaherawhchu, he hming hi an putna a la rei êm êm lo—kum 1917 atang chauh khân a ni. Chumi hma chuan, German hming, Saxe-Coburg-Gotha tih a ni reng thîn a, a chhan pawh Bristih lal tam takte khân—”mihring chi-a” an inneih pawlhna hmangin—German mite nên thisena inzawmna an neih vâng a ni. Nimahsela, khâng thisena inzawmna kha chu an indo tawnna dâl khawp a lo ni rêng rêng lo mai a; chuvâng chuan, Indopui Pahnihna lâi khân an hmêlma huat êm êmte lak ata inlâk hran nân tiin an lal chhûngkaw hming pawh The House of Windsor tiin an thlâk ta daih a ni.
Daniela 2:31–45 chhiar la. Nebukadnezzara’n mumanga a hmuh chu eng nge ni a, eng tin nge Daniela’n a awmzia a hrilhfiah?
_______________________________________________________
____________________________________________________
Daniela lehkhabu-a tâwpna hun chungchâng hrilhlâwknate hi Daniela bung 2-a kan hmuh hrilhlâwkna dung zui vek a ni hlawm a. A awmzia chu, hêng hrilhlâwknate hian, Daniela bung 2 ang thovin, Pathianin a chatuan lalram a din hmaa lalram hrang hrang lo ding tûrte chu a indawtin an sawi vek tihna a ni (Dan. 2:44; Dan. 7:13, 14). Tawngkam danga sawi chuan, hrilhlâwknate hian chatlak lâi awm miah lovin khawvêla lalram ropui tak tak lo ding tûrte chu a lo sawi lawk vek a, hmasânga lo ding tawh atanga tanin, a tâwpna keini hun thleng hian a târ lang a ni. Hetianga hrilhlâwkna thu hrilhfiahna hi “historicist approach” (“his-taw-ri-sis a-prawch” tia lam tûr) an ti a, hetiang ngeia hrilhfiah hi Bible thu pawhin a phût a ni bawk. He hrilhfiahna dân hman hi ni hnuhnûnga thil thlengte hriatthiamna tûra tûl êm êm a ni a, a bîk takin Thupuan bu-a kan hmuhte hriatthiam nân phei chuan a tûl leh zual hle.
Eng tiangin nge Daniela bung 2 hian Pathian chuan nakîna thil lo thleng tûrte a hre sa vek a ni mai lo va, chûngte chu ama thuhnuaia awm vek a ni bawk tih chiang takin min hrilh le?
Thawtanni June 16
Milim chibai bûkin
Lal Nebukadnezzara hian, Daniela’n a mumang a lo hrilhfiahsak tawh avâng khân Daniela leh a Pathian chu a zah ta hle a (Daniela 2 en la, châng 46–48 hi en ngun zual ang che); rei erawh a daih ta lêm lo.
Daniela 3:1–12 chhiar la. Rangkachak hlanga milim a siam chhan hi eng nge ni a, enga ti nge a milim siam hi chibai bûk theuh tûrin mi zawng zawng thu a pêk kher?
___________________________________________________
____________________________________________________
Babulon lal hian Pathian thuchah a pawisak lohzia chu rangkachak hlang hlaka milim a siam lui ngat hian chiang takin a ti lang a. Eng vânga siam nge a nih? E le, Babulon ram chu a tluchhe ngâi dâwn lo va, amah Nabukadnezzara pawh hi kumkhuain lal a ni reng dâwn tih entîr nân maw le! A ngaihdân pawmpui lo leh hnial apiang chu tih hlum zêl tûr an ni bawk a. He a thupêk chhuah hian keimahni duh dân anga thil tih tum tlatna hi sual leh tha indo tawnna ropui tak thleng mêk tâwp dân tûr kan hriatthiamna kawng dâltu a ni thei tih a ti lang chiang hle.
Kawng thenkhatah chuan, Nebukadnezzara hian Lucifera mizia a pu thui hle tih a lang: a tum a sâng a, amah a indah pawimawh êm êm a, Pathian thuneihna ualau taka hel khum ngam khawpin a chapo bawk. An inan loh êm êmna kawng thenkhat pawh a awm tho bawk a: Nabukadnezzara hi chuan Pathian dik tak hriatna lo nei ta-in, pawisak loh luih a tum ngar ngar thin Pathian lalramah chuan amah ngei pawh hi kan la hmuh ve ngei a rinawm.
Hebrai tlangvâl pathumte’n Lal Nabukadezzara hnêna thu an sawi inziahna Daniela 3:17, 18 chhiar la. He an thu sawi hian rinna chungchâng leh rinnain mi a phût theih thilte eng tin nge min hrilh?
___________________________________________________
_____________________________________________________
Hêng tlangvâl pathumte hian duh ni se, he dinhmun hlauhawm tak atanga tâl chhuak tûr hian chhuanlam tha tak an siam thei reng mai. Rawh tuina meipuia paih luh nih hial pawh an pawi ti lo hi an sakhaw vawn an lâk fawr êm vâng a ni ang em? Milim chu chibai bûk ang taka langin, anmahni Pathian zâwk chibai bûk pahin an pheikhawk hrui an suih tha der zaih thei lo vem ni? An thil hmachhawn hi nunna chân phahna khawp tûr êma lian tham a tling em? A tling niin an ngâi tih a chiang a, chhanchhuah ni dâwn lo pawh ni se, milim chu chibai bûk an tum chuang lo tih an sawi tlang nghâl vek zâwk a ni.
Kan rinna phatsan tûra thlêmna kan tawhahte hian mahni inthiam chawpa tlûk mai a awl thîn a. Nimahsela, chûng lakahte chuan eng tin nge kan invên theih ang? He lâi thu hian chutiang laka kan invên a tûl chhan chu eng tin nge a lo sawi? “Tu pawh tlêmte chunga rinawm chu tam tak chungah pawh a rinawm thîn; tu pawh tlêmte chunga rinawm lo chu tam tak chungah pawh a rinawm lo thîn” (Luka 16:10).
Thawhlehni June 17
Milim chibai bûkin
Ngun taka Bible zirtute chuan Daniela bung 3 leh Thupuan bu-in ni hnuhnûnga thil thleng tûr a sawite hi a inzawm thui hle a ni tih an hria a. A chhan chu, Daniela bung 3-a kan hmuh “milim chibai bûk” tûra thupêk tih chhuah a ni thu leh, thupêk zâwm lo chu tih hlum tûr (Dan. 3:15) tih ang hi Thupuan bu-ah pawh lo lang ve lehin, milem dang chu chibai bûk tûrin thupêk chhuah a ni a, chibai bûk lo apiangte chu tih hlum tûr an ni tih a ni ve leh chiah bawk. “Sakawlh lem chu a tawng theihna tûr leh sakawlh lem chu chibai bûk lo apiang a tih hlumtîr theih bawkna tûrin sakawlh lem hnênah chuan thâwkna pêk phal a ni” (Thup. 13:15).
Thupuan 13:11–17; Thupuan 14:9, 11, 12; Thupuan 16:2; Thupuan 19:20; leh Thupuan 20:4 te chhiar la. Hêngahte hian Pathian thupêkte leh mihring thupêkte inkalh dân eng tin nge târ lan a nih?
___________________________________________________
_________________________________________________
Pathian mite chu “vân te, lei te, tuifinriat te leh tuihna te siamtu” chibai bûk tûra sâwm a ni a, a awmzia chu, sakawlh leh a lem ni lovin, Siamtu zâwk chibai bûk tûr tihna a ni. Hebrai tlangvâl pathumte pawh khân hetiang vauna hi an hmachhawn ve tho chungin, Siamtu Pathian ni lo chu tu mah leh eng mah chibai an bûk duh lo va. Dura phâizâwla thil thleng, Siamtu Pathian ni lovin, milim zâwk chibai bûk tûra thupêk chhuah a ni leh, khawvêl puma la thleng tûr, Siamtu Pathian ni lovin, sakawlh lem zâwk chibai bûk tûra thupêk chhuah a la ni tûr hi inang diak diak lo mah se, a bulthûm takah chuan thuhmun tho an ni.
Rom 1:18–25 chhiar la. (Rom 1:18 leh Thupuan 14:9, 10 te’n “Pathian thinurna” chungchâng an sawi dân hi a inzawm a ni tih i hria em? Eng tiang kawngin nge milim/milem chibai bûk hi mihringte’n tu hnênah nge an rinawmna an pêk tih ti langtu a nih?
____________________________________________________
“Chibai bûk” han tih hian milim hmaa bawkkhupa, a hnêna rimtui hlân tihna a nih theih rualin, a ni vek chuang lo bawk a. Kan rinawmna kan pêk apiang hi chibai kan bûka chu a ni mai. Pathian hi kan Siamtu leh—Isuaa kan tâna thil ropui tak a lo tih leh tâk hnu-ah khân—kan Tlantu a ni tih kan ngaihtuah a nih chuan, amah chauh hi chibai bûk tûr chu a ni tih kan hre thei dâwn a. Amah lo thil dang rêng rêng chibai bûkna chu milem biakna vek a ni. Chutiang chu a nih avâng a ni ngei ang, Isua khân thu khauh angreng tak, “Tu pawh ka lama tang lo chu mi do a ni; tu pawh mi lâk khâwmpui lo chuan a ti darh a ni” (Mat. 12:30) tih hi a lo sawi a. Tâwpna huna thil thleng tûrte pawh hi Isua thu sawi dikzia mi tin nuna rawn ti langtu a ni dâwn a ni.
Nilaini June 18
Kohhran hmasa tihduhdahna
Thuthlung Hlui lehkhabute chauh hian tâwpna huna thil thleng tûrte lo entîrtu min lo hrilh a ni lo va, Thuthlung Thar lehkhabute pawh hian min hrilh tam ve hle tho mai. Kum zabi pakhat lâi vêla Kristiante nun kha a chêpin a harsa hle a. A tîrah khân an sakhaw vawnpuite zînga mi tam takin an han haw phawt a, an huat chhan pawh Mosia zirtîrna zuitute tâna mi hlauhawm nia an ngaih vâng a ni. Tin, milem betu Rom Lalram thinurna namêm lo tak kha an hmachhawn leh bawk a. “Lei leh hremhmun thiltihtheihnate chuan Krista dodâl tûra inthurualin Krista zuitute an tiduhdah nasa hle a. Milem be mite khân chanchin thain hnehna a chang a nih chuan, an biak in leh mâichâmte kha a bo vek ang tih a hmu tlang sa vek a ni. Chuvâng chuan, a sipaite kha Kristian sakhua ti boral vek tûrin a ko khâwm ta a. Tihduhdahna meipui chu a alh ta vut vut mai a ni.”—Ellen G. White, Indona Ropui, p. 39.
Tirhkohte Thiltih bu-ah hian Thupuan bung 13-in a lo sawi hi kan hnaih mêk lâia Pathian mite’n tawh kan inrin tûr chiang taka lo sawitu thawnthu pakhat kan hmu a.
Tirhkohte 12:1–17 chhiar la. He thawnthua engte hian nge ni hnuhnûnga thil thleng tûrte chu lo entîr lâwk?
_________________________________________________
______________________________________________________
Jakoba chu a lu tansak a ni a, Petea pawh tansak ve leh hmabâk a ni bawk; Kristiante chu Kristian a nih avâng hrim hrima tih hlum zêl tûr an ni tawp mai. He thawnthu-a thil chhinchhiah tlâk tak pakhat awm nia lang chu, a tâna zân tha lo leh lungngaihthlâk ber ni ngei tûra ngaiha Petera a muhîl tui êm êm tlat mai hi a ni a—a mutui hle tih a chianna chu, vântirhkohin a rawn ben harh hial a ngâi hi a ni!
Hemi zân hian Petera kha mak tak maia chhanchhuah a ni a, a tâna lo tawngtâitu Kristian, tân in ata a chhuah tak tak ring chiah bawk si lote awm khâwmna hmun lam panin a kal nghâl a. A va thlen chuan mak an lo ti hle mai. Keini pawh hi Pathian hnênah kan duh leh mamawhte dîlin kan tawngtâi fo va; nimahsela, Pathian chuan min rawn chhan tak tak erawh kan ring ngam leh chiah chuang lo ve tho thîn a ni lo’m ni?
Khatih hun lâi khân ringtu zîng thenkhat chu an nunna zuah a nih lâiin, thenkhat dang erawh tih hlum an ni thung si. Tâwpna hun kan hnaih mêk lâi hian ringtute tihduhdahna a lo thleng leh ngei dâwn a ni. Petera pawh kha hemi zân hian tih hlum ni lo mah se, a rinna avângin a thi ve leh ta tho a. Isua pawh khân Petera hi a la thih tûr thu a lo hrilh daih tawh nghe nghe: “‘Tih tak meuhvin, tih tak meuhvin ka hrilh a che, i naupan lâi khân i tâiah i inhrêng a, i duhna apiangah i kal thîn a nih kha; nimahsela, i upat hunah chuan i kutte i phar ang a, mi dangin an hrênsak ang chia, i duh lohna lamah an kâi ang che,’ a ti a. (Chûng thu chu eng tianga thiin nge Pathian a châwimâwi ang tih hriattîr nân a sawi a ni.) Tin, chu chu a sawi zawhin, a hnênah, ‘Mi zui rawh’ a ti a” (Joh. 21:18, 19).
Isua hian, Petera hi a la thi dâwn a ni tih a hrilh hnu-ah, “Mi zui rawh” tiin a hrilh tho bawk si tih hi lo chhinchhiah ila. Hei hian tih hlum tûra vauna kan tâwk a nih pawhin Lalpa hnung chu kan zui tho chhan tûr min hrilh em?
Ningani June 19
Sakawlh chhinchhiahna chu
Kum a lo vei zêl a, tâwpna huna thil thleng tûr, entîr nân, tih hlum kan nihna tûr thupêk leh sakawlh chhinchhiahna pu tûra intih luihna te chu a lo la thleng bawk si lo va. Chuvângin, mi thenkhat chuan ni hnuhnûnga thil thleng tûr nia kan sawi thin, indona hnuhnûng berah chuan Sabbath leh Sunday chungchâng hi thu inchuh lian ber a la ni ang kan tih te hi a lo thleng tak tak dâwn ta lo nia ngaihna an nei ta a ni.
Thupuan bu hi chuan a sawi chiang khawp mai: Siamtu chibai kan bûk lo va nih chuan sakawlh leh a lem zâwk chibai kan bûk tihna a ni dâwn a, tui lâi rapa awm a theih loh ang. Sabbath hi Siamtu a nihna anga Pathian chhinchhiahna—Eden huana a lo din tawh (Gen. 2:1–3 en la)— a nih avângin Siamtu chibai bûk chungchânga inhnialna a lo chhuah hunah pawh Sabbath hi thu inchuh ber a ni dâwn a. Tin, sakawlh ngei hi Sabbath thupêk thlâk danglama, Bible-in serh tûra min hrilh ni sarih ni âia, Bible-in a sawi ni hauh lo Sunday zâwk serh tûra mite zirtîrtu chu a ni. Hei hi kan hria a nih chuan, chibai bûk chungchânga Sabbath leh Sunday thu—Siamtu thu nge kan zawm dâwn a (Thup. 14:6, 7 en la), sakawlh thu zâwk—a pawimawh êm êm chhan pawh kan hre thiam thei dâwn a. Tin, Thuthlung Thar lehkhabu-ahte pawh hian ni sarih ni Sabbath nge mihring siam chawp dân zâwk tih chungchânga inhnialna lo chhuah fo tawh thu kan hmu nual bawk.
Matthaia 12:9–14 leh Johana 5:1–16 chhiar la. Sakhaw hotute’n Isua thah an duh chhan tak hi eng nge ni?
Isua’n Sabbath nia kut zeng pakhat a tih dam hnu khân (Mat. 12:9–13) eng tin nge sakhaw hotute’n an rawn rawn tih kha? “Chutichuan, Pharisaite chu an chhuak a, amah an tih boral theih dân tûr ngaihtuahin an inrâwn ta a” (Mat. 12:14). Ni sarih ni Sabbath avânga thihna maw? Johana 5:1–16-ah pawh Sabbath niin Isua’n dam lo pakhat a tih dam thu kan hmu a. Chutia a tih dam zawh chuan sakhaw hotute bawk hian Isua an rawn ti duhdah ta a, chûng thilte chu Sabbath ni-a a tih avângin tih hlum an tum ta hial nghe nghe a ni (Joh. 5:16).
Tih hlum an duh chhan hi ni sarih ni Sabbath a bawhchhiat vâng ni lovin, mihringte thurochhiah a palzût avâng zâwk a ni a (Bible-ah hian Sabbath hi Sunday-a thlâk a nih tâk thu pakhat mah hmuh tûr a awm lo ang chiahin, Sabbath nia dam lo tih dam khapna thu pawh a awm miah lo bawk). Hemi tuma Pharisaite’n Isua an rawn puhna leh ni hnuhnûnga inhnialna ti chhuaktu tûr chu thuhmun chiah ni lo mah se, inhnaih erawh a inhnaih hle dâwn tho: mihringte siam chawp dân nge kan zawm dâwna Pathian dân zâwk tih a ni dâwn a. Johana bung 5 leh Thupuan bung 13-a kan hmuhahte hian inhnialna ti chhuaktu ber chu Bible-in a sawi Sabbath chungchângah ve ve a ni.
Pathian thupêkte zînga pakhat avâng maiin kan thi ang maw? Thihna pumpelhna tûr zawn mai hi eng tiang taka awlsam nge a nih thin?
Zirtawpni June 20
Zir belhna: Ellen G. White-i lehkhabu, Indona Ropui bung 40, “Pathian Mite Chhanchhuah An Ni” (phêk 635–652) chhiar ni se.
“Hun liam ta zawng zawngah khân Pathian chuan vântirhkoh thianghlimte hmangin a mite tanpui hna leh chhanchhuah hna a lo thawk tawh thîn a. Vân mite khian mihringte tân rim tak leh taima takin hna an thawk reng thîn. Kâwlphe anga êng thuamhnawte inbelin an rawn inlan thîn a; khualzin mi anga inthuamin an rawn kal fo bawk. Vântirhkohte chu mihring anga inlanin Pathian mite hnênah a rawn inlâr thîn a. Chau tak ang maiin sasaw thing hnuaiahte an châwl hahdam thîn. Mihringte duhsakna pawh dawnsakin an inahte an thlen chilh thîn a. Khualzin, an tum ram an thlen hmaa khuain a thim hnan tâkte hruaitu ang pawhin an rawn inlâr thîn bawk. Anmahni kut ngeiin mâichâma meite chu an chhi alh a. Tân in kawngkhârte hawngin, Lalpa chhiahhlawhte chu an chhuahtîr thîn. Vân thuamin an inthuam a, Chhandamtu thlân chhinna lung lian tak pawh kha anmahni nam sawn hi a ni.
“Vântirhkohte chu, mihringte anga rawn inlanin mi felte inkhâwmnaahte an rawn tel ve thîn a; tin, mi sualte kal khâwmna hmun an tlawh fo bawk. A tlawh chhan erawh, Sodom khuaa an lo tih tawh ang khân, an thiltihte chhinchhiaha, Pathian dawhtheihna ramri kham an pêl tawh em tih rawn hriat an duh vâng a ni. Lalpa chuan a khawngaihna lantîr nuam a ti a; tih tak zeta a rawngbâwltu mi tlêmtê-te avâng pawhin chhiatna lo thleng tûr chu a dan rih thin bâkah, mi tam tak tân muanna hun a pawt sei thîn bawk. Pathian dodâl thîntu mi sualte hian an nuihzat leh an rah beh thin mi rinawm tlêmtê-te avânga hun tha la nei chauh a ni tih rêng an hre lo va, an lakah bat an nei nasa hle tih pawh an ngaihtuah ngâi hek lo.”—Ellen G. White, Indona Ropui, p. 632.
Sawi ho tûrte:
1. 2 Timothea 1:7 chhiar ula. Hrilhlâwkna thu-a in rilru ti buai deuh ber thilte sawi ho rawh u. Eng tin nge hlauhna rilru hi kan thin thlâk ang a, kan rinna avânga tihduhdahna kan la tawrh tûr thu lo sawi lâwknaah ngei pawh hian Pathianin beiseina thuchah a lo dah chu kan hmuh thiam theih ang?
2. Tûnah hi chuan ni hnuhnûnga Sabbath leh Sunday chungchâng buaipui a nih dân tûr hriat thiam a la harsa rih maithei a; nimahsela, khawvêl inthlâk danglam chakzia hi han ngaihtuah mah teh u. Hei hian kan rinna chu tûna thil thleng mêk, thâwk leh khata danglam leh thut thut theia nghat lova, Pathian Thu puan chhuaha awmah zâwk hian kan nghah a tûl thu min hriattîr em?3. Daniela bung 2 (leh bung 7 pawh) thu hi ngun takin ngaihtuah ula. Hêng lalram hrang hrangte hi an lo lan hun tûrah theuh zêl rawn langin, an tlûk chhiat hun tûra sawiah theuh zêl an tlu chhe leh vek bawk. Vawiinah hian, chanchin kal tawhte kha kan thlîr kîr a, hrilhlâwk a lo nih ang chiah vekin an awm a ni tih kan hria. Vawiina kan thlîrna atang chuan lalram pakhat chauh lo la lang leh tûr a awm a. Chu chu eng lalram nge ni a, eng vângin nge hrilhlâwk a nih ang chiahin a lo lang ngei dâwn a ni tih kan rin ngam theih?