2025 2nd Quarter Puitling Zirlai-13-na
Zirlâi 13 June 21–27
Tawpna Chhinchhiahnate
Sabbath Chawhnu
Chhiar tûrte: Mat. 12:38–42; Jona 3:5–10; Thup. 18:4; Dan. 5:1–31; Thup. 16:12–19; 2 Chron. 36:22, 23.
Chângvawn: “Ani chuan an hnênah, ‘Hebrai mi ka ni a; tuifinriat leh khawmual siamtu Lalpa, vân Pathian chu ka hlau a ni,’ a ti a” (Jona 1:9).
Tûn kârah hian tâwpna huna thil thlengte awmzia kan lo hriatthiam theihna kawnga min tanpui theitu tûr thawnthu tlêm azâwng kan en ho leh dâwn a. Chûngte chu: Ninevi khawpuia Jona’n thu a hril thu te, Babulon lalram tlûk chhiat thu te, Pathian mite chhuah zalêntu, ram tiam lama an kîr leh theihna tûra phalna petu Persia lal Kura lo din chhuah dân te a ni.
Hêng a taka thleng ngei thawnthute hian, zirlâi hmasa lama thawnthu dang kan lo zir tâkte ang bawk khân, chhuan tina mite tâna pawimawh êm êm thuchah an nei theuh a. Krista lo kîr leh hmaa chhuan hnuhnûng berte tân phei chuan an pawimawh leh zual hle. A awmzia chu, hêng a taka thleng ngei thawnthute atang hian “tûn hun atâna thutak” tia kan sawi mai thin awmzia kan lo hriatthiam theihna tûra thil pawimawh tak tak kan hâi chhuak thei tihna a ni.
Chutih rual chuan, hêng thawnthute hian ni hnuhnûnga thil thleng tûrte a lo entîr lâwk nia a lan avângin thil pakhat kan hriat rêng ngâi a awm a: an thupui chaite leh an thil sawi thâwite hi fîmkhur tak leh ngaihtuahna zau tak nei chunga kan zir chian a pawimawh a; tin, an sawi tum ni hauh lo sawitîrin an tawngkam hman tinte hi awmze eng emaw tak nei zêl ni-a lo ngaih tum kher tûr a ni lo bawk. Isua tehkhin thu sawite ang tho hian, an sawi uar duh lâi leh mi hrilh an tum tak chu hriat tumin kan zir zâwk tûr a ni a. Thu inthup eng emaw tak a awm nia ngâia, chumi hmuh chhuah tuma lo buai chu kan tih loh tawp tûr a ni ang. A thawnthu ruangâm leh a tlângpui hriat tumin kan zir zâwk tûr a ni a; chûngte atang chuan ni hnuhnûng atâna pawimawhna nei zirlâite chu kan lo hmu chhuak thei dâwn a ni.
Sunday June 22
Thu hril hreh tak zâwlnei chu
Jona chanchin (Jona 1–4) hian, tâwi tek tawk hle mah se, thu pawimawh tak tak min zirtîr tlat mai. He thu hril hreh tak zâwlnei chanchin atang hian ringtu tam tak chuan anmahni nihna dik tak an lo hriat phah tawh a. Tin, he thawnthu-ah hian nakîn huna thil lo la thleng tûrte kan hriat thiam theihna atâna pawimawh tak takte pawh kan hmu bawk.
Matthaia 12:38–42 chhiar la. Isua’n lehkha ziaktute leh Pharisaite hnêna thu a sawi tum hian Jona chanchina a eng lâi hi nge a thur chhuah? He a thu sawiah hian Pathian rorêlna lo thleng tûr chungchâng eng tin nge kan hmuh?
__________________________________________________
_____________________________________________________
Isua hian Jona âia ropui zâwk a nih thu a sawi a. He khawvêlah a lo kal a nih chuan krawsah khenbeh a ni dâwn tih hre sa vek mah se, “boralte zawnga chhandam tûrin” a lo kal ta tho a ni (Luka 19:10). Jona kha, ama suahsual leh luhlul avângin nghapui kawchhûngah ni thum leh zan thum ngawt a awm a; Isua’n thlân chhûnga ni thum leh zan thum hun a hman chhan erawh kha chu keimahni suahsual vâng a ni ve thung. Kha kha boralte chhandamna atâna a tih ngei ngâi a ni tlat a ni.
Jona kha zâwlnei ni ve si, thu erawh hril hreh tak, Pathianin a tirhna hmun Ninevi khawpuiah pawh kal duh miah lo ni angin kan hria a. Mihring thlîrna atang chuan a hriatthiampuiawm khawp mai: Assuria mite kha an hmêlmate lakah an nunrâwng êm bawk atin ni. An lemziak hrang hrangahte chuan an nunrâwnzia târ lan a ni a: indonaa an hnehte chu suangtuah phâk bâka râwngin an ti hlum thîn a ni tih chiang takin a lang. Chutiang mite khawpuia va kal a, an sualte an sim a tûl thu va hrilh chu tu-in nge duh ang?
He thawnthu-ah hian ni hnuhnûnga a la bâng kohhran lo chhuak tûrte entîrtu thil thleng pawimawh tak pakhat a awm a. Tu nge a nih tih an zawhna a chhânna, “Hebrai mi ka ni a; tuifinriat leh khawmual siamtu Lalpa, vân Pathian chu ka hlau a ni” tih thu hi vântirhkoh pakhatna thuchah puan nên khân a inang hle mai (Jona 1:9; Thup. 14:7). Lalpa chu “tuifinriat leh khawmual siamtu” tia a sawi hian Lalpa chu Siamtu, khawvêl leh a chhûnga thil awm zawng zawngte siamtu a ni tih a puang a. He thu ngei hi amah chibai kan bûk chhan tûr niin, chibai bûkna chu ni hnuhnûnga thil thleng hrang hrangah hian fiahna pawimawh tak a ni dâwn bawk a ni.
Keini pawh hi thlarau lam Babulon mite hnêna an ngaihthlâk châk lêm loh tak tûr thuchah puang tûra tirh kan ni a. “Ka mite u, a chhûng ata lo chhuak rawh u” (Thup. 18:4, NKJV) tih thu kan sawi hian, khawvêl mite chu an sualte sim tûrin kan hrilh tihna a ni. He thu hi mi tam takin an lâwm lo va, a zâidawh thei ang bera kan sawi pawhin an thin a rim tho thîn. Kan zîngah hian, khawvêl hnêna simna thu kan puana lo nuih zâtna emaw, lo dodâl hialna emaw la tawng miah lo kan awm em? Eng tin paw’n lo ti se, kan puan zêl tho a ngâi si a ni.
Jona nên hian eng tiang taka inang nge in nih le? I ngaihdân neih sa dik si lo kha eng tin nge i thlah theih ang?
Thawtanni June 23
Sual simna
Jona hian Ninevi khawpuia chêngte tâna zawm ngei ngei tûr thuchah pawimawh a puang a. “Jona chu ni khat kal chin khawpui chhûngah chuan a han lût tan phawt a, ‘Tûn achin ni sawmli-ah, Ninevi khawpui hi tih boral a ni dâwn e’ tiin a au va” (Jona 3:4, NKJV). A thu hril awmzia hi a chiang hle mai: Ninevi khawpui hi tih boral mai hmabâkin a awm mêk a ni. Lalpa zâwlnei ngeiin a puan a ni a, a sawi ang ngei hian a lo thlen ngei pawh a rinawm. Nimahsela, eng tin nge a awm tâk le?
Jona 3:5–10 chhiar la. Eng vângin nge he hrilhlâwkna thu hi a puan angin a lo thlen leh tâk si loh?
___________________________________________________
_____________________________________________________
Khawpuia chêngte chuan an zavâiin an sual an lo sim ta vek a; chuvâng chuan, anmahni hremna tûra Pathianin a lo rêl tawh pawh sût leh rih a ni ta a ni. “Thiam loh chantîr tawh an nihna chu sût leh a ni a, milem be mite ram pumah Israel-te Pathian chu châwisân leh châwimâwi lo niin, a dân pawh zah a lo ni ta bawk. An chheh vêla awm hnamte kutah an tlûk tâkna kha chu kum tam tak liam leh hnu-ah chuah a ni a, an tlûk chhan pawh Pathian an theihnghilh tâk vâng leh an lo chapo tâk êm vâng a ni.”—Ellen G. White, Zâwlneite leh Lalte, p. 271.
Hetiang deuh hi ni hnuhnûngah pawh a lo la thleng ve leh mai ang em? Tlâwm tawh khawvêl hnêna thuchah hnuhnûng kan puan hi lo âwiha, an sualte sim ta an awmin kan ring em? “Ka mite u, a sualnaahte in tel lohna tûr leh, a hremnate in hmuh ve lohna tûrin, a chhûng ata chhuak rawh u” (Thup. 18:4) tih thu hi khawvêl hmun hrang hrangah puan chhuah vek a ni ang a. Chutih hunah chuan, sakawlh hnâwla Pathian chibai bûk thlang zâwktute chuan Pathian thupêkte zâwmin Isua rinna an nei dâwn a ni (Thup. 14:12). Chûng mite chu, Ninevi khawpuia chêngte ang khân, boralte chunga lo thleng tûr Pathian rorêlna lak ata humhim an ni ang.
Thil pakhat kan hriat tûr awm chu, hrilhlâwkna thenkhat, entîr nân, Pathianin Ninevi khawpui a tih boral vêk tûr thu a puan angte hi thu delh kilh nei a ni hlawm a; a awmzia chu, a mi chêngte’n an sual an sim lo va nih chuan tih boral a ni dâwn tihna a ni (Jer. 18:7–10 en la). Chutih lâi chuan, hrilhlâwkna dang thenkhat erawh chu thu delh kilh awma puan a ni ve lêm lo thung a. A lo dawngtute chuan eng tin paw’n lo chhâng lêt mah se, puan a nih tawh ang takin a lo thleng tho tho dâwn a ni. Khawvêla Isua Krista lo pian tûr thu leh mi thianghlimte lam tûra a lo kal leh tûr thu te, sakawlh chhinchhiahna chungchâng te, hremna berhbu leih buak a nih tûr thu te, tâwpna huna tihduhdahna lo thleng tûr chungchâng te hi thu delh kilh eng mah awm hran chuang lo a ni hlawm a; mihringte hian eng tin pawhin lo dawngsawng mah ila, a lo thleng tho tho dâwn. Mihringte thil tih leh duhthlanna an siamte chuan zâwlneite’n an lo puan lâwk thilte a lo thlen hunah khawi/tu/eng lam zâwka tang nge an ni tih a ti lang dâwn a ni.
Tûnah hian, Pathian nge sakawlh zâwk chibai i bûk dâwn tih thu-a zawhna i hmachhawn huna duhthlanna dik i siam ngei theihna tûra tanpui thei tûr che eng duhthlanna nge i siam ang?
Thawhlehni June 24
Belsazzara buatsaih ruai
Median sipaite leh Babulon sipaite (Nebukadnezzara pa kaihhruai) tangrualin Ninevi khawpui an hneh tâk hnu khân Babulon khawpui chu a lo lianin a lo ropui ta hle a, an lal ropui tak Hammurabi (dân siamtu) hun lâi ang kha an rawn tawng chho leh ta a. Nebukadnezzara hnuaiah hian—Assuria sipaite’n rawn ti buai thei tawh hek lo le—Babulon khawpui chu a lo hausa-in huhâng pawh a nei lian ta hle mai. An chheh vêla awm hnam dangte pawhin hreh teh mah se, a ropuina leh thiltihtheihna chu an lo pawm lo thei ta bîk lo va. Khawvêl pum puia lal ber niin, ram hausa leh hmuingîl nih duh ve apiangte chuan a lakah an rinawm tlat a ni tih an lantîr zêl thîn.
Hetih lâi hian, kan hriat theih chin atang chuan Nebukadnezzara kha ringtu niin a thi a, a thih hma khân Daniela biak Pathian chu hnam zawng zawngte chunga rorêltu dik tak a nih thu a puang a nih kha (Dan. 4:34–37). A thih hnu-a Daniela’n Babulon lal dang chanchin a sawi hi chu amah thlâktu Belsazzara a ni a, ani hian a pa âiawhin ro a lo rêl sa tawh reng thîn nghe nghe.
Daniela 5:1–31 chhiar la. He lâi thu atang hian thlarau lam thuchah pawimawh eng engte nge lâk chhuah theih kan neih? Belsazzara tlûk chhiat chhan ber hi eng nge ni?
___________________________________________________
____________________________________________________
He lâi thu-a a lungchhiatthlâk lâi ber chu Daniela 5:22 hi a ni âwm e. Belsazzara hnênah hian a pa Nebukadnezzara chunga thil thleng, tih thangtlâwma a awm thu leh chumi hnua châwi sâna a lo awm leh tâk dân te kha sawiin, “Nimahsela, nang a fapa Belsazzar, hêng zawng zawng hi i hre na a, i inphah hniam duh tlat si lo” a ti a. A awmzia chu, Belsazzara hian thutak hriatna remchâng tha tak a nei a; Nebukadnezzara chunga thil thlengte pawh kha tu ma hrilh chhâwn ni lovin, amah ngeiin a hmu ve vek ngei ang. Chuti chung chuan, khâng thil thlengte kha a bengkhawn duh miah lo va, bengkhawn chu sawi loh, a pa Nebukadnezzara’n buaina namên lo a tawh phahna tûra thil dik lo a tihte ngei kha a rawn ti ve leh ngat zâwk a ni.
Nebukadnezzara’n rangkachaka siam milim dina Pathian pawi a lo sawi tawh ang chiah khân, ani pawh hian Daniela’n a biak Pathianin a lo puan lâwk tawh thute chu a pawisa duh lo lui vêl a. Khatia temple bungbêlte a ti bawrhbâng zâwnga a hman khân, Babulon ram chuan Juda-te hnehin, an Pathian sakhaw serh leh thil thianghlimte pawh a neihsak ta vek tih lantîr a tum niin a lang. Tawngkam danga sawi chuan, an boral tûr thu lo sawi lâwktu Pathian chungah hian thu a nei a ni tih lantîr a tum a ni.
He a thil tih hi Pathian pawisak lohna thil tih dik tak a ni a. Pathian chu tu nge a nih a hriat theihna tûrin “finfiahna” pawh a lo hmuh tam tâwk tawh vei nên! Tin, thutak chu eng nge ni tih hre tûrin hriatna pawh a nei tam tâwk êm êm bawk a; mahse, a thinlungin a pawm duh tlat si lo. Hetiang hian, ni hnuhnûng, khawvêla buaina hnuhnûng ber a lo chhuah hunah chuan, mi zawng zawng hi thutak hre tûrin hun remchâng tha tak pêk vêk an ni dâwn a. An duhthlanna kâihruaitu tûr chu, Belsazzara’n a lo tih ang tho khân, an thinlung a ni ang.
Nilaini June 25
Euphratis lui kang chat
Babulon khawpui chakna pakhat chu a kulh bang hnuaia luang Euphratis lui niin, chu lui chuan khawpuia chêngte tân hnianghar takin an mamawh tui a pe thîn a. Mahse, chu lui vêk chu a lo chak tâwk lohzia ti langtu pawh a ni tho bawk. Hmâsâng Babulon lalnu Nitocris-i khân khawpui luhna atân lui hrûl zêlah hian kawng a lo sial tawh a, chu hna an thawh lâi chuan hnathawktute’n duh thâla hna an thawh theih nân tiin a luanna kuang an sawn rih a, chutih chhûng chuan lui chhuat pawh chirh dûm mai a ni. Chu chu Kura khân lo hriain, kulh bâng hnuaiah chuan a sipaite awlsam taka an kal tlang theih nân a luanna hi a sawn ve leh bawk a. Khawpui hungna kulh bang chhûng lama an awm hnu chuan, a hnuaia lui luang tlang kulhte chu tu ma vên lohin a lo awm reng tih a hmu ta a, hemi zân la la hian Babulon khawpui chu a tlu ta nghâl a ni âwm e. Hmâsâng Grik chanchin ziaktu Herodotus-a khân heti hian a lo sawi a: “Khawpui laili-a chêngte chuan khawpui daifêm lam hi hmêlmate kutah a tlu tawh tih rêng an hre si lo. Kût an hman lâi a lo ni kher bawk si a, hlim tak leh nuam ti êm êmin an lâm mup mup mai a ni.”— The Histories, Tom Holland, trans. (New York: Penguin, 2015), p. 94. Hemi zâna an lawm hi Daniela bung 5-a kan hmuh Belsazzara’n a theh ruai kha a nih ngei a rinawm.
Daniela 5:18–31 leh Thupuan 16:12–19 chhiar la. Thupuan bu-a kan hmuh berhbu pasarihte zînga thenkhat leh Babulon khawpui tlûk thu te hian eng nge inanna lâi an neih?
______________________________________________________
_____________________________________________________
Isua’n a zirtîrte hnêna tâwpna hun chhinchhiahnate an lo hriatthiam theih dân tûr a hrilh khân, “Chutichuan ngaihven rawh u, eng ni-ah nge in Lalpa chu a lo kal dâwn in hre si lo. Nimahsela, hei hi hre rawh u, in neitu chuan rûkru lo kal hun tûr hria ni se chuan, a lo inrâlring ang a, a in a reh pawhtîr hauh lo vang” (Mat. 24:42, 43, NKJV) tiin vaukhânna thu a pe a. Babulon khawpui a tlûk zâna thil a thleng ang chiah khân, thâwk leh khata Krista lo lan thutna chuan tûnlâi Babulon hi a rawn nangchîng dâwn a ni. Amaherawhchu, hetianga rawn thâwn thut hi a tum ve hrim hrim chu a ni hran chuang lo va, nih ahnehin, Bible-a hrillhlâwkna hrang hrangahte hian Isua lo kal lehna chu a hnâi tawh hle a ni tih ti chiangtu finfiahna kan hmu tam hle zâwk a ni.
Khawvêl hi Pathianin a lo hrilh lâwk tawhte a ngaihthah avâng maia thâwna awm tûr a ni lo va; thâwna a awm chhan tûr chu Pathianin a thleng ngei dâwn nia a lo sawi tawhte a rin duh tlat loh avâng zâwk a ni ang.
Thupuan 16:15 chhiar la. Hêng tâwpna hun chungchânga vaukhânna thu hrang hrang kan hmuhahte hian chanchin tha thuchah inphûm eng nge awm? “Saruaka lêng” tih hi eng nge ni a awmzia?
Ningani June 26
Pathian hriak thih Kura
Lal Kura’n Babulon khawpui a chhut chhiat vek tâkah khân Pathian mite sal tân hun chhûng chu a lo ral ve nghâl chiah a. Persian mite khân ram tiam lama an kîr leha, Jerusalem temple chhe tawh pawh chu an sak that leh an phalsak ta a. Kura hnuaiah khân Persia Lalram chu khawvêla lalram lo awm tawhah chuan a huam chin zau ber niin, khawvêlin a lo hmuh tawhah chuan ram bung hrang hrang awp khâwm hnem ber a ni bawk.”—Tom Holland, Dominion Basic Books, Kindle Edition, p. 25. Persia mite phei chuan an lo tih thin dân angin Kura kha “Lal Ropui” tiin emaw, “Lalte Lal” tiin emaw an ko hial rêng a ni.
Kura hian a kohhran tâna Krista lo kîr leh huna thil thleng tûr chu a lo entîr a. Kura ang bawk hian Krista chu khawchhak lam atanga lo kal (Mat. 24:27 nên khâikhin rawh), Babulon dotu, Babulon sal nihna laka a mite chhuah zalêntu leh ram tiam lama an kîr leh theihna tûra kawng hawnsaktu a ni (Thup. 19:11–16 en la.) Hei vâng hian Pathian pawhin Kura hi “[a] hriak thih” tiin a lo sawi rêng a (Isaia 45:1); he Persia lal hmingthang tak hian Pathian mite a chhuah zalên a ni mai lo va, Babulon a do pawh hi Krista lo kal leh dân tûr min hriattîrtu a ni.
2 Chronicle 36:22, 23 chhiar la. Eng tiangin nge Kura chanchin hi Nebukadnezzara chanchin nên a inan a, eng tiangin nge a danglam bawk? A thupêk chhuah hian eng nge ni pawimawhna a neih? Eng tiangin nge kum za vêl zet ral hnua lo thleng Isua Krista lo pianna a nghawng chhuah bawk?
______________________________________________________
____________________________________________________
Kan Bible hman mêka Thuthlung Hlui lehkhabu awmte indawt dân, a hnuhnûng bera Malakia lehkhabu awm ta hi a tîra a indawt dân ang kha a ni tawh lo va. A tîra a indawt dânah chuan Thuthlung Hlui thu tâwp ber chu Lal Kura thu puan (2 Chronicle 36:22, 23) hi a ni. Hemi zawh chiaha lehkhabu lo awm hmasa leh ber chu Kura’n a lo entîr Isua Krista pian thu-a intan Chanchin Tha Matthaia ziak hi a ni a. Kura khân lei Jerusalem temple sak that leh a nih theih nân thupêk a chhuah ang chiah khân, Isua pawhin vân biak bûka a rawngbâwlna chu a tan ve dâwn a—chu hna a thawh zawh hunah chuan leiah lo kîr lehin zalênna famkim min chantîr tawh ang.
Kura kha Krista entîrtu tha famkim a ni lo tih erawh hria ila; entîrna eng mah hian tha famkimin a entîra chu an entîr thei ngâi lo. Chuvâng chuan, Kura chanchina a eng kim mai hian entîr a nei vek ni ang chuan kan ngâi a ni lo va. “Chhandamtu” lo entîrtu a nihna angin thil a lo entîr mai zâwk a ni.
Pathianin a ruahmanna ti puitling tûra milem be mite lal a hman dân hi a makin a ngaihnawm hle mai. Kan beisei loh dân ang daiha thil a kal tum pawhin eng tiangin nge khua reiah chuan Lalpa’n tâwpna huna thil thleng tûr a sawite hi a lo sawi lâwk ang chiahin a rawn thlentîr ngei dâwn a ni tih kan hriat theih ang?
Zirtawpni June 27
Zir belhna: Ellen G. White-i lehkhabu, Zawlneite leh Lalte bung 43, “Lang Lo Lam Atanga Thlîrtu,” (pp. 443–456) tih kha chhiar ni se.
“Hnam lo ding chhuak tawh rêng rêngte kha, Vêngtu leh Mi Thianghlima thiltumte hlen chhuaktu an ni dâwn nge ni dâwn lo tih ti lang tûrin hun tha leh hmun pêk theuh an ni. Hrilhlâwkna hian khawvêla lalram ropui tak tak lo awm tawh—Babulon te, Medo-Persia te, Grik te leh Rom te kha an lo din chhuah dân leh an lo len zual zêl dân a chhui vek a. Hêng lalram hrang hrangte chungah hian, hnam tênau deuh zâwka thil thleng ang tho kha a thleng ve leh vek mai. Fiahna an tâwk theuh a; chu an fiahna tawh chu an pal tlang lo theuh bawk. An ropuina a lo chuai a, an thiltihtheihna pawhin a tînsan ta a ni. Hnamte hian Pathian duan inkaihhruaina dânte chu hnâwlin, an hnâwl avâng chuan an chungah chhiatna lo thleng thîn mah se, Pathian thiltum chu hun hrang hrangah khân hlen chhuahin a awm tho zêl a ni.—Ellen G. White, Zawlneite leh Lalte, p. 451.
Jeremia bung 18 kan chhiar chuan, Jeremia’n bêl vawtu-in bêl a vaw lâi a thlîr thu kan hmu ang a: chu bêl vawtu’n a khawih ang ang chuan a bêl vuak pawhin hmêl leh pianghmang a rawn pu ta mai a ni. Pathian chuan he tehkhin thu hmang hian Bible-a hrilhlâwkna thenkhat hi thu delh kilh awma pêk a nih dân a sawi fiah a. Heti hian Jeremia hnênah khân a lo sawi: “Engtikah pawh hnam emaw, ram emaw chungchang thu-ah, ‘Ka pawtchhuak ang a, ka thiat ang a, ka ti chhia ang,’ tiin lo sawi pawh ni ila. Chu hnam chuan a chungthu ka sawi avânga a thil tha lo a hawisan chuan a chunga thil tha lo tih ka tum chu ka lamlêt ang. Tin, eng tikah pawh hnam emaw, ram emaw chungchâng thu-ah, ‘Ka siam ang a, ka din ang,’ tiin lo sawi pawh ni ila, ka tawngka chhuak ngâithla lova ka mithmuha thil tha lo a tih chuan a tâna thil tha tih ka tum chu ka lamlêt bawk ang” (Jer. 18:7–10).
Sawi ho tûrte:
1. Isua’n thutak pên bosantu Pathian mite âia Ninevi khawpuia chêngte’n khawngaih a la hlawh zâwk tûr thu a lo sawi hi ngun takin ngaihtuah ula (Mat. 12:39–42 en la.) He vaukhânna thu atang hian Pathian kohhrante’n eng zirlâite nge kan zir chhuah theih ang?
2. Ellen G. White-i’n lalram hrang hrangte hian an hma chiaha mite tih dân ang tho kha an rawn ti ve leh zêl nia a sawi hi lo chhinchhiah ula.—Ellen G. White, Zawlneite leh Lalte, p. 535. Hêng lalram hrang hrangte zînga thil thuhmun awm zêl chu eng nge ni? Eng tiang kawngin nge hrilhlâwkna kawng thuhmun chu an zawh tlân? Eng tiangin nge tûna kan chênna khawvêl kal mêk dân pawhin a zui ve leh tho bawk?3. Rinna min neihtîr lotu hi kan rilru emaw a ni ngâi lo va, kan thinlung zâwk a ni tih thu hi ngun takin ngaihtuah ula. Hemi i hriatna hian eng tiangin nge mi dangte hnêna thu hretu nih hna i thawhnaah nghawng a neih ang?