2025 2nd Quarter Puitling Zirlai-3-na
Zirlâi 3 April 12–18
Entîrna Atân Inneihna Hman A Ni
Sabbbath Chawhnu
Chhiar tûrte: Gen. 2:23–25, Eph. 5:29–32, Ezek. 16:4–14,Thup. 18:1–4,Gen. 24:1–4, Thup. 19:1–9.
Chângvawn: “Tin, ‘ “Berâmno nupui neihna ruai theha sâwmte chu an eng a thâwl e” tiin ziak rawh’ mi ti a. Tichuan, ka hnênah, ‘Hêng thu hi Pathian thutak a ni’ a ti a” (Thupuan 19:9).
Bible hi chhandamna nihphungte leh Pathianin a mite a hmangaihzia târ langtu hmangaihna thawnthu hrang hrangin a khat a ni ber mai. Mi pahnih inkâra inlaichînna awmah chuan inneihna (nupaa insiamna) hi a thûk leh a inneiate pawh an inhnaihna ber a ni a. Hei tak hi Pathianin a lo duan ang ngeia keimahni’n chan kan inphal a nih ngat chuan mi a hmangaihzia, amah nêna kan inlaichîn tawnna chungchâng leh min tlan tûra a kawng zawh lo thuizia kan zir chhuah theihna tûr hmun a ni.
Tûnlai mi tam takte’n hmangaihna leh inneihna an ngaihdân hian inneihna thuthlung hmanga Pathianin mi zirtîr a tum chu kan hriatthiam theihna tûr kawng a dâl tlat tawh a. Mihringte sualna khân inneihna hi nasa takin lo ti chhe tawh (thil dang zawng zawng pawh a ti chhe vek bawk a) mah se, thutak puan chhuahna hmanraw ropui tak la ni thei reng thovin, hrilhlâwkna thutak nên lam a puang chhuak thei a ni. Inneihna hian mi a tih hlim hrim hrim bâkah, thûk leh zau taka keimahni mihringte nihna kan zir chhuah theihna tûr sikul a ni a; tin, Pathian nêna kan inlaichîn tawnna chungchâng min zirtîrtu pawimawh tak pawh a ni bawk.
Tûn kârah hian Pathian Thu-in kawng hrang hranga inneihna—a tha leh a tha lo pawh—a lo sawi dân kan luh chilh ang a. Hêng entîrna atâna kan lâk chhuahte atang hian Pathianin a mite nêna inlaichînna neih a duh dân—a mite’n an tlin loh tum awm fo mah se—kan lo hriatthiam theihna tûr zirlâi pawimawh tak tak kan zir chhuak dâwn a. Tin, ni hnuhnûnga thil thlengte fiah leh chiang zâwka min hriattîr theitu tûr a hmangaihna chungchânga thutak awmte pawh kan zir tel bawk ang.
Sunday April 13
Tisa pumkhat
Bible-in tehkhinna a hmante zîngah hian Pathianin mihringte inzawmna hnâi tak neihpui a duhzia târ lang chiang bertu chu inneihna hi a ni âwm e. He tehkhinna hi Bible-a kan hmuh thawnthu hrang hrangahte hian a lang hnem hle a—Thupuan bu-ah ngei pawh fiah taka târ lan a ni. Chutiang chu a nih avângin, Bible zirtute tân chuan Pathianin a Thu-a he tehkhinna a lo hman rim êm êm chhan hi hriat tum ngei ngei a tûl a ni.
Genesis 2:23–25 leh Ephesi 5:29–32 chhiar la. Eng tiangin nge mihringte inneihna (nupaa insiamna) hian Krista’n mihringte nêna inzawmna a rawn neih dân a târ lan?
_________________________________________________
_____________________________________________________
Isua’n Pharisaite hnêna thu a sawi tum khân Genesis bu-a kan hmuh Evi leh Adama te inneihna chungchâng hi a sawi chhuak a. Chutah Pharisaite chuan zawhna lo zâwt vatin, “A nih leh, enga ti nge Mosia khân inmâkna (inthenna) lehkha pêka mâk (then) tûr thu a lo pêk si?” (Mat. 19:7) an ti a.
Mosia kha Juda hnamin zâwlnei an neih zîngah pawh a ropui ber a ni ngei mai tak a. Mahse, inneihna siamtu Pathian chu, a tirh a zâwlnei thu hmanga inchhân awhtîr an tum hi an ti âwm ang lo hle mai! Hetiang hi Isua laka an chêt thin dân a ni hrim hrim a: a thu zirtîrte chu Pathian Lehkha Thu (Thuthlung Hlui lehkhabute) nên a inkalh ni anga lantîr an tum ngar ngar thîn a nih kha.
Dam dun chhûng zawng rinawm taka inneih hi Pathianin mihringte a siam tirha inneihna a lo duan dân chu a ni a. Nimahsela, vânduaithlâk takin suala tlu tawh mihringte hian Pathian hnên ata kan dawn thilpêk ropui tak hi kawng hrang hrangin kan lo ti khawlo ta thîn a nih hi.
Pathian Lehkhabu-in inneihna a dah pawimawhzia ngaihtuahin, tih chhiat tuma beih a tâwk reng mai hi thil mak a ni lo letling zâwk a. Sabbath nên hian Eden huana mihringte’n thilpêk an dawn hlu tak tak ni dûnin, a pahnih hian Pathianin a thil siamte nêna inlaichînna tha tak neih a duhzia tih lanna tûra din ve ve a ni.
Inneihna, mi famkim ni lo ve ve pahnihte (hmeichhia leh mipa) inkawpna hian harsatna eng eng emaw thlenin a hmachhawn fo ngei dâwn a. Kohhran leh Krista inneihna erawh hi chu mi famkim Chhandamtu leh mi famkim lo mo (chu chu kohhranho) inkawpna a ni thung. Eng pawh ni se, inneihna tha tak, nupa rem taka a inkawpna atang hian Pathian hmangaihna kan zir chhuak thei tih erawh i hria ang u.
Hêngte hi inneihnaa zawm tûr thu pawimawh tak tak pathumte a ni: A hmasa berin, i nupui/pasal kha ngaihdam phu lo tak pawh ni mah se, Isua Krista’n kan phu lo chunga mi a ngâidam thîn ang hian ngâidam phawt mai rawh. A dawtah chuan, i nupui/pasal kha Krista’n kan thil tih sual zawng zawng nêna min pawm tho ang chiah hian a thil tih sual zawng zawng nên pawm la. A pathumnaah chuan, Isua Krista’n amah âia keimahni min dah pawimawh zâwk angin nang pawhin i nupui/pasal kha nangmah âiin dah pawimawh zâwk thîn rawh. Hêng chanchin thaa innghat dân tha tak tak pathumte hian eng tin nge Pathianin mi a hmangaihzia hrethiam tûra min puih mai bâkah, nupa kawp châwi tha leh hlim tak kan lo nih theih nân pawh mi a puih bawk le?
Thawtanni April 14
Mo hmêltha leh nalh tak chu
Ezekiela bung 16 hian Pathianin a mite a ngaihsakzia chiang leh fiah takin a lo târ lang a. Israel hnam chu nausên, a nu leh a pate’n ram palailênga thi tûra an kalsan tâk ni angin a sawi a. Chu nausên chu a inah a hruai haw a, a bual fâi vek a; tichuan, a lo nula ta a, nupuiah a nei ta a ni. He a tehkhin thu sawi hi a taka thlenga mâwi chu ni lo mah se, a pasal hian a hmangaihzia a lang chiang hle.
Ezekiela 16:4–14 chhiar la. Heti taka a nupui neih tûr a châwimâwi hian Pathianin kan laka tih a tumte chu eng tin nge a târ lan?
_____________________________________________________
_________________________________________________
Pathian chuan Israel hnam kha a ngaihsakna hnuaia “a lo mâwi êm êm” tâk thu a hrilh a (Ezek. 16:13, NKJV). A va hmuh tirh kha chu tu mahin mâwi an tih tûr a ni lo. A nu leh pate ngei pawhin an hnâwl tawh a ni a, thi tûra an hnutchhiah mai a ni. Nimahsela, Pathianin a rawn hmu a, a enkawl tâk hnu-ah chuan a lo nalh telh telh a, mite sawi luai luai khawpa mâwi a lo ni ta. Hei hi Hebrai lalte zînga a hmasa lam, Davida leh Solomona te hunah khân a dik leh zual a. Ethiopia ram lalnu pawhin Israel mâwizia chu hmuh ve ngei a châk avângin a rawn tlawh vang vang a nih kha!
Amaherawhchu, Israel mâwina hi Pathian thilthlâwnpêk a dawn a ni a. Pathian mo a nih avâng maia mâwi, a mâwizia hnam tinte sawi tling khawp lo ni ta a ni. Amah Pathian ngei pawhin Israel mâwina kha “ama mâwina” a bêl avânga lo “famkim” a nih thu a sawi (Ezek. 16:14).
Hei hi Bible-a thupui pawimawh tak lo lang nawn fo a ni: Pathian mo chu a mâwi a, a mâwi chhan erawh ama’n thil tih eng emaw a neih vâng ni lovin, Pathianin a chungah a duhsakna a lantîra, mâwi taka a siam tâk vâng a ni zâwk. Chutiang chiah chuan, ringtute pawh hi Pathian ngaihah chuan kan lang mâwi êm êm a; mahse, kan mâwina hi keimahni’n thil eng emaw kan tih vâng ni lovin, Pathian duhsakna kan dawn, kan chungah chhandamna a rawn thlen tâk vâng a ni. A felna, amah “Pathian felna” ngei chuan hliah khuh kan nih avânga mâwi ve mai chauh kan ni tih hi i hre reng ang u (2 Kor. 5:21).
Ezekiela lehkhabu kan chhiar tawh chin kha chu Israel mâwizia sawina hlîr a ni rih a; a dawt leh chiah châng erawh hi chu a thu a dang ta daih mai: “Nimahsela, i mâwina chu i chhuang a, i hmingthanna chu hur sual phah nân i hmang a, mi vei vâk nazawng hnênah i inphalrâi ta zêl mai a nih hi” (Ezek. 16:15) a ti.
Pathian thatna leh ropuina chu lantîr tûra siam kan ni a. Mahse, Pathian thil siamte hian an mâwina chu anmahnia an neih ve rêng nia an ngaih chiah hian chu an mâwina chu tih thangtlâwm niin, buaina an tâwk ta thîn a ni.
“Keimahni mâwina” kan chhuan emaw, rin chhan emaw avânga hlauhawm awm theite chu eng nge ni? A awmzia chu, eng tiangin nge keimahni-ah hian Pathian laka min ti tlatlumtu emaw, a hmangaihna dawn min phutîrtu emaw awm niin kan lo ngaih theih ang? Eng tin nge thlarau lama chapona rilru kan put loh nân kan invên reng ang?
Thawhlehni April 15
Mipa dang ngaih chîng Hosea nupui
Pathianin ti tûra zâwlnei Hosea a hrilh hi a chhiahhlawhte hnêna tih tûr a hrilhte zîngah chuan a mak dangdâi berte zinga mi a ni âwm e: nupuiah nawhchizuar nei tûrin a hrilh mauh mai! Nimahsela, Pathian hian mihringte sualna leh a laka a helnain a rilru a tih natzia kan lo hriatthiam theihna atân Hosea hi hman a tum a lo ni. Pathian chuan Israel hnam kha duh takin nupui atân a thlang a, nupuia a neih hnu pawh hian vawi tam tak a rinawm lohsan bawk; nimahsela, a hnênah hruai kîr lehin a din thar leh thîn a ni.
Hosea 1:2; Hosea 3:1; Thupuan 17:1, 2; leh Thupuan 18:1–4 te hi chhiar la. Hêng Bible châng hrang hranga kan hmuh inngaihna tih emaw, nawhchizawrhna tih emaw hi eng nge ni? Hosea chanchin atang hian Kristiante’n zirlâi kan zir chhuah theih eng engte nge awm? Kohhran hian eng tiang kawngtein nge Thuthlung Hlui hun lâia Israel fate thil sual tih ang kha kan tih ve thin le?
_____________________________________________________
_____________________________________________________
Bible hian Thuthlung Hlui hun lâia Israel hnamin thil sual a tihte kha Thuthlung Thar huna Krista kohhrante’n an rawn ti ve leh dâwn tih a sawi a. Pathian thuthlung kawltu Israel fate kha Babulon sala hruai a nih hma khân an lo kal sual nasa hman tawh hle a. An chheh vêla awm hnam dangte sakhaw serh leh sângte chu an sakhua biak dânah an sêng lût nasa êm êm a ni. Kum zabi pali-naah khân Kristian kohhran chuan an chan thatna tûr a nih ringin, Rom lalber Constantine chu kohhran chhûnga buaina leh inrem lohna awmte ching fel tûrin an ngên a. Chûng an thu buai hrang hrangahte chuan Pathian mite khân Pathian nêna an inlaichînna dah thain, an buaina “chin felsaktu” atân ring lo mi an pan thîn a ni.
Pathianin tawngkam a hmante hian kan thil tih sualte chu eng nge ni tih min hriattîr a ni mai lo va, kan thil tih sualte’n a rilru an tih nat thin dân pawh a ti lang nghâl bawk. An kawppuite’n an lo phatsan tawhte chuan kan rinawm lohnain vân rorêlna hmuna Krista rilru a tih nat dân tûr an hrethiamin a rinawm a. Hosea chanchina a mak lâi ber mai chu, amah uire-santu a nupui chhanchhuak tûra kal thui êm êm hi a ni âwm e.
Pathianin mihringte hnêna vaukhânna thu hnuhnûng ber a pêk, a mite chu Babulon chhûng ata chhuak tûra a hrilh hian, a kohte chu mi dang daih ni lovin, ama mite ngei a ni tih kan hre tûr a ni. A mite chu a hre chiang a, a hmangaih êm êm bawk. Khawvêlin a hun tawn tûra a chhe ber chu a hnaih chhoh mêk lâi hian, ama thisen ngei hmanga mi a lei lêt leh theih nân a lo pêk tlâk tawh tlanna man kha min la hlui chhunzawm reng a. Krista kraws hian—thil dang zawng âiin—Lalpa’n amah kal bosan tawhtu a mite chhandam a duhzia mi a hriattîr tûr a ni.
Tûnlâi hunah hian eng kohhran pawh—keimahni kohhran ngei pawh hi telin—thlarau lam uirenaa kan tlûk leh theihna kawng eng engte nge awm?
Nilaini April 16
Isaaka leh Rebeki
Abrahama kha a lo upa ta hle mai a, Pathianin thlah tam tak a la neih tûr thu a hrilh kha eng tikah tak lo thleng ang maw tiin a ngaihtuah nasa thîn ang tih rinhlelh rual a ni lo (Gen. 15:5 en la). Chutichuan, a chhiahhlawhte zînga a upa ber leh a rin ber ni bawk chu hna pawimawh tak thawh tûr a tuk ta a.
Genesis 24:1–4 chhiar la. Eng vângin nge Abrahama tân hian a fapain nupuia “Kanaan ram nula” (Gen. 24:3) a neih loh kha a pawimawh êm êm?
____________________________________________________
_____________________________________________________
A chhiahhlawh hnêna a hrilh hi a rilru zîmthlâk kan lo ti a ni maithei; amaherawhchu, Abrahama ngaihdân chuan he thil hi hnam chungchâng ni lovin, thlarau lam daih a ni a. Tin, chi inthliarna lam rawng kâi ni lovin, a sakhaw biak vawn nun zêl a duh vâng a ni zâwk bawk. Abrahama hian Kanaan mite sakhaw zirtîrna leh serh leh sângte—chibai an bûk milem pathiante kha chu sawi loha lêng ni se—tenawmzia a hre chiang a. A fapain chûng mite zînga mi nupuia a nei a nih chuan, a tân an thil tih ang tih ve mai a awlsam tûrzia pawh a hmu tlang sa vek bawk.
Hmânlâi Israel hnam chanchin leh, kum za eng emaw zât kal ta chhûnga Kristian kohhran chanchin ngei pawh kha kan thlîr kîr chuan, Pathian mite kha—khawvêl hnêna chanchin tha puang darhtu tûr ni siin—khawvêl mite thang kamah an âwk ta hlauh zâwk a, an sakhaw zirtîrna leh thurin dik lo tak takte chu an tâwmpui ve ta mai thîn a ni tih kan hria ang. He thil lungchhiatthlâk tak hi a taka thleng ngei a ni tih ti lang chiang êm êmtu pakhat chu Bible-in serh tûra min hrilh ni sarih ni Sabbath âia milem be mite’n ni pathian an lo biak thinna ni Sunday serh a ni ta zâwk hlauh hi a ni a. Hemi chungchâng hi ni hnuhnûnga thu inchuh lian ber pawh a la ni dâwn nghe nghe bawk a ni.
Genesis 24:57–67 chhiar la. He thawnthua thil thenkhat kan hmuhte atang hian Krista leh a kohhran chungchângah eng zirlâite nge zir chhuah theih kan neih? Entîr nân, Rebeki leh Isaaka te kha inlaichîn an la nihna atang hian suala tlu tawh kan nihna chungchâng eng nge zir chhuah theih kan neih?
_____________________________________________________
Thil chiang tak chu kan Siamtu nên hian inlaichîn hnâi kan ni a, ama anpui ngeia a siamte kan ni. Mahse, sualin a lak ata min ti hrang ta a; chuti chung chuan, a tân mo dik tak nia ngaih kan la ni tho thung. Nimahsela, keimahni duhthlanna hmangin amah nêna kan inneihna chu a nih dân tûr dik tâk ni lo leh buarchuar takah kan siam ta thîn a nih hi.
Ni e, Pathian chuan a mote hi min hmangaih a, keimahni’n amah kan hmangaihna âiin, ama’n min hmangaihna hi a thûk zâwk daih bawk. Ni tin hian Pathian kan hmangaihna ti zual thei eng duhthlannate nge kan siam theiha kan siam tûr ni bawk awm? Hetih lâi hian, eng ang duhthlannate’n nge kan hmangaihna ti chak lo sawt thei si le?
Ningaini April 17
Nawhchizuar chungah rorêlna a thleng
Thupuan 19:1–9 chhiar la. Hetah hian thil thleng pahnih avânga lâwmthu sawina kan hmu a, chûng thil thleng pahnihte chu: nawhchizuar ropui tak chunga rorêlna lo thleng ta leh Krista’n a nupui hual a nei ta te hi a ni. Eng tin nge hêng thil thleng pahnihte hi Pathian felna leh hmangaihna ngahzia lantîrna a nih kawp le?
___________________________________________________
_________________________________________________
Nupa inrinawm lohsanna hi a man pêk ngâi tûr ni se, a man chu sâng far far khawp ang. Anmahni kâr chauh pawh ni lovin, an fate nun leh mi dang thlengin a nghawng vek a. Mi dawh thei leh chhel ber pawhin an dawh theih tawh loh chin a thleng ta nia an ngaih hun tawng nge nge-in, inthen mai loh chu tih theih dang a awm ta lo niin an hre thîn. Kan khawvêl hian, an sualte avânga inchhîrna pawh an nei dâwn tawh miah lo nia ngaih theih tûr khawpa mite thinlung a sak tawngkhawng hunah chuan sualin, a nawm a mâka tawrhna a thlentîr chhunzawm zêl phal a ni tawh lo vang a, khawvêl ngei pawh hi a awm chhunzawm zêl a remti tawh lo bawk ang. Boralte avânga rilru natna leh anmahni khawngaihna chu a awm ngei dâwn tho a; chutih lâiin, sualin khawvêl a thunun chhûng zawnga hrehawm lo tuar thîntute tân erawh hlimna leh lâwmna a thleng ve thung tawh dâwn a ni. Khawvêl hi a tîra Pathianin a lo duan dân ang tak khân din thar leh a ni ang a. Chutih hunah chuan mi tu mahin an hawisan tawh lo vang—a chhan pawh Pathian kan hawisan avânga hrehawm kan tawrh zawng zawngah khân Pathianin thiam lohna a nei lo tih kan lo hre theuh tawh dâwn si a.
Thupuan 21:1–4 chhiar la. Heta inneihna a tih hian eng nge ni a entîr a, eng vângin nge chu inneihna chu beiseina leh thutiama khat a nih? Hêng châng pali-te atanga beiseina kan lo chhar chhuah chu eng nge ni?
_____________________________________________________
_______________________________________________________
“Dam dun chhûng zawng pumkhat ni reng tûra inneihna hi Krista leh a kohhran inpumkhatna entîrtu a ni a. Krista’n a kohhran chunga rilru a put ang hi nupaa insiam tawhte’n an kawppuite lakah an lantîr tawn ve ve tûr a ni.”—Ellen G. White, Testimonies for the Church, vol. 7, p. 46.
Krista khân mihringte’n amah an hnâwl avâng leh pathian dangte laka an uiresan fo avângin hrehawm sawi hleih theih loh a tuar a. Chuti chung pawh chuan kan tân amah a rawn inpe ta tho a nih kha. Amah khân kan rinawm lohnate leh kan uire-nate man chu a pêk tawh avângin kan inchhîra, kan sualte kan sim a nih phawt chuan chatuana nunna chantîr leh min tiam a ni.
1 Petera 1:18, 19 chhiar la. Hêng châng pahnihahte hian Thupuan 21:1–4-a kan hmuh tâwpna hun lo thleng tûra beiseina min pe thei eng thu nge awm?
Zirtawpni April 18
Zir belhna: Johana 2:1–11, Matthaia 22:1–14, 2 Korinth 11:1–5, leh Matthaia 25:1–13 te chhiar ang che.
Bible hmun hrang hrangah hian hrilhlâwkna kan lo hriatthiam theih nâna tanpuitu tûr che thawnthu tam tak a awm a; mahse, hêngte hi a lova luata hman palh thei a ni tih kan hriat a pawimawh hle. Hun kal tate kha thlîr kîr ila, Kristiante zînga thenkhat chuan Bible thawnthua chhinchhiahna leh entîrna kan hmuhte hi an ngaihven leh lutuk a, a taka thil thlengte ngei pawh thawnthu phuahchawp mai mai ang deuhah an chhuah ta daih thîn nghe nghe. Bible-a thawnthu kan hmuhte hi hrilhfiahna hrang hrang a awm thei ngei mai tak a; chutih rual chuan, Pathian hian a taka thleng ngei thilte hi a kohhran nêna an la indâwr tawn dân tûr lo entîrna atân a hmang thîn a ni tih kan hriat reng a pawimawh hle a ni.
Entîr nân, Kana khuaa inneihna ruai theh khân hrilhlâwknain entîrna atâna inneihna a hman chhan leh hman dân min hrilh a. A taka thil thleng ngei kha tehkhinna atân Isua’n a lo hmang a ni. “Krista thu sawi hian inneihna ruai theh a nih tuma an tlâkchham kha a phuhrûk zo hle a. Chutiang bawkin, mihringte khawlohna thâi bo tûr leh, an nun siam thara châwm zui bawk tûr pawhin a khawngaihna hi a tâwk zo êm êm a ni.”— Ellen G. White, Chatuan Nghahfâk p. 152.
Heti hian Pi White-i vêkin a lo ziak leh bawk a: “‘Lalpa Pathian chuan a rawngbâwltu, a zâwlneite hnênah a thurûk hrilh lovin eng mah a ti ngâi lo.’ ‘Thil inthupte chu Lalpa kan Pathian ta’ ni tho mah se, ‘thil tih lan tâkte chu . . . keini leh kan thlahte ta kumkhua tûr a ni.’ Amos 3:7; Deuteronomi 29:29. Hêng thilte hi Pathianin min lo pe tawh a, amah tih tak chung leh tih tak zeta zirtute hnênah chuan malsâwmna thlentîr a tiam a ni.”—Chatuan Nghahfâk, p. 246.
Sawi ho tûrte:
1. Johana 2:1–11 chhiar la. Chanchin Tha Johana ziakah hian Krista’n hna a la thawh tûr lo entîrtu thil tam tak a awm a. Bible zirna lama mi thiamte pawhin Johana’n Kraws lam thlîr tûra a lehkhabu chhiartute mi a khalh luh dân hi an sawi thîn. He thawnthu-a khawi lâiahte hian nge Krista nungchang leh a lalram din tûr chungchâng chu târ lan a nih sawi la. Tin, chhandamna ruahman emaw, Pathian Fapa hnêna lo tiam tawh inneihna ruai kîl chungchâng emaw chu engtin nge a sawi bawk?
2. Nula thianghlim sâwm tehkhin thu hi hriat lâr tak leh mite ngaihnawm tih êm êm ni bawk a ni a. He thawnthu pawimawh tak hian eng tin nge ni hnuhnûnga thil thleng tûrte chu min hrilh? Mo neitu hian rawn thlen tlâi chhan tha tak a nei em? He tehkhin thu hian a mi mal anga Krista nên kan inlaichîn tawn dân leh a kohhranho ang zâwng a kan inlaichîn tawn dân pawh engtin nge a sawi fiah?3. Kristian kohhrana zirtîrna leh serh leh sâng dik lo chi hrang hrang lo luh dân hi ngaihtuah ula. Bible-in serh tûra min hrilh ni sarih ni Sabbath âia Sunday zâwk serh a ni ta hlauh hi chu sawi loha lêng ni ta se, hemi ni lo zirtîrna dik lo dang seng luh ni tate chu eng nge ni? Engtia lo lût ngawt thei nge a nih a, engtin nge keimahni kan lo invên mai bâkah, mi dangte hnênah pawh a dik lohzia kan hrilhfiah theih ang? Eng tiang kawngin nge chumi chu vântirhkoh pathum thuchahin tih a tum tak pawh a nih?