2025 2nd Quarter Puitling Zirlai-5-na
Zirlâi 5 April 26–May 2
Khawvêla Hnam Tinte: Then 2
Sabbath Chawhnu
Chhiar tûrte: Gen. 2:9–17; Dan. 2:31–35; Isaia 17:12, 13; Dan. 7:1–3; Rom 3:10–19; Thup. 12:15, 16; Thup. 10:1–11.
Chângvawn: “Ngâwi ula, Pathian ka ni tih hi hre rawh u: hnam tin zîngah châwimâwiin ka awm ang a, leiah hian châwimâwiin ka awm dâwn a ni” (Sam 46:10, NKJV).
Kum za eng emaw zât kal tawh atanga vawiin thleng hian, mihringte suala an tlûkna kha Pathianin thleng se a tih vânga thleng a ni tia ngâi tlat an awm thîn a. Mihringte hi sualah tlu-in thi ila; tichuan, amah chu Isua nia rawn piangin krawsah a rawn thi dâwn a ni an ti. A ni tak a, kan tâna krawsa a lo thihna âia mi a hmangaihzia târ lanna ropui zâwk leh chiang zâwk thil dang tih theih a nei lo rêng a. Chutiang zâwnga ngaihtuah chuan, suala mihringte kan tlûkna kha Pathian ngaihah pawh thil tûl tak a ni tih ve mai theih tûr chu a ni ang.
Nimahsela, hetiang ngaihdân hi a âwm ang lovin a râpthlâk êm êm a. A chhan pawh suala Setana emaw, mihringte emaw kan tlûk hi Pathianin a ruahman dân a ni ngâi lo hrim hrim atin ni. Setana helna leh a hnu-a mihringte pawh an hel ve leh tâkna kha nghawng râpthlâk tak nei thil thleng pawi lutuk a ni a, kan nu leh pa hmasa berte kha sualah lo tlu lo ni se chuan Pathianah hlimna famkim neiin kan la awm rêng tûr a ni asin le!
Tûn kârah hian suala mihringte an tlûknain harsatna a rawn thlente leh, mihringte’n kan chunga rorêltu atân Pathian ni lovin, kan mihringpuite zâwk kan thlan avânga harsatna kan tawh thinte kan zir chhunzawm leh dâwn a. Chûngte’na harsatna min thlen nasatzia chu Daniela lehkhabu-ah hian chiang taka târ lan a ni. Daniela lehkhabu hian Pathian mite’n Pathian an hawisana, khawvêl lalte an bêl zâwk a nih chuan an chungah thil tha lo a lo thleng dâwn a ni tia a hrilh khan an tâna tha tûr a hriattîr a ni tih chiang takin hrilh a. Khawvêl lalte pawh kha anmahni ang bawka mi sual ni ve tho an nih miau avângin, a thu hnuaia awm tûra intah luh chu thil âtthlâk tak a ni rêng a ni.
Sunday April 27
Thupêk hmasa ber chu
Eden huan kha Pathian mi hmasa berte tân chuan zirna in a ni a, khami hmunah khân Pathian thil siam dangte nên awm tlângin, chu chuan anmahni mai bâkah an thlahte thleng pawhin Siamtu chanchin a zirtîr dâwn a ni. Ellen G. White-i chuan, heti hian a lo ziak a: “Nupa thianghlimte kha Pathianin duat taka a enkawl a fate an ni mai lo va, finnaa khat Siamtu hnên atanga zirtîrna dawng thîn zirlâite pawh an ni tel bawk. . . . Mita an hmuh theih vâna thil mak leh ropui tak tak—’hriatna famkim neitu thil tih mak tak takte’ (Joba 37:16)—chuan an mamawh zirtîrna leh hriatthiamna kang chat ngâi lo a pe thîn a ni.”—Thlahtubulte leh Zâwlneite, p. 28.
Genesis 2:9–17 chhiar la. Pathianin mihringte hnêna thupêk, tih loh tûr a hrilh hmasak ber chu eng nge ni a, eng vângin nge chu thupêk chu a pawimawh êm êm bawk?
Pathianin mihringte hnêna “thu” a “pêk” thu kan hmuh hmasakna ber chu Genesis 2:16-ah hian a ni a, chu chu a chhia leh a tha hriatna thing rah ei lo tûra thu a pêk kha a ni. Pathian tehrêng pawh hian enga ti nge hriatna an lo neih chu a phalsak loh tlat mai le? Thil kan dâi hriat ngei chu a tangkâiin, thil hriat neih belh zêl pawh a tha êm êm lo vem ni?
Chutiang chu Pathian Lehkhabu-in min zirtîr dân a ni tlat lo: Pathianin a tum chu, hriatna thenkhatte’n kum rei tak awh tûr hrehawm tawrhna a thlen theihte lak atanga a mite huma, an tâna tha tûr thil tha tak takte zîrtîr a ni a. Amah chu lal ber leh an nun kâihruaitu atâna hmang lova, anmahni duh dân anga nun zâwk a thlana thil lo thleng tûrte chu zirtîr a duh hle bawk.
Evi leh Adama te thih hnu kum za tam tak hnu-a Israel fate’n lal neih an dîl pawh khân Lalpa chuan an thil dîlin nghawng tha lo a neih tûr zawng zawngte chu a hrilh tlang nghâl vek a (chumi chungchâng chu kâr kal ta khân kan zir tawh a nih nghe nghe kha). Tin, a mite hnênah khân a thu hnuaia kûn peih loha amah kalsanna chu tâwpna hun thlengin a awm chhunzawm zêl dâwn tih pawh a sawi rêng bawk.
Khatia Israel lalte’n thil sual an tiha, a lal hnuhnûng apiang a sual zual emaw tih hial tûr khawp an han nih tâkah khan, Pathian thuthlung kawltu a hnam thlante ni si kha hnam dangte ang mai an lo ni ve ta a. An tâna ruahmanna a lo siamte chu an pên bosan thui tawh êm avângin anmahni duh tak, an chunga rorêltu tûr lal chu a pe ta nge nge a ni.
Hemi hre chunga Daniela lehkhabu hi kan zir a nih chuan he lehkhabu-in min hrilh a tum tak chu kan lo hrethiam thei ang. Daniela’n inlârnaa a hmuh lalram hrang hrangte hi “hnamte”—Jentail-te—thiam loh chantîr a nih thu târ lanna chauh ni bîk lovin, Israel-te hlawhchhamna, Pathian thupêkte (Hebrai tawngin, mitswot) an zawm loh avânga thiam loh chantîr a nih tâk dân ti langtu pawh a ni bawk a. Kum tam tak chhûng sala an tânna kha an zirna in thar lo ni ta-in, Eden huana zalên taka an zir ang kha bâwih ni chungin an zir ta a ni. Chutiang chu ni mah se, thinlung inhawng tak chunga an zir a nih chuan, he khawvêl lalramte leh Pathian ram inan lohzia, a inthat hleihzia chu an zir chhuak thei dâwn tho thung ang.
Tûnlâi hunah pawh hian, hriatna thenkhat, kan zînga tam tak tân chuan kan hriat loh tawp atâna tha zâwk tûr a awm thei ang em? A awm a nih chuan, eng engte nge ni? Chu chuan eng tin nge Eden huana Pathianin a chhia leh a tha hriatna thing rah ei a lo khap tlat pawh kha hrethiam tûrin min tanpui?
Thawtanni April 28
Daniela bung 2
Babulon sala Israel fate an tân chhûng hian, Pathian chuan zâwlnei Daniela kal tlang khân a mite leh he khawvêl lalram/sawrkârte’n inlaichînna an neih tawn dân chiang leh fiah takin a lo târ lang a. A mite chu anmahni ramah, anmahnia ro inrêl thei an ni ta lo; an duhthlanna siam dik loh rah an sêng dâwn ta a. (Mahse, chuta tang chuan zirlâi an zir chhuak thei ang em?)
Tâwpna hun a lo thlen hmaa khawvêla thil lo thleng tûr pawimawh tak takte lo sawi lâwkna Daniela 2:31–35 hi chhiar la. He hrilhlâwkna ropui tak atanga thu pawimawh tak tak kan zir chhuah theih awmte chu eng nge ni?
__________________________________________________
_________________________________________________
Kum zabi sâwm leh pakuana tâwp lamah khân mi tam tak chuan mihringte hian hma kan sâwn chho zêl dâwn nia ngâiin, a phûr hle nghe nghe a. The Paris Exposition (1900) te pawh kha hma lam huna beiseina an neih sânzia ti langtu pawimawh a ni âwm e. Khâwl thil siam chhuah lamah leh science zirna lama hmasâwnna nasa tak thlengte khân mihringte’n harsatna kan tawh tam takte hi a ti tâwp thei mai dâwn nia rinna a lian hle thîn a. Kum zabi sawmhnihna kan han chuan chhuah chiah phei kha chuan, mi fing leh ngaihtuahna sêng mite zînga tam tak pawhin mihringte thatna leh finna hian mihringte tân hun thar duhawm tak a hring chhuak dâwn ni ngeia beiseina a lian hle a nih kha.
Amaherawhchu, Indopui Pahnihna lo chhuak khân an beiseinate chu eng mah lo mai a nihzia a rawn ti ang a, kum zabi sawmhnihna tâwp lamah phei kha chuan indona avânga thi zât belh khâwm chu maktaduai 200 zet an tling hman a ni. Ni e, khâwl thil siam chhuah lamah chuan hma kan sâwn nasa ngei tak alâwm; nimahsela, rilru thatna lamah erawh eng ruai kan ang ta lo a nih hi. Dr. Martin Luther King Jr.-a khân, mitdelin bomb mit nei kan kâihruai a ni e, ti ang deuhin a lo sawi a. Chutiang chu thil hlauhawm tak a ni rêng a ni.
Hrilhlâwkna zirtu tam tak chuan Daniela bung 2-a milim siamna hmanruate kha a hlut dân indawtin a ke lamah a tla thla zêl a ni tih kan hria a: rangkachak atangin tangkaruaah, tangkarua atangin dârah, dâr atangin thîrah, a tâwp ber chu thîr leh hlum inchawhpawlh a ni.
Charles Darwin-a te, Karl Marx-a te leh kum zabi sâwm leh pakuana hun lâia mi thiam dangte khân mihringte hi a tha zâwngin, a changkâng zâwngin kan insiam chho zêl nia mi rintîr an tum nasa thîn a—a awmzia chu, kan taksa awm dânah leh rilru put hmangah pawh kan tha telh telh an tihna a ni. Ni e, kawng thenkhatah chuan mihringte nun (kan khawsak a ni ber ang chu) hi a tha tawh hle ngei a; nimahsela, he khawvêl hma lam hi han thlîr ila, tûna kan inawp dân leh ro kan rêl dânahte hian remna leh muanna, him tlânna leh hmuingîlna a lo thlen zêl beisei ngam kan awm meuh em?”
“Chutichuan, indo thu leh indo thuthang in la hria ang. . . . Hnam hrang leh hnam hrang an indo ang a, ram hrang leh ram hrang an indo bawk ang. Tin, hmun hrang hrangah tâmte a tla ang a, hrite lêngin lîrte pawh a nghîng bawk dâwn a ni” (Mat. 24:6, 7, NKJV) tiin Isua’n a lo sawi a. Hetiang hian vaukhânna thu hmu tho mah ila, eng tin nge a lo thlen hmaa lo hrilh sa kan ni tih kan hriatna atang hian thlamuanna kan lo neih theih ang?
Thawhlehni April 29
Daniela bung 7
Daniela bung 2-a kan hmuh mumang hi Babulon lal hnênah pêk hmasak phawt a ni a. Chutih lâiin, Daniela bung 7-a inlârna erawh hi chu Pathian thuthlung kawltu hnama mi Hebrai zâwlnei hnêna pêk a ni ve thung.
Daniela hnênah hian Nebukadnezzara hnênah pawh lo pêk tawh chungchâng tho kha pêk ve leh a ni a. Mahse, ani hnênah hi chuan milim ni lovin, tuipui ropui tak chunga lo tleh thlipuiin tuipui atanga a rawn len chhuah ram hrang hrang entîrtu ramsa pali hmuhtîr a ni ve thung. Hêng ram pali-te hi thuneihna inchuha indo tawn theuh thîn niin, a chungnung ber nihna dinhmun pawh a inchan chhâwk zak zak thîn a. Sam 65:5–8; Isaia 17:12, 13; leh Jeremia 46:7, 8 te pawh hian hnam hrang hrangte zînga inbeih tawnna awm thu sawina atân “tui lian” tih leh “tui fawn” tih tawngkamte an lo hmang ve chiah bawk.
Hetih lâi hian, Ram Tiam erawh chu Jentail ram hrang hrangte’n an hual vêl kârah thliarkâr râlmuang leh him tak niin hun eng emaw ti chhûng chu a lo ding tawh a. Pathian sawrkârna lungphûm nghet taka din hnam thianghlim niin, a chheh vêla awm hnam luhlul tak takte nên chuan inang lo tak a ni.
Daniela 7:1–3 chhiar la. Hetah hian thil thleng chi hrang hrang kan hmu a. He tehkhin thu, entîr nân, tuipui atanga lo chhuak sakawlh tih atang hian eng zirlâite nge zir chhuah theih kan neih?
__________________________________________________
_________________________________________________
Daniela hian tuipui kama dingin, Jentail ram hrang hrangte an indo tawn lâi chu a thlîr a, chutih lâi tak chuan tuipui ata ramsa mak tak tak lo chhuakin, chûng ramsate chu amah Daniela leh a chipuite awmna ramah an lo lût a. Jentail hnamte buaina chu Juda mite buaina pawh a lo ni ve ta a ni. Juda mite khân Jentail-te anga awm ve an thlang a; chuvângin, tûnah chuan Jentail-te nên (an hnuaiah) an awm tlâng dâwn ta. A hmasa berin, Babulon sawrkâr hnuaiah an awm phawt ang a, tûn hma zawnga an lo neih thin mahnia inrêlbâwlna tluantling ang kha kum tam tak chhûng chu an nei thei tawh rih dâwn lo va ni.
Pathian mite’n an nuna thu neihna an nei thin an chân tâk pawh hi tâwpna hun, Krista’n kan Lal a nihna anga a dinhmun dik tak a rawn luah leh hun a thlen hma chuan an nei lêt leh tawh rih dâwn lo va. Thuthlung Thar lehkhabute kan chhiar chuan, Pathian mite khân Rom sawrkâr hnuaiah leh Rom sawrkâr dinhmun rawn luahtu ki te tak tê hnuaiah tihduhdahna nasa tak an lo tuar tawh thîn a ni tih kan hria ang.
Ram thenkhatte kha chu ram dangte âia tha zâwk deuh niin, hun eng emaw ti lâite kha chu hun dangte âia muanawm deuh zâwk pawh ni tho mah se, hun kal taa hnam tam zâwk, mi tam zâwk leh lalram tam zâwk daihte kha an nunrâwng êm êm hlawm a, hnam dangte rah beh chîng tak tak vek an ni. Tin, khâng thilte kha anmahni hnamte tâna tha ber tûr zêl chauh tih tum lalte hnuaia thleng a ni tlângpui bawk a. Pathianin a mite tâna a thlan, nei se tia duhsak êm êm rorêlna nên chuan a inang lo hle a ni.
Eng tiangin nge Rom 3:10–19 thu hian kan khawvêl dinhmun dik tak a lo sawi? A bîk takin, châng 19 hian eng tiangin nge kan nunin chanchin tha an mamawh êm êm chhan a târ lan?
Nilaini April 30
Lei leh tuifinriat inkârah
Bible-in, a bîk takin hrilhlâwknaa “lei”/“khawmual” tih leh “tuifinriat”/“tuipui” tih a hman dân hi hriatthiam a tûl khawp mai. Hêng entîrna a hman pahnih, lei tih leh tuifinriat tihte thil inang lo, inkâwlkalh tlat a ni.
“Bible hrilhlâwknain entîrna atâna ‘lei’ tih leh ‘tuifinriat’ tihte a sawi kawp rêng rêng hian, lei tih chuan mumal taka inrêlbâwlna awm tawh ram emaw, Israel ram emaw a entîr tlângpui a, chutih lâiin, tuifinriat tih erawh chuan khawmual ti mintu tuifinriat ang deuha Israel ram ti râltitu Jentail ramte a entîr ve thung thin.”—Beatrice S. Neall, “Sealed Saints and the Tribulation,” in Symposium on Revelation, Book 1, ed. Frank B. Holbrook, (Silver Spring, MD: Biblical Research Institute, General Conference of Seventh-day Adventists, 1992), p. 260.
Chutiang chuan, lei tih chu hmun nghet, Pathian sawrkâr innghahna lungphûma din ram ralmuang sawina a ni a; tuifinriat tih erawh chu mihringte’n an chapona atanga an din ram buai leh nghet lo sawina a ni ve thung.
A chunga kan sawi tâk khi rilrua hre reng chungin Thupuan 12:15, 16 leh Thupuan 13:1, 11 chhiar la. “Lei” tih leh “tuifinriat” tihte dah dun a nih dân hi lo chîk deuh bîk ang che. Eng tiangin nge hêng tawngkam pahnihte hi hman a niha, hman a nih dânin hrilhlâwkna hriatthiam kawnga mi a puih dân chu eng nge ni?
_________________________________________________
___________________________________________________
Drakon hian hmeichhia (kohhran) tihduhdahna atâna tui a hmang a ni tih hi lo chhinchhiah ila. Kan sawi tawh ang khân, hrilhlâwknaah chuan “tui” tih hian khawvêl sawrkârte entîr thînin, chûng sawrkârte chu lalna inchuh avânga buai leh inbei tawn rêng an ni tlângpui bawk. Heta tang hian Setana’n Pathian mite tihduhdahna atâna an hotute leh lalte’n an fuihpawrh mipuite a lo hman thin dân kan hmu thei âwm e.
Tin, keini Seventh-day Adventist-te chuan Thupuan 12:16 thu hi tihduhdah tuar ringtute America rama an pêm luh thu sawina niin kan ngâi bawk a. Lei tih leh tuifinriat tihte’n a entîr nia kan ngaih hi a dik a nih chuan, America ram din a lo nih tâkna nên khuan inzawmna a nei em?
“Lei” tih hi Pathian mite tâna ruat ram râlmuang leh nghet “Ram Tiam” ang deuhah khân kan ngâi ve thei ang em? Hei tak hi lei atanga lo chhuak sakawlh kha berâm anga a rawn inlan phawt chhan a ni thei ang em? America ram khu, a dintu hmasate zînga thenkhatte’n sawi deuh hrâm a tum anga “Israel Thar” chu ni ngâi miah lo mah se, kum tam tak chhûng chu sakhaw zalênna ram a lo ni tawh a, ram hrang hrang atangin sakhuana avânga tihduhdahna tuar mi maktaduai tam tak an lo tlân lût tawh a ni.
Nimahsela, he berâmno ang tak sakawlh hi eng tikah emaw chuan “drakon tawng angin” a la tawng dâwn tlat mai (Thup. 13:11)!. United States of America, sakhuana avânga tihduhdah tuarte lo tuam hlâwmtu ngei mai khu sakhuana avânga mite ti duhdahtu a la ni dâwn a. Hei pawh hi mihringte’n Pathian thu hnuaia awm âia anmahni thu-a awm zâwk an thlan chiaha thil lo thlen thîn ti langtu dang leh a ni.
Ningani May 1
Thu chu hril nawn leh rawh
A la bâng kohhran hi “Khawvêl Tharah” (“Khawvêl Thar” tih hi America ram sawina a ni) khuan, kum zabi sâwm leh pasarihna leh zabi sâwm leh pariatna lâia sakhaw zalênna beiseite’n America ram an pan khâwm ruih ruih lâi vêl khân a lo piang a. Ram danga sakhaw dodâlna leh politics thila buaina nasa tak thleng thînte ngaihtuah kha chuan, he kohhran lo piang hlim hi ram thar, United States of America lo ni taa a than chak angin ram dangah erawh a than chak ve rin a harsa hle.
A la bâng kohhran a lo pian thu sawina Thupuan 10:1–11 hi chhiar la. Kan thil zir tawh thenkhat, entîr nân, “hnamte” tih te, “lei” tih te leh “tuifinriat” tih te’n a entîr kha rilru-ah hre reng ang che. He lâi thu atangin, a sawi tum ni miah lo sawitîr palh theih a ni tih hre chungin, eng chungchâng nge i hmuh?
____________________________________________________
____________________________________________________
He vântirhkoh hi, Thupuan bung 14-a kan hmuh vântirhkoh pathumte ang leh, Thupuan bung 18-a kan hmuh vântirhkoh ang deuh khân ring takin a au va. Hei hi khawvêl chanchina hun hmanhmawhthlâk lâi, “mi tam tak te, hnam tam tak te, tawng tam tak te, lal tam tak te” (Thup. 10:11) chungchâng thu hril tûra a la bâng kohhran din a nih lâi vêl a ni.
Tin, “lehkhabu te tak tê” a keng bawk a—a ken hi Daniela lehkhabu a ni maithei (Dan. 12:4 en la)—chu lehkhabu chu chhuan tam tak ral hnu-ah a vawi khat nân keu leh a ni ta. A ke pakhat chuan tuifinriat a rap a, tin, a ke lehlam chuan khawmual a rap ve thung. Hetianga ding nia sawi a nih chhan hi a thuchah puan chuan khawvêl pum pui, Khawvêl Thar (America) leh Khawvêl Hlui (Europe, Asia, etc.) a tuam vek dâwn a ni tih a entîr vâng a nih a rinawm a. A nih loh pawhin, he thuchah hi hnam zawng zawng: khawmuala (Juda-te rama) chêngte leh tuipuia (Jentail-te rama) chêngte tân a nih vâng a ni maithei bawk.
Khawvêl hi, eng tikah emaw chuan Pathian ropuinaa chhun ên chhuah vek a la ni dâwn a, Thupuan bung 14-a kan hmuh vaukhânna thuchah hnuhnûng hi mi zawng zawng hnênah hriattîr a la ni ang. Hmânlâi Israel-te ang khân kohhran kan nihna anga kan tih tûr chu “hnam zawng zawng hriattîrna tûra khawvêl zawng zawnga” chanchin tha hril a ni a; chumi kan tih zawh hunah chuan “tâwpna chu a lo thleng” tawh ang (Mat. 24:14).
Pathian chuan mihringte chanchin hi a tâwp khârna ropui tak lam pan tûrin a khalh mêk zêl a, mihringte lalram leh sawkârte hi la tâwp vêkin, chatuan atân Krista lalthutthlêng chu hûn chhuah a ni ang. Daniela 2:34, 35, 44, 45 chhiar la. Bible hian ngaih sual palh awm thei miah lo tûr khawpa chiangin a lo sawi a, hêng khawvêl lalram leh sawkârte hi tih tâwp vek a la ni dâwn a, an sûlhnu leh an thil lo tih khawloh tawh zawng zawngte pawh nuai reh vek a ni ang. An âiah Pathian chatuan lalram chu tun din a ni ang a, chu lalramah chuan sual leh tawrhna te, natna leh thil tha lo rêng rêng te, thihna te pawh a awm leh thei ngâi dâwn tawh lo va ni.
Daniela bung 2 leh 7-a hrilhlâwkna kan hmuhte hian dik tak maia hêng lalram ropui tak takte lo din chhuah tûr thu leh an tlûk chhiat tûr thu a lo sawi dân hi ngun takin chhiar la. Hetiang taka dika a lo hrilhlâwk hian—Daniela’n a lo ziah hun lâi kha ngaihtuah phei chuan a mak leh zual—Pathianin a chatuan lalram a la din tûr thu a sawi hi ring ngam tûrin min tanpui em?
Zirtawpni May 2
Zir belhna: Ellen G. White-i lehkhabu, Thlahtubulte leh Zâwlneite bung 10, “Babel In Sâng” (phêk 99–105) chhiar ni se.
“Vân thar leh lei thar ka hmu a: vân hmasa leh lei hmasa kha chu a boral tawh (Thupuan 21:1). Mi suaksualte kâng raltu mei chuan lei hi a kâng thianghlim ta a. Sual ânchhe sûlhnu zawng zawng pawh phiah fâi lêng a ni ta bawk. Tlan tawhte hmaah chuan sual nghawng râpthlâk tak ti lang rengtu tûr chatuana alh reng hremhmun awzâwng a awm lo.
Hriat reng tûr pakhat erawh a awm a: kan Tlantu chuan khehbeh a nih avânga ser a neihte chu chatuanin a pu reng tawh ang tih hi. A lu, a nâk leh a kut leh a kete-a ser awmte chu sual hnathawh râpthlâk sûlhnu hmuh theih awm chhun a ni. Zâwlnei Habakuka khân Krista chu a ropuina nêna a han hmu chu heti hian a sawi a: ‘A nâk atang leh a kut atangin êng zâm a lo chhuak a, chutah chuan thiltihtheihna inthupin a awm’ (Habakuka 3:4). Feia an chhunna a nâk atang chuan Pathian leh mihringte inremtîr lehtu thisen a lo luang chhuak a—chutah chuan Chhandamtu ropuina, ‘a thiltihtheihna inthup’ chu a awm. Mihringte tlan nâna amah a inpêkna azârah ‘chhandam tûra mi chak’ niin, Pathian khawngaihna ngâinêptute chungah rorêlna a thlentîr thei ta a ni. Tin, a inphah hniamnate kha châwimâwina sâng ber chantîrtu a ni a; chatuan chatuan thleng pawhin Kalvari-a hliam a lo tawrhte khân amah fakna leh a thiltihtheihna a puang zêl tawh ang.”—Ellen G. White, Indona Ropui, p. 674.
Sawi ho tûrte:
1. Khawvêl tâwp hunah chuan leia hlawhtlinna kan chan zawng zawngte hi—eng anga lian tham, eng anga ropui, eng anga mak pawh ni se—vaivutah, meivâpah la chang vekin, kumkhuaa lang leh ngâi tawh lo tûra nuai reh a ni ang. Chutiang chu a ni dâwn tih hriat reng hi enga ti nge a pawimawh êm em? Chumi hriatna chuan ngaih pawimawh tûr dik hrethiam tûrin a tanpui che em?
2. Thupuan 13:1–10-a kan hmuh tuifinriat atanga lo chhuak sakawlh chanchin hi ngun takin chhiar la. Eng tiang kawngtein nge he sakawlh hi Babel in sâng satute nên an rilru put hmang a inan? A rilru puthmang hi “hnam” tinrêng—Babulon atanga ki te tak tê thlenga mihringte’n an lo put thin tho kha a ni a. Lalram hrang hrangte khân rilru puthmang thuhmun an neih chu eng nge ni? Eng tiang kawngtein nge khawvêl hian, entîr nân, Babulon emaw, Rom emaw ngaih hlut zâwng thil angte kha a la ngaih hlut ve reng tho?
3. Adventist-te hian Lalpa hnung zui leh kan chênna ram dânte zawm hi eng tin nge inbûk tâwk takin kan kal kawptîr theih ang? Pakhat zâwk thu kan zawm avânga pakhat dang thu kan zawm loh hian eng thil nge lo thleng thîn?