2025 2nd Quarter Puitling Zirlai-6-na
Zirlâi 6 May 3–9
Krista Inthâwina Siam Kha Hrethiamin
Sabbath Chawhnu
Chhiar tûrte: Isaia 1:2–15, Heb. 10:3–10, Exod. 12:1–11, 1 Kor. 5:7, Haggaia 2:7–9, Isaia 6:1–5, Thup. 4:7–11.
Chângvawn: “Tin, ‘Nang, lehkhabu chu laa, a chhinchhiahnate phelh tlâk i ni e; talhin i awm tawh a, chi tina mite, tawng tina mi te, mi tina mi te, hnam tina mi te Pathian tân i thisenin i lei tawh si a’ tiin hla thar an sa a” (Thupuan 5:9).
Baptistu Johana khân, amah pana Isua lo kal chu, “En teh u, Pathian Berâmno, khawvêl sual kal bopuitu tûr saw” (Joh 1:29, NKJV) tiin a puang a nih kha. He lâi thu hian hai rual lohin ran hmanga inthâwina chungchâng a sawi a ni tih a hriat theih a, khâng inthâwinate kha mihring zawng zawngte âiawha Krista thihna entîrna vek a ni.
Bible-ah hian, ran hmanga an inthâwi thin thu kan hmu tam hle a, phêk tin deuh thaw-ah thâi lan niin, Pathian lalthutphah hûnna pindana Johana hruai luh a nih thu sawina Thupuan bu-ah phei hi chuan thupui pawimawh tak a ni nghe nghe (Thupuan 4 leh 5). Hemi tum hian Isua chu berâmno talh tawh hnu angin a lo lang a (Thup. 5:6), chu tak chu Thupuan bung 4 leh 5 te’n a sawi hrilhlâwkna pum pui hriat thiamna atâna a chabi a ni.
Tûn kârah hian lalthutphah hûnna pindan chhûnga langsâr ber, Berâmno talh tawh hnu Isua chanchin min hriat chiantîrtu inthâwina thupui thenkhatte kan zir ho dâwn a. Tu ma phelh theih loh lehkhabu chhinchhiahna/chârna chu phelh tlâk nia pawm niin, chutianga tling bîk a nihna chuan inthâwina kal tlanga Pathianin hna a thawhte awmzia chu chiang takin min hriattîr ta a ni. Tin, hmangaihna tâwp nei lo Pathian, inthâwina famkim siamtu a nihzia pawh a puang bawk a, a thil tihte chu keini mihringte mai ni lovin, khawvêl danga mihring awmte pawhin kumkhaw tlaitluana mak an tih tûr a ni.
Sunday May 4
Inthâwina sawngsawhlawt lo maw?
A châng hi chuan thil inang lo, inkalh tlat pahnihte han khâikhin vêl hi a bengvârthlâkin, an nihna dik tak hriat thiam pawh a awlsam phah sawt thîn a. Bible-a kan hmuh inthâwina nihphung pawh hi Pathianin a pawmsak loh a mite inthâwinate chanchin kan zir atangin kan hre fiah thei ang.
Isaia 1:2–15 hi Isaia 56:6, 7 leh Sam 51:17 te nên khâikhin la. Hêngahte hian inthâwina chungchânga kan hriat tûr pawimawh tak tak eng nge awm?
_________________________________________________
___________________________________________________
Hemi tuma thil thleng lungchhiatthlâk tak mai hi Pathianin inthâwina a pawm loh vawi khatna a ni a lo. Hetiang deuh hi chhandamna chanchina a tîr lam, Pathianin Abela inthâwina a pawm lâia Kaina inthâwina erawh a pawm ve loh tum pawh khân a lo thleng tawh a. Khami tuma thil thleng khân Pathianin a pawm inthâwina leh a pawm loh inthâwina khâikhin theihna remchâng tha tak min lo pe a ni (Gen. 4:3–7 leh Heb. 11:4 en la.)
Isaia hun lâia Israel mite khân Pathian lâwm zâwng thilte chu tih tum sa teh thîn mah se, anmahni duh dân ang angin an nung lawi bawk si a. Chuvâng chuan, an inthâwinate pawh kha Kaina inthâwina ang tho, Pathian hnêna inpêkna leh intûk luhna rilru nêna tih ni lo, anmahni hma an sial avânga an tih mai mai zâwk a ni.
Chutiang rilru, mahni tling tâwka inngaihna tho chu he khawvêla lalramte chawk thotu pawh a ni a. Kaina khân ama duh dâna nung reng chung siin, Pathian hnênah ama phal chin a pe satliah ve ringawt a nih kha. Pathian chu thawhpui harsa, ama duh dân anga a nun theihna tûr kawng dâltu angin a hmu niin a hriat a; chutih rual chuan, ama ngaihdân anga kal tlang erawh a ngam chuang bawk si lo.
Abela erawh kha chuan Pathianin a ngen tak, Pathianin a lo tiam tawh Messia lo kalna entîrtu berâmno a hlân a (Gen. 3:15), kha a thil hlan khân Kalvari-a Krista’n chhandamna hna a la thawh tûr chu a lo târ lang a ni.
“Abela khân tlanna thu ropui tak chu a hrethiam a. Mi sual a ni tih inhriain, sual leh a man thihna chu amah leh Pathian inzawmna tûr dâltu a ni tih a hrethiam vek bawk. Bawhchhiata awm dânin a phût chu a hriat avângin inthâwina atâna hlan tûr chu a rawn keng a. A inthâwina ran thisen chhuak hmang khân Kalvari krawsa Isua lo la thihna tûr chu a lo thlîr lâwk daih tawh a ni. Chumi hmuna tlanna siam tûr chu a lo ring tawh a, mi fel a ni tih hriattîrtu neiin, a inthâwina chu pawm a ni ta a ni.”—Ellen G. White, Thalhtubulte leh Zâwlneite, p. 52.
“Dân ang maia thil tihna” laka invên tlat hi eng tiang taka pawimawh nge a nih? Krista thihnaa innghah tawp mai hi chhandam nihna atâna kan beisei theih awm chhun a nih tih hi eng tin nge a takin kan chan theuh theih ang?
Thawtanni May 5
Bâwngpate leh kêlte thisen
Mi thenkhat chuan inthâwina hlan hi thil tha lo tak niin an ngâi a—a nunrâwnthlâk a, a mahni hmasialthlâk a, tin, mahni tawrh âi ran pawi sawi lo tawrhtîr daih chu a dik lo hrim hrim niin an sawi bawk. Ni e, a dik lo rêng alâwm. Krista thihna kha a râwng a, a hrehawm a, tin, a tawrh tûr ni miah lo a ni bawk—sualna nei miah lo ni chungin mi sualte tân a thi ta si a. Mahse, kha kha sual avânga harsatna lo thleng chin felna tûra thil tih ngei tûl a ni bawk si a. Chuvângin, hêng inthâwina râwng tak leh hmuh hrehawm tak tak, dik lo êm êm nia lang ni bawk site hi Krista lo la thihna tûr entîrtu vek a ni.
Hebrai 10:3–10 chhiar la. He lâi thu hian Thuthlung Hluia Pathian mite’n inthâwina an hlan thin dân eng nge min hrilh? An inthâwina hlante khân a chhandam thei chuang lo a nih chuan, enga ti nge an hlan tho bawk si?
____________________________________________________
_________________________________________________
Berâmnote leh inthâwina atâna an hman ran dangte kha mihringte tlanna atâna lo la thi tûr Pathian Berâmno entîrtu chhinchhiahna mai an ni a. Rinna thil tih niin, mi sualte’n lo la kal tûr Messia hnathawha rinna an nghahzia hmuh theiha an tih lanna a ni. Hêng entîrnate hi a tak-ina rawn hlen chhuah tâk hlimthla rawngbâwlna tiin kan sawi mai thîn a. Mi thenkhat chuan hêng hrilhlâwknate hi krawsa Isua lo la thih tûr thu entîrtu “hrilhlâwkna tênau” ti pawhin an sawi thîn bawk.
Inthâwina nêna inzawm serh leh sâng thil chi hrang hrangte hi, khawiah emaw kan kal nikhuaa kan chuanna motor chuan man kan pêk thin ang deuh hi a ni âwm e. Rêl ticket emaw, bus ticket emaw, thlawhtheihna ticket emaw i lei a; mahse, i lei zawh rual rualin i zin chhuak zui nghâl mai ngâi lo. Ticket emaw, boarding pass emaw pêk i ni phawt a: chu chu i zin chhuak ngei dâwn a ni tih ti chiangtu a ni. Mahse, chu lehkha themah chuan thu ta ngawt mai la, khawi hmun mah i thleng lo vang. I chuanna tûr bus emaw, rêl emaw, thlawhtheihna emawa i han luh chiah khân i zin kawng i zawh tan ta chiah tihna a ni a, pawisa i pêk chhan tak chu i dawn tâk avângin lehkha them hmanga siam ticket kha chu i kawl reng a tûl ta lo.
Chutiang chu inthâwina atâna an talh rante pawh kha a ni a. Tih tûr pawimawh tak chu an nei thîn ngei mai a; mahse, inthâwina tak siam a nih tâkah kha chuan awmze nei lo mai an lo ni ta. An pawimawh zui tâk lohzia chu Isua hnuk chah ruala lei biak bûk puanzâr, Hmun Thianghlim leh Hmun Thianghlim Ber dâidangtu lo thlêr ta vek khân a ti lang chiang a. “Tin, Pathian biak in puanzâr chu, a chung lam atangin a hnuai lam thlengin a lo thlêr chhuak” ta a nih kha (Marka 15:38). Inthâwina thil tih zawng zawng, temple rawngbâwlnate leh thil dangte pawh khân krawsa Isua thihna an entîr vek a. Isua’n krawsa a thutiam a hlen chhuaha, thihna hneha a lo thawh leh chiah khân hlimthla rawngbâwlnate chu tih chhunzawm zêl a tûl ta lo va ni.
Sual sualzia leh, a man pawh Thu tisaa lo chang Isua thihna chauhin a tlâk thei a ni tih hi ngaihtuah la (Joh. 1:1–3, 14 en rawh). Hei hian sual chungchânga kan rilru put dân tûr eng nge min hrilh?
__________________________________________________
Thawhlehni May 6
Kalhlên Kût Berâmno chu
Thupuan bu hian Isua chu “Berâmno” tiin vawi sawmthum dâwn a sawi a. Tlanna ruahmana a tîr lamah khân Pathian mite chuan Messia lo kal tûr entîrtu atân berâmno an lo hmang thîn a. Abela khân “a berâm rual zînga a piang hmasa ber” chu a hlân a (Gen. 4:4, NKJV); tin, Israel mite pawh ram tiam lam pan tûra Aigupta ram an chhuahsan hma khân a fate zînga piang hmasa ber emaw, an ran piang hmasa ber emaw chu berâmno kum khata upaa tlan chhuak theuh tûra hrilh an ni bawk (Exod. 12:5).
Exodus 12:1–11; Isaia 53:7, 8; 1 Korinth 5:7; leh Thupuan 5:6 chhiar la. Hêng Bible chângte hian eng tin nge Isua hi Kalhlên Kût inthâwina Berâmno a nih dân an sawi? Chu chu keini tân hian eng nge a pawimawhna awm?
_________________________________________________
__________________________________________________
Isua Krista a thiha, a thawh leha, vâna a chhoh tâk hnu kum eng emaw zât liam taah khân heti hian Petera chuan a lo ziak a: “In thlahtute pêk chhâwn, in awm dân eng khaw lawi lo lak ata chu thil chhe thei, tangkarua leh rangkachaka tlan in ni lo va, berâmno hmêlhem lo leh bawlhhlawh kâi lo thisen anga Krista thisen hlu chuan tlan in ni zâwk tih in hre si a” (1 Pet. 1:18, 19).
Isua kha mihring anga lo piangin Pathian thianghlimnain a phût ang tak chu a nun chhuahpui a; keini mihringte hi chu thil sual ti vek tawh niin, kan nun dân sual tak hian kan Siamtu nihphung pawh dik lo takin a lantîr ta thîn rêng a ni.
Isua erawh kha chu “Adama hnuhnûng ber” a lo ni ta a (1 Kor. 15:45). Keini kan lo hlawhchham tawhnaah khân ani chuan sawisêl bo khawpa thain a nun a hmang a ni. A mihrinnaah khân mihringte kan nihna tûr zawng zawng chu a awm kim vek a. Amahah khân Pathian ropuina chu a famkima târ lanin a awm bawk. Chutiang chu a nih avângin, Philipa hnênah pawh khân, “Keimah hi mi hmu a nih chuan, Pa chu i hmu tawh reng a ni” (Johana 14:9, CEV) tiin a hrilh rêng a ni.
Isua kha Kalhlên Kût lâia khenbeh a, Kalhlên Kût ni khera khenbeh a ni khân inthâwinate’n an entîr Berâmno tak chu amah hi a nihzia a ti lang chiang hle. Johana 18:19, 20-ah chuan Isua’n “vântlâng hriata” a thu zirtîr a sawi thin thu a sawi a. Hetiang deuh chiah hian hmânlâi Israel fate pawh kha Kalhhlên Kûta talh tûr berâmno chu uluk taka thlanga, inthâwina hlan ni a thlen hma zawng chu ni tin mi zawng zawng hmuh theiha pho chhuak thîn tûrin hrilh an lo ni bawk (Exod. 12:5, 6). Puithiam lalberin a thu zirtîr chungchâng a zawh khân amah ngei chu Pathian biak inah kala, mi zawng zawng hriat theih tûra a zirtîr thin thu a sawi a. A nun, a thil tih leh a thu zirtîr te khân tu nge a nih tih chiang takin an puang chhuak a ni. Hmêlhemna lâi eng mah nei lo Berâmno thianghlim a ni a, chu chu Pathian felna leh ropuina târ langtu famkim a nihna pawh a ni bawk.
Keimahni nun theuha Isua nungchang kan târ lan theih dân tûr kawng tha zâwkte chu eng nge ni?
Nilaini May 7
Pathian biak inah Isua a kal
Chhandamna chanchinah hian harsatna eng eng emaw a thleng ve fo va. Pathian chuan amah nêna inbiak pawhna kan lo neih tawh thin ang kha thar thawh leha, kan bula rawn chên ve leh a châk êm êm a ni. Nimahsela, a awmnaa mi sualte awmtîr ve lah chu an boral phahna tûr a ni bawk si a. Hei vâng hi a ni ang, Davida pawhin, “Suahsualnaa lâwm thîn Pathian i ni si lo va; mi sual chu i hnên an thleng lo vang” (Sam 5:4) tia a lo ziah ni. Chutih lâi chuan, Davida vêk hian, “Kei erawh chu, i ngilneihna nasa tak avângin i inah ka lo lût ang a; tih chung chein i biak in thianghlim lam hawiin chibai ka bûk thîn ang che” (Sam 5:7) tiin a lo ziak tho bawk.
Haggaia 2:7–9 chhiar la. Pathian biak in hnuhnûng zâwk sak a nih lâi khân zâwlnei Haggaia chuan Pathian biak in thar chu a hmasa zâwk âia ropui tûr a nih thu a lo sawi a. He a hrilhlâwkna hi eng nge ni a awmzia?
__________________________________________________
____________________________________________________
Solomona’n Pathian biak in hmasa zâwk a hlan tum khân Shekinah ropuina—Israel fate’n Kanaan ram an pan lâia anmahni hruaitu Pathian awmpuina—chu biak in chhûngah a lo khat ta mup a; chumi avâng chuan puithiamte pawhin an rawngbâwlna khawih mêk chu a chawlhsan rih a tûl hial nghe nghe (1 Lalte 8:10, 11). Temple hnuhnûng zâwk an hlan tumah erawh hi chuan Pathian lalthutphah entîrtu thuthlunna bâwm ber kha Jeremia’n a lo thuhrûk daih avângin hmuh tûr a awm ve ta lo va; a taka Pathian awmpuina chuan biak in a rawn luah khat ve ta lo. Hemi avâng hian an lunghnûr hle rêng a. Haggaia’n a lo sawi tawh kha eng tin nge a lo thlen tâk ang?
He biak in hnuhnûng zâwkah hian mihringa lo chang Pathian Isua chu mihring tisa leh thisen ang pu-in a lo lang ta thung a. Amah Pathian ngei chu keimahni ang lo ni ve tûr leh, he khawvêl sual taka lo chêng ve tûrin puanzâr phên ata a lo pên chhuak ta a ni. Pathian Fapa chu mihring Fapa a lo nih tâk avângin a hmêl an lo hmu thei ta a, a âw ri an lo hre thei ta a, a kut ngeia phâr a khawiha a lo thianghlim ta te chu anmahni ngeiin an hmu bawk (Mat. 8:3). Pathian chuan amah hnaih tûrin a lamah mi a hruai a ni lo va, amah hian mi a rawn hnaih theih nân min rawn pan zâwk a ni. Amah ngei chu kan hnênah tisa pu-ina rawn chhuk ta a. Heti hian Bible chuan Isua chungchâng hi a lo sawi: “Ngâi teh, nula thianghlim chu a râi ang a, Fapa a hring ang a, a hmingah Emmanuela an sa ang” tiin. Heti lâia “Emmanuela” tih hi “kan hnêna awm Pathian” tia lehlin thin a ni (Mat. 1:23). “Kan hnêna awm Pathian” tih chu eng nge ni a awmzia? Lei leh vân leh a chhûnga thil awm zawng zawngte siamtu chu kan zînga lo chêng ve tûrin a rawn inphah hniam a ni mai lo va, kan tâna thi tûr pawhin a lo kal bawk a ni.
Kraws hi Pathian hmangaihna târ lanna ropui leh chiang ber a ni a. Pathian hmangaihna kan hmuh leh chan theih nân hian kraws ni lo thil dang eng engte nge awm?
Ningani May 8
Eng kim i siam si a!
Zâwlneite zînga thenkhat kha inlârna an hmuh lâia Pathian bul hnâi taka awmtîr an nih tum a awm zauh zauh a, chutih lâi chuan Pathian lalthutphah pawh an han hmu thîn a ni âwm e. Ezekiela khân vân dum chunga awm niin a hmu a (Ezek. 1:26); Isaia khân Pathian lalthutphah hmu tûra vâna awm Pathian biak in a han tlawh thu a sawi a (Isaia 6:1), tin, Thupuan bu ziaktu Johana khân chiangkuang deuh takin Pathian lalthutphah a hmuh thu a sawi bawk (Thupuan 4 leh 5). Thuthlung Hlui hunlâia biak bûk rawngbâwlnate khân mihringte’n Pathian hnên an thlen theihna kawng pakhat chauh a awm tih an entîr a a, chu chu Isua Krista thisen chhuak kha a ni (entîr nân, Lev. 16:2, 14 chhiar ang che.)
Isaia 6:1–5 leh Thupuan 4:7–11 chhiar la. Hêng inlârna pahnihahte hian eng thilte nge inang awm? Thil thlengte hi a thlen dân indawtin lo chhinchhiah la: Eng thil nge an sawi lan hmasak ber? Chumi zawhah chuan eng nge lo thleng? Hêng inlârna pahnihahte hian Pathian chungchâng eng nge uar taka sawi lan awm?
Hêng lalthutphah hûnna pindan an hmuh thu sawina pahnihahte hian thil lo lang hmasa ber ni ve ve chu vân mite’n Pathian thianghlimzia a puan thu a ni a. Isaia’n a hmuh phei hi chu a ropui hle: Pathian biak in chu meikhu-in a khat vek a, seraf-te’n Pathian thianghlimzia an puan lâi te chuan a “kawngka bul lungphûmte” lamin a nghîng dur dur mai a ni âwm e. Johana hmuh inlârnaah pawh hian cherub-te chu “A thianghlim e, a thianghlim e, a thianghlim e” ti bawkin an au va (cherub tia sawi thil nungte hi eng ang nge an nih hre tûrin Ezekiela 10:14, 15 chhiar ang che). Chutiang chuan, zâwlnei Isaia leh Johana te hi Pathian ropuina êng mâwi tak chu hmuhtîr an ni ve ve a ni.
Hêng zâwlnei pahnihte’n Pathian ropuina an hmuha an awm dân pawh hrilh kan ni bawk. Isaia hian hmûi bawlhhlawh pu mite zînga mi a nih avânga a chung a pik thu a sawi a (Isaia 6:5), Johana pawh hi lehkhabu zial hawnga, a chhûng lam en tlâk tu mah an awm loh avângin a tap zawih zawih mai bawk a ni (Thup. 5:4). Ni e, Pathian thianghlimzia kan han hriat chian chiah hi chuan mihring dinhmun chhiatzia hriatna kan lo nei nghâl thuai thîn rêng a, kan dinhmun dik tak chu tlâktlâi lo tak, Chhandamtu Isua Krista mamawh êm êm a ni.
Setana hian dik lo tak takin Pathian a puh chhe nasa hle a, mahni thu duh, hmasial êm êm leh khirh tak niin a sawi thîn. Nimahsela, Isaia leh Johana te’n Pathian lalthutphah hûnna pindan chhûng an han hmuh zawk chhûng ringawt pawh hian Setana thil sawite chu dâwt mai a nihzia chiang takin a lang a. Krista chu a nihna dik tak, “talh tawh hnu Berâmno” (Thup. 5:12, NKJV) a nihna anga kan hmuh chiah hian Pa pawh a nihna ang takin kan lo hmu thei ta thîn a ni. Isua kan hmuh hian Pa hmu kan ni (Joh. 14:9) tih hriat hi a thlamuanthlâk êm êm a. Pathian chu eng ang mi nge a ni tih a lo lan chhuahna ropui ber pawh kan tâna Isua a thihna kha a ni.
Chutiang chu a nih avângin kraws khân thil pahnih min hriattîr a: pakhat chu Pathian hian min hmangaih êm avângin amah a rawn inhlân ta hial tih hi a ni a; pakhat dang chu, mi sual leh suala tlu tawh kan nih avângin kraws avâng chauhin chhandam kan lo ni thei tih hi a ni.
Zirtawpni May 9
Zir belhna: Bible hian Krista chu min chhandam tûra tling awm chhun a ni tih chiang takin a sawi a. A nun kha mihringte zînga sual kâi lo awm chhun, Pathian ropuinain a phût nun tha famkim lantîrna a ni. Pathian Berâmno hmêlhem lo leh sawisêl bo a ni a, tûnah hian chatuana kan himna a nihna angin mihring zawng zawng âiawhin a ding ta a ni. Amahah khân kan sualte chu a bel a, chumi avâng chuan Pathianin suahsualna a hremna pawh a lo tuar ta vek bawk. Johana chu Pathian lalthutphah hmaa vân mite an lo kal khâwm a hmuh khân a tap a, mahse upa zînga pakhat chu a hnênah lo kalin, “‘Sakeibaknei, Juda hnama mi’ . . . khân a hneh ta” tiin a rawn hrilh a nih kha” (Thup. 5:5).
Sual sualzia hi ngaihtuah la, tin, mihringte hi suala tlu tawh hnu kan nih chianzia pawh ngaihtuah bawk ang che. Amah Pathian Isua thihna chauhin sual avânga harsatna lo thleng ta hi a ching fel thei a ni tih i hrethiam em? Pathian hian a sawrkâr inkaihhruaina dân bawhchhe si lova mihringte min chhandam dân kawng dang neiin hria ni se chuan, chu kawng chu a zawh ngei ang tih a chiang a.
“Pathian dân bawhchhiatna chuan mi sual nunna a phût tlat a. A thil phût hi lei leh vân pum puiah hian mihringte âiawha pe thei pakhat chauh a awm. Pathian dân chu amah Pathian ang thova thianghlim a nih tlat avângin sual tlanna chu Pathian nêna intluk chauhin a siam thei a. Krista chauhin sual ânchhia lak ata mihringte tlan chhuak theiin, Pathian nên a inremtîr leh thei bawk. Krista chuan sual avânga inthiam lohna leh zahna chu a phur ta a—sual chu Pathian thianghlim tân a huatthlalâk êm avângin Pa leh a Fapa pawh a inthen hial a ngaih phah rêng a ni. Krista chuan sual hrênga tânte chhan chhuak tûrin lungngaihna khur thûk ber ber pawh a luh chhuah dâwn ta a ni.”—Ellen G. White, Thlahtubulte leh Zâwlneite, p. 42.
Sawi ho tûrte:
1. Johana khân lalthutphah hûnna pindana Berâmno lût lâi chu hmuin, chu Berâmno chu “talh” tawh hnu ni ngeiin a lang bawk. Thupuan 13:8 chuan, Isua hi leilung pian tirha lo “talh” tawh a nih thu min hrilh a. Tlanna ruahman hi, kan la mamawh hma hauh pawha a lo awm daih tawh a ni hian Pathianin mi a hmangaihzia eng tin nge a târ lan?
2. Pathian awm ring lotute chuan mihringte hi lei leh vân pum pui, ngainatawm loh zet ni lehnghâl bawk sia minung awm chhun kan ni tiin an sawi thîn a. Hetih lâi hian, Bible erawh chuan Pathian a awm tih a sawi mai bâkah, chu Pathian chuan mihringte hi a hmangaih êm êm a; anmahni tâna thi tûrin a lo kal hial nghe nghe a ni tih min hrilh thung. Pathian awm ring lotute ngaihdân leh keini ngaihdân hi eng tiang taka inang lo tûr nge a niha, mihringte dinhmun kan hriat dân pawh hi eng tiang taka inpersan tûr nge a nih bawk? Tawngkam danga sawi chuan, Krawsa Isua thihna khân eng tiang takin nge kan nunah leh kan thil tih eng kimah nghawng a neih ang?3. Enga ti nge Isua Krista nun, thihna leh thawhlehna kha mihringte chhandama kan awm theihna kawng awm chhun a nih? Pathian Fapa Isua meuh a thih tûl tâkna hian sual pawizia eng tin nge a târ lan?