2025 2nd Quarter Puitling Zirlai-7-na
Zirlâi 7 May 10–16
Hrilhlâwkna Innghahna Lungphûm
Sabbath Chawhnu
Chhiar tûrte: Isaia 6:6–8, Gen. 3:21–24, Ezek. 1:4–14, Thup. 4:1–11, Num. 2:3–25, Isaia 14:12–14.
Chângvawn: “Tin, ‘Tu nge ka tirh ang a, tu nge kan tân kal ang?’ tiin Lalpa aw chu ka hria a. Tichuan, keiin, “Kei heta hi ka awm, mi tîr ta che’ ka ti a” (Isaia 6:8, 9).
Pathian chu eng kim siamtu a nih avâng leh (Thup. 4:11), hmangaihnaa khat a nih avângin lei leh vân zawng zawng chunga rorêltu ni tlâk a ni a. Pathian nungchang, hmangaihna a nihzia kan lo hriat chiah hian Pathian ropui hmaa ding tlâk lo kan nihzia kan lo hrethiam thîn (Rom 3:23).
Tûn kârah hian lalthutphah hûnna pindan hmuh a nih thu kha kan zir chhunzawm leh dâwn a, chu bâkah chuan, mihringte leh Pathian inlaichîn tawn dân leh, Krista inthâwina siamin mi a dinthara, Pathian lalthutphah lama mi a hruai dân pawh kan ngaihtuah tel bawk ang. Pathian chuan a mi mal ang chauh pawh ni lovin, mihring zawng zawng hi mi din thar leh a tum hle a, mi a din thar leh a nih chuan thil siam dang zawng zawng hnênah a ropuina kan puang leh thei dâwn a ni. Bible hi ngun takin chhiar ila, Pathianin kan chunga mawhphurhna a nghah hi kan lo hriatthiama lâwm nachâng kan lo hriat phah theih bawkna tûr thu pawimawh tak tak kan hmu ang a, mi sual tlan tawh, kan sualte ngaihdamsak vek ni tawh kan nihzia pawh kan hrethiam bawk dâwn a ni.
Mihringte helna hi kumkhua atân a la tâwp nge nge dâwn a. Tin, chu âi pawha nghahhlelhawm zâwk chu, Pathian hmangaihna, mahni a inphatna leh kan tâna amah a lo inhlanna chu a tîra a lo ruahman dân ang âia chiang zâwkin a êng bawk ang. Pathian chuan mihringte hi suala tlu tûrin mi a siam lo hrim hrim a. Nimahsela, kraws kal tlang khân a hmangaihna chu mak leh ropui takin târ lan a lo ni ta hlauh zâwk a ni.
Sunday May 11
Kei heta hi ka awm, mi tîr ta che
Kum eng emaw zât kal ta khân kohhran pakhat chuan an biak in hnuai thawm thata, fellowship hall thar siam an rilrûk a. An thil tih hmasak ber chu a ti lang mâwi leh hmuh ti nuamtu atân electric bulb/tube êng tak tak vuah thluah a ni. Nimahsela, an han vuah chiah chu, a hma âi khân a lang mâwi lo ta zâwk mah a, a chhan pawh êng chuan thil nalh loh lâi, dik loh lâi a tih lan thin vâng a ni.
Isaia’n Pathian lalthutphah hûnna pindan chhûng a han hmu chu ropui a ti lutuk a, an tlin lohzia inhriain, “Hmûi bawlhhlawh pu mi ka niha, hmûi bawlhhlawh pu mite zînga awm ka nih avângin ka chung a va pik êm! Ka boral ta a nih hi; ka mitin Lal, Sipaihote Lalpa chu ka hmu ta si a” (Isaia 6:5) a ti chûl mai a ni. Keini pawh hi Pathian bula hruai ni ta thut ila, a awm ang hian kan awm ve ngei tho ang. Pathian êng chu kan chhuanlam neih zawng zawngte ti kiang vek tûr khawpa êng nasa a ni a. Pathian bulah chuan suala bo tawh kan ni tih inhriatna kan nei thîn. Isaia phei hi chuan a dam chhûng zawnga mak a tih reng tawh tûr thil a tawng a ni.
Isaia 6:6–8 chhiar la. Isaia hian thil sual tih chu boralna a ni tih a hre chiang a, a chhan pawh sual man chu thihna a nih miau vâng a ni. Nimahsela, Pathian chuan sual rahte tuar tlawk tlawk tawh mai tûrin min kalsan lo va, a hmangaihnain mi a rawn zawng hrâm hrâm zâwk thîn. Isaia’n Pathian a hmuh hnu hian eng thil nge lo thleng a, chu thil thleng chu enga ti nge a pawimawh êm êm?
_________________________________________________
____________________________________________________
Isaia hi seraf pakhatin mâichâm ata meiling rawn laa, chumia a kâ a rawn deh rual rualin a khawlohna lâk bosak nghâl a ni a. He mâichâm hi rimtui hâlna mâichâm, Pathian mite’n leh Pathian mite tâna tawngtâina an hlanna hmun a ni (Thup. 8:3, 4 en la). Tichuan, a sualte chu ngaihdam niin, Pathian hmaa ding tlâka ngaih a lo ni ta a—mahse, chu âia pawimawh zâwk chu, khawvêl hnêna Pathian âiawha ding tûra tirh a nih ta hi a ni.
Thil mak leh ngaihnawm angreng tak chu, “seraf” tih hi “alh”/“kâng” tihna a lo ni hi a ni a. Johana 5:35-a Isua’n Baptistu Johana rawngbâwlna a sawi dân hi i lo en teh ang: “Amah chu khâwnvâr alh tha tak leh êng tak a ni a, a êngah chuan eng emaw chen hlim rih pawh in duh bawk kha” (NKJV). Ni e, Johana kha keimahni ang bawka mi sual, khawngaihna leh chhandamna mamawh ve tho chu a ni ngei a; nimahsela, a rawngbâwlna khân khawngaihna leh chhandamna rawn thlentu tûr lam chu mi a kawhhmuh a ni.
Isua kha Pa ropuina âiawhtu tha famkim niin a lo kal a—tin, Pathian chuan vâna vântirhkohte’n (saraf-te’n) an thawh thin ang hna thawk tûrin zâwlnei, mi sual a rawn tîr bawk a ni.
Isaia hian a sualte tlen fâi a ni ta tih a hriat hnu-ah chauh, Kei heta hi ka awm, mi tîr ta che tih thu hi a sawi a. Eng tin nge keini, Isua thisena kan sualte tlen fâisak ni tawhte hian Isaia’n Pathian kohna a chhân ang hian kan chhân ve theih ang?
Thawtanni May 12
Cherub pahnih
Kan nu leh pa hmasa berte Eden huan ata hnawhchhuah a nih hnu lawk khân Pathianin Messia a la rawn tirh tûr thu a hrilh nghâl a (Gen. 3:15). Tichuan, Eden huan khawngkaah khân chhinchhiahna ropui, mei khandaih vir tawn zawk zawk keng cherub pahnih a awmtîr ta a. Cherub hi Pathian lalthutphah entîrna niin, thuthlunna bâwm pawh kha cherub pahnihin a inhawi tawnin an thla an lo zâr hliah a nih kha (Exod. 25:18).
Genesis 3:21–24 chhiar la. Cherub-te’n an tih tûr chu eng nge ni a, eng vânga chu chu ti tûr nge an nih?
____________________________________________________
___________________________________________________
Cherub-te hi mi sualte’n an duh duha nunna thing rah an lo thei tûr vêngtu atâna dah chu ni ngei mai mah se (Gen. 3:22), eng tikah emaw chuan mihringte hi paradis-ah dah kîr leh an la ni dâwn tih entîrtu, beiseina leh thutiam chhinchhiahna pawh anni tel tho bawk.
“Eden huan hi mihringte luh ve phalsak an nih tâk loh hnu-ah pawh khân rei tak chhûng chu leiah hian a la awm zêl rih a. Suala tlu ta mihringte kha râlkhat atanga sualna nei ve lote chênna hmun an thlîr phalsak niin, a luhna kawngka erawh vântirhkohte’n an lo vêng tlat thung. Cherub-te’n an vên Paradis kawngka-ah chuan Pathian ropuina târ lanin a awm a. Hemi hmunah hian Adama kha a fapate nên Pathian chibai bûk tûrin an va kal thîn a ni. Hetah hian an bawhchhiat avânga Eden huan ata chhuahtîr an nih phahna dân chu zawm tawh an intiam thar thîn a. . . . Nimahsela, siam thar lehna tak tak, ‘lei thar leh vân thar’ (Thupuan 21:1) a awm hunah chuan a tîra âia mâwi leh ropui zâwk daihin din thar leh a ni ang.”—Ellen G. Thlahtubulte leh Zâwlneite, p. 41.
Genesis 3:24 thu inchheh dân hi a ngaihnawm khawp mai: Pathian chuan Eden huan chhak lampangah cherub-te a “dah” tih a ni a. Heti lâia dah tih hi Hebrai tawngah ziah Bible-ah chuan shakan niin, chu chu a mite zînga Pathian a rawn chên ve-na hmun thianghlim “biak bûk” sawina atâna hman thin a ni (Exod. 25:9, Num. 3:26 en la). Pathian awmna hmun sawina atâna tawngkam hman thin tlânglâwn tak, Shekinah tih tak hi chu Bible-ah a awm lo mah se, “biak bûk” tia lehlin thin he thumal atanga chher chhuah hi a ni a. Shakan tih hi a ngialngana lehlin dâwn chuan, “Pathian chuan Eden huan chhak lampangah cherub-te a biak bûk”tih tûr a ni ang.
Bible-ah hian cherub-te chu Pathian awmnaa awm ve nia sawi thin a ni a (1 Chron. 13:6, Sam 80:1, leh Isaia 37:16 te en la), a bîk takin Pathian hming puan chhuaha a awmna a lalthutphah bul vêlah an awm thîn. Thupuan bung 4 leh 5-a kan hmuh, Pathian lalthutphah vêla awm upa 24-te hian Pathian fakna hla sain, eng kim siamtu (Thup. 4:11) a nih avânga ropuina leh châwimâwina nei tlâk an nih thu an puan hi kan hriat ngei a ngâi a. A chhan pawh hei hian lalthutphah hûnna pindan chhûnga thil awm dân min hriatthiamtîr bâkah, mi sual ngaihdam tâk kan nihna anga kan Siamtu nêna kan inzawm dân pawh min hrilh bawk a ni.
Thawhlehni May 13
Meiling vâm ham ang mai
Cherub-te hi, minung an nihna angin (Ezek. 10:8) emaw, rangkachaka an lem an siam angin (Exod. 25:18) emaw Thuthlung Hlui lehkhabu hmun hrang hrangah a lang a. A tlângpui thu-in, Pathian lalthutphah kiang maia ding, lei leh vân pum puia a ropuina êng zung chhuahtu angin târ lan a ni thîn. Cherub-te lem chu Hmun Thianghlim Ber luh dâwna zâr puanah khân chuantîr a ni a (Exod. 26:1). Sam lehkhabu-ah chuan thil siamte chunga Pathianin thu a neihzia hla thu hmanga târ lan niin, Pathian chu cherub-hote’n boruakah an châwi kâng a ni a ti (Sam 18:10). Pathian chuan Mosia hnênah khân thuthlunna bâwm chunga rangkachak hlanga siam cherub pahnih dah tûrin thu a pe a, an pahnih hian inhma tawna dingin, zahngaihna thutphah chu an thla-in an zâr hliah tûr a ni tiin a hrilh bawk (Exod. 25:18–20).
Ezekiel 1:4–14 chhiar la. He lâi thu-ah leh Isaia 6:1–6 leh Thupuan 4:1–11-a kan thil hmunahte hian eng engte nge inang awm?
_____________________________________________________
______________________________________________________
Ezekiela hnênah hian Pathian thiltihtheihzia chiang taka târ lan a ni a. A thil hmuh hian a rilru a ti buai hle ang tih erawh a chiang: Pathian mite chu Pathian ngeiin a thlante ni mah se, ram tiamah ni lo, Babulonah zâwk, chutah pawh sal ni leh nghâla an awm lâi a ni tlat bawk si a ni. A thil hmuh chu ngun takin a han ngaihtuah a, a hawi chho a, Pathian lalthutphah chu eng kim chungah a awm a ni tih a hre ta a.
Ezekiela’n a hmuh lalthutphah leh lalthutphah hmu vetu mi dangte hmuh hi a inan tlânna lo sawi ila. Thil nung a hmuhte hian Johana’n a hmuh thil nung pali-te hmâi ang bawk kha an pu a: sakeibaknei hmêl ang te, mupui hmêl ang te, bâwngpa hmêl ang te leh mihring hmêl ang te an pu a ni.
Hêng thil siam mak tak mai, hmâi pawh pali ngawt neite hi Ezekiela lehkhabu-ah hian an hming a sawi lêm lo va; mahse, a hnu-ah, lalthutphah a hmuh thu a sawina dangah chuan “cherub-ho” tia sawi a ni. Tin, Isaia inlârna hmuhah pawh seraf pakhat chuan maichâm ata chaichehin meiling a rawn keng bawk a. Hêng thil nungte hmâi hi Johana inlârna hmuha thil nung pali-te hmâi nên pawh a inang hle a ni.
Pathian lalthutphah kan hmuh apiangin—a entîrtu thuthlunna bâwm, Pathianin Mosia a rawn biakna hmunah a ni emaw (Exod. 25:22), zâwlneite’n inlârnaa an hmuhah emaw pawh ni se—cherub-ho hi an lo awm ve zêl thîn a. A chhan pawh Pathian lalthutphah nêna hnâi taka an inzawm tlat vâng a ni. Pathian thil siamte hi a ropuina târ lang tûra duan vek an ni a. Ama anpuia siam mihringte kan ni emaw, a lalthutphah ropui tak kianga awm reng thîn vân mite an ni emaw, Pathian ropuina puang chhuaktu kan ni vek.
Lalpa Pathian Engkimtitheia chu a thianghlim e, a thianghlim e, a thianghim e. Ezekiela’n Pathian ropuizia leh thianghlimzia a sawi hi ngun takin ngaihtuah la, nangma ropui ve-na leh thianghlim ve-na nêna a inthlauhzia i lo hmu chhuak thei em? I chhânna khân chanchin tha i mamawhzia a hriattîr che em?
Nilaini May 14
Pathian chu a mite zîngah a awm
Israel fate kha Ram Tiam lam pana an kal lâi khân Pathian awmpuina an chang a ni tih entîrtu chhûmin a hruai a. Chhûm chu a ding a nih chuan anni pawh an châwl ve a, biak bûk sa-in, biak bûk vêlah chuan sîr tinah hnam pathum zêlin an puan in an zâr ve thîn a ni. Pathian awmpuina chu Hmun Thianghlim Berah khân a lo chhuk thla a; chutiang chuan, a mite zîngah a rawn chêng ve thîn a ni.
Hêng biak bûk sîr lî-a inzâr hnam pathum zêlah hian hnam lian ber leh hotu chan chang hnam khat an awm zêl a. Chûng hnam lian leh hotu chan chang pali-te chu tute nge ni (Numbers bung 2 chhiar la)?
Num. 2:3 (Khawchhak lampang): ___________________
Num. 2:10 (Chhim lampang): ______________________
Num. 2:18 (Khawthlang lampang): __________________
Num. 2:25 (Hmar lampang): ________________________
Hêng hnam pali-te hian anmahni huam chhûnga awmte chhinchhiahna atân puanzâr an nei theuh a, chu puangzâr chu tute nge an nih tih ti langtu tûr a ni. Bible hian an puanzârte hi eng ang pian nge ni a, eng rawng nge ni hlawm tih te a sawi hran lo naa, thil tih thin dân ngaihnawm deuh an nei ni chuan a ngaihruat theih—chu chu Genesis bung 49 leh Deuteronomi bung 33-a kan hmuh, Jakoba’n a fapate nihna theuh a sawi beh chhana lo piang a ni nghe nghe bawk. “Juda rabbi-te sawi dân chuan, Juda thlahte riahna hmuna puanzârah hian sakeibaknei lem a chuang a, Reubena thlahte riahna hmunah hian mihring lem emaw, a mihring lu lem emaw a chuang a, Ephraima thlahte riahna hmunah hian bâwngpa lem a chuang a, Dana thlahte riahna hmunah hian mupui lem a chuang bawk. Chutiang chuan Ezekiela’n a lo sawi, cherub pian hmang ang nei thil nung pali-te kha hêng puanzâr pali-a milem chuangte hian a entîr a ni.”—Carl Friedrich Keil and Franz Delitzsch, Commentary on the Old Testament, vol. 1 (Peabody, MA: Hendrickson, 2011), p. 660.
Juda-te thawnthute hi âwih chin tâwk neih thiam a tûl tho rualin, he thawnthu-in a sawi leh Bible-in Jerusalem Thar hmêlhmang a sawi dân kan khâikhin hian, a inanna lâi a awm nual a, a ngaihnawm ve hrim hrim tlat. Jerusalem Tharah pawh hian kulh kawngkhâr sâwm leh pahnih neiin (khawchhak lam leh khawthlang lam, chhim lam leh hmâr lamah pathum theuh), kawngkhâr tinah chuan Israel hnam sâwm leh pahnihte hming a chung vek bawk (Thup. 21:12, 13).
Bible-in Israel fate riah hmun leh Jerusalem Thar hmêlhmang a sawi dân hian thil pawimawh tak pakhat târ lan a nei a, chu chu Pathianin a lalthutphah hnaih tûra mihringte a hruai thin thu hi a ni. Thupuan bu hian “Lalpa Pathian, Engkimtitheia leh Berâmno chu an biak in a ni” tih thu min hrilh (Thup. 21:22, NKJV).
Keini hi chu Israel fate riah bûkah khân kan chêng ve lo ngei mai a. Mahse, keimahni nun theuha Pathian kan hnaih theih dân kawng awmte chu eng nge ni?
Ningani May 15
Lucifera tlûkna
Hriatthiam leh âwih har angreng tak mai chu, Lucifer hian cherub-ho zîngah pawh dinhmun chungnung ber luahin, Pathian lalthutphah kiang maiah a awm reng thîn a ni tih hi a ni a. Chutianga awmtîr a nih chhan chu vâna awmte hnêna Pathian ropuina hmuhtîrtu atâna tih a nih vâng a ni. Nimahsela, a Siamtu ropuina ni lovin, ama ropuina tûr zâwk ringawt mai a ngaihtuah ta a; a awmzia chu, a dawn tûr ang châwimâwina leh ropuina dawng lo nia inngaihna a nei ta a ni ber mai.
Ezekiel 28:11–17 leh Isaia 14:12–14 chhiar la. Lucifera tlûktîrtu hi eng nge ni? He lâi thu hi Thupuan 14:1–12 nên khâikhin la. Lucifera tlûkna leh Kristaa mihringte’n dinhmun sâng tak kan chân tâk dân khâikhinna hian eng tiangin nge Thupuan bung 14-a thil thleng hi hrethiam tûrin min tanpui le?
_________________________________________________
______________________________________________________
Pathian tlâng thianghlim ata Lucifera paih thlâk a nih lâiin, tlante erawh Zion tlângah Pathian Berâmno nên an ding ho ve thung tih hi lo chhinchhiah ila. Lucifera hi Eden huana chêng thîn nia sawi a ni a; chumi hmunah chuan mihringte pawh an lo chêng ve tawh thîn bawk. Setana hi chu eng tikah mah dah lêt leh a nih ngâi tawh dâwn loh lâiin, mihringte erawh Krista avângin la awmtîr leh an ni ang (Thup. 22:1–3 en la.) Hemi chungchânga Ellen G. White-i’n a lo sawi hi a bengvârthlâk ngawt mai: “Vân khian hnehna a la chang dâwn a, a chhan pawh Setana leh a tirkohte tlûknain vâna hmun ruak a siam kha Lalpa tlante’n an la luah khah vek dâwn vâng a ni.”—The Advent Review and Sabbath Herald, May 29, 1900.
Vânrama an awm theih chhan chu chanchin tha avâng chauh a ni a. Dik tak phei chuan, Thupuan bung 4 leh 5-a kan hmuh lalthutphah dahna pindan chhûng awm dân a sawiah pawh hian chanchin tha, tlanna thupui chu chiang taka târ lan a ni nghe nghe. Entîr nân, vântirhkohte chuan, “Nang, lehkhabu chu laa, a chhinchhiahnate phelh tlâk i ni e; talhin i awm tawh a, chi tina mi te, tawng tina mi te, mi tina mi te, hnam tina mi te chu Pathian tân i thisenin i lei a, kan Pathian tân khua leh tuiah leh, puithiamahte i siam ta si a” (Thup. 5:9) tiin hla thar an sa a. He an hla sak hian chanchin tha, mihringte tlânna atâna Isua thihna kha a awmzia a sawi fiah hle mai!
Tin, he an hla sak hian vântirhkoh pakhatna thuchah, leia awmte hnênah leh hnam tinrêng te, chi tinrêng te, tawng tinrêng te, mi tinrêng te hnêna chatuana chanchin tha hril tûra thu pêk kan nihna (Thup. 14:6) kha min hriat chhuahtîr leh bawk a. Khawvêl tâna Krista’n a lo tih tawh khân mi zawng zawng a huam kim hnehzia a sawi chiang hle. Khawvêla lo piang chhuak tawhte zîngah leh la piang leh zêl tûrte zîngah pawh, Krista’n a thihsak ni ve lo tu mah an awm lo va. Chu chu kan hriat theuh ngâi leh kan pawm theuh ngâi ni bawk a ni.
Mite’n an tâna Krista’n a lo tih tawh chu an lo hriat theih nân, a kohhran ang leh a mi mal ang pawhin eng nge tih tûr kan neih?
Zirtawpni May 16
Zir belhna: Ellen G. White-i lehkhabu, Indona Ropui bung 42, “Indona A Tâwp Ta” (phêk 662–678) chhiar ni se.
Satana, Pathian lalthutphah kianga lo awm tawh reng thîn chuan vântirhkohte’n Pathian lalthutphaha rinna a nghah ngam tawh loh theih dân kawng a zawng ta a. Pathian pawhin suala tlu ta vântirhkohte chu, mahni inchâwisân duhna atanga lo chhuak suahsualna thûk tak chu vâna awm zawng zawngte’n an lo hmuh vek theih nân an hel chhunzawm zêl a phal bawk. Setana hian Pathian a dodâlna chu zawm ve tûrin mihringte lo hmin tawh mah se, amah Setana ngei hi krawsah khân Krista’n chiang takin a lo hneh tawh a, chumi avâng chuan suala tlu ta vântirhkohte awmna thin hmunah khân mihringte an lo ding ve dâwn ta thung a ni. Mi sualte chuan, Kristaah khân mi zawng zawng hriat theih tûrin Lucifera’n a phûtte chu an hnar thla vek a. Hemi tuma thil thleng hian Pathian thatna leh hmangaihna chu Lucifera tlûk hmaa a lo awm tawh dân âia ropui zâwkin a puang chhuak ta a ni. Pathian chuan sual hi awm ve tûr rêngin a lo ruahman sa hran lo va; chutih rualin, eng kim chin fel vek a nih hunah chuan Pathian thatna leh hmangaihna hi tûn hma zawng âia chiang leh fiah zâwkin puan chhuah a la ni ang.
Krista chuan “tlante chu a han en a, amah anna kawngah siam thar an ni tawh a ni tih a hmu a, mi tin mai chuan Pathian thinlung ang lo pu ve tawhin, an hmêlah pawh an Lal anpui an nihzia a lang bawk. Ani chuan a nunin a thawhrimna rah anmahnia lo lang chu a thlîr a, a lung pawh a âwi hle mai. Chutichuan, mi fel pung khâwmte leh mi sualte pawhin an hriat vek theih tûr khawpa ringin, ‘En teh u, ka thisena ka leite hi! Chatuana ka hnêna an awm theih nân, hêngho tân hian tuarin ka thi tawh a ni’ tiin a puang a. Chutah, lalthutphah vêla awm puan vâr sinte chuan, ‘Berâmno talh tawha hi thiltihtheihna te, hausakna te, finna te, chakna te, châwimâwina te, ropuina te, malsâwmna te chu hmu tlâk a ni e’ an lo ti a. Thupuan 5:12.”—Ellen G. White, Indona Ropui, p. 671.
Sawi ho tûrte:
1. Pathian hmaah chuan i thil lo tih sual tawh zawng zawngte nên, i nungchanga fel tâwk lo awm zawng zawngte nên, i tlin lohna zawng zawng nên, i ngaihtuahna sual zawng zawng nên khân i ding a, a hmaah chuan i thil tih tum zawng zawng pawh pho lan vek a ni bawk angin han suangtuah chhin teh. Eng thil nge dawng tlâk emaw, dawn phu emaw nia i inhriat? Eng nge i beisei awm chhun ni le? Eng vângin nge “Pathian felna, Isua Krista rin avânga a ring apiangte hnêna tih lana lo awm ta” (Rom 3:22) chuan tûnah hian leh kan mamawh hun ber tûr rorêlna niah chuan kan inthuam a tûl? A tâwi zawngin sawi ila, eng vângin nge chanchin tha chu kan mamawh?2. Kan hmuh ang khân, Baptistu Johana hian seraf-te thawh ang hna kha a thawk a—amah hi khâwnvâr alh nasa tak leh êng tak chu a ni (Joh. 5:35 en la.). Isua Krista tâna kawng lo sialtu, Messia lo kal tûr thu lo puangtu a ni a. A hna thawh ang hi keini ni hnuhnûnga Pathian mite hian engtin nge kan thawh ve ang?