2025 2nd Quarter Teenager Zirlai-1-na

Zirlâi 1-na                                          April 05, 2025

LO KAL ULA, ENTEH U!

Chângvawn:  “Tichuan, hmeichhia chuan a tuibêl a kalsan a, khuaah a kal a, mite hnênah, ‘Ka thil tih apiang min hrilh zêltu mi pakhat a awm a, lo kal ula, en teh u; Krista a ni thei âwm em?’ a ti a. Anni chu khua ata chu an lo chhuak a, a hnên lam an pan ta a.”  (Johana 4:28–30, NIV).

Chhiar Tûr: Johana 4:1–42.

Zir Zauna: Chatuan Nghahfâk, bung 19.

Thu Êng

“Chhandamtu a hmuh veleh Isua hnênah mi dangte a rawn hruai thuai a; Isua zirtîrte âiin thlarau bo zawn chhuah hna a thawk nasa zâwk a ni. Zirtîrte chuan Samari ram hi chanchin tha rawngbâwl nâna hmun tha tak a ni tih an hre rêng rêng lo.  Hun lo la awm tûrah ropui taka Pathian hna thawh a la ni dâwna hriatna chu an nei a, an bul hnâi maia buh seng tûr awm reng erawh chu an hmu ve thei lawk lo. An hmuhsit êm êm Samari hmeichhiain a mite hnêna chanchin tha meichher a va chhit thuai avângin Chhandamtu zirtîrna ngâithla tûrin, a khaw nâwtin an lo chim ta a nih kha.”—Chatuan Nghahfâk (2nd Edition 2014), p. 204.

Engtin Nge I Ngaih?  

Isua tâna thuhretua tang tûrin a hnuaia eng thilte hi nge tangkâi tûra i rin? (A taka hman ve theih tûra i rin chu khawite hi nge ni?) Isua tâna thuhretua tan duh tawh phawtin a tih ngei tûr chu:

___ Bible pum pui chhiar chhuah

___ baptisma chan

___ high school zir chhuah

___ Isua hmangaih

___ pian thar

___ Bible study pe thei nih

___ pelh lo va inkhâwm zat zat

I Hria Em?

Samari mite kha Isua hun lâia Judai ram atanga hmar lama chêngte an ni a. Anni kha chuan Israel hmar lam hnamte, Nebukadnezzara kuta Babulon lama an hnam mi tam zâwk sala hruai an nih lâia saltâng ve lote thlahah an inchhâl a. Juda-te erawh chuan, hêng mite hi Babulon-in a rawn rûn hnua Jentail hnamte thlah ni tûrah an ngâi thung. An tobul chu eng pawh lo ni se, Samari mite khân Israel-te Pathian chu an be ve ngei mai a; mahse, Juda hnam tih dân ni lo thil tam tak chhawm an nei a ni. Juda mi tam zâwkte chuan hêng mite hi mi hnuaihnung deuh zâwka ngâiin, Isua hun lâite phei kha chuan Jentail hnam dangte an en hrang ang thovin, anni hi engah mah an hmang ngâi lo a ni.

Bible Thawnthu

“Samari hmeichhe pakhat hi tui chawiin a lo kal a. Isua’n a hnênah, ‘In tûr mi pe rawh,’ a ti a.  (A zirtîrte lah chu ei tûr leiin khuaah an kal tawh si a.) Chutichuan, Samari hmeichhia chuan a hnênah, ‘Nang Juda mi i ni si a, kei Samari hmeichhia ka ni si a, engti zia nge ka hnêna in tûr mi dîl?’ a ti a. (Juda te’n Samari mite engah mah an hmang ngâi si lo.)

“Isua’n a chhâng a, a hnênah, ‘Pathian thilpêk leh, “In tûr mi pe rawh,” i hnêna titu hi hria la chu, nangin a hnênah i dîl zâwk tûr a ni a, ani’n tui nung a pe tawh tûr che a ni,’ a ti a.

“Hmeichhia chuan a hnênah, ‘Ka pu, khâina eng mah i nei si lo va, tuichhunchhuah a thûk vei nên, khawi atangin nge tui nung chu i hmuh? Kan pu Jakoba âiin i ropui zâwk em ni? Ani chuan he tuichhunchhuah hi min pe a, amah pawhin a in a, a fapate, a rante nên,’ a ti a.

“Isua’n a chhâng a, a hnênah, ‘Tu pawh he tui in apiang an tuihâl leh ang; tu pawh an hnêna ka pêk tûr tui in apiang erawh chu kumkhuain an tuihâl lo vang; keiin an hnêna tui ka pêk tûr chu an kawchhûngah tui hna a lo awm ang a, chatuana nun thlengin a chik chho vang,’ a ti a.

“Hmeichhia chuan a hnênah, ‘Ka pu, chu tui chu mi pe rawh, ka tuihâl loh nân leh, hêng thleng thlenga tui chawi tûra ka lo kal thin loh nân,’ a ti a.

“Isua’n a hnênah, ‘I pasal va ko la, hetah lo lêt leh ang che,’ a ti a.

“Hmeichhia chuan a hnênah, ‘Pasal ka nei hleinêm,’ a ti a, a chhâng a.

“Isua’n a hnênah, ‘Pasal ka nei hleinêm’ i tih hi i ti dik e; pasal panga i nei tawh, tûna mi i neih hi chu i pasal a ni lo rêng a ni, he thu hi i ti dik e,’ a ti a.

“Hmeichhia chuan a hnênah, ‘Ka pu, zâwlnei i ni tih ka hre ta. Keini thlahtute chuan he tlângah hian Pathian chibai an bûk thîn; nimahsela, nangni zawngin, “Mihringin Pathian chibai an bûkna hmun tûr chu Jerusalem khuaah a awm,” in ti thîn,’ a ti a.

“Isua’n a hnênah, ‘Hmeichhia, ka thu âwih rawh, he tlângah kher lo pawh, Jerusalem khuaah kher lo pawh Pa chibai in bûk hun a thleng dâwn ta. Nangni’n in hriat loh chibai in bûk thîn; keini zawngin kan hriata chu chibai kan bûk thîn thung. Chhanhimna Juda-te hnên ata a lo chhuak dâwn si a. Chutichuan, a hun a thleng dâwn ta, tûnah pawh a thleng tawh mêk a ni, chu mi hunah chuan Pathian chibai bûktu tak takte’n thlarau leh tih tak zetin Pa chibai an bûk ang, Pa-in chutiang mi chu a chibai bûktu ni tûrin a zawng a ni. Pathian chu Thlarau a ni a; amah chibai bûktute chuan thlarau leh tih tak zetin chibai an bûk tûr a ni,’ a ti a.

“Hmeichhia chuan a hnênah, ‘Messia, Krista an tih chu a lo kal dâwn tih ka hria, ani chu a lo kal hunah engkim min la hrilh ang,’ a ti a.

“Isua’n a hnênah, ‘Keimah a betu che hi amah chu ka ni asin,’ a ti a.

“Chutih lâi chuan a zirtîrte chu an lo kal a, hmeichhia a bia chu mak an ti hle a; nimahsela, tu ma’n, ‘Eng nge i zawn? Enga ti nge hmeichhia i biak?’ pawh an ti lo.

“Hmeichhia chuan a tuibêl a kalsan a, khuaah a kal a, mite hnênah, ‘Ka thil tih apiang min hrilh zêltu mi pakhat a awm a, lo kal ula, en teh u; Krista a ni thei âwm em?’ a ti a.

“Anni chu khua ata chu an lo chhuak a, a hnên lam an pan ta a. Chu mi hlânin zirtîrte chuan a hnênah, ‘Zirtîrtu ei rawh,’ an ti a.

“Nimahsela, ani chuan an hnênah, ‘Chaw, in hriat loh ei tûr ka nei e,’ a ti a.

“Zirtîrte chu an inbia a, ‘A ei tûr miin an rawn kensak em ni chu le?’ an inti a.

“Isua’n an hnênah a sawi a, ‘Mi tîrtu duhzâwng tih leh, a hna thawh zawh tûr hi ka chaw a ni. Nangni’n, ‘Buh sengna tûr thla li a la awm,’ in ti thîn a ni lo’m ni? Ngâi rawh u, ka hrilh a che u, dâk ulang, lote en rawh u, tûn apangin seng tûrin a êng a ni. A âttuin hlawh a hmu thîn a, chatuana nun thlenga awm tûrin rah a seng thîn, a tuhtu leh a âttu an lâwm dun theih nân. ‘Pakhatin a tuh thîn a, mi dangin a ât thîn,’ tih thu hi, chumi-ah chuan a dik hle a ni.

“‘In thawhrim loh ât tûrin ka tirh che u kha; mi dangin an thawk a, nangnin an thawh sa chu in chhunzawm a ni,’ a ti a.

“Hmeichhia chuan, ‘Ka thil tih apiang mi hrilh zêl,’ tia, a hriattîr thu avâng khân chumi khuaa awm Samari mi tam takin Isua an ring ta a. Chutichuan, Samari mite chu Isua hnênah an lo kal a, an hnêna awmah an ngên chiam a; tichuan, chutah chuan ni hnih a châm ta a.

“Mi dang tam takin ama thu avângin an ring ve ta a; anni chuan hmeichhe hnênah chuan, ‘Tûnah zet chuan i thu sawi avânga ring ve mai kan ni ta lo; keimahni ngeiin a thu kan hria a, he mi hi khawvêl Chhandamtu a ni ngei tih kan hre ta,’ an ti a.”

(Johana 4:7–42, NIV)

Thawnthu Atangin

Engati nge Isua’n tui in tûr a dîl kha Samari hmeichhia khân mak a tih? Khâ thil hmang khân Isua’n Ama nihna chungchâng eng tak chu nge a târ lan tâk?

“Tui Nung” tih kha Isua’n eng a tihna nge nia i rin?

Isua’n pasal panga a neih tawh thu a sawi chhan kha eng vâng nge niin i rin?

Isua kha Messia chu a ni ngei ang tih hmeichhiain a pawm tâkna chhan tak kha eng ni le?

Isua thu sawi ngâithla tûra Samari mite an lo kal chhan kha eng nge ni?

An khuaa mite lo pian thar nân khân hmeichhe thusawi khân eng pawimawhna tak nge a neih?_

Thu Pawimawhte: 

“Juda-te leh Grik mite chu engah mah an danglam chuang si lo va, Lalpa pakhat an zaa chunga Lalpa a ni a, a lamtu apiangte chungah chuan thatna a ngah si thîn a. ‘Tu pawh Lalpa hming lam apiangte chu chhandamin an awm ang,’ tih a ni a. A nih leh, an rin lohva chu engtin nge an lam ang? A thu an hriat lohva chu engtin nge an rin ang? Thu hriltu awm lovin engtin nge an hriat ang? Tirh an nih loh chuan engtin nge thu an hril ang? ‘Thil tha chanchin lâwmawm thlentute ke chu a va mâwi êm!’ tih ziak ang khân” (Rom 10:12–15, NIV).

“Lawnga Isua a chuan dâwn lâi takin ramhuai man hnu-a khân Isua hnêna awm reng a rawn ngên a. Nimahsela, Isua’n a phal lo va, a hnênah, ‘I inah, i thiante hnênah haw la, Lalpa’n i tân thil a tihsak che hi a ropuizia leh, a khawngaihzia che hi va hrilh rawh,’ a ti ta zâwk a. Tichuan, a kal a, Dekapoli khuaahte chuan Isua’n a tân thil a tihsak ropuizia chu a tlângaupui ta a; mi zawng zawng chuan mak an ti hle a” (Marka 5:18–20, NIV).

“Amaherawhchu, in thinlungah Krista chu Lalah ruat rawh u; nangmahnia awm in beisei chhan zâwt apiang che u chhâng tûrin inpeih sa fo ang che u; nimahsela, thuhnuairawlh tak leh tih dêk chungin in chhâng dâwn nia” (1 Petera 3:15, NIV).

Hriat Zui Atân

“Zirtîr dik takte chu Pathian rama chanchin tha rawngbâwl hna thawk tûrin, pian tharna neiin, an lo lût reng a, nunna tui intu chu nunna tuikhurah a lo chang a, dawngtu chu petu a lo ni thîn.”—Ellen G. White, Chatuan Nghahfâk, p. 204.

“Tu nge thinlung chu nei? Kan ngaihtuahnate chu tu hnênah nge a awm? Tu nge biak kan duh thin? Tu nge kan duhna ril berte leh kan châkna ril berte nei le? Krista ta kan nih chuan kan ngaihtuahna chu a hnênah a awm a, kan ngaihtuahna duhawm berte chu ama chanchin a ni.”—Ellen G. White, Krista Panna Kâilâwn (5th Edition, 2015), p. 52.

Mahni Nun Nêna Dawh Zawm Tûr

Sabbath

Chhiar tûr:  Johana 4:1–42 

Samari hmeichhe dinhmunah khân indah chhin la. Isua thu sawi eng emaw lâi lâi kha engtin nge a dawnsawn? Enga ti nge phûr taka an khaw lam pana tlân a, “Lo kal ula, en teh u,” tia a va sâwm?

“He a la bâng (kohhran) hian rorêl hun lo thlen tâk thu te, Krista zâra chhandamna te leh, a lo kal lehna hnaih tawhzia thute chu an puang mêk a ni” (The Remnant and Its Mission, Fundamental Belief, No. 13). Engtin nge a la bâng (keini) leh Samari hmeichhia khân inanna kan neih le?

Sunday

Chhiar tûr: Luka 5:29–32

Zirlâia I Hria Em? tih kha en nawn leh la. Isua hun lâite kha chuan Juda mite’n Samari mite an biak kha an ngâithiam chiah ngâi lo. Chutiangin Isua’n Samari hmeichhia a biak pawh khân a ni ve ngei ang. Hmeichhiate phei chu vântlâng zînga tawng ve tûra ngaih an ni lo hrim hrim a. Ina tawma, an chhûngkaw zînga mi bâk mipate be lo tûra ngaih an ni. Engati nge Isua khân chutiang hnamze thil hmanga dâlna bang chu thiahsak a duh? Vawiin Bible châng behchhanin, Isua’n mi dangte chunga a tih thin dân mite’n an lo pawm dân entîrna eng nge min siamsak? Tûnah Isua kha kan zîngah lo chêng leh ta se, eng ang mite zîngah nge ei leh ina a kawm nêl in rin? Engtin nge thiana insiamna ang chi chu thuhretua tan nân a hman in rin?

Thawhtanni

Chhiar tûr:  Johana 4:28–30

Samari hmeichhia khân Isua nêna inbiakna an neihna atangin Isua chanchin mi dangte hnêna hrilh tûrin a kal nghâl mai tih kha chhinchhiah la. Mi dangte kha a hrilh ngawt pawh ni lovin, anmahni ngei chu Isua hnên rawn pan ve tûrin a sâwm zâwk a ni. Kan tûnlâi khawvêlah hian kan thiante chu Isua hnên rawn pan tûra sâwmna tûr remchâng kan nei lo fo. Amah nêna mimal taka intawhna nei tûra sâwm chu kan duh em? Engtin nge chu chu kan tih ang?

• Anmahni tawngtâipuiin

• Bible chhiar thîn tûra fuihin

• Kan inkhâwmna leh thalâi pâwla lo tel ve tûra sâwmin

• Mi dangte rawngbâwlsakna thila min tanpui tûra sâwmin

Thawhlehni

Chhiar tûr: Johana 15:4, 5; 2 Korinth 5:17; Galatia 5:22, 23

Isua nêna mi mal taka inlaichînna i neihpuiin eng nge lo thleng thîn?

Jeremia 20:9 atangin thil thleng dang pawh hmuh chhuah tum teh.

Ni tina Isua i lo hriat chian deuh deuh lâiin, nakin hun atâna khêk khawtlâi lova, ama tâna thuhretua tan nghâl duhna i lo nei nasa deuh deuh dâwn a ni. Chutiangah chuan, mi chi hrang, ze inang lo tak takte zîngah pawh Isua hmêlhriattîr châkna i lo nei nasa tial tial mai ang.

Nilaini 

Chhiar tûr:  Johana 4; Johana 9

Johana 4-a Samari hmeichhe chanchin leh Johana 9-a mitdel bâkah, Marka 5-a ramhuai man chanchin kha khâikhin ang che. Isua tâna thuhretua tang tûr hian ‘training’ leh ‘experience’ tam tak neih zet kher tûr emawte kan ti thîn a. Mahse, ‘thuhretu’ nih chu mahni hmuh leh benga hriat leh mahni chunga thilthleng mi dangte hnêna hrilh a ni mai si a. Isua chu hmaichhanah chuan kan hmu thei kher lo pawh a ni ang; mahse, a thu chhiar te, tawngtâi te leh engtik lâi pawha amah rinchhanna zârah amah hriatna nung kan nei thei tho si a ni. Vawiin hian, mimal taka Isua hriatna nei tûrin thutlûkna siam ang che.

Ningani

Chhiar tûr:  Johana 3:16

Isua kha chuan mi tute mah kawm serh leh hlauh pawh a nei ve ngâi lo. Amah sawisêl leh chhâltute pawh a ensan chuang lo. Hmangaih a, pawmin, an laka inhawng takin an chungah ngilneihna a lantîr zêl thîn a ni. Johana 3:16 chhiarin vawng nghâl teh. Ziak chhawng la, ‘khawvêl’ tih âiah in kawm serh deuh tûr ang chi, mimal leh pâwl hmingte emaw ziak zêl ang che. Engtin nge chûng mite nên chuan inkungkaihna in neihpui thin? Isua tih dân kha entawnah hmang ta ulang, eng ang inlaichînna nge in neihpui theih ang?

Johana 3:16-a “Tu pawh amah ring apiang an boral loh a,” tih kha chhiar zawm la. A ringtute chungah eng nge lo thleng dâwn? Mite’n Isua an rin theih nâna kan lo tangkâi theih ve dân chu engtin nge ni? Chuti a nih chuan thuhretua tan chu eng ang taka pawimawh nge ni ang?

Zirtawpni

Chhiar tûr: Johana 4:28, 29

Tuichhunchhuaha hmeichhia kha an khuaah a kîr leh a, chuta mite hnênah chuan Isua chanchin hrilhin, “Hei hi Messia a ni thei âwm em?” tih finfiah tûrin a sâwm a nih kha. Isua a rinna chungchângah thil zawng zawng a la hrethiam vek bîk hauh lo chungin, ama chunga thil thleng chu hrilhin, mite chu an ngaihtuahna hmang tûrin a sâwm mai a ni. Chutah mite chu lo kalin, anmahni ngei chuan Isua chungchâng hriatna an nei ta a. Hmeichhe tih ang khân, Isua hnên atanga an thil hriat chu mi dangte hnênah an hrilh chhawng ve ta zêl a. Chutiang chuan nang pawhin i ti ve mai dâwn lo’m ni? Anmahni ngeiin Isua chu mi eng ang nge a nih hre tûra an bengkhawn duh nân eng zawhna nge i zawh ve theih ang le?