2025 2nd Quarter Teenager Zirlai-10-na

Zirlâi 10-na                              June 07, 2025

hma lam leh a lâi lam

Chângvawn: “Isua’n kut zeng hnênah chuan, ‘Lo ding chhuak rawh,’ a ti a. Tichuan, Isua’n an hnênah, ‘Chawlhniah hian tihthat nge thiang, tihchhiat? Chhandam nge thiang, tihhlum?” tiin a zâwt a. Nimahsela, an ngâwi ta reng a,” (Marka 3:3, 4, NIV).

Chhiar Tûr: Matthaia 12:9–14; Marka 3:1–6; Luka 6:6–11.

Zir Zauna:  Chatuan Nghahfâk, bung 29.

Thu Êng

“Kutzeng tihdamna kha Juda-te hnam dân Isua’n a demna a ni fâwm a; thupêk palîna erawh chu atîra Pathianin a pêk angin a ngâiin a awmtîr a, tichuan, Sabbath niin tihthat a thiang, tih a puan chhuahna a ni bawk. Tangkâina leh awmze nei lo, khapna dân Juda te’n an siam chawpte hnawl vekin Isua’n Sabbath a châwimâwi a, amah sawisêltute erawh chuan Pathian ni thianghlim chu an châwimâwi ve lo a ni.”—Chatuan Nghahfâk (2nd Edition, 2014), p. 312.

Engtin Nge I Ngaih? 

Ka thin a rim chânga ka chêt dân chu . . . . Chîk taka ngaihtuahin zâwi muangin 1  2  3  4  5 6  Thuhnu dâwn lêk lo vin ka che nghâl phiar phiar. A khawi lâi hi nge i nihna dinhmun chu ni le? Hetianga chêtna ang chi thatna leh that lohna chu eng nge ni? Engin nge min tithinrim thîn?

___Mi tute emaw dâwta an hlâwkna tûr hum tlat thîn te.

___Mi chanhai zâwk hlamchhiah an ni tlat si te.

___Naupang diriam taka titute.

___Mi rintlâk tûra ngaih rintlâk si loh te.

___Hmusit deuh taka mi dang nuih sawh chîngte.

I Hria Em? 

Juda hruaitute’n Sabbath serh dân tûr khawng taka an vawn kha Sabbath thianghlimna hum him nâna an tih chu a ni nâin, chawlhniin a tum ropui zâwk dik tak chu an târ lang leh si lo va. Entîr nân, bangin mi tute emaw lo chim hnan ta se, a mi chim hnante chu an thî nge an dam tih en theihna tâwk tûra bang hai kian kha phal a ni tih i hria em? An lo la dam a nih chuan, chû mi chhanchhuak tûra tanpui chu phalsak i ni a, a thi tawh a nih erawh chuan, ni tlâk thleng i nghah a ngâi thung si a ni.

Bible Thawnthu

“Chuta tang chuan a kal a, an inkhâwmna inah a va lût a. Ngâi teh, mi pakhat kut zeng a lo awm a. An hêk theih nân, ‘Chawlhniin tihdam a thiang em?’ tiin Isua an zâwt a.

“Ani chuan an hnênah, ‘Nangni zîngah tu pawhin berâm pakhat nei ula, chu chu Chawlhniin khuar khurumah tlâ ang sela, tu nge chelhin kâi chhuak lo vang che u? Berâm pakhat âi chuan mihring pakhat chu a va hlu zâwk êm! Chuvângin, Chawlhni-ah tihthat a thiang e,’ a ti a.

“Chu veleh, chu mi hnênah chuan, ‘I kut phar rawh,’ a ti a. Tichuan, a phar a, a lehlam angin a dam ta viah a.

“Chutichuan, Pharisaite chu an chhuak a, amah an tihboral theih dân tûr ngaihtuahin an inrâwn a.

“Inkhâwmna inah chuan a lût leh a, chutah chuan mi pakhat kut zeng a lo awm a. Amah an hêk theih nân Chawlhniin a tihdam dâwn leh dâwn loh an mitmei a. Ani’n kut zeng hnênah chuan, ‘Lo ding chhuak rawh,’ a ti a.

“An hnênah chuan, ‘Chawlhniah hian tihthat nge thiang, tichhiat? Chhandam nge thiang, tihhlum?’ tiin a zâwt a. Nimahsela, an ngâwi ta reng a.

“An thinlung sakzia chu pawi tihsak êm êmin, thinur chunga anmahni a en vêl hnuin, chu mi hnênah chuan, ‘I kut phar rawh,’ a ti a. A han phar chhuak a, a kut chu a dam ta a.

Pharisaite chu an chhuak a, amah an tihhlum theihnazia tûr ngaihtuahin Heroda pâwla mite nên chuan an inrâwn ta nghâl a.

Heti hi a ni a, Chawlhni dangah chuan inkhâwmna inah a lût a, a zirtîr a; chutah chuan mi pakhat kut ding lam zeng a lo awm a.

Lehkhaziaktute leh Pharisaite chuan a hêkna tûr an hmuh theih nân, Chawlhniin a tih dam dâwn leh dâwn loh an mit mei a.         

Nimahsela, ani’n an rilru chu a hria a, kut zeng hnênah chuan, ‘Tho la, a lâiah ding chhuak rawh,’ a ti a. A tho va, a ding chhuak ta a.

Isua’n an hnênah, ‘Chawlhni-ah hian tihthat nge thiang, tihchhiat? Chhandam nge thiang, tihhlum? Ka zâwt a che u,’ a ti a.

An za chuan a en vêl a, a hnênah, ‘I kut phar rawh,’ a ti a. A phar a, a kut chu a dam ta a.

Chutichuan, an thin tâwtin an puak keh lek lek a, Isua chunga an tihzia tûr an inrâwn ta a.”

(Matthaia 12:9–14; Marka 3:1–6; Luka 6:6–11, NIV)

Thawnthu ATangin

Thil thleng thuhmun thlîr dân pathumte, an danglam dân leh inan tlân dân chu khâikhin la.

Matthaia’n tawngkam a hman loh Marka leh Luka te’n an hman chu engte nge ni?

Marka leh Matthaia te’n an hman loh tawngkam Luka’n a hman bîk chu eng nge ni?

Marka chauhin a hman bîk tawngkam chu eng nge ni?

Sabbath serh dân tûra Isua thusawi chu eng nge ni? Engtin nge Isua zawhna:  “Sabbath nia dân anga tih thiang chu a khawi zâwk nge:  tihthat nge thil tha lo tih; nunna chhandam nge tihboral?” tih khân Sabbath chungchâng thlîr dân kawng a tihdanglam? 

Isua zawhna: “In zînga tu pawhin berâm nei ta ula, Sabbath niin khurah tla ta se, chelhin in khâi chhuak dâwn lo vem ni? Berâm âi chuan mihring chu a va hlu zâwk êm!” tih kha chîk takin ngaihtuah la. Heta thil sawia a pawimawh lâi tak chu eng nge ni?

Sunagogue-a Krista thil tih Juda hruaitute’n an dawnsawn dân kha engtin nge i sawi ang? He thawnthu behchhan hian Sabbath thil tum bulpui ber chu eng nge a ni i tih ang le?

Thu Pawimawh: 

“Chawlhni hi thianghlim taka serh t<r a ni tih hre reng rawh. Ni ruk chhûngin i thawk tûr a ni a, i hna zawng zawng chu i thawk tûr a ni; a ni sarih ni erawh chu Lalpa i Pathian tân Chawlhni a ni e; chumi ni chuan hna rêng rêng i thawk tûr a ni lo, nang pawhin, i fapa pawhin, i fanu pawhin, i bâwihpa pawhin, i bâwihnu pawhin, i ran pawhin, i ina hnam dang (mikhualte) pawhin; ni ruk chhûngin Lalpan lei leh vân te, tuifinriat leh a chhûnga awm zawng zawngte chu a siam a; a ni sarih ni chuan a lo chawl ta si a; chuvângin Lalpan Chawlhni chu mal a sâwm a, a tithianghlim ta a ni” (Exodus 20:8–11, NASB).

“Chutiang ti mi leh, chumi pawm tlattu mihring fapa chu, a eng a thâwl e; Chawlhni bawhchhe lova serh thîntu leh, thil tha lo rêng rêng ti lo tûra a kut veng tha thîntu chu” (Isaia 56:2, ESV).

“Tichuan Isua’n an hnênah, ‘Chawlhni hi mihring tâna siam a ni a, mihring hi Chawlhni tâna siam a ni lo; chutichuan, Mihring Fapa hi Chawlhni chungah lam pawh hian Lal a ni!’ a ti a” (Marka 2:27, 28, NLT).

“Ka chawlhnite serh thianghlim ula, kei leh nangni inkâra chhinchhiahna a ni ang a, Lalpa in Pathian chu ka ni tih in hriat theihna a ni dâwn nia” (Ezekiela 20:20, The Message).

Hriat Zui Atân

“He leia Pathian hnâin hlen a tum chu mihringte tlanna a ni a; chû hna hlenna tûra Sabbath nia thawh tûl apiang thawh chu Sabbath thupêk nêna inrem a ni. A thu sawi hmâwr bâwk nân, dân zawng zawng chunga lêng a ni.”—Ellen G. White, Chatuan Nghahfâk (2nd Edition, 2014), p. 309.

Mahni Nun Nêna Dawh Zawm Tûr

Sabbath

Chhiar tûr:  Luka 13:10–17; Marka 3:1–6

“Pathian thupêk danglam thei lo zînga a palîna chuan hê nisarihna–ni hi chawlhna ni, chibaibûkna leh Sabbath Lalpa, Isua zirtîrna leh nun nêna inrema serh tûrin min ngiat a ni.” (Fundamental Belief 20, The Sabbath). Engtin Nge I Ngaih? tiha zawhnate kha dik takin chhâng ang che. Mite thin tirim thîntu atang hian an thil ngaih pawimawh zâwng chu a hriat theih a. Thinrimna tûr âwma i ngaih thil chi hrang hrangte chu ngaihtuah la. Luka 13:10–17-ah chuan khatiang deuh bawka tihdamna chang chungchâng kan hmu a, kha thil lo ngaithei lotu erawh chu inkhâwmna (sunagog) hotupa a ni thung. Luka 13:10–1-a Juda hruaitute tithinrimtu thil leh Marka 3:1–6-a Isua rilru tibuaitu chu khâikhin la. Isua thil ngaih pawimawh leh Juda hruaitute thil ngaih pawimawh chu hriat dik chat i tum dâwn nia. Nangma ngaiha thil pawimawh—thinrim tûr khawp hiala i ngaih pawimawh chîte chu eng nge ni ngaihtuah ang che.

Sunday

Chhiar tûr: Marka 2:27, 28. Bible Thawnthu i chhiar hnuin, Thawnthu Atangin tiha zawhnate kha chîk zâwka zir nân i hmang tangkâi dâwn nia. Thil thleng thu hmun thlîr dân kawng thum (Matthaia, Marka, leh Luka) chu tûn kâr zirlâi hian min neihpui a. Marka kha a ziaktu a ni a, mahse Petera thusawi a ziak a; chuvâng chuan rilru awm dân a târ lang nual a ni. Luka hi chuan a ziak chipchiar deuhin, a bengvâr thlâk a. Matthaia erawh hi chuan Juda mite lo hriat atâna hê thu hi a ziak bîk deuh ni âwmin a lang. A khawi ber chu nge i rilru han rem bîk deuh le? Eng vâng nge? Nangma thlîr dân bîk lo ziak dâwn ta lang, a englâi tak chu nge i han sawi uar ve deuh ang le? He thawnthua a pawimawh lâi tak chu eng nge ni?

Thawhtanni

Chhiar tûr: Marka 3:3, 4

Chângvawn thu hi rilrua tuh ngheh i tum mêk lâiin, engtiang kawngin nge Sabbath i lo ngaih thin dân nên a inzûl a? Sabbath i serh chhan thil pawimawh deuh deuh chu engte nge ni? Isua Sabbath serh dân anga serh ve thîna i ngaih chu tu nge ni le? Eng thil tih tûr ang chîte nge an ngaih pawimawh a, eng thilte chu nge an tih ngâi loh thung?

Thawhlehni

Chhiar tûr: Isaia 56:1, 2

Thu Êng tiha Chatuan Nghahfâk thu lâk chhawn kha chhiarin, Sabbath nia thil tha tihna hmanga Pathian châwimâwi dân tûr chu chîk takin ngaihtuah teh. Krista nun târ lan pum puiah hian, sakhaw hruaitute khân ‘thil tih loh tûr’ mawlh an ngaihtuahna lamah, anmahni nunah Pathian thiltihtheihna ataka channa ang chi kha an tlachham tlat mai! Thenkhatte’n ‘tih loh tûr’ ngawt thupuia an neih lâiin, Isua erawh kha chuan ‘eng nge tih tûr ni ang’ tih lam kha thupuiah a nei ve thung a. Engtin nge ‘tih loh tûrte’ tih leh ‘thil tih tûrte’ chungchâng i ngaihpawimawh dân chuan i thil thlîr dân leh chêt dân hmang chu thui taka a nghawng ang? Engtin nge vawiin zirlâi thurâwn hian kan thil tih tûr hriatna kawngah min tanpui theih ang?

Nilaini

Thu Pawimawhte tiha thute hian Kristian nuna Sabbath pawimawhzia min hriat nawntîr leh a. Hêng chângte i chhiar pahin, a khawi chu nge i tân han pawimawh thar zual deuk bîk le? Eng bengvârna thu thâr nge i chhar tâk? Hêng Bible chângte hi Sabbath chungchâng la hre ve lo hnêna hrilh chhawn atân a indawt dân tûr anga i ngaih dân angin nambar pe hlawm ang che. A khawi hmang chuan nge bul i tan ang? A tâwp khâr nân eng châng ber chu nge i hman ang? Chutianga indawta i rem chhan chu eng nge ni?

Ningani

Chhiar tûr:  Jeremia 29:11–13

Tûn kâr zirlâi hi Sabbath thu ngawt chu a ni bîk lo va, mihringte pawimawhna te, ngaihtuahna hruai sual leh mihring zepui chungchâng a ni mah zâwk. Sabbath chu Pathian leh a fate nêna inzawmna kan neih theih nâna siam a ni a, kan nihna leh engtin nge kan la awm zêl dâwn tih hi kan theihnghilh ngâi tûr a ni lo. Isua’n min zirtîr dân chuan Sabbath hi ‘thil tha tihna tûr’ leh ‘nun chhandamna’ tûr a ni ber. Nangma nuntawnga Sabbath mâwina belhchhah tûrin tûn Sabbath lo thleng tûrah hian eng ang thil tha ang chite nge i tih theih ang? Chhûngkaw zîngah leh thian thate zînga i chêt dân tûr chu chîk deuh takin ngaihtuah lâwk rawh le. 

Zirtawpni

Chhiar tûr: Isaia 66:22, 23 Sabbath chungchânga i tâna thil awmze nei ber chu ngaihtuah teh. Sabbath ni chu bîk a nihna tûrin, thil tihtûr/chêtna eng ang nuntawng chîte chu nge rilrû-ah lo lang? Bible chângah hian Sabbath chu chatuana kan nun peng khat a la ni zui zêl dâwn tih min hriattîr a, chutiang chu Pathian siam khawvêla sual luh hma pawh khân a lo ni tawh bawk a (Genesis 2:1–3). Vânramah chuan Sabbath hi eng ang nge ni dâwn tih suangtuah zui vang vang la, chutiang chu hê leiah, tûnah i lo hman tan theih dân tûr ngaihtuah bawk ang che