2025 2nd Quarter Teenager Zirlai-11-na

Zirlâi 11-na                       June 14, 2025

Isua kohna

Chângvawn:  “Chûng lâi chuan Isua a chhuak a, tawngtâi tûrin tlângah a kal a, Pathian hnênah a tawngtâi zankhua a. Khawvâr veleh a zirtîrte chu a ko va; an zîng ata sâwm leh pahnih a thlang a, an hmingah pawh tirhkoh a vuah a,” (Luka 6:12, 13, NIV).

Chhiar Tûr:  Marka 3:13–19; Luka 6:12–31; Matthaia 5–7.

Zir Zauna:  Chatuan Nghahfâk, bung 30, 31.

Thu Êng

“A zirtîrte a kaihhruainaah leh zirtîrnaahte pawh Isua’n khawpui hulûm atanga kal hrangin, phûl leh tlâng ram hmun fianrialah a kal thîn a, chu chu mahni inphatna zirtîr a tum nên pawh inhmeh tak a ni rêng a. Phâitual hnim bawh tlâng pangper leh dîl kam lamah, vân dumpâwl ruih hnuaiah te a thu ngâithlatu mipuite a hruai fo thîn. Amahina a lo siam ngeite hual vêlah chuan phuah chawp thil ni lo, thil awm tak tak lamah mipuite rilru a thlektîr thei a. Chi lo tiak leh lo thang chho zêlte a ram than dân entîrtu remchâng tak an ni.”—Chatuan Nghahfâk (2nd Edition, 2014), p. 316.

Engtin Nge I Ngaih? 

Rawngbâwlna eng emaw tak bultan tûr te, Pathian lalrama lût tûra mite ko tûr tea hma la thar tûr lo ni dâwn ta la, mite’n an lo tuipui theih nân engtin nge vântlâng hmaah i han târ lan (advertise) ang le? Fakna thil hrang hrang i siam tûr zîngah hêngte hi chu i târ lang tel ngei ang chu:

Thusawi tûr thupui, mi rilru hîp tak tûr:

Rimâwi:

Budget (Beihpui thlâkna daih tûr sum?):

I Hria Em? 

Mi tam zâwk hi chuan Isua zirtîrte khân a rawngbâwl tirh phat atanga zui nghâl chat angin an ngâi hlawm a; mahse, chutiang chu a ni lo. Mi pangate kha chu an ni ang a; mahse; mi dangte kha chu an ni chiah lo (Johana 1:40–49). Mi dang pasarihte kha chu Isua’n he leia kum thum leh a chanve rawng a bâwl hun lâi hawl vêla a thlan vete an ni. Luka 6-a târ lan angin, Isua’n zirtîrte a thlan fel meuh kha chuan hnungzuitu thahnem tak a nei tawh zâwk a.  Isua’n a rawngbâwlna thiltihtheihzia lantîr nân damlote tidamin, ramhuai bawlhhlawhte a hnawt chhuak a, mi rethei leh endawng tuarte tân rawng a bâwlsak thîn a ni. Chutiang avâng chuan mipuite’n an zui thîn a. Chûng mite zîng atang chuan a zirtîr tehkhatte kha chu a thlang a; tichuan a lalram thar chungchâng thu lo hre duh apiangte’n an hriat theih nân, mi 12-te hmang khân a lungphûm chu a phûm nghet ta a ni.

Bible Thawnthu

“An rualin a kal chhuk a, hmun zâwlah a ding a, a zirtîrte mipui tam tak nên, Judai ram zawng zawng ata leh Jerusalem khua ata leh, Tura leh Sidon khaw lama tuifinriat kam ata mi tam tak nên; chûngho chu a thu ngâi duh leh an nâte intihdam duhin an lo kal a ni; tichuan ramhuai bawlhhlawh sawisakte pawh an lo dam ta a.

“A hnên ata thiltihtheihna a chhuak a, mi tin a tihdam avângin mipui zawng zawng chuan amah deh an tum a. A dâk chhuak a, a zirtîrte chu a en a.

“Nangni rethei te u, in eng a thâwl e; Pathian ram in ta a ni si a.

‘Nangni tûna riltâmte u, in eng a thâwl e; in la tlâi dâwn si a,

“Nangni tûna tapte u, in eng a thâwl e; in la nui dâwn si a.

“Mihring Fapa avânga mite’n an huat che u a, an tuithlâra an hau che u a, in hming a tha lo tiin an paih bo dêr hunah in eng a la thâwl ang.

“Chu mi ni-ah chuan lâwm ulang, hlimin zuang rawh u; ngâi teh u, vânah in lâwmman a awm hnem si a; chutiang bawkin an thlahtute’n zâwlneite chunga an tih thin kha.

“Amaherawhchu, nangni mi hausâte u, in chung a pik e; in thlamuanna in hmu tawh si a.

“Nangni tûna tlâi puarte u, in chung a pik e; in ril a la tâm dâwn si a.

“Nangni tûna nuite u, in chung a pik e; lungngâiin in la tap dâwn si a.

“Mi zawng zawngin an fak hunah che u in chung a la pik ang, chutiang bawkin an thlahtute’n zâwlnei derte chunga an tih kha.

“Ka thu ngâitute u, ka hrilh a che u, in hmêlmate chu hmangaih ula, a hua che u chu an thatna tûr ti ula, ânchhe lawhtu che u chu malsâwmsak ula, a sawisatu che u chu tawngtâisak rawh u.

 “Biang lehlama bêngtu che chu lehlam pawh dawh rawh; i puan lâksaktua hnênah chuan i kawr lâk pawh hnial suh.

 “A dîltu apiang che hnênah pe rawh; i sum lâksaktu che hnênah chuan dîl leh tawh suh.

“Miin in chunga an tiha in duh tûr ang zêlin mi chungah pawh ti ve rawh u.”

(Luka 6:17–31, NIV)

Thawnthu ATangin

Hêng Bible chângte hi Tlâng Chunga Thusawi zînga sawi chhawn hlawh ber berte an ni a. Mahse, Isua thusawi dang pawh a la tam mai. A thuchah lâipui hriat theih nân Luka 6 chhiar chhuak ang che. Isua thusawi engte kha nge i tân thil thar han ni deuh? Tûnhma lama i la hriat ngâi vak loh, tûna i hriat tharte zâwnah chuan ‘X’ dah zêl ang che.

Hêng thupuite Isua’n A hnungzuitute hnêna a hrilh chhan chu eng ni tûrin nge i ngaih?

__________________________________________________

__________________________________________________

Nihlawhna Thua thuchah lâipui chu eng nge ni? Isua’n rawng a bâwlna mipui vântlâng nun chungchâng eng nge hêng a thusawite hian min hriattîr?

__________________________________________________

__________________________________________________

Isua thusawia mite’n ‘hleihluak’ ti anga an lo ngaih theih tûr lâi bîkte chu a hnuaiah rîn zêl ang che.

Isua’n a târ lan anga vân lalram thupui hi mite’n atakin lo nunpui ni ta se, eng ang takin nge kan chênna khawvêl hi a lo danglam ang le?

__________________________________________________

__________________________________________________

Tlâng Chunga Thusawi zirtîrna thupuite hi Amah Isua tel lovin, atakin kan nunpui thei ang em?

__________________________________________________

__________________________________________________

Thu Pawimawh: 

“In thil tha tihte mi hmuh atân, mihring mithmuha ti lo tûrin fîmkhur rawh u; chutilochuan in Pa vâna mi hnênah chuan lâwmman in nei lo vang” (Matthaia 6:1, NIV).

“Khai le, Israel mite u, in laka Lalpa in Pathianin a phût chu eng mah dang a ni lo va, in thatna tûra Lalpa in Pathian tih a, a kawng zawng zawng chu zawh a, amah hmangaih a, in thinlung zawng zawng leh in rilru zawng zawngin Lalpa in Pathian rawngbâwl rawh u” (Deuteronomy 10:12, NIV).

“Inngaihtlâwmna leh Lalpa tih man chu sum te, châwimâwi na te, nunna te a ni” (Thufingte 22:4, NIV).

“Tichuan thil tha tih i ning suh ang u; kan inthlahdah loh zawngin a hun takah chuan kan seng dâwn si a. Chutichuan, remchâng hun kan neihzia ang zêlin mi zawng zawng chungah thil thâ i ti ang u, rinna chhûngte zînga mi chungah i ti deuh ber ang u” (Galatia 6:9, 10, NIV).

Hriat Zui Atân:  “Galilia sangha–mantute kotu khân vawiinah hian A rawng bâwl tûrin mihringte A la ko ta zêl a. Zirtîr hmasâte hnêna thiltihtheihna a pêk ang bawk kha min pêk a la duh reng bawk.”—Ellen G. White, Chatuan Nghahfâk, (2nd Edition, 2014), p. 323.

“Mihringte hi an nih ang angin Pathianin a pawm phawt a, chutah A nun tâwmpuitu leh A thununna pawmtu an nih phawt chuan, A tâna rawngbâwl tûrin A zirtîr zui thîn. . . . . An that famkim avânga thlang a ni lo, thutak an hriat a, an nun chhuahpui theih nân leh, Krista khawngaihna azâra Amah an neih theih nân leh, an nun a siam thar theih nân, an famkim lo chung pawhin A thlang a ni zâwk.”—Ellen G. White, Chatuan Nghahfâk, (2nd Edition, 2014), p.320.

Mahni Nun Nêna Dawhzawm Tûr

Sabbath:  Chhiar tûr: 1 Petera 4:10; Rom 12:6–8.  “Pathianin hun tina A kohhran member tinte hnênah, kohhran leh mihringte tâna rawngbâwlsak nâna hman tûrin thlarau thilpêkte a pe theuh a ni. Thilpêkte petu chu Thlarau Thianghlim niin, Aman a ruahman ang zêlin member tinte hnênah a pe a, thilpêkte chuan kohhranin a tih tûra ruahman chu a hlen theihna tûra rawngâwlna tûra mamawh chu a pe zêl thîn a ni. . . . Member te’n hê thilpêk hi an hman a, Pathian khawngaihna (thilpêk) chi hrang hrangte chu rinawm taka an hman tangkâi phawt chuan, kohhran chu amah rawn tichhe thei thurin dik lo laka venhim niin, Pathiana chhuak thanlennaa thang zêlin, rinna leh hmangaihnaah a puitling chho zêl thîn.” (Fundamental Belief 17, Spiritual Gifts and Ministries).

Sunday:  Chhiar tûr:  Luka 6:37, 38; Matthaia 6:25–27. Bible Thawnthu i chhiar hnuin, Thawnthu ATangin tiha zawhnate kha hmang tangkâi zui ang che. Isua’n A thusawia thupui dang a sawi tel chu engte nge ni? Tûnah, entîr nân, mi dangte sawi sêl chungchâng eng nge A sawi (Luka 6:37)? _________________________________________

______________________________________________

Mite hnêna thilpêk hlan pawimawhna chungchâng eng nge mipui hnênah A zirtîr (Luka 6:38)? __________________

______________________________________________

Lungkham chungchâng eng nge Isua’n a sawi (Matthaia 6:25–27)?  _____________________________________

______________________________________________

Sermon pakhatah thil chi hrang tam tak a sawi a. Engati nge Isua’n khatianga thupui chi hrang hrang fûn tel sermon kha sawi tûl tlata a hriat? _________________________ ______________________________________________

Thawhtanni:  Chhiar tûr:  Luka 6:12, 13. Chângvawn-ah hian thu hlû leh awmzenei tak tak a inphûm nual mai. A theih chuan chhiar nawn leh ang che.  Isua’n A zirtîr ni tûrte A thlan hmain eng thil nge A tih hmasak phawt?_____

__________________________________________________

Khawvêl thi mêk hnêna chhandamna chanchin thâ puangtu tûr mi dik takte a thlan theih nân, Isua’n zankhuaa tawngtâi nân hun a hmang a. Khâng mi 12-te a thlan lâi pawh khân Ani chu khenbeh a la ni dâwn a, A awm loh hnuah hna chu an kalpui chhunzawm zêl a ngâi dâwn tih a hria a ni. Mahni tawng kauchhehin, zirtîrte’n Isua thih hnua thil an tih zui tâk chu sawi fiah ang che. Khatianga lian tham taka chêtna thlen tûrin Isua’n mi dik takte A thlangin i hria em? ___________________________________________

__________________________________________________

Thawhlehni:  Chhiar tûr:  Sâm 19:1, 2. Thu Êng tih chhûngah khân Isua rawngbâwlnaa thilsiamte tangkâina târ lan a ni a. Vawiin châng thlana Davidan hêng châng hnih lek hmanga sawi a tum chu eng nge ni? Thilsiamah hian eng chu nge i ngainat? Thilsiam hmanga Pathian chungchâng i hriat tlêma zâwng tak chu ziak chhuak ang che. ___________________________________________

__________________________________________________

Nilaini:  Chhiar tûr:  Galatia 6:9, 10. Hêng Thu Pawimawhte tiha a hmawr bâwkna chu Galatia 6:9, 10 hi a ni ber mai. Isua thuchah lâipui pakhat chu mihringte kan inen dân mawlh hi thlâk danglam a ngâi tih a ni. Tirhkoh Paula’n chutiang kan tih chuan, Isua lo kal leh hunah rah duhawm tak kan la seng dâwn tih min hrilh a. Mahse, hei hi rei lo tê tal ngaihtuah zui teh. Kan tûn lâi damchhûng ngei hian mite chunga hmangaih leh ngaihsakna kan lantîr a, thil thâ kan tih hian hlâwkna kan têl nghâl tho bawk em? Thil thâ kan tih zâra hlâwkna kan hmuh nghâl theih tute chu sawi ho teh u._________________

__________________________________________________

Ningani:  Chhiar tûr:  Isua’n A zirtîrte a thlan khân, an thilpêk dawn te, an theihna te leh an chaklohnate nên lam a hriatsak vek a ni. Heta zirtîr târ lante chungchâng hi chhiar leh la. An chaklohna te, siamthat an ngaihna lâite thenkhat chu engte nge ni hlawm?

Petera (Johana 18:10; 25–27): _____________________

Jakoba leh Johana (Marka 3:17): ____________________

Thoma (Johana 20:25–27): _________________________

Juda (Johana 12: 5, 6):  ___________________________

Khatiang mite hnêna Isua’n chhandamna thuchah A kawltîr duh a nih chuan, keini pawh min duh ve ngei dâwn lo’m ni? Ama hnêna i nun i hlân pum hlûm a nih ngat chuan, Isua’n zirtîr ropui takah A siam ngei ang che.

Zirtawpni: Chhiar tûr:  Matthaia 5:1, 2. Isua’n mipuite A hmuh khân, tlângah a lâwn a, a thu ta a ni. A zirtîrte chu A hnênah an lo kal a, anni chu A zirtîr tan ta a” (Matthaia 5:1, 2, NIV). Chutiang chu Matthaia’n tlâng chunga Isua thusawi chungchâng a sawi dân chu a ni.

Hê leia Isua nun kha mi dangte nêna inkûngkaihna nei a ni deuh zêl mai. Mite mamawhte a hriatsak thîn. Mite thlîrin, an ‘mamawhte’ i hriatsak ve ngâi em? Nge, mahni mamawh ngawt i engto thîn zâwk?__________________

__________________________________________________ __________________________________________________