2025 2nd Quarter Teenager Zirlai-12-na

Zirlâi 12–na                              June 19, 2021

Sipai rinawm

Chângvawn:  “Isua’n chûng thu chu a hriatin mak a ti hle a, a zuitute hnênah chuan, ‘Tih tak meuhvin ka hrilh a che u, Israelte zîngah pawh heti êma rinna nasa hi ka hmu lo,’ a ti a.” (Matthaia  8:10, NIV).

Chhiar Tûr:  Matthaia 8:5–13; 12:22–28;  Luka 7:1–17.

Zir Zauna:  Chatuan Nghahfâk, bung 32, 33.

Thu Êng:  “Juda upateho Krista hnêna sipai za hotu ngenna va thlentute hian chanchin tha lâiril an la pawh pha lo hle tih an lantîr a. Kan mamawh lian ber chu Pathian zahngaihna rinchhan a ni tih rêng an hre lo. An hnam a hmangaih leh duhsak vânga sipai zahotu chunga a thil mamawh tihsak  tûrin, anmahni felna hmachhuanin Isua an va ngên a. Sipai za hotu erawh chuan Isua hnêna ‘kal tlâk lova a inhriat thu’ a sawi zâwk a ni. Krista khawngaihnâin nasa takin a thinlung a khawih a, engmah lo mai ani tih a inhmu chiang a, chutih lâi vek chuan tanpuina a dîl lo ngam bawk si lo.”—Chatuan Nghahfâk, (2nd Edition, 2014), p. 347.

Engtin Nge I Ngaih? America ram Dânpuiin an president kuta thuneihna a dah dân chungchâng ngaihtuah nân hun tlêm tal hmang ang che. Chutiang chungchâng tlêm chu hetah hian târ lan a ni a. Chutiang thuneihna chu president chuan a neih chuan a zâwnah ‘T’ dah la, a neih loh erawh chuan ‘F’ dah thung ang che.

  President chuan a ti thei: 

___US Conress pawmpuina tel lo vin eng ram chungah pawh indo a puang thei.

___Ram chhûng khawi lâi hmun pawh national park atân a humhalh thei.

___Engtik lâi pawhin America ram khawi lâi hmun pawh, a duh phawt chuan a tlawh thei vek.

___Thâ a tih loh chuan bill a dang bet (Veto) thei a, chu chu tihdanglam theih pawh a ni tawh lo.

___Thâ a tihzâwng a nih loh chuan dân a palzût thei.

I Hria Em?  Rom sipai chungchuang deuh, sipai za rual lâite hotu chu, an enkawlna hnuaia sipai 100 lâi an awm avângin ‘Sipai zahotu’ tih an ni thîn. Sipai zahotu chu tûnlâi hun atân chuan Captain emaw, lieute’nant emaw ang vêl hi an ni ang. An sipaite nên râl an do tlâng thîn a, râl hmatawngah tangin râl an bei thîn. StudyLight.org Bible encyclopedia sawi dânin, sipai zahotute chu sipai an hote lâmtîr kawngah te, an râlthuam endiksak kawngah te, ei leh in leh silh leh fên bâkah, indonaa hote chu an mawhphurhna a ni. Rom mite ngaihdân chuan, an sipai zahotute chu an huaisen phawt chuan an sipaite chu hneh theih loh niin, kum za tam tak chhûng hnehtu an nih theih an ring a ni.

Bible Thawnthu

“Mite beng hriata a thu zawng zawng a sawi zawhin Kapernaum khuaah a lût a. Sipai za hotu tu emaw a bâwih duh tak a dam lo va, a thi lek lek a.

Tichuan, Isua chanchin a hriat veleh a bâwih rawn tidam tûra ngên chiam tûrin a hnênah Judaho upate a tîr a.

Anni chu Isua hnênah an va thleng a, thahnemngâi takin an ngên chiam a, ‘Ani hi hei hi i tihsak tlâk a ni e; kan hnamte a hmangaih a, kan inkhâwmna in pawh aman min saksak a ni,’ an ti a.

Tichuan Isua chu an hnênah a kal ta a. In a thlen dâwn dâwnin, sipai za hotu chuan a hnênah a thiante a tîr a, ‘Lalpa, lo kal harsa suh, ka in chhûng i luhna tlâk a ni lo ve; chuvângin i hnêna lo kal tlâk pawh niin ka inring lo va; thu chauh sawi la, ka naupang a dam mai ang. Kei pawh mi thua awm ka ni a, ka hnuaiah sipaite an awm a; chu mi kha mi chu, ‘Kal rawh,’ ka tih leh, a kal thîn; mi dang hnênah pawh, ‘Lo haw rawh,’ ka tih leh, a lo haw thîn; ka bâwih hnênah pawh, ‘Hei hi ti rawh,’ ka tih leh, a ti thîn,’ a ti a.

Isua’n chûng thu chu a hriatin amah chu mak a ti hle a; a hawi a, mipui a zuitute hnênah chuan, ‘Ka hrilh a che u, Israelte zîngah pawh heti êma rinna nasâ hi ka hmu lo,’ a ti a.

A mi tirhte chu inah an haw leh a, bâwih chu damin an hmu ta a. Chu mi lâi chuan, mitdel tawng thei lo ramhuai man pakhat a hnênah an rawn hruai a; ani chuan a lo tidam a, chutichuan, tawng thei lo chu a lo tawngtheiin, a lo hmu thei ta a.

Mipuiho zawng zawng chuan mak an ti hle a, ‘Hê mi hi Davidâ fapa chu a ni lo’m ni?’ an ti a. Nimahsela, Pharisaite’n chu chu an hriat veleh, ‘Hê mi hian ramhuai lal Beelzebula avâng lo chuan ramhuaite a hnawt chhuak lo vang,’ an ti a.

Isua’n an ngaihtuahte chu a lo hria a, an hnênah, ‘Khawii ram pawh mahni indo apiang an boral thîn; khawii khua pawh, chhûng khat pawh, mahni indo apiang an ding khawchhuak lo vang. Setanan Setana vek a hnawh chhuah chuan mahni indo a ni ang asin; a ram chu engtin nge a din chhuah ang le? Kei Beelzebula avâng a ramhuaite hnawt chhuak thîn ka lo nih chuan, in fate’n tu vângin nge an lo hnawh chhuah thin le? Chuvângin, anni chu nangmahni ngaihtuahtu tûrte an ni ang.

Amaherawhchu, kei Pathian Thlarau avânga ramhuaite hnawt chhuak thîn ka nih chuan, Pathian ram in hnênah a lo thleng tawh a ni ang,’ a ti a.”

(Luka 7:1–10; Matthaia 12:22–28, NIV)

Thawnthu ATangin

Bible Thawnthu hian rawngbâwla Isua zin vêlna chanchin inang lo tak pahnih a târ lang a. Chûngah chuan thil inzûl, danglam si engte nge i hmuh? ______________________

__________________________________________________

Sipai zahotu nêna intawnnaah khân Juda hruaitute’n eng thil nge Isua hnênah an sawi? Eng rilrû nge an put?__________

__________________________________________________

Bible Thawnthu pahnihna kha en la. Heta Juda hruaitute rilru puthmang chu eng nge ni? Hetah hian engtin nge Isua kha an sawisêl tâk?_______________________________

__________________________________________________

Hêng Thawnthua thil lo thleng indawt zêl dân kha chîk deuh la. Chûngah chuan ‘X’ i dah zêl dâwn nia.

Hêng Thawnthu-ah hian Isua’n eng nge a sawi? A thusawia thuneihna leh thiltihtheihna a pai dân hmuh tum bawk la. Zakzum leh inthlahrunna lam chî a lang em? Juda hruaitute’n Amah an ngaih dân tûr lam engtona nei âwmin a lang em?______________________________________

__________________________________________________

Pathian chhûngkuaa telte chungchâng hriat nân eng zirlâite nge kan zir chhuah theih ang?___________________________

__________________________________________________

Thu Pawimawh: 

“ ‘Tu nge i nih? Âw tlâng lianpui, Jerubabela hmaah chuan phaizâwlah i chang mai ang; ani chuan a lung pawimawh ber chu a tâna malsawmna nên, hlimna au âw nên a rawn thlen ang!’ tiin mi chhâng ta a” (Zekaria 4:7, NIV).

“Nimahsela, rinna lovin ama lâwmzâwng mi nih rual a ni lo; Pathian hnêna lo kal chuanin, ani chu a awm tih leh, zawngtute hnêna lâwmman pêk hmang a ni tih rin tûr a ni” (Hebrai 11:6, NIV).

“Nangmahni lama hmangaihna kan ngah angin, nangmahni lamah inhmangaih tawnna leh mi zawng zawng lamah hmangaihna chu Lalpa chuan tihpunsakin, tihngahsak che u rawh se” (1 Thesalonika 3:12, NIV).

“In ritphurhte chu inchhawk tawn rawh u, chutichuan, Krista dân thu chu in zâwm a ni ang” (Galatia 6:2, NIV).

“In hnênah thu ka sawi leh tawh mang lo vang, khawvêl lal a lo kal dâwn si a, ani    chuan keimahah eng mah rêng a nei lo” (Johana 14:30, NIV).

“Diabolan a thlemna tûr tinrênga a thlem zawh chuan a remchân hun atân a kalsan ta a” (Luka 4:13, NIV).

Hriat Zui Atân:  “Thlarau Thianghlim hnathawh hnartu chu sual simna leh rinna nei thei lovah a insiam tihna a ni. Thlarau hnathawh chu mite’n an hnar luiha Setana hnathawh a ni zâwk tia an puan chuan, Pathianin a rawn pawhna kawng chu an lo tiping tihna a ni.”—Ellen G. White, Chatuan Nghahfâk, (2nd Edition, 2014), p. 354.

“Nangni ringhlel leh khûr thînte u, en chho teh u; Isua chu kan tâna min dîlsak tûrin a awm si a. . . . Thlarau chuan vawiinah hian a sâwm a che. I thinlung zawng nên Isua pan la, tichuan A malsâwmna chu i nei thei ang.”—Ellen G. White, Krista Panna Kâilâwn, (5th Edition,  2015), p. 49.

Mahni Nun Nêna Dawhzawm Tûr

Sabbath:  Chhiar tûr:   Johana 17:1–5. Engtin Nge I Ngaih tiha tihtûr kha engtin nge i tih tâk? Thu thenkhat kha chu manthiam mai a har deuh pawh a ni thei a, hre chiang tûr chuan mi dang emaw, lehkhabu emaw i râwn a ngâi pawh a ni mahna. Ram Dânpui an tih chu ram rorêltute:  President leh (sorkar) hotu lian dangte mawhphurhna leh thuneihna an neih chungchâng hrilh fiahna bû a ni. Hê leia Isua a awm lâi khân a thuneihna hnar ber chu tu nge/eng nge ni (Johana 17:1–5)?________________________

__________________________________________________

Sipai zahotu kha Isua zuitu pawh a ni ve si lo va, engtin nge Isua’n a chhiahhlawh tidam tûrin thiltihtheihna a nei a ni tih a hriat nghâl mai theih? I chhânna sawi fiah ang che._____________________________________________

__________________________________________________

 “Kohhran hi Isua Krista chu Lalpa leh Chhandamtu atâna pawmtu, ringtute inpâwlho hi a ni.

. . . Kohhran chuan Krista hnên atangin thuneihna a dawng a, Ani chu Bible-in a târ lan, Thu tîsâa lo chang chu a ni.” (Fundamental Belief 12, The Church).

Sunday:  Chhiar tûr:  Johana 15:12. Bible Thawnthu i chhiar hnuin, Thawnthu ATangin tiha zawhnate chhâng zui nghâl ang che. Sipai zahotu chhiahhlawh leh ramhuai man tihdam chungchânga Isua hnêna thu rawn thlensaktute hi mi dang an ni ve ve a. I thiante Isua hnêna i hruai ve lâi chungchâng kha ziak chhuak la. An tâna tawngtâisakna hmangin emaw, inkhâwm tûra sâwmna hmangin emaw a ni mai thei e. Chutianga i tihna tûra chawkphûrtu che chu eng nge ni?_____________________________________

__________________________________________________

Pathian chhûngzînga mite kan nih angin mi zawng zawngte pawh tûra koh kan ni vek a. “Hei hi ka thupêk chu a ni: Keiin ka hmangaih che u angin, nangni pawh inhmangaih tawn theuh rawh u” (Johana 15:12, NIV).

Thawhtanni:  Chhiar tûr:  Marka 12:32–34.  Chângvawn  kha chhiar nawn leh la. Sipai zahotu chungchâng A sawi dân ang khân i chungchâng kha a sawi ve ang em le? Mi fak leh châwimâwi lamah Isua khân mi hriat a hlawh thîn a. Vawiin Bible châng thlanah hian sakhaw zirtîrtute chungchângah eng thil nge a sawi? Engati nge khatianga sipai zahotuin rinna a lantîrna khân Isua kha a ‘hneh’ viau?

__________________________________________________

Sipai zahotu kha Juda mi a ni ve lo. Dik tak phei chuan, ani kha Juda ram awptu Rom sipai zînga mi a ni zâwk a. Kristian sakhaw vuan ve lêm lo (Pathiana) rinna ropui tak lantîr hriat i nei tawh ngâi em? Eng ang takin nge chû mi chuan i rilrû a hnehsak che? Engtin nge i rinna a tihchak bawk?_____________________________________________

__________________________________________________

Thawhlehni:  Chhiar tûr:  Jakoba 2:1–7.  Thu Êng tih chhûng thute kha chhiar la, chutah Luka 7:1–5 chhiar zui ang che. Khâ sipai zahotu khân Juda-te chungah eng duhsakna nge a lo lantîr tawh thin?___________________

__________________________________________________

Juda hruaitute ngaih dân chuan, sipai zahotuin khatiang thil a tih avâng khân, Isua tanpuina dawng tlâk ni âwmin an sawi a. Mi lian leh thiltithei deuh, thil lian tham eng emaw an tih avânga hausâ leh thunei chu âwm tih chângte kan nei ve thîn a ni lo’m ni? Mi hausa leh retheite hleih nei lova en tûr kan nih chungchâng eng nge tirhkoh Jakoban min hrilh ( Jakoba 2:1–7)? ___________________________________________

__________________________________________________

Pathian chhûngte kan nih angin, Pathian enkawlna mamawhtu apiangte chu pawh zêl tûra kohte kan ni. Pathian kan hnâihna chhan pawhi Amah kan mamawh vâng mai a ni a, chhan dang a awm lo.

Nilaini:  Chhiar tûr: Thu Pawimawhte tih kha chhiar la.  Zekaria 4:7 sawitu tak hi tu nge ni?

Zekaria 4:7 thu hmakhalhtu sawi chhawn hlawh tak chu eng nge ni?  Pathian khân Zekaria te,

Zerubabela leh Juda-te hnênah khân eng nge a sawi? Hêng châng hnihte hian Pathian chu kan rinna leh kan nuna thil tin rêng ‘bultumtu’ leh ‘thawk zotu’ a nih tih min hriat nawntîr leh a ni.__________________________________

__________________________________________________

Ningani:  Chhiar tûr:  Matthaia 12:24.  Isua’n ramhuai–man pa hnêna zalênna a pêk a, khawhmuh theihna leh tawngtheihna a pêk leh khân, Pharisai hote chu an lâwm ve hlek lo mai. Nang, thil thâ eng emaw i tih vânga sawisêlnate i lo tawng ve tawh ngâi em? Chutiang sawisêlna avâng chuan thil tha tih nâna i thilpêk dawn leh theihna neihte hman i bânsan daih ngâi em?___________________________________________

__________________________________________________

__________________________________________________

Zirtawpni: Chhiar tûr:  Matthaia 10:1.  Hê leia a awm lâi khân Isua chu thil ropui takte ti thei tûra thiltihtheihnaa thuam a ni a, mahse Ani chuan chû thiltihtheihna chu A zirtîrte hnênah leh tûna keini hnênah pawh hian min pe chhawng a ni. Isua’n A zirtîrte hnêna a sawi Matthaia 10:1-a mi hi chîk takin ngaihtuah ang che. Pathianin hê thiltihtheihna hi pe ta che selang, engtin nge i hman ang?

__________________________________________________

__________________________________________________