2025 2nd Quarter Teenager Zirlai-13-na

Zirlâi 13–na June 26, 2021

Tih Thin Dân leh Nih Dânte

Chângvawn: “Ramhuai chhuahsan hnua erawh kha chuan Isua hnêna awm reng a ngên a. Nimahsela Isua’n, ‘I inah haw la, Pathianin i tân thil a tihsak che hi a ropuizia va hrilh rawh,’ tiin a kaltîr ta a. Tichuan a kal a, khawpui chhûng zawng zawngah chuan Isua’n a tân thil a tihsak ropuizia chu a tlângaupui a,” (Luka 8:38, 39, NIV).

Chhiar Tûr: Luka 8:26–39.

Zir Zauna: Chatuan Nghahfâk, bung 34, 35.

Thu Êng: “Thunei takin an chhûng ata chhuak tûrin ramhuai bawlhhlawhte chu thu A han pe a. A thute chuan chung mi vânduai takte rilru thim zo vek tawh chu a zuk fan chhuak a. Anmahni sawisatu ramhuaite laka chhanchhuak thei kiangah an awm a ni tih chiang lêm lo taka hriatna an nei tan ta a. Isua kebulah chuan an bawkkhup a, chibai an bûk a; nimahsela, an chunga zahngâi tûra an ngên tan dawn chiahin, anmahni hmangin ramhuaite chu an au chhuak a.”—Chatuan Nghahfâk, (2nd Edition, 2014), p. 374.

Engtin Nge I Ngaih? A hnuaia thil ang chî-ah hian thang zêl i nih dân ngaihtuah la. Mi dangte’n Krista chanchin mahni nuntawng ngei atanga an sawi hian min chawkphûr êm êm a ni.

Piantharna Langsâr Damchhûnga Zirna

1 2 3 4 5 6

Engati nge ringtu thenkhatte hian Kristaa an nuntawng hi thil thleng phut phut a nih loh avâng hian mak lua lo anga an ngaih thin? Engtin nge nuntawng chu a pahnihin thiltithei tak a nih ve ve? Sawi fiah ang che.

__________________________________________________

I Hria Em? Hêng thil thlenna bial kha Dekapoli (Khawpui Sâwm awmna) lamah a ni. Chûng khawpuite chu: Damaska, Dion, Gadara, Gerasa, Hippos, Canatha, Pella, Filadelfia, Rafana, leh Scythopolis te an ni.

Khawpui thenkhat i hriat reng tûr zînga Damaska pawh hi a tel ang a; hetah hian Saula (Paula hming hmasa) pawh kha Kristian kohhran lo thang zêl titâwp tûrin a kal a nih kha. Chûng hmunah chuan ramhuai–man ‘lo ni ta’ leh ‘ni thîna’ chuan Krista chanchin chu puang darhin, Galilee bialah chuan ram kâng râpthlâk tak ang maiin ringtute chu an lo pung ta hluai hluai mai a ni. Khâ khân mi pakhat lek pawhin danglamna namên lo thlen tûra thil a tih theih zia a entîr a ni.

Bible Thawnthu

“Galili ram zâwna Gerasin mite ram chu an thleng a. Khâwmuala a chhuahin, khuaa mi ramhuai–man tuin emaw a rawn tâwk a; chu mi chu rei tak puan rêng rêng sin lovin a awm a, inah rêng pawh a awm lova, thlânahte a awm zâwk thîn a.

Isua a hmuh veleh a au va, a hmaah a bawkkhup a, aw ring takin, ‘Isu, Pathian Chungnungbera Fapa, kei leh nang eng nge kan inzâwlna awm? Mi nghaisa lul suh ang che, ka ngên a che,’ a ti a.

(Isua’n ramhuai bawlhhlawh chu, chu mi kawchhûng ata chu chhuak tûrin thu a lo pe tawh si a. Chu mi chu ramhuai chuan a man fo thîn a ni; mite’n khaidiat leh kawl an buntîr a, an veng reng thîn a; nimahsela, a phuarnate a tichat a, ramhuaiin thlalêrahte a hnawt chhuak thîn).

Isua’n, ‘I hming eng nge ni?’ tiin a zâwt a. Ani chuan, ‘Nuaia,’ a ti a, (a kawchhûnga ramhuai tam tak an luh avângin).

Leilâwta kal thu an hnêna pe lo tûrin Isua hnênah an ngên a. Chutah chuan tlângah vawk rual tam tak an tlâ a; a hnênah vawk kawchhûngahte luh theihna thu an ngên a. Ani chuan thu a pe a.

Ramhuaite chu mi kawchhûng ata an chhuak a, vawk kawchhûngahte an lût a; vawk rual chu khâmah an tlân chhuk chiam a, dîlah an tlân lût a, tui hâkin an thi ta a.

A vulhtute chuan chu thil awmzia chu an hmu a, an tlân a, khuaah leh lovahte chuan an sawi a. ‘Eng nge lo ni tâ?’ ti a en tûrin an chhuak hlawm a; Isua hnên an lo thleng a, ramhuai chhuahsan hnua chu puan sin a, rilru pângngâi puin, Isua ke bula thû an rawn hmu a; tichuan an hlau ta a. A hretute chuan ramhuai man a tihdamzia thu chu chûngho chu an lo hrilh a.

A vêl Gerasin mite rama mi zawng zawng chuan an hlauh êm êm avângin, ani chu an hnên ata kal bo tûrin an ngên a; lawngah a chuang a, a kîr leh ta a.

Ramhuai chhuahsan hnua erawh kha chuan Isua hnêna awm reng a ngên a. Nimahsela Isua’n, ‘I inah haw la, Pathianin i tân thil a tihsak che hi a ropuizia va hrilh rawh,’ tiin a kaltîr ta a. Tichuan a kal a, khawpui chhûng zawng zawngah chuan Isua’n a tân thil a tihsak ropuizia chu a tlângaupui a.”

(Luka 8:26–39, NIV)

Thawnthu ATangin

Hê Thawnthu i chhiar pahin, thil thleng chungchâng sawina awmzenei bîk deuh lâi nia i hriat chu a hnuaiah rîn zêl ang che. __________________________________________

__________________________________________________

Hê thil thleng chungchâng a tobul lam chhiar la, thil thleng hlauhawm tak an hmachhawn lâia Krista leh A zirtîrte nuntawng leh rilru put hmang kha sawi ang che.________

__________________________________________________

Krista nêna an intawh hma leh hnua ramhuai–man pa dinhmun târ langtu thumal chu thaibial hnan zêl la. Engtin nge hei hian Krista lalram awm dân leh Setana lalna hmun danglam dân an târ lan?___________________________

__________________________________________________

Hê Thawnthua i thil hmuh behchhanin, engtin nge ramhuaite’n Isua awmpuina hi an chhân lêt thin? Khâ thil thleng an hmuh khân, Isua thiltihtheihna chungchâng chu zirtîrte leh khata awm vete khân engtin nge an sawi i rin?

__________________________________________________

______________________________________________

Engtin nge khâ thil thleng kha khâng lâi thingtlâng khuaa mite khân an dawnsawn? Khaw danga fak leh châwimâwi chunga Isua lo lâwmtute nên engtin nge an danglamna hi i khâikhin ang?__________________________________

__________________________________________________

Hei hian Krista an lo hriat tawh dân eng nge a târ lan?_____

__________________________________________________

Engvângin nge ramhuai–man khân Isua bula awm zui zêl a duh êm êm? ____________________________________

__________________________________________________

Engtin nge Isua’n a chhân a, engati nge Isua’n a thil hriat chungchâng chu mi dangte hnêna hrilh ve zâwk tûra a tih?

__________________________________________________

Thu Pawimawh:

“Nunna Thu atîr ata awm kha, kan bengin kan hriat kha, kan mitin kan hmuh kha, kan en reng a, kan kuta kan dap kha, chu mi chanchin chu; (chu mi Nunna chu a lo lang ta a, kan lo hmu a, kan hriattîr bawk a, chu chatuan Nunna, Pa hnêna awm kan hnêna lo lang chu kan hrilh che u a nih hi); chû mi kan hmuh leh kan hriata chu in hnênah kan hrilh ve che u a nih hi, nangni pawhin min pâwl ve theih nân; keini min pâwlna chu Pa leh a Fapa Isua Krista pâwlna a ni tawh reng si a. Tichuan, kan lâwm a famkim theih nân hêng thute hi kan ziak a nih hi” (1 Johana 1:1–4, ESV).

“Amah chu in fak tûra chu a ni, hêng in mita in hmuh tâk thil ropui tak leh râpthlâk takte tihsaktu che u in Pathian a ni. In pî leh pute chu Aigupta ramah sawmsarih an chhuk a; tûnah chuan tam lama vâna arsi zâtin Lalpa in Pathianin a titam ta che u a ni” (Deuteronomy 10:21, 22, NASB).

“Hawh u, Pathian tih zawng zawngte u, ngâithla rawh u, tichuan ka nunna tâna a thiltih chu ka hriattîr ang che u. Ani chu ka kâin ka au va, ka leia châwimâwiin a awm a. Ka thinlunga sualna ka ngaihsak chuan Lalpan mi ngâithla lo vang; nimahsela, Pathianin mi ngâithla tak tak a; Ka tawngtâina thawm chu a bengkhawn a ni” (Sâm 66:16–19, NLT).

“‘Ka thil tih apiang min hrilh zêltu mi pakhat a awm a, lo kal ula, en teh u; Krista a ni thei âwm em?’ a ti a. Anni chu khua ata chu an lo chhuak a, a hnên lam an pan ta a.” (Johana 4:29, 30, The Message).

“Anni chu khawvêla mi an ni lo, kei khawvêla mi ka ni lo ang bawk hian. Anni chu thutakin tithianghlim rawh, i thu chu thutak a ni. Nangin khawvêla kei mi tîr ang khân, kei pawhin anni chu khawvêlah ka tirh hi” (Johana 17:16–18, NCV).

Hriat Zui Atân: “ ‘An thinlung chu Isua lama hertîrin a awm a, a hnênah, “LALPA, min chhanhim rawh, kan boral dâwn hi le,’ an ti a. Chutiang taka au chhuakte chu ngaihsak lohin an awm ngâi rêng rêng lo.”—Ellen G. White, Chatuan Nghahfâk, (2nd Edition, 2014), p. 370.

“Chhandamna chanchin tha puan darh hna thawhna hi a ni Chhandamtu kianga min awmtîrtu ber zâwk chu.”—Ellen G. White, Chatuan Nghahfâk, (2nd Edition, 2014), p. 377.

Mahni Nun Nêna Dawhzawm Tûr

Sabbath: Chhiar tûr: 1 Johana 1:1–4. Engtin nge i Ngaih? tih kha chhiarin, zawhna awmte chhâng nghâl ang che. Ramhuai–man dam leh emaw ruihhlo ngâi dam leh emawte kan nih loh chuan keimahni nuna Pathian thiltihtheihna hi a tak a nihzia kan ngaihtuah lêm loh bâkah, a tak ni thei tûr pawhin kan ngâi lo deuh chawk. Chutianga an piantharna thute pawh a ni tho. Bible-a chuang rinna mi liante kha ngaihtuah ta ila, thenkhat chu pian leh mûrna atanga ropui ve rêngte pawh an nih theih lâiin, thenkhat chu piantharna boruak duhawm tak changte an ni. Kan châng thlanah hian, Pathianin thil A lo tihsak tawh che chungchâng testimoni sawi thei tûra ngiat i ni lo’m ni? Chûbâkah, hê thu hi chîk takin ngaihtuah vang vang teh: “Krista zârah thiamchantîr, Pathian fanû leh fapate leh sual thuneihna laka chhanchhuahte kan ni. Thlarau Thianghlim zârah, . . . nun thianghlima nung thei tûra chakna pêk kan ni.” (Fundamental Belief 10, The Experience of Salvation).

Sunday: Chhiar tûr: Matthaia 28:18. Bible Thawnthu tih kha chhiar la, Thawnthu ATangin tiha zawhnate kha zir zui nân hmang nghâl ang che. Tûn kâr zirlâi hian ramhuaite chunga Krista thiltihtheihna min târ lansak a. Thenkhat chu pawh ngam rual loha hlauhawm angte pawhin an lang a ni thei e; mahse, Krista’n chhandam phâk loha hlâ tu mah a nei ve lo. Hê Thawnthua a khawi lâi nên hian nge inzawmna in neih deuh a, nangma tân eng thuchah nge Pathianin a neihsak che? Hê chânga nangma tâna Pathian thuchah chu eng nge ni? ___________________

__________________________________________________

Thawhtanni: Chhiar tûr: Luka 8:38, 39. Chângvawn hi Luka 8:38, 39 thu “Ramhuai chhuahsan hnua erawh kha chuan Isua hnêna awm reng a ngên a. Nimahsela Isua’n, ‘I inah haw la, Pathianin i tân thil a tihsak che hi a ropuizia va hrilh rawh,’ tiin a kaltîr ta a. Tichuan a kal a, khawpui chhûng zawng zawngah chuan Isua’n a tân thil a tihsak ropuizia chu a tlângaupui a,” (NIV) tih a ni. Bible-ah emaw, khawvêl chanchin atang emaw pawhin, mi tu emaw, khatiang taka testimoni sawi thiltitheih dang tu nge sawi tûr i neih le? Tûn kâr chhûng hian tu mi pathumte hnênah nge Krista nêna in inlaichînna chungchâng i hrilh theih ve ang le? Engati nge?______________________________

__________________________________________________

Thawhlehni: Chhiar tûr: Thufingte 15:11. Thu Êng-a Chatuan Nghahfâk thu lâk chhuah kha chhiarin, tanpui hleih theih loh âwm dinhmuna dingte tâna awmzia a neih dân tûr ngaihtuah teh. Pi Ellen White–i thusawi hi ngaihtuah la: “A thute chuan chûng mi vânduai takte rilru thim zo vek tawh chu a zuk fan chhuak a. Anmahni sawisatu ramhuaite laka chhanchhuak thei kiangah an awm a ni tih chiang lêm lo taka hriatna an nei tan ta a. Isua kebulah chuan an bawkkhup a, chibai an bûk a; nimahsela, an chunga zahngâi tûra an ngen tan dâwn chiahin, anmahni hmangin ramhuaite chu an au chhuak a.”—Chatuan Nghahfâk, pp. 374.

Mite’n huat thu an sawi chhuah mêk lâi pawhin, Krista’n a hmuh theih ramhuai la luah loh an thinlung chhûngah a la awm thei tho mai a, chûng chu siam that theih a la ni. Pathian hlat taka awm tawh anga ngaih theih tûr tu nge hriat i neih, Lalpa hriat châkna pawh nei tawh lo chî? A thinlung chhûnga hmun zîm tê la awm chuan Pathian chhân duhna a neih theih nân tawngtâisak ang che. Vawiin thu chhiar atang hian eng thlamuanna thu nge i hmuh thar?___

__________________________________________________

Nilaini: Chhiar tûr: Thu Pawimawhte tih hian mimal testimoni sawi hlâwkpuiawm theihzia a târ lang a. Chîk takin chhiar nawn leh teh, pawimawh deuh bîk riauva i hriat pathum thlang chhuak la. Mi tute’n emaw mi dang hnêna awmze nei deuh taka an testimoni an hrilh theih dân tûr kawngte ngaihtuah la. Hla hmangin emaw, thu ziak hmangin emaw, ngilneihna lantîr leh duhsakna hmangte pawhin an rilrû chawhthawhsak theih an ni mai thei a sin! Krista zahngaihna changtu rêng rêng chuan sawi tûr eng emaw chu an nei ngei ngei zêl. Bible-a tu chanchin hi nge i ngaihtuah deuh fo thin? Engvâng nge?______________

__________________________________________________

Ningani: Chhiar tûr: Sâm 71:17, 18. Ramhuai–man hi atak ngei, phat rual loha khawvêl khawi hmun hmun emawa thleng thîn a ni. Hmun dang danga ramhuai chêt dân hi a inang lo hlawm hle a; mahse, atak chu a ni ngei si. Chutiang chunga hnehna channa chuan sual chunga hnehna chan chu a entîr a, chûng chu Krista khawngaihna leh zahngaihna zâra thleng a ni. Ringtu lo ni tâte rêng rêng hian, ropui taka lo thleng a ni emaw, damchhûnga hmasâwn chho hret hret emaw pawh ni se, mi dangte hnêna hrilh chhawn tûr, rinna chanchin thiltithei tak chu a awm zêl tho a ni. Mi tin chanchin hi an pawimawh vek a, chutiang chu sawi chhuah theuh tûr pawh a ni. Nang i chanchin eng nge ni ve? Mahni testimoni ziak chhuak tûr chuan, hêng thil pathumte hi ngaihtuah tel ni se: 1) Krista nêna kan intawh hmaa ka nun dân te; 2) Krista hniakhnung ka zui theih nâna thutlûkna siam tûra thil thleng/nuntawng pawimawh bîk lâi deuh leh; 3) chû thilin ka nuna nghawng/rahchhuah a neih zui dân. I pianthar dân chanchin ziak la, Bible kârah i zep tha khiau dâwn nia. Krista nêna zinkawng zawh mêk in ni tih hriattîr fo tûr chein, i en thîn dâwn nia. Vawiin thu chhiar hi nangma nunah atakah chantîr ngei ang che.

Zirtawpni: Chhiar tûr: 1 Johana 1:1–3. Mi tuin emaw nangma hnêna Krista chanchin a hrilh lâi che kha ngaihtuah lêt leh la. Engtin nge i lo dawnsawn? Tûn lâia thleng ni ta zâwk se engtin nge i chhân i rin? Mi dangte hnêna hrilh theihna tûr remchânnna dîltu thahnemngâi takte hi mi dangte hnêna hrilh taima takte an ni chawk. Chutiang kawngah chuan eng dinhmuna ding niin nge i inhriat ve?

__________________________________________________