2025 2nd Quarter Teenager Zirlai-2-na
Zirlâi 2-na April 12, 2025
HMUH CHU RINNA A NI
Chângvawn: “‘Chhinchhiahnate leh thilmakte in hmuh loh chuan in ring tawp lo vang,’ a ti a. Upa chuan a hnênah, ‘Ka pu, ka fa thih hmain lo chhuk ta che,’ a ti a. Isua’n a hnênah, ‘Haw leh ta mai rawh, i fapa chu a dam tawh e,’ a ti a. Chu mi chuan Isua’n a hnêna thu a sawi chu a ring a, a kal ta a,” (Johana 4:48–50, NIV).
Chhiar Tûr: Johana 4:43–54.
Zir Zauna: Chatuan Nghahfâk, bung 20.
Thu Êng
“Upa hian a rin hmaa a dîlna hlawhtlinna hmuh hmasak a duh a; nimahsela, a dîlna chu Isua’n a hria a, malsâwmna pawh pêk a ni tih Isua’n a sawi chu a pawm hmasa phawt tûr a ni. Hei hi keini pawhin kan zir a tûl hle mai. Pathianin kan dîlnate min ngaihthlâksak tih kan hriat hmasak avânga ring tûr kan ni lo va, a thutiamah kan innghat phawt tûr a ni zâwk e. . . . A malsâwmna kan dîlin, a malsâwmna chu kan dawng tih kan ring tûr a ni a, chumi avâng chuan a hnênah lâwmthu kan sawi nghâl tûr a ni.”—Chatuan Nghahfâk, (2nd Edition, 2014), p. 209.
Engtin Nge I Ngaih?
Inchhawng sâng emaw, khâm ko sâng tak emaw atanga inkhâi thlâk leh hruia inthlung chunga zuan thlâk tih ang chi te i ti ve tawh ngâi em? A nih loh leh, mi dangte rinchhan nihna ang chi hna pawimawh takte i chelh tawh em? Nau awm ang chi te tal pawh? Chutiang thila tawn hriat i neih tawh chuan mi dang rinchhan chungchâng atanga i thil zir chhuah chu han ziak chhuak teh:
I Hria Em?
‘Hmuh chu rinna’ a nihna chungchângah hian, kum eng emaw ti kal taa zir bingna an neihah chuan, mihringah hian tlâk hlauhna hi pianpui rêng a ni em tih en fiah a ni a. Naute vâk thei hret hret ang rualte hi dawhkânah an awmtîr a. Chutiang dawhkân dang nên chuan Plexiglas fîm hmangin an dawh zawm a. Chûng nautê-te chuan an tla thei dâwna inngâiin tu mahin chulâi chu an vâk thleng duh lo ve tlat mai a nih chu!
Bible Thawnthu
“Chumi ni hnih hnuah chuan chuta tangin a chhuak a, Galili ramah a kal ta a. Isua ngeiin, ‘Zâwlnei chu ama khaw lamah chuan châwimâwiin a awm ngâi lo’ tih a hriattîr si thîn a.
“Chutichuan, Galili ram a lo thlenin, Galili rama mite’n an lo lâwm a, Jerusalem khuaa kût lâia a thil tih zawng zawng an hmuh avâng khân; anni pawh chu kûtnaah chuan an kal ve si a.
“Galili rama Kana khua, tui uain-a a chantîrna kha a lo thleng leh a. Upa tu emaw a awm a, a fapa Kapernaum khuaah a dam lo va.
“Isua Judai ram ata Galili ramah a lo kal tih a hriat veleh a hnênah a han kal a, a fapa zuk tidam tûrin a ngên chiam a, a thi lek lek si a.
“Isua’n a hnênah, ‘Chhinchhiahnate leh thilmakte in hmuh loh chuan in ring tawp lo vang,’ a ti a. Upa chuan a hnênah, ‘Ka pu, ka fa thih hmain lo chhuk ta che,’ a ti a.
“Isua’n a hnênah, ‘Haw leh ta mai rawh, i fapa chu a dam tawh e,’ a ti a. Chu mi chuan Isua’n a hnêna thu a sawi chu a ring a, a kal ta a.
“A kal chhuk lâi mêkin a bâwihte’n an lo hmuak a, ‘I fapa chu a dam ta,’ an lo ti a. Ani chuan an hnênah a dam tirh lâi a zâwt a. Anni chuan a hnênah, ‘Niminah ni her chauhvin a khawsik a reh ta a ni,’ an ti a.
“Chutichuan, a pain Isua’n a hnênah, ‘I fapa chu a dam tawh e,’ a tih lâi tak chu a ni tih a hre ta a; amah leh a chhûngte’n an zain an ring ta a.
Chu chu Isua’n a chhinchhiahna tih a vawi hnihna a ni, Judai ram ata Galili rama a lo kalin.”
(Johana 4:43–54, NIV)
Thawnthu ATangin
A fapa damna dîl khân, mi lian khân Isua thusawi chu ringin, in lam panin a chhuak ta nghâl a; a fapa chu a tihdamsak tawh a ni tih a ring hmiah mai a ni. Hei tak hi he thil lo thlen theih nâna a thil mamawh chu a ni “a rin hmaa a dîlna hlawhtlinna hmuh hmasak.”—Ellen G. White, Chatuan Nghahfâk, p. 209.
Kha hotupa’n Isua hnên a rawn pan chhan tak kha eng ni tûrin nge i ngaih?
A thil thlîr dân lo danglam tâkna chhan ber chu eng nge ni?
In lam pana a hawn leh lâi khân hotupa khân eng nge a rin tâk?
Marka 13:22-ah chuan thlante bum nân hun hnuhnungah Krista der leh zâwlnei derte lo chhuakin, “chhinchhiahna leh thilmakte” tih an la tum dâwn a ni tih hrilh lâwk kan ni a. He thu leh Galilee ram Kana khuaa mite’n chhinchiahnate leh thilmakte hmuh an duh thu Isua sawi kha khâikhin ang che. Engtin nge Isua’n milian hnêna “hmuh chu rinna a ni” a tih ang kha hêng zawng zawngah hi chuan bel vek theih a ni dâwn lo tih i rin theih ang?
Thu Pawimawhte
“In zînga indona leh inhnialnate hi khawi atanga lo chhuak nge ni? In taksa pêngahte indona siam thîntu, in duhzâwng atangte chuan lo chhuak a ni lo vem ni? In châk a, in nei si lo va: tual in that a, in awt a, in nei thei si lo va; in inhnial a, in indo va; in dîl loh avângin in nei lo va; in dîl a, in dîl dik loh avângin in hmu lo, in nawmsak nân hman in tum si a” (Jakoba 4:1–3, NIV).
“Chutichuan, zirtîr dangte chuan a hnênah, ‘Lalpa chu kan hmu ta,’ an ti a. Nimahsela, ani chuan an hnênah, ‘A kuta thîr khenna serte kha ka hmuh a, thîr khenna serahte chuan ka kutzung ka khawih luh a, a nâka ka zen meuh loh chuan ka ring lo vang,’ a ti a” (Johana 20:25, NIV).
“Isua’n a hnênah, ‘Nang chuan mi hmuh avângin i ring a ni; hmu lova ring apiangte chu an eng a thâwl e,’ a ti a. Isua’n zirtîrte hmaah chuan chhinchhiahna dang tam tak a ti teuh va, chûng chu he lehkhabuah hian ziak a ni lo; nimahsela, hêng hi Isua chu Krista, Pathian Fapa a ni tih in rinna tûr leh, in rin a, a hminga nun in neihna tûrin ziak a ni” (Johana 20:29–31, NIV).
Hriat Zui Atân
“A malsâwmna kan dîlin, a malsâwmna chu kan dawng tih kan ring tûr a ni a, chumi avâng chuan a hnênah lâwmthu kan sawi nghâl tûr a ni. Tichuan, kan mamawh lâi takin malsâwmna chu kan chungah a lo thleng zêl dâwn tih ring nghetin, kan hna pual chu kan thawk mai tûr a ni.”—Ellen G. White, Chatuan Nghahfâk (2nd Edition, 2014), p. 209.
Mahni Nun Nêna Dawh Zawm Tûr
Sabbath
Chhiar tûr: Johana 4:43–54
Vawiin Bible châng târ lanah hian milian (upa) pakhatin a fapa damlo tihdamsak tûrin Isua a ngen thu kan hmu a; Isua kha chuan chu thil bâk pawh tihsak a duh tlat mai. A fapa damlo chu tihdamsak a nih theih nâna thutlûkna pawimawh tak a siam theih nân eng tanpuina nge a dawn? Châng 50-na chhiar la, Isua’n kha milian hnêna a sawi kha keini pawhin ni tinin kan pawh ve thei reng a ni. Kan tih tûr zawng chu, kha milian anga ‘rin’ mai a ni. “He Thu-ah hian, chhandamna atâna hriatna neih tûl chu Pathianin mihring hnênah a pe a ni. Pathian Lehkha Thu Thianghlim hi thuneitu chungchuang, thuneihna pâi leh a thil ruahman puan chhuahna dik lo thei lo chu a ni” (The Holy Scriptures, Fundamental Belief, No. 1).
Sunday
Chhiar tûr: Marka 13:21, 22
Hêng Bible chângahte hian Isua lo kal leh dâwna thil thleng tûrte hriattîr kan ni a. Setana’n bumna thil chi hrang hrangte nasa takin a hmang dâwn a ni. Chutih hunah chuan “Hmuh chu rinna a ni” tih hi a taka hman chi a ni tawh dâwn lo. Khawvêl tâwp dâwn chungchânga Isua’n vaulâwkna thu min hrilh bengkhawn that hi a pawimawh hle dâwn a. Thil lan dân ngawt âia a Thu kan rinchhan a ngâi dâwn a ni. Chutiang thil lo thleng tûr atân chuan, vawiin hian duhthlanna i siam dâwn em?
Thawhtanni
Chhiar tûr: Marka 11:24
Isua thusawi chu ringin, milian khân a la hmu lo chungin, a fapa chu tihdam a ni ngei ang tih ringin, a hawng ta nghâl a. Chatuan Nghahfâk bu-ah chuan hmanhmawh tak pawha hawng lovin, Isua sawi ang chu a ni ngei ang tih a ring hmiah tih min hrilh. Kha milian ang êm kha chuan Isua hnêna kan ngenna hmâichhanah kan hrilh ve thei lo nachungin, vawiin zirlâi atang hian tawngtâi chungchângah eng zirlâi nge kan zir chhuah ve theih ang?
Thawhlehni
Chhiar tûr: Genesis 3:1–7
Pathian khân Evi leh Adama te kha huan lâi taka thing rah ei lo tûra hriattîrna bîk tak chu a lo pe tawh a. Mahse, anni khân an ei ta tho mai. Genesis 3:1–7 chhiar la. Châng 6-na behchhanin, Evi’n thing rah a ei tâk chhan pathum chu engte nge ni?
1. ___________________________________
2. ___________________________________
3. ___________________________________
Pathian thupêk zawm âiin Evi’n kha lâi hmuna a mita a thil hmuh atanga a hriatnate chu a rinchhan ta zâwk a. Mahse, Pathian chuan kan ngaihdân leh tih ve theih lam âia, a Thu kan rinna lantîr zâwk thîn tûrin min ko a ni. Thil lan dân ang ngawta kal lova, Pathian Thu chu rinchhan zâwk tûrin vawiin hian eng duhthlanna nge i siam theih ang?
Nilaini
Chhiar tûr: Hebrai 11:1leh Hriat Zui Atân
Hmu thei lo chung pawh a, Pathian Thu chu kan ring tlat a nih chuan, chu chu rinna sâwizawi dân chu a ni. Hetiang hian, kan rinna chu thil hmuh lohte hriat fiahna, thil beisei awm ngeia hriatna a lo ni ta a ni. Pathianin a Thu hmangin thil tam tak min tiam a. Tûn kâr chhûng i tawngtâinaa a taka chan i duh tûr thutiam pahnih chu ziak chhuak ang che:
- ________________________
- ___________
Ningani
Chhiar tûr: Johana 20:29
Mi tuin emaw hlâwkna leh lukhawng nei lo an hlui che emaw kha ngaihtuah la. I ringhlel deuh nge i bawh huam huam mai zâwk? Mahse, tiam lâwk ang tak chu a lo ni lawi a. Tûnlâi hunah chuan, mite hi an rinawm loh leh hlemhlêt êm vângin, tu nge rin a, rin loh tûr thutlûkna siam thiam a har ta hle mai. Chuti chungin, Bible-a thu chuangte chu mita hmutute ni ve kher lo mah ilang, kan rinchhanin, innghah nân kan hmang thei zêl thung a ni. Vawiin Bible châng thlanah hian, mita hmu lo chung pawha rinna nei tûr kan ni tih eng thu nge Isua’n a sawi?
Zirtawpni
Chhiar tûr: Johana 1:14; Johana 3:16 Chhandam kan nihna tûrin Pathian Thu kan rinchhan ngam a pawimawh hle a ni. Johana 1:14; Johana 3:16 chhiar la. Kan rinna hi Pathian Thu behchhan a nihin, kan rinchhan tak chu tu nge ni zâwk? Chumi kan rinna rah chu eng nge ni?