2025 2nd Quarter Teenager Zirlai-3-na

Zirlâi 3-na                                April 19, 2025

tihdam i duh em?

Chângvawn:  “Isua’n a mu chu a hmu a, chutiangin rei tak a awm tawh tih a hria a, a hnênah, ‘Tihdam i duh em?’ a ti a. . . . Isua’n a hnênah, ‘Tho la, i âwngphah lâ la, kein kal tawh rawh,’ a ti a.”  (Johana 5:6–8, NIV).

Chhiar Tûr:  Johana 5.

Zir Zauna:  Chatuan Nghahfâk, bung 21.

Thu Êng

“Chu damlo chu a zâmpherah chuan a lo mu ngât a, a khât tâwkin dîl tui chu a en zauh zauh reng a. Chutih lâi tak chuan, lainatna leh ngilneihna nei hmêlpu tak mi pakhat hi a lamah chuan a lo kûn a, ‘Tihdam i duh em?’ tiin a rawn zâwt a.  A thinlungah chuan beiseina a lo nung thar leh ta a. . . .   Isua’n he damlo hi amah ring tûrin a hrilh hranpa lêm lo va, “Tho la, i âwngphah lâ la, kein kal tawh rawh,” a ti mai a ni. Damlo chuan Isua thu chu a ring a, a tihrâwl tin leh hriatna thazâm tin chu an lo chak thar ta thut a, a ke zeng khawng zo vek tawh chu a lo che thei ta a.”—Chatuan Nghahfâk (2nd Edition, 2014),  pp. 211, 212.

Engtin Nge I Ngaih?

Thutlûkna i siam tawh azawnga pawimawh zual pathumte chu han ziak chhuak teh:

1.

2.

3.

I Hria Em? 

Johana 5:1hian Isua Jerusalem-a a kal chhan chu ‘Juda-te kût’ hmang tûrin a ni tih min hrilh a. Juda mi zawng zawngte Jerusalem-a an lo kal khâwm chhan tûr kût chi hrang pathum a awm a, chûngte chu:  1) Kalhlen Kût leh Chhang Dâwidim Telh Loh Kût te; 2) Chawlhkâr Kût (Pentekos Kût an tih bawk) leh,  3) Bâwk Te Kût a ni. Chûng pathum zînga pakhat chu hmangin Isua hi a lo kal a, Bethesda Dîl kianga kebâi kha a tidam ta a ni.

Bible Thawnthu

 “Chûng thil hnu-ah chuan Juda-te kût pakhat a awm a; Isua chu Jerusalem khuaah a han kal a. Jerusalem-ah chuan berâm kawngkhâr kiangah dîl a awm a, chu chu Hebrai tawngin ‘Bethesda’ an ti a, hulhliap panga a nei nghe nghe a.

“Chûngah chuan damlo te, mitdel te, kebâi te, zengte tam tak an mu hlawm a.* Chutah chuan kum sawmthum leh kum riat na tawh mi tu emaw a awm a.  Isua’n a mu chu a hmu a, chutiangin rei tak a awm tawh tih a hria a, a hnênah, ‘Tihdam i duh em?’ a ti a.

“Mi damlo chuan, ‘Ka pu, tui a fâwnin dîla mi dahtu ka nei lo va, ka kal chhûngin mi dangin mi pen thlâk khalh thîn,’ a ti a, a chhâng a.

“Isua’n a hnênah, ‘Tho la, i âwngphah lâ la, kein kal tawh rawh,’ a ti a. Thâwkleh khatah chu mi chu a dam ta nghâl a, a âwngphah chu a lâ a, a kal ta a.  Chumi ni chu Chawlhni a ni a.

“Chutichuan, Juda te’n a dam ta-a hnênah chuan, ‘Chawlhni a nih hi, i âwngphah i lâk a thiang lo ve,’ an ti a.

“Ani chuan an hnênah, ‘Mi tidamtu ngeiin ka hnênah, “I âwngphah lâ la, kein kal tawh rawh,” mi ti a ni,’ a ti a, a chhâng a.

“Anni chuan a hnênah, ‘I âwngphah lâ la, kein kal tawh rawh,’ i hnêna titu chu tu nge ni?” an ti a, an zâwt a. Nimahsela, a dama chuan tu nge a nih a hre lo va, chutah chuan mipui an awm avângin Isua a kal bo ta si a.

“Nakinah chuan Isua’n ani chu Pathian biak inah a hmu a, a hnênah, ‘Ngâi rawh, i dam tak hi, thil tisual leh tawh suh, chuti lo chuan thil tha lo lehzual i chungah a lo awm dah ang e,’ a ti a.

“Chu mi chu a va kal a, Juda-te hnênah chuan a tidamtu chu Isua a ni tih a hrilh a.

“Chutichuan, Chawlhnia chûng thilte chu a tih avângin Juda te’n Isua an tiduhdah ta a.

“Nimahsela, Isua’n anni chu a bia a, an hnênah, ‘Ka Pain tûn thleng pawhin hna a thawk reng a ni, kei pawhin ka thawk ve a ni,’ a ti a.

“Chutichuan, Juda te’n tihhlum an tum lehzual a, Chawlhni a bawhchhiat avâng chauh pawh a ni lo va, Pathian ama Pa-ah a vuah a, Pathian tluka a insiam avâng pawhin a ni.

“Isua’n an hnênah, ‘Tih tak meuhvin, tih tak meuhvin ka hrilh a che u, Fapain mahniin eng mah a ti thei lo, Pa thiltih a hmuh chauh lo chu; thil a tih ang apiang chu, Fapa pawhin a ti ve thîn,” a ti a.

(Johana 5:1–19, NIV).

Thawnthu ATangin

Engati nge Isua’n kha kebâi hnêna, “Tihdam i duh em?” tih a zawh kher?

Engati nge Isua’n khâ pa khân tihdam a duh ang tih ringa A chêt nghâl mai loh?

Hê thu hian mihringte’n duhthlan theihna zalênna kan neih min zahsak zia eng nge min hrilh?

Hê thu hian thulûkna kan siamin nghawng a neih dân chungchâng eng nge min hrilh?

Hê thu hian Sabbath serh dân chungchâng eng nge min zirtîr?

Hê thu hian mi dangte mamawh ngaihsak chungchâng eng nge min zirtîr?

Thu Pawimawhte 

“Tisa thiltihte chu a lang fiah a ni; chûng chu hêng hi a ni: inngaihna te, bawlhhlawhna te, hurna te, milem biakna te, dâwithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsikna te, zu ruihna te, zu hmun hlimna te, chutiangte chu; chûng kawngah chuan tûn hmaa, ‘Chutiang thil tih hmangte chuan Pathian ram an chang lo vang,’ tia ka hrilh lâwk che u ang khân ka hrilh lâwk che u hi” (Galatia 5:19–21, NIV).

“Isua’n an hnênah chuan, ‘Chawlhniah hian tihthat nge thiang, tihchhiat? Chhandam nge thiang, tihhlum?’ tiin a zâwt a. Nimahsela, an ngâwi ta reng a” (Marka 3:4, NIV).

“Chutichuan, Pathian mite tân chuan Chawlhnia chawlhna a la awm ta fo va. Tu pawh Pathian chawlhnaa lûta chawl ve tawh chuan, Pathian tih ang khân a hnathawhte chu a chawlhsan ve thîn. Chutichuan, tu mah chu mi âwih loh entîrna anga awma an tlûk loh nân, chu chawlhnaa lût tûr chuan thahnem i ngâi ang u” (Hebrai 4:9–11, NIV).

“Amah vekin an hnênah chuan, ‘Chawlhni hi mihring tâna siam a ni a, mihring hi Chawlhni tâna siam a ni lo; chutichuan, Mihring Fapa hi Chawlhni chungah lam pawh hian Lal a ni,’ a ti a” (Marka 2:27, 28, NIV).

Hriat Zui Atân

“Pathianin tu mâ zawm theih loh thupêkte a pe lo va, a dânahte hian âwm lo tak thupêk emaw, hmasialna tela khapna emaw a awm rêng rêng lo.”—Ellen G. White, Chatuan Nghahfâk (2nd Edition, 2014), p. 214.

“Pathian Chawlhni thianghlim chu mihring tâna siam a ni a, chu ni thianghlima zahngaihna thiltih chu, a ni thianghlimna nên a inrem thlap a ni.”—Ellen G. White, Chatuan Nghahfâk  (2nd  Edition, 2014), p. 218.

Mahni Nun Nêna Dawh Zawm Tûr

Sabbath

Chhiar tûr:  Jakoba 1:5. 

Thlarau Thianghlim hruainain kan mamawhte hria a, kan sualnate hriatna neiin, sim duhna leh Isua chu Lalpa leh Chhandamtua pawm tûrin rinna kan sâwizawi thîn. . . .  Thlarau zârah piantharna leh tihthianghlima nuna nungin, Thlarau chuan kan rilrûte min tihtharsak a, kan thinlungahte chuan Pathian hmangaihna dânte min ziahsak a; nun thinghlima nung tûra chakna min pe thîn.” (Fundamental Belief 10, The Experience of Salvation). Nun thianghlimna nun zârah duhthlanna fing kan siam thîn. Thutlûkna i siam tawh zînga finthlâk ber kha ngaihtuah lêt leh la. Engati nge chutianga thutlûkna fing ber mai chu i lo siam? Chû thutlûkna i siamin a rah chhuah chu engte nge ni? Chuta tang chuan thutlûkna fing siam pawimawhzia engte nge i zir chhuah?

Vawiin atâna Bible châng thlan khawi lâi thu hian nge thutlûkna fing siam tûra tanpui thîn che?

Sunday 

Chhiar tûr:  Johana 10:10. 

Ni khat chu Isua’n Jerusalem kawtthlêr a fang a, chutah chuan mi pakhat kum 38 zet zeng hrîin a man tawh chu a hmu hlauh mai a. A kiangah chuan ding chatin, he Bible châng hmang hian zawhna mak ber mai chu a zâwt ta a ni:  “Tihdam i duh em?” tiin. Khatah khân pa pakhat kea kal thei lo, tlân thei lo, zuang thei lo leh lâm ve thei ngâi lo chu a awm a. Mahni pawha chesawn hlei thei lo hnênah chuan Isua’n tihdam a duh leh duh loh a zâwt mauh mai a nih chu! Khâ zeng pa khân beisei rêng a nei tawh lo pawh a ni maithei e. Kum 38 zet zenga mu hlâwm reng tawh chuan dam beiseina rêng nei tawh lo vin, intihdam tuma beih zui zêl châkna pawh a nei tawh lo a ni thei bawk. Khâ leh chen khatiang a lo nih tawh avâng khân, lo dam leh pawh ni se eng mawhphurhna mah la thei tak tak tawh lo tûrah a inngâi pawh a ni mahna.

Vawiin kan thu chhiarah hian, rûkru kha tu nge ni rêng le? Eng thil nge a rûksak emaw, tihchhiatsak tawh che? A châng tâwp lam kha chhiar nawn leh la. Eng thil nge Isua’n i hnêna sawi nia i hriat? Chu nun tam chu neih ve ngei i duh a ni tih Pathian hnênah hrilh nghâl vat ang che. Mahni intihchhiatna nun kalsan i la duh chiah lo a nih pawhin, chû pawh chu a hnênah hrilh tho la. Hriatna dik i neih theih nâna tanpui tûr chein a Thlarau Thianghlim a pe dâwn che nia.

Thawhtanni

Chhiar tûr:  Johana 5:6–8

Chângvawn thuin min hrilh chu: “Isua’n a mu chu a hmu a . . .” tih a ni. Chu lâi thil awm dân chu Pi Ellen White-in heti hian a sawi: “Nimahsela, damlote zîngah chuan tanpui ngâi zual bîk pakhathi Isua’n a va hmu a. Kum sawmthum leh pariat lâi zeng kebâi a nih avânga hna engmah thawk thei lo a ni a. A kebâina chhan hiama suahsual vâng a ni nghe nghe a. Khawhar tak leh thian pawh nei lova, Pathian zahngaihna pawn lama awm niin a inhria a; chutiang dinhmun duhawm lo takah chuan kum tam tak a lo awm tawh a ni.” (Chatuan Nghahfâk,pp.  210, 211). Johana 5:6–8châng thlan kha chhiar leh la. “Tihdam” tih âiah khân nangma harsatna lam sawina thu mal hrang hrangte hmang zâwk ang che. Entîr nân, zirna lamah zir puitlin a ngâi tih i hria a, mahse i tui tawh mang si lote pawh a ni thei e. I thu chu hetiang hi a ni mahna:  “Zir puitlin i duh em? Theihtâwp chhuah tharin i zirlâi zirah thahnemngâi la, zir zo ngei ang che.”

Thawhlehni

Chhiar tûr:  Marka 3:4

Johana 5:10-a lo dam taa chhânna khân, ama hnêna a puanthuah têl tûra hrilhtu thu sawitu chungchâng a târ lan?

A hnêna thil sawitute tawngkam khân, ani damna âia Sabbath serh chungchâng dânte an ngaih pawimawhzia a târ lang a. Chutiang chungchâng chu Isua’n eng angin nge a ngaih? Hê mi chungchâng, Sabbath nia intihdam chungchânga zawhna Marka 3:4chhiar la. Isua min kawhhmuhna atangin Sabbath serh chungchâng eng nge kan zir chhuah theih ang?

Nilaini

Chhiar tûr:  Luka 4:16–20, 38–39; Marka 6:2.

He leia rawng a bâwl chhûng khân, Isua’n Sabbath serh dân tûr entîrna dangte pawh min pe a. Vawiin Bible châng thlanin a sawi dânin, engtin nge Isua’n Sabbath a serh? Isua tih dân anga Sabbath serh dân tûr kawng hrang hrangte chu ziak chhuak teh u. Vawiin châng thlana thutiam hi, tihdamna i dîl pahin mahni chanpualah nei nghâl ang che.

Ningani

Chhiar tûr:  Johana 14:13

Vawiin hian Isua chu i hnêna lo kalin “Tihdam i duh em?” tiin rawn zâwt ve ta che selang, i chhânna chu eng nge ni ang le? Eng thil laka tihdamna chantîr tûrin nge i ngen ang?

Zirtawpni

Chhiar tûr:  Ephesi 2:1.  Pi Ellen White-i’n kha kebâi chanchin kha hetiangin min hrilh:  “Chutiang rinna chu kan neih ve phawt chuan keini pawhin, thlarau lama damna kan dawng ve thei. Sualin Pathian atangin min tihrang tawh a, kan nun hian zeng hrî a vei a, dîl kama dam lo khawngaih thlâk tak, amaha kal thei lo ang khân, keimahni ringawt chuan nun thianghlim kan nei thei lo. . . . Insûmkârna nei lova hun rei tak i khawsakna chuan phuar tlat che mah sela, chûng lak atang chuan Krista’n a chhanchhuak thei che a ni.”—Chatuan Nghahfâk (2nd Edition, 2014), p. 212.

Ngaihtuah zui tûr zawhnate:

• Thlarau hrisêlna dinhmun chu eng nge ni?

• Lalpa-ah ka chak deuh deuh nge ka chawrchê tial tial zâwk? • Krista’n eng thil lakah nge “min chhanchhuah” a duh ngawih ngawih?