2025 2nd Quarter Teenager Zirlai-4-na

Zirlâi 4-na                                April 26, 2025

lan dân nge a nihna dik tak zâwk?

Chângvawn:  “Tih tak meuhvin ka ti a che u, ‘Hmeichhe hrin zîngah Baptistu Johana âia ropui zâwk an la chhuak ngâi lo; nimahsela, vân rama mi tê deuh pawh ani âi chuan an ropui zâwk si a.” (Matthaia 11: 11, NIV).

Chhiar Tûr:  Matthaia 11:1–11; 14:1–11; Marka 6:17–28; Luka 7:19–28.

Zir Zauna:  Chatuan Nghahfâk, bung 22.

Thu Êng

“Messia chanchin lo hril lâwktu a nihnaah Johana chu “zâwlnei âia ropui zâwk” a ni a.  Zâwlneite chuan Krista lo lan hma daihin an lo thlîr thîn a, Johana zawngin Amah ngei chu a hmu a, Messia a nih ngei thu vân atanga âwin a rawn puan chhuah pawh a hria a,  Pathian atanga Tirh a ni tih Israelte hnêna puangtu a ni bawk.”—Ellen G. White, Chatuan Nghahfâk(2nd Edition, 2014), p. 234.

Engtin Nge I Ngaih? 

Engtin nge ‘hlawhtlinna’ tih hi i hrilh fiah ang?

• Tûnah hian mi hlawhtling tak i ni mêk a ni tih lantîrna tûr kawng hrang hrangte ziak chhuak la. Hetiang lam hawi sawina a tam thei ang ber ngaihtuah bawk ang che:

• Keima nun hi hlawhtling anga ka inngaih theihna tûr chu  . . .

• Nangma tâna a tha zâwnga huhâng nei lian tak tak mi pathum emaw pali emaw han ziak chhuak teh.

• An hming dawtah chuan, an nihna leh dinhmun, hna hming leh nangmah nêna in inlaichîn dân i ziak bawk dâwn nia.

• Chûng hming i ziah chhuahte chu mi hmingthangte nge ni a, mi hausate zâwk? Mahni hlawhtling i intihna ang chi-te chu an nei ve hlawm em? Nei lo ta se, i ngaihsân zâwng eng nihnate nge an neih hlawm?

I Hria Em?

Wolfgang Amadeus Mozart-a kha a retheih êm vânga mumala vûi leh phûm pawh hlawh lo a ni. Bêlvawtu hmuna phûm a ni a. Chuti chungin Mozart-a rimâwi tum chu classical musician-te zînga mâwi ber leh ngainat hlawh ber anga ngaih chu a ni lawi si a. Martin Luther-a kha Protestant Siamthatna lâi hunah khân “German Hercules” tih ni hialin, Philip Melanchthon-a thung chu mi fing (intellectual), “Siamthatu Thâwm Zâwi” tih a ni thung a; an pahnih tang dûn khân Protestant rinna puanchhuahna, Augsburg Confession tih chu an ziak a. John Weidner-a, Seventh-day Adventist, khân Indopui II–na hun lâia Nazi hnuaia tihduhdahna leh tihhlum hlau Juda leh hnam dang mi eng emaw zât nunna a humsak thung a. A rûkin a thawk thîn a, Indopui II tâwp hnuah chiah chutianga a tih chu hriat chhuah a ni. Israel sorkar bâkah, khawvêl pum puiin ‘mi fel’ tia mi huaisen a châwimâwite zîngah a tel ve hial rêng a ni.

Bible Thawnthu

“Heti hi a ni a, Isua’n a zirtîr sâwm leh pahnihte chu, thu a pêk zawh veleh, chuta tang chuan an khuaahte zirtîr leh thuhril tûrin a kal ta a.

“Johana’n Krista thiltihte chu tân inah chuan a lo hriatin, a hnênah, ‘Lo kal tûra chu i ni nge, mi dang kan la nghâk ang?’ tiin a zirtîrte a palâitîr a.

“Isua’n an hnênah, ‘Kal leh ta ulang, thil in hmuh leh in hriat hi Johana hnênah va hrilh rawh u: mitdelte an mit a lo vâr ta, kebâite kein an lo kal ta, phârte an lo thianghlim ta, bengngawngte pawh an beng a lo vâr ta, mitthite pawh kaihthawhin an awm ta, pachhiate pawhin Chanchin Tha hrilh an dawng ta. Tu pawh ka chunga lungnih lohna hmu lo chu an eng a thâwl e,’ tiin a lo chhâng a.

“Chûng mite chu an hawn veleh, Isua’n mipui hnênah chuan Johana thu a sawi ta a, ‘Eng en tûrin nge thlalêra in kal chhuah kha? Luang thli chhêm nghîn mâw? A nih loh leh, eng en tûr berin nge in kal chhuah kha? Puan nêm sin maw? Ngâi rawh u, puan nêm sinte chu lal inahte asin an awm. A nih loh leh eng vâng berin nge in kal chhuah kha? Zâwlnei en tûrin maw? A nih ngei kha, ka ti a che u, zâwlnei âi pawha ropui zâwk, ‘En teh u, ka tirhkoh i hmaan ka tîr a ni. Ani chuan i hmaah i kawng a siam ang,’ ti a, a chanchin an ziaka kha, hê mi hi a ni.

“Tih tak meuhvin ka ti a che u, ‘Hmeichhe hrin zîngah Baptistu Johana âia ropui zâwk an la chhuak ngâi lo; nimahsela, vân rama mi tê deuh pawh ani âi chuan an ropui zâwk si a.’

“(Heroda chuan a unau Philipi nupui Herodi avângin Johana chu a man a, a phuar a, tân inah a lo khung tawh a ni; Johana chuan a hnênah, ‘Ani i neih hi a thiang lo ve,’ a tihsak avângin.

“Johana chu tihhlum a tumin mipui a hlau va, zâwlneia an ruat avângin. Nimahsela, Heroda pian champhaphâk ni chu a lo thlenin Herodi fanu chu a lâiah a lâm a, Heroda chu a tilâwm ta a.

“Chumi avâng chuan a dîl apiang pe tûrin chechhamin a tiam ta a. Ani chuan a nû fuihin, ‘Hetah hian thlengin Baptistu Johana lû mi pe rawh,’ a ti a.

“Lal chu a lungngâi ta a; nimahsela, a thutiamte leh a chaw kîlpuite avâng chuan pêk tûr thu a pe a, tichuan mi a tîr a, tân ina Johana lû chu a tantîr a.

“A lû chu thlengin an rawn lâ a, hmeichhe naupang hnênah chuan an pe a; ani chuan a nû hnênah a kalpui ta a.”

(Matthaia 11:1–11; Matthaia 14:3–11, NIV)

Thawnthu ATangin

Isua rawngbâwlnaa Baptistu Johana chanvo ve kha eng nge ni? Luka 1:16, 17 chhiar ang che.

Johana’n Messia lo kal tûr thu a lo puang lâwk a. Isua kha Juda-te beisei (Messia) chu a ni tihte a hrilh thîn! Khatia Johana chu tân ina khung a nih tâka, Isua hnêna palâi tîra, ‘Messia’ chu i ni em tih a zawh leh tâk chhan kha eng ni tûrin nge i ngaih?

Johana tân ina khung leh a tâwpa a lû tansak a nih chhan kha eng nge ni?

Hêng thu Isua’n a sawi lâi mêk hian Johana kha chu thih mai hmabâkin tân ina khung a ni thung: “Hmeichhe hrin zîngah, Baptistu Johana âia ropui zâwk an la chhuak ngâi lo,” tiin. He thu behchhan hian, Isua’n Johana kha mi ‘hlawhtling’ angin a ngâiin i ring em? A kiang vêla mite khân mi ‘hlawhtling’ angin an ngâi ve ang em? Engtin nge hei hian mahni chu hlawhtling leh tling lo anga i inngaih dânah huhâng a neih tûr ni ang?

Johana kha Messia lo kal Hmasakna tûr puanga tlângaupuitu a ni. Keini hi Isua lo kal Vawi Hnihna tûr puang tûra kohte kan ni ve thung. Hê hna kan lova nghahah hian eng ang taka rinawm nge i nih ve?

Thu Pawimawh: 

“Chu! Autu râwl chuan, ‘Thlalêrah Lalpa kawng buatsaih ula, ram rovah kan Pathian tân lamlian tirual rawh u” (Isaia 40:3, NKJV).

“Ngâi teh u, Lalpa ni ropui leh râpthlâk tak a lo thlen hmain, zâwlnei Elija chu ka rawn tirh ang che u” (Malakia 4:5, NIV).

“Anni chuan a hnênah, ‘Tu nge i nih le? Elija i ni em?’ an ti a, an zâwt a. Ani chuan, ‘Ka ni lo ve,’ a ti a. ‘Zâwlnei kha i ni em?’ an ti a. Ani chuan, . . . ‘Lalpa kalkawng tirual rawh u,’ tia thlalêra autu âw ka ni, zâwlnei Isaia sawi ang khân,’ a ti a” (Johana 1:21–23, NIV).

“Pathian tirh mi pakhat a lo awm a, a hming chu Johana a ni. Chumi chu hriattîr tûrin a lo kal a, êng thu chu hriattîr tûrin; amah avânga mi zawng zawngin an rinna tûrin” (Johana 1:6, 7, NIV).

“Juda te’n, ‘Tu nge i nih?’ tia zâwt tûra Jerusalem khua ata a hnêna puithiamte leh Levia chîa mite an tirh lâi khân hêng hi Johana thu lo hriattîr chu a ni: Tang lovin a inpuang a, ‘Krista chu ka ni lo ve,’ tiin a inpuang a” (Johana 1:19, 20, NIV).

“‘En teh u, ka tirhkoh i hmaah ka tîr a ni. Ani chuan i hmaah i kawng a siam ang,’ ti a, a chanchin an ziaka kha, hê mi hi a ni.” (Matthaia 11:10, NIV).

Hriat Zui Atân

“Pathian fate’n a bul atanga a tâwp thleng hmu thei ta sela, an tâna thil ruahman ropui tak famkimna, Pathian thawhpuite an nihna chu, chiang takin hre bawk sela, chu mi hnua kaihhruai an nih dân tûr anmahnin an thlan ang chauh lo chuan, Pathianin a fate a kaihruai ngâi lo.”—Ellen G. White, Chatuan Nghahfâk (2nd Edition, 2014), p. 241.

“Mihringte hnêna vân thilpêkte zînga a pawimawh ber leh ngaihhlutawm ber pakhat chu Krista tuarnate tâwmpuitu nih theihna min pêk hi a ni.”—Ellen G. White, Chatuan Nghahfâk (2nd Edition, 2014), p. 241.

Mahni Nun Nêna Dawh Zawm Tûr

Sabbath 

Chhiar tûr:  Marka 6:17–28.

Engtin Nge I Ngaih tiha ‘hlawhtlinna’ tih kha engtin nge i hrilh fiah a, mi hlawhtlingte nihna chu engtin nge i tih tâk? Isua’n Baptistu Johana kha a fak hle mai a, chû fakna sâng ber chu mi tinin chan tuma an beih theih theuh a ni. Lalber lo kal tûr thu kha hlim taka tlângaupui zêl tûr âwm tak a nih lâiin, ani chu tân ina khung a ni tlat mai zâwk a! Ani Isua pawh khân a va tlawh chhuak chuang lo. Hê a laichîn hnâi thiltithei tak hnên atang hian tanpui tiamna pawh a dawng hek lo. Vawiin Bible châng thlanah hian, Johana chunga thilthleng, a chanchin tâwp tâk dân chu i hre thei ang, han chhiar teh. Tân ina a tân chhûng khân a rinna tlêmin a lo chuai deuhin i ring em? Isua rawngbâwlna chungchâng thu a lo hriat ve tâkah khân, eng rilrû pu tûrin nge i ngaih?

Isua lo kal hmasak thu kha chu Johana’n mahni maia a puan a ngâi a. A lo kal lehna tûr thu erawh hi chu kohhran chhûngkuate’n a huhovin kan puang thei thung. “Krista lo kal lehna tûr hi kohhran tâna beiseina lâwmawm niin, ropui taka chanchin tha hmawr bâwkna a ni dâwn a ni.” (Fundamental Belief 25, The Second Coming of Christ).

Sunday

Chhiar tûr:  Johana 1:6, 7

Pathianin a siam chhan ang tak chu Baptistu Johana khân hlawhtling taka hlen chhuakin i ngâi em? Engati nge chutianga i ngaih? A nun tâwp dân kha mi hlawhtling tih tûr em ni dâwn? Engvâng nge a nih a, a nih loh bawk?

Thawhtanni

Chhiar tûr: Matthaia 11:11

Isua’n, “Hmeichhe hrin zîngah Baptistu Johana âia ropui zâwk an la awm ngâi lo,” ti hiala a sawi khân châwimâwina sâng ber a hlân tih i hria em? Mahse, chumi zawm chiah chuan, heti hian a sawi zui nghâl a, “Chuti chungin, vânrama mi tê ber pawh ani âi chuan an ropui zâwk,” tiin. Isua thil sawi tum tak kha eng ni tûrin nge i ngaih?

Thawhlehni 

Chhiar tûr: Johana 20:21

Engati nge Isua kha leiah a lo kal? Chu chuan kan hnênah eng thu nge a sawi? Baptistu Johana anga Isua tâna palâi thawk hlâwk tak kan nih theih nân eng thil tawn pawimawh tak nge kan paltlang ngâi ang? Châng 22en la.

Nilaini

Chhiar tûr:  Philipi 2:3–8

Baptistu Johana khân ama lamah leh a hna bâkah, koh a nihna lama mite hîp zâwk tûra remchânna tin rêng a nei a ni. Mahse, chutiang chu a ti hauh lo. He thu-ah leh chêt dânah hian kan tân eng zirlâi zir tûr nge awm? Vawiin Bible châng thlana Pathianin hlawhtlinna duhthusâm a sawi uar, Paula’n min hrilh chhawn chu chîk takin zir ang che.

Ningani

Chhiar tûr:  Thufingte 3:5, 6

Tûnlâi Kristiante zîngah ngei pawh hian, hmuingîlna chanchin tha kan uar nasa ta hle mai a, . . . chu chu, Pathian thutiamte ringa kan tâa kan chhâl ngam chuan a ni. Hlawhtlin, hausak leh nun nuam taka awm theihna tûr lam a ni ber e. Mahse, A chanchin a lo tlângaupui thin Messia leh Johana hnên atang khân eng nge kan zir chhuah theih thung si le? Pathian kan lo nghahna kawngah hian dâltu engte nge awm? Kan tâna thil min ruahmansak pawm a, Pathian âw ngaihchân âiin, mahni duhzâwng min tihsak tûr zâwng hian kan châng thîn em? Vawiin thu chhiar atang hian eng kaihhruaina nge kan hmuh theih ang?

Zirtawpni

Chhiar tûr:  Thupuan11:15

Baptistu Johana kha Messia lo kal hmasakna tûr chungchâng, Pathian Lalram lo thleng tûr lo puang a, lo tlângaupuitu mi lâr tak a ni a; chutih lâiin keini pawh hi khawvêl tar leh boral mai tûrah hian Lalram lo thleng mai tûr puang a, tlângaupuitu tûrte kan ni. Isua chu a lo kal thuai tawh dâwn a, ama hnêna chêng reng tawh tûrin min hruai ang. Keini hi chu kraws hnu lama mite niin—Krista inhlanna leh tih chhiat mai mai theih loh tûr a tempul (kohhran) din zârah zahngaihna te, khawngaihna te leh siamthatna te kan chang ta thung a. Ani Johana kha thil lo thleng tûr târ lanna lo ni ta se, chu chuan kan tân eng tangkâina tak nge a neih ang? Messia lo kal lehna tûrah hian nang (leh kei) hian eng mawhphurhna pawimawh tak nge kan chan le? Vawiin châng thlan kha ring takin chhiar lauh lauh la. Ni ropui lo thleng tûra i dinhmun tûr chu i suangtuah thiam thei em? Isua hnêna mahni nun hlan zâra chan theih tûr, hêng ang—zahngaihna te, khawngaihna te leh siamthatna te hi i mi hriat zawng zawngte’n an chan theuh theihna tûra an hmingte ziak chhuakin, tawngtâisak ang che. Nangma nuna a nungchang chu ni tina i lantîr zêl theihna tûra Pathian tanpuina dîlin tawngtâi ang che.