2025 2nd Quarter Teenager Zirlai-5-na

Zirlâi 5-na                                May 03, 2025

Khaw Mipui Thinrim Buai Nuai Nuai Kârah

Chângvawn:  “Riangvaite hnênah Chanchin Tha hril tûra mi ruat avângin Lalpa Thlarau chu ka chungah a awm; ani chuan salte hnêna chhuahna thu leh, mitdelte hnêna mitvâr neih lehna thu sawi tûr te, tihduhdah tuarte chhuahtîrna tûr te, Lalpa lungâwi kum thu sawi tûr tein, mi tîr a ni,’ (Luka 4:18, 19, NIV).

Chhiar Tûr:  Luka 4:16–30.

Zir Zauna:  Chatuan Nghahfâk, bung 23, 24.

Thu Êng

“Messia lo kal thu hi Judai ramah puan hmasak ber a ni a. Jerusalem-a biak ina maichâm hmaa Zakaria’n rawng a bâwl lâiin a hnênah, Lalpa kawng sialtu tûr pian tûr thu puan a ni a. Bethlehem tlâng chungah vântirhkohte’n Isua pian thu an puang bawk a. Mi fingte chu Isua zawngin Jerusalem-ah an lo kal tawh bawk a. Biak inah Sumeona leh Anni te’n Isua chu Pathian a nih thu an au chhuahpui bawk a. . . . A rawngbâwlna hmasa lama hun a hman tamna ber pawh Judai ram a ni a; biak in a thenfâi tuma a Pathianna lo lanna te, dam lo a tihdamna te, Pathian thu a zirtîrna tam tak te chu Judai ram chhûngah hian a ni. Bethesda Dîl kama dam lo a tihdam hnua Sanhedrin hmaa Pathian Fapa Chatuan Mi a nih thu a puanna pawh kha Judai ramah bawk a ni.”—Ellen G. White, Chatuan Nghahfâk(2nd Edition, 2014), p. 242.

Engtin Nge I Ngaih? 

Vawiin hian mi thusawi thiam tak pakhat, huaisen leh mi hneh thei tak maia thu sawi a, thusawi ngâithlatute hnêna sakhaw hruaitute thil kalpui mêk dân nêk salh salhin sawi ta piap piap mai se lang, eng thil nge i beisei theih ang le? A hnuaia thu zîng atang hian han thlang chhuak dâwn teh. Mi tu emaw chuan:

____ thusawi thiamzia a entîr a ni

____ tûnlâi thiamna hmangin a intâr chhuak

____ suit nalh tak a ha

____ nupui hmêltha tak a nei

____ podcasts hmangin sermon a sawi

Tûnah chu thusawitu chu in vêng chhûnga mi, a têt lâi atanga i mi hriat than tak, naupang taima leh bengvâr ve tak thîn chu ni mah se, mipui chunglama mi bîk nihna eng mah nei lo a ni tih hre leh ta lang, engtin nge ni ang le? Chutah amah i va hmuh tâkah chuan, mi tu emaw ngaihsân awm tak ni tûra i râl khat ngaih kha chutiang a lo ni lo tih i’n hre ta sia le!

I Hria Em? 

Pi Ellen G. White-in inlârnaah Isua a hmu deuh fo mai a. Chutiang chungchâng ziahna pakhatah chuan heti hian a ziak a:  “Naupang hote’n a hmêl an enin, a mita thianghlimna leh thatna lo êng chhuak chu an hmu thîn a. A hmêlah chuan nunnêmna, thuhnuairawlhna, hmangaihna leh hriatna chak tak awmte chu an hmu bawk thîn. Mahse, thusawi, chêt dân leh a hmêla thil lo lang chhuak tinte chuan, Chung lam mi a nihna te, inngaihtlâwmna te chu an târ lang si a ni.”—My Life Today, p. 300.

Bible Thawnthu

“A sei lenna khua Nazaret chu a lo thleng a; Chawlhnia a tih dân pângngâiin inkhâwmna inah a lût a, chhiar tûrin a ding a. Zâwlnei Isaia lehkhabu chu a hnênah an pe a. Lehkhabu zial chu a phelh a, hê thu ziakna lâi hi a chhiar a,

‘Riangvaite hnênah Chanchin Tha hril tûra mi ruat avângin

Lalpa Thlarau chu ka chungah a awm;

Ani chuan salte hnêna chhuahna thu leh,

Mitdelte hnêna mitvâr neih lehna thu sawi tûr te,

Tihduhdah tuarte chhuahtîrna tûr te,

Lalpa lungâwi kum thu sawi tûr tein,

Mi tîr a ni,” tih hi.

“Lehkhabu chu a zial a, rawngbâwltu a pe leh a, a thu ta a. Inkhâwmna ina mi zawng zawng mit chu a chungah a fû a. An hnênah, ‘He Pathian Lehkha Thu hi vawiinah hian in hriatah a lo thleng ta,’ tiin a sawi tan a.

“An zain amah an fak a, a kam chhuak kawngaih thute chu mak an ti hle a. ‘He mi hi Josefa fapa a ni lo vem ni?’ an ti a.

“Ani chuan an hnênah, ‘Nangnin hê tehkhin thu hi, ‘Daktawr, nangmah intidam rawh,’ ‘Kapernaum khuaa i thiltih kan lo hriat apiang kha, hetah nangma khaw lamah pawh hian ti rawh,’ tiin min la hrilh dâwn ngei tâk hi,’ a ti a.

“Amah vekin, ‘Tih tak meuhvin ka hrilh a che u, zâwlnei tu mah mahni khaw lama miin an lâwm ngâi lo. Chutichuan, dik takin ka ti a che u, Elija dam lâia kum thum leh thla ruk vân a pin a, khawvêla tâm nasa tak a lo tlâk khân, Israel ramah hmeithai tam tak an awm a; nimahsela, an zîngah tu mâ hnênah Elija tirh a ni lo va, Sidon ram lama Sarepta khuaa hmeichhe pakhat hmeithâi hnênah chauh tirh a ni zâwk kha.

“Zâwlnei Elisa dam lâi pawh khân Israel ramah phâr tam tak an awm a; nimahsela, an zîngah tu mah tihthianghlimin an awm lo va, Naamana, Suria rama mi chauh tihthianghlimin a awm tâk zâwk kha,’ a ti a.

“Inkhâwmna ina mi zawng zawng chuan chûng thu chu an hriat veleh, an lo thinur êm êm a, an tho hlawm a, khua ata chu an nam chhuak a, paih thlâk tûrin an khaw awmna khâm kovah chuan an hruai ta a. Nimahsela, ani chu an kârah a kal tlang a, a kal ta zêl mai a.”

(Luka 4:16–30, NIV)

Thawnthu ATangin

Isua’n sunagog-a lehkhabu zial atanga a chhiar kha, thil hriat zen zen loh thupui puan chhuahna a ni ber mai: “Vawiin hian in beng hriatah hê thu hi a lo thleng famkim ta,” tih a ni. Kha inkhâwmnaah khân lo awm ve ni ta lang, tualchhûng naupang pângngâi, tûna lo puitling ve ta, tlangvâl hnên atanga khâng thute i’n hriatin eng nge i ngaihtuah i rin?

Engati nge a thusawi ngâithlatute chuan “a khawngaihna thute” chu mak an tih hle

Engati nge zâwlnei chu “mahni khaw lama lawm hlawh lo” an nih thin?

Mak tia an lâwmna chu kâr lohah thinrimnaah a chang ta mai kha eng vâng nge ni?

Isua’n hê thufing pakhat:  “Doctor, mahni intidam rawh” tih thu a hmana a a sawi tum tak chu eng nge ni tûra i ngaih?

Mipui thinrimin khalâi hmuna Isua tihhlum tuma an beihna a hlawmchham tâk chhan kha eng nge ni?

Thu Pawimawh: 

“Ani chu kum sawm leh kum hnih a nihin kût dân pângngâiin an han kal a; . . . an haw lâiin naupang Isua chuan Jerusalem khuaah a awm san a; a nû leh a pa chuan an hre si lo va. Heti hi a ni a, ni thum chinah chuan Pathian biak inah, zirtîrtute zînga thûa an thu lo ngâithlâa lo zâwtin an hmu ta a. A thu hria apiang chuan a hriatzia leh a chhânzia chu mak an ti hle a. A nu leh a pa chuan amah chu an hmuhin mak an ti hle a; tichuan a nuin a hnênah, ‘Ka fa, engati nge hetia min tih? Ngâi teh, i pa leh keiin thlaphâng takin kan zawng che a ni,’ a ti a. Ani chuan an hnênah, ‘Engah nge mi zawn ni? Ka Pa ina ka awm tûr in hre lo vem ni?’ a ti a” (Luka 2:42–49, NIV).

“Aw Jerusalem, Jerusalem! Zâwlneiho thattu, i hnêna an rawn tirhte lunga lo dêng hlumtu, arpuiin a notê a thla hnuaia a awp khâwm angin i fate vawi eng zât nge awp khâwm ka tum kha! Nimahsela, in duh si lo” (Matthaia 23:37, NIV).

“Chuvâng chuan Isua’n Pathian biak ina a zirtîr pahin a au va, ‘Nangnin mi hria e, ka pianna chin pawh in hria e. Nimahsela, mahni thua lo kal ka ni lo, mi tîrtu hi mi tak zet a ni, ani chu in hre si lo. Kei erawh chuan ani chu ka hria; a hnên atanga lo chhuak ka ni a, ani chuan mi tîr a ni si a,’ a ti a. Chutichuan, ani chu man an tum a, nimahsela, a hun a la thlen loh avângin tu ma’n an khawih si lo” (Johana 7:28–30, NIV).

Hriat Zui Atân

“Pathian Lehkha Thute’n hun an sawi chu kan tawng ta a, zâwlneite inlârnate hawn an ni ta a, tâwpna hun kan thleng ta; inlârnate chuan urhsûn takin Lalpa lo kal lehna a hnâi ta tih min hrilh.”—Ellen G. White, Chatuan Nghahfâk (2ndEdition, 2014), p. 247.

“Pathian hmaa kan dinhmun hi êng kan dawn zâta innghat a ni lo va, êng kan dawn kan hman dâna innghat a ni zâwk.”—Ellen G. White, Chatuan Nghahfâk (2nd Edition, 2014), p. 252.

Mahni Nun Nêna Dawhzawm Tûr

Sabbath

Chhiar tûr:  Marka 9:14–29

Thuhriltu lâr tak an lo chhuah hian engtin nge i lo ngaih tlângpui deuh thin? An kiang vêlah chuan eng thang kamte nge awm thei bawk? Lâr leh hmingthanna hi engtia tih tûr nge ni ang?

Mi tute emaw, i seilenpuite ngei an lo lâr deuh hluai hian pawm har tih châng i nei thîn em? Chutiang chu an khuaa Isua thusawi ngâithlatute pawh kha an ni ve tho mai a, Pathian a nihna ang chu sawi loh, Messia a nihna pawh pawm harsâ an ti tlat mai a nih kha. Anni’n pawm lo mah se, a ni tho si! “Chatuana Pathian dik tak niin, mihring dik tak, Isua Krista pawh a lo ni ta a ni. Thlarau Thianghlim zâra nula thianghlim Marin a pai a ni a. Mi dangte ang thova khawsâin, thlemnate a tuar ve a, mahse Pathian felna leh hmangaihna chu duhthusâmin a târ lang si a ni.” (Fundamental Belief 4, The Son).

Puilting a lo nih tâk hnu khân, amah lo hre thang tawh Nazareth khuaa mite’n Isua kha an ngâisâng lua lo. Naupang ramhuai mana pain, “Ka ring e, ka rinhlelhnaah hian mi pui ang che,” (Marka 9:24, NASB) tia a auchhuah khân mi tam takte khân engtin nge an ngaih ang le? Nang eng rilrû nge i put? Sakhaw mi vak lova i hriatte hmanga Pathian chu lo tawng chhuak pawm harsâ tih chângte i nei tawh ngâi em? Enga ti nge chutiang i nih?

Sunday

Chhiar tûr:  Luka 4:28–30

 Eng emaw châng chuan thutak hian min tina thîn. Chutiang chiah chu Isua’n a thusawi ngâithlatute hnêna thutak a hrilh pawh khân a lo thleng a, an thin a khei tlat mai a. An thinrim chuan an khaw kiang khâma nam thlâk tumin an bei ta mai a ni. Mahse, khâm ko an thlen meuh chuan an hlawhchham hêl hawl hlawm hle thung a. Pathianin thutak puang chhuak tûrin min ko va, thu lâr tak pawh a ni kher lo thei. A nghawng thil tha lo lakah Ani chuan min venghim zêl dâwn em? Sawi fiah teh.

Thawhtanni

Chhiar tûr: Isaia 61

Isua’n Isaia 61 thu a chhiar khân, ama chhanah khâng hrilh lâwkna thute chu a lo thleng famkim ta tih a sawi a. Bible hrilh lâwkna thute i chhiar chângin, nangma chhana lo thleng famkim ve ta, chiang taka hriat i nei em? Hetah hian ziak chhuak ang che:

Thawhlehni

Chhiar tûr:  Johana 1:4, 5

Vawiin Bible chângah hian, Isua chu hriat lohna thim zînga êng anga târ lan a ni. Khawi maw lâi lâiah khân, êng chu danglam nasa deuh takin a ên chhuahtîr thîn.

Tempul then thianghlimnaah pawh khân a Pathianna chu hriat theih taka lantîr a nih thu chu Pi Ellen G. White-i’n Chatuan Nghahfâk bu-ah hetiangin a lo sawi:  “A hmaa thil thleng zawng zawng chu a han thlîr chhuak vek a. . . . Mipuite chu a han thlîr kual leh a, mi tih chu chîk takin, pakhat khatin a en lâwr a; mipuite chung lama chawisân chhoh ang mai a ni a, a hmêl chu Pathian êngin a rawn kâp êng a. Chutah a han tawng chhuak ta a.  Aw ring tak leh fiah tha tak, Sinai Tlânga dân puang chhuaktu âw ngei khân, puithiamte leh hotute dân bawhchhiat chu a rawn puang chhuak leh ta a, chu âw, biak in bang sâng pui puite khawk rum rum hial chuan: ‘Hêng thilte hi heta tangin kalpui rawh u, ka Pa in sumdâwnna inah siam suh u,’ a ti a.’” pp. 161, 162. Engtin nge hei hian Isua Pathianna chu a târ lan le?

Nilaini

Chhiar tûr:  Johana 1:1, 14

Pathian Fapa mihringa a channa, mihring nihna famkim leh Pathian nihna famkim nei nih chu hriatthiam phâk rual loh thurûk ril a ni. Chutiang chungchâng chu engtin nge Bible-in Johana 1:1, 14-ah a lo sawi? Pathian leh mihring nih fâwm a nih kha engtik lâiin nge Isua’n a inhriat? Mihringte, hun rei tak amah hriatna lo nei tawh Nazareth khuaa mite ngei pawhin amah duh lova an hnar kha eng ang takin nge na a tih ve i rin?

Ningani

Chhiar tûr: 2 Timothea 3:16

Juda naupang leh tlangvâlte chher nân Tempul kha a pawimawh hle mai a. Chutiang chu Isua tân pawh a ni ve tho. Chu hmunah chuan zalên takin thlarau lam thilte bâkah, thlahtute chungchâng leh inlaichînna thutea zawhnate inzâwt a, hrilh fiahte a ni. Chutiang chu in Sabbath Sikul kha a ni ve em? A lo nih chuan, chutiang nihtîr theitu chu eng nge ni? Lo ni lo ta se, chutiang nihtîr tûrin engtin nge tan in lâk ang? Zirna kawnga hmasâwn zêl tûrin vawiin thu chhiar hian engtin nge a fuih phûr che?

Zirtawpni

Chhiar tûr: Sâm 34:8 Ama rualpuite tân Isua kha Messia emaw, zâwlnei emaw a ni tih pawm mai a harsa hle a ni. I hmêlhriat tu emaw chuan Isua a ring ve lo va, Kristianah pawh a inchhâl ve lo. Kristian sakhua leh Kristiante chungchâng thil tha lo mi sawite pawh i lo hre ve tawh a ni thei a, engtin nge chûng sawisêltute chu i chhân ang? Vâwiin thu chhiar behchhanin eng nge i sawi ang? Pathian thatna ataka hriatna i lo neih ve tawh chuan, Sabbath ni-ah in pâwlte hnênah i hrilh dâwn nia