2025 2nd Quarter Teenager Zirlai-6-na

Zirlâi 6-na                                May 10, 2025

HNUNGZUITU KA NI E

Chângvawn:  “Simon Petera chu . . .  Isua khûp kiangah a bawkkhup a, ‘Lalpa, mi kalsan rawh, mi sual ka nih hi!’ a ti a . . . Isua’n Simona hnênah, ‘Hlau suh, tûn hnuah zawng mihring i man tawh ang,’ a ti a. An lawngte chu vaukamah an hruai kai a, engkim kalsanin amah chu an zui ta a,” (Luka 5:8–11, NIV).

Chhiar Tûr:  Matthaia 4:18–22; Marka 1:16–20; Luka 5:1–11.

Zir Zauna:  Chatuan Nghahfâk, bung 25.

Thu Êng

“Galili Dîla sangha mantute hi thiamna nei lo, mi inngâitlâwm tak an ni a; nimahsela, khawvêl êng, Krista chuan a kohna chhan thawk thei tûrin tlinna a pe thei. . . . Nimahsela, Chhandamtûn a hun lâia mi fingte chu, an inrin tâwk êm avâng te, tuarna neitu lâinatna neilote an nih avâng te, Nazaret mi nêna thawk ho thei an nih loh avâng tein, a kal pêl a. . . . Lal Isua chuan a thawhpui atân, a khawngaihna kawng dâl duh lote a zawng renga, chutiang mite tâna zir tûr pawimawh hmasa chu mahni inrintâwk loh a ni a, chu chu an zir phawt chuan, Krista nungchang pêk theih an ni.”—Chatuan Nghahfâk, (2nd Edition, 2014), p. 263.

Engtin Nge I Ngaih? 

Isua’n engkim kalsana amah zui tûrin sâwm ve ta che selang, engtin nge chhânna i pêk i rin?

____“Lalpa, engkim i tih hi eng i tihna nge ni?”

____“Thil thenkhat kalsan ta ilang . . . zui che ka la ni ve

       tho ang em?”

____“Chutiang tak chu i ti tak tak chiah lo a ni lo’m ni?”

____“Tehrêng mai! Harsatna a awm lo ve!”

__________________________________________________

__________________________________________________

(I chhânna tûr ziak ang che)

I Hria Em?  t

Hmânlâi hun atang tawhin, Galili Dîl hi sangha manna hmun pui a lo ni tawh thîn rêng a. Isua hun lâia an sangha man dânah khân, kut lâwng bâkah, âwt hmang te, tahrâng hmang te, hual awh te, nghakuai chiah, thala kah, feia chhun leh lên dente pawh a telin a rinawm. Chûng zîngah chuan lên den chu an hmang uar ber thung a. Petera, Andria, Jakoba leh Johana te khân lênkhang an zâr thîn pawh a ni mai thei e. Khatianga tih kha chuan sanghâ hi an hual thîn a, chutianga ti tûr chuan thiam leh zei a ngâi hle thung. Isua’n Petera leh a thiante kha, inhlan pumhlûmna hmang chauha thawh thiam theih tûr hna chu thawk tûrin a ko va. Pathian lalram tân mihring mantuah an tang dâwn a ni.

Bible Thawnthu

“Heti hi a ni a, mipuiin Pathian thu an ngaihthlâk a, amah an bâwr huai huai lâiin, ani chu Gennesaret Dîl kamah chuan a ding a; dîl kamah chuan lawng pahnih awm a hmu a, nimahsela sangha mantute chu an chhuak a, an lênte an sû a. 

“Tichuan lawng pakhat Simona tâ zâwkah chuan a chuang a, a hnênah vaukam ata tlêma tawlh luh deuh a dîl a. A thû a, lawng atang chuan mipuite chu a zirtîr ta a.

“Thusawi a bân chuan Simona hnênah, ‘Li thûk lam pan la, sangha man tûrin in lênte dêng rawh,’ a ti a.

“Simona’n a hnênah, ‘Zirtîrtu, rim takin zankhuain kan bei a, eng mah kan man lo va; nimahsela. i thuin lênte ka dêng leh ang e,’ a ti a, a chhâng a.

“A han den chuan sangha tam tak an khuh a, an lênte chu a chat pheuh pheuh va. Lawng danga an pâwlpui awmte chu anmahni rawn pui tûrin kutin an hûi a.

“An lo kal a, lawng pahnih chu pil lek lek khawpin an chhûng khat ve ve a.  Simon Petera’n chu chu a hmuh chuan, Isua khûp kiangah a bawkkhup a, ‘Lalpa, mi kalsan rawh, mi sual ka nih hi,’ a ti a. An sangha man chu ani leh a thiante’n mak an ti hle si a. Simona pâwl vek Zebedaia fapa Jakoba leh Johana pawhin mak an ti hle bawk a.

“Isua’n Simona hnênah, ‘Hlau suh, tûn hnuah zawng mihring i man tawh ang,’ a ti a. An lawngte chu vaukamah an hruai kai a, engkim kalsanin amah chu an zui ta a.”

(Luka 5:1–11, NIV)

Thawnthu ATangin

Kha thil thlen hma khân Simon Petera leh a thawhpuite khân Isua hriatna an lo nei tawh em?

Chu chuan Isua sâwmna an chhân dânah danglamna a thlen thei ang em?

Khâng sangha mantute a hnung zui tûra a sâwm hmaa an mithmuh ngeia thilmak ti a, namên lo taka sangha a mantîr kha eng vâng nge nia i rin?

Kha thilmak thleng khân nghawng eng ang nge Petera leh sangha mantu dangte chungah a neih?

Engati nge Simon Petera khân khâ thilmak thleng kha “Lalpa, min kalsan rawh; mi sual ka ni,” tia a chhân lêt? Eng thil nge a ngaihtuah? Nang eng thil nge khatah khân i ngaihtuah ang?

Engati nge sangha mantute khân îhê lova Isua kha an zui nghâl tâk mai? Khatih lâiah khân eng nge Isua hnên atanga dawn an beisei nia i rin?

Thu Pawimawhte

“A zirtîrte zînga mi dangin, a hnênah, ‘Lalpa ka pa mi vuitîr zet rawh,’ a ti a. Nimahsela, ani chuan a hnênah, ‘Mi zui rawh; mitthiin anmahni mi thi chu vui rawh se,’ a ti a” (Matthaia 8:21, 22, NIV).

“Isua chuta tangin a kal zêl a, chhiah chawina hmuna thû, mi pakhat, a hming Matthaia a hmu a; a hnênah, ‘Mi rawn zui rawh,’ a ti a. Tichuan, a tho va, a zui ta a” (Matthaia 9:9, NIV).

“Isua’n a zirtîrte hnênah, ‘Tu pawhin mi zui a duh chuan mahni hrehawm pawisa lovin, a kraws puin mi zui rawh se,’ a ti a” (Matthaia 16:24, NIV).

“Isua’n a hnênah, ‘Tha famkima awm i duh chuan, kal la, i neih chu hralh la, pachhiate hnênah pe rawh; chutichuan, vânah ro i nei ang; lo kal la, mi zui ang che,’ a ti a” (Matthaia 19:21, NIV).

Hriat Zui Atân

“Krista hmangaih bertu chuan thil tha berte a ti nge nge thîn.”—Ellen G. White, Chatuan Nghahfâk (2nd Edition, 2014), p. 264.

“Thuawihna hmangaih rawngbâwlna leh Pathian hnêna intukluhna chu zuitu nih chhinchhiahna dik tak chu a ni.”—Ellen G. White, Krista Panna Kâilâwn, p. 60.

“Hmasialna dah botu, a thinlunga Thlarau Thianghlimin hna a thawhtheih nâna hmun kiantu leh, Pathian hnêna inhlân zo vektu hmantlâkna chuan chin lêm a nei rêng rêng lo.”—Ellen G. White, Chatuan Nghahfâk (2nd Edition, 2014), p. 264.

Mahni Nun Nêna Dawh Zawm Tûr

Sabbath

Chhiar tûr:  Matthaia 16:24

[Isua’n] a thilmak tihte hmangin Pathian tiam lâwk Messia chu a ni ngei tih chiang takin a lantîr a.” (Fundamental Belief 4, The Son). Isua’n Petera leh sangha mantu dangte a kohna thu i chhiarin, khata thil thleng kha chiang takin mitthlâ tum ang che. Petera dinhmuna dingah inchanin, khatiang thil mak lo thleng i han hmuh tâk zêlah khân i hriatna chi ngâ hmanga hriat chian tum ang che. A hnuaia thu târ lante i ngaih dân hi ziak chhuak ang che:

Isua’n Petera chu a lên dêng leh tûra a tih khân, Petera khân hetiang hian a ngaihtuah ve maithei e.

Mak taka sanghâ a man tâk teuhah khân, hetiang hian a ngaihtuah zui mai thei e

Hetiang pawh hian a ngaihtuah bawk ang

. Amah zui tûra Isua’n Petera a sâwm khân, Peteran hetianga a tih hi ka ring. Vawiin Bible châng thlan i chhiarin, eng ang rilrû nge i put tâk?

Sunday

Chhiar tûr: Rom 12:6, 7 

I Hria Em? tiha Isua hun lâia Galili Dîla sangha man chungchâng kha chhiar la. Isua’n ‘mihring (sangha) mantu’ tih thu kha a hmang a, a chhan chu khâ kha a zirtîrte’n an manthiam dân ber tûr a nih vâng a ni. Anni ngaih dân chuan, Pathian Lalram chhêk khâwm tûrin khawvêl atangin mi tam tak an la seng khâwm dâwn tih a ni. Lo neitute hnêna sawi chu ni se Pathian buhzêma buh chhêk khâwm tûra rah seng tûr angin a sâwm zâwk ngei ang. Chutiang chu a tehkhin thu tam takah pawh a lo hmang tawh rêng a nih kha. Tûnlâi hunah hian a lalrama mi dangte seng luh sawi nân, Isua’n eng entîrna dangte nge hmang thei tûra i ngaih? Hêng ang mite hi ko dâwn ni ta se, eng ngaihruatna nge a hman ang: Zirtîrtu? Bus driver? Doctor? Thalâi?

Chanchin Tha theh darh nân Pathianin eng talen leh theihnate nge a pêk che?

Thawhtanni

Chhiar tûr: Luka 5:8–11

Sangha tam tak an man theih nân Isua’n Simon Petera leh sangha mantu dangte chu a tanpui a. Petera chu rang taka thingthi nghâl rapin, mi sual a nih leh Isua kiang hnâia awm ve tlâk lo a ni tih a puang a. Engati nge khâ thilmak thleng khân Petera chu sual nih inhriatna a neihtîr nia i rin? Petera’n Isua chu kal bo tûrin a hrilh a—mahse, Isua chu a kal bo chuang lo. Nangmah kal san a, kal bo tûrin Pathian chu i lo hrilh ve tawh em? Engtin nge Ani chuan a chhân che?

Thawhlehni

Chhiar tûr: Matthaia 19:21

Thu Êng tih hian Isua’n mi thiam sâng leh hruaitute âiin mi narân, thiamna nei lo sangha mantute a ko zâwk a ni tih uar takin a târ lang a. A kohna chungchâng Pi Ellen White-in Chatuan Nghahfâk lama a sawi chiang zâwka kan bih chuan, lehkha thiamna hi Pathianin a ngaihlû a, ama rawngbâwl nân a sâwtpuiawm tih a târ lang a—mahse, eng emaw châng chuan lehkha thiamna nei lote hian Isua chu an zui tha thei zâwk fo thîn; a chhan chu anni hi inngâitlâwmin, mahni theihna rinchhan thei lo an ni tih an inhriat zâwk vâng a ni. Isua hnung zuina tûr dâl theitu eng thil dangte nge la awm thei ang le? Vawiin zirlâi châng thlanah hian, Isua’n rorêltu tlangvâl hausa hnêna a thu sawi chu kan hmu a. Isua’n khâ thu a sawina tûrin eng thil chu nge khâ paah khân a hmuh le?

Nilaini

An ni tin nun leh khawsakna pângngâi kalsana amah zui tûra Isua’n a koh entîrna Bible-ah kan hmu nual mai. Hêng châng târ lante hi chhiar la. Isua hnung an zui theih nâna an tih mâkmawh pakhat theuh chu ziak chhuak ang che:

Matthaia 8:21, 22 _______________________________

Matthaia 9:9 ___________________________________

Matthaia 16:24 _________________________________

Matthaia 19:21 _________________________________

Pathian chuan chutiang tho chu tûnlâi mite lakah pawh hian a la beisei reng ang em? A ruahmanna zui tûrin hna te, chhûng te, nunphung pang ngâi kalsan tûrte a la awm theiin i ring em? A mi ngenna chu eng pawh ni se, inpêkna pum hlûm nei tûrin min beisei theuh a ni.

Ningani

Chhiar tûr:  2 Korinth 12:9

Nangma nun kha inbih chiang la, Isua i zuina tûr dâltu chu eng nge ni chîk takin ngaihtuah ang che. Isua zui tûra, chutiang dâlna chu dah bo tûrin, eng thilte chu nge a taka i tih tâk ang le? Entîr nân, social media lama hun i hman dân khân Isua zuina tûr te, Bible chhiar leh tawngtâia a hnêna inpêkna tûra zîng leh tlâia inhlanna neihna tûrte a dâlsak thîn che em? Vawiin Bible thlan atang hian eng fuih phûrna thu nge i hmuh theih?

Zirtawpni

Chhiar tûr: Matthaia 6:31–33

Vawiin hian Isua chu i hnêna lo kal a, “Hêng _____________ thilte hi kansanin, min zui rawh,” ti ta se, eng thilte chu nge kalsan tûra a duha i rin? Ziak chhuak teh: 

Engtin nge i chhân ang? Vawiin zirlâi behchhanin, eng     

nge ni ang? Isua hnung zui tûr hian thil eng eng emaw kalsan/hnutchhiah a ngâi ang. Mahse, chûng bâkah chuan, tûna Isua hnêna inhlanna pum hlûm ngeih pawh a tel ngei ang. Tûna nangma nun hmang ngei hian Pathianin mi dangte hnêna a hmangaihna hriattîr ve tûrin a tanpui thei che a ni.