2025 2nd Quarter Teenager Zirlai-7-na
Zirlâi 7-na May 17, 2025
INKHÂWMNA INA TIHDAMNA
Chângvawn: “Mipuite chuanan zain mak an ti êm êm a, ‘Hei hi eng nge ni le? Zirtîrna thar—thuneihna pai a nih hî! Ramhuai bawlhhlawhte pawh thu a pe a, a thu an âwih zêl hi le,” an ti a,”(Marka 1:27, NIV).
Chhiar Tûr: Marka 1:21–28.
Zir Zauna: Chatuan Nghahfâk, bung 26.
Thu Êng: “He tuarna nei, mi khawngaihthlâk tak rilru hi Setana’n a tihthimsak a ni a, Chhandamtu’n thim chu êng zungin a zuk chhuna, Setana hrêng atanga chhuah duhna a zuk neihtîr a; nimahsela Krista thiltihtheihna do zâwngin ramhuai chuan tan a lo khawh ve a. Ramhuai man chuan rawn tanpui tûra Isua a han ngen chuan, ramhuai bawlhhlawh chuan a tawngtîr a, nasa taka thlabâr angin a au chhuak a. Ramhuai man chuan tizalên theitu kiangah a awm tih hriatna chu a nei; mahse, Chhandamtu kut chak tak ban phâkaawm a han tum lâi takin, chhûng lam atangin chelh kîrtu a lo awma, a ka atangin thu dang, ama thu ni lo, a lo chhuak ta a ni. Zalênna neih a duhna leh chu mi kalha Setana thiltihtheihna indo chu namên lova nasa a ni.”—Chatuan Nghahfâk (2nd Edition, 2014), p. 270.
Engtin Nge I Ngaih?
Hêng chângte chhiar la: Exodus 22:18; Leviticus 19:26; Leviticus 19:31; Leviticus 20:6; Deuteronomy 18:9–14; 1 Samuela 28:3; Isaia 8:19. Hêng Bible châng zawng zawngte hian thlarau biakna chungchâng chu thâwitham deuh talin an sawi theuh a ni. Hêng thilte laka inhnamhnawih lo tûra vaulâwkna thu sawi a ni fo hi eng vâng ni tûrin nge i ngaih? Leviticus 19:31 chhiar la. Engati nge Pathianin, “Kei hi Lalpa in Pathian ka ni,” tih a sawi fo thin?
___Ani chuan kan mamawh tin rêng min phuhrûksak thei.
___Ramhuaite’n an thununsak nuna tawrhna pawh a hriatsak vek.
___Ani chu Pathian tha a nih avângin, amah chauh chu kan rilru thununtuah kan hmang tûr a ni.
___A vâwiin a dik vek.
I Hria Em?
“Bumtu ropuian a bumna hna a hlawhtlinpui berte zînga thenkhatte chu, mitthi thlarau biakna dâwt thu mak tak, leh mi dawi â thei chi zirtîrna te hi an ni. Êng vântirhkoh anga inthuamin, a lênte chu mi rinlohna lâi takah a zâr thîn a. Mite’n Pathian Lehkhabu hi hre thiam tûrin thahnemngâi taka tawngtâina nên zir thîn selang chuan, thurin dik lo pawm tûra thima hnutchhiah an ni ngâi lo vang” (Ellen G. White, Indona Ropui (4th Edition, 2014), p. 524.
Bible Thawnthu
“Kapernaum khuaah an va lût a; Chawlhniah chuan inkhâwmna inah a lût a, a zirtîr ta nghâl a. A thu zirtîr chu mak an ti hle a; lehkha ziaktute ang lova, thuneihna nei âwm taka anmahni a zirtîr avângin.
“An inkhâwmna inah chuan ramhuai bawlhhlawh pai mi pakhat a lo awm a; ani chuan, ‘Nazaret Isu, keini leh nang engnge kan inzâwlna awm? Min tiboral tûrin i lo kal em ni? Nang ka hria a che, Pathian mi thianghlim i ni e,’ tiin a au chhuak ta nghâl a.
“Isua’n a hau va, ‘Ngâwi la, a chhûng ata lo chhuak rawh,’ a ti a.
“Ramhuai bawlhhlawh chu, amah sawisaa ring taka auvin a chhûng ata a lo chhuak ta a.
“An zain mak an ti êm êm a, chutichuan, ‘Hei hi eng nge ni le? Zirtîrna thar a nih hi le! Ramhuai bawlhhlawhte pawh thu nei takin thu a pe a, a thu an âwih zêl hi le,’ tiin an inhnial a.
“Galili ram vêl zawng zawngah, ram tinah a chanchin a thang ta nghâl a.”
(Marka 1:21–28, NIV)
Thawnthu ATangin
Marka 1:21–28 chhiar la, a hnuaia zawhnate hi chhâng ang che:
1:21 Isua’n A zirtîrte hnêna zirtîr a tum ber chu eng nge ni?
1:22 Engati nge mipuite’n Isua thil zirtîr kha mak an tih viau?
1:23 Engtin nge hê pa thlarau bawlhhlawhin a man hi i mitthlâ dân?
1:24 Ramhuai manin Isua chunga a tih dân englâi tak khân nge han khawih deuh bîk che?
Marka 1:25 chhiar leh la. Isua’n thunei taka thil a sawina dangte nên khâikhin ang che. Hêng chângahte hian tute chu nge Isua’n a hauh? Marka 4:39? Luka 7:14, 15? Isua thuin thil a tihtheihzia chungchâng eng nge hêng hian a hriattîr che?
1:26: He thlarau chungchâng eng nge hriat thar i neih?
1:27: Mite mak tihtîrtu kha eng nge ni?
1:28: Isua chungchâng thu lo thang darh ta kha a thalam zâwng nge a chhe lam zâwng? Sawi fiah la.
Thu Pawimawh:
“ Ramhuai âienthiam zâwlte chu pan suh ula, dâwithiamte pawh in bawlhhlawh phahna tûrin anni chu zawng chhuak suh u” (Leviticus 19:31, NIV).
“Chuvângin, ni tha lovah chuan in do zawhna tûr leh, in tih zawh vek hnu pawha in din theihna tûrin, Pathian râlthuam famkim chu la rawh u. Chutichuan, in kâwng chu thutaka hrêngin, felna âwmphâw chu hain, remna Chanchin Tha inbuatsaihna chu in keah bunin ding rawh u; chûng lo pawh chu rinna phaw la ula, chu mi chuan mi sual thal alh thei zawng zawng chu in timit thei ang. Chhandamna lukhum leh Thlarau ngûnhnam (Pathian Thu chu) la ula, tawngtâina leh dîlna tinrêngin eng hun pawha Thlarauva tawngtâiin, chu mi kawngah chuan mi thianghlim zawng zawng tân thahnemngâi tak leh dîl tlatin ngaihven rawh u” (Ephesi 6:13–18, NIV).
“Chutichuan, Pathian hnênah intulût rawh u; amaherawhchu, Diabola dodâl rawh u, tichuan a tlân bosan ang che u” (Jakoba 4:7, NIV).
“Ngaihven ula, fîmkhur rawh u; in khingpui Diabola chu sakeibaknei rûm thîn angin a ei theih tûr zawngin a phî ruai thîn; in ûnau khawvêla awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u” (1 Petera 5:8, 9, NIV).
Hriat Zui Atân
“Pathian Lehkha thu zirtîrna leh kan sualna min hriattîrtu Thlarau Thianghlim thiltih theihna hawisantute hian, an nun thunun tûrin thlarau bawlhhlawhho an sâwm tluk a ni.”—Ellen G. White, Chatuan Nghahfâk (2nd Edition, 2014), p. 274.
“Krista’n Setana hneh nâna a hman chu Pathian thu thiltihtheihna a ni a, chu hmanrua vek hmang chuan keini pawhin Setana chu kan hneh thei.”—Ellen G. White, Chatuan Nghahfâk (2nd Edition, 2014), p. 274.”
Mahni Nun Nêna Dawh Zawm Tûr
Sabbath
Chhiar tûr: Ephesi 6:13–18
Mihring zawng zawngte hi Krista leh Setana kâra Pathian nungchang, a dân leh vân lam khawvêl zau chunga a thuneihna chungchânga indona/inhnialna ropuiah hian an tel vek a. . . . [Setana’n] Evi leh Adama te kha sualah a hruai lût a. He mihring sualna hian mihring hmaah Pathian nihna chu dik lo takin a lantîr a. . . . [He] khawvêl hi lei leh vân huapa indona hmun lo ni tain, chutah ngei chuan Pathian hmangaihna chu chiang taka târ lan a ni ta bawk. He thu inchuha inhnialnaa a mite tanpui tûrin, Krista’n Thlarau Thianghlim leh vântirhkoh rinawmte a rawn tîr a. Chu chu chhandamna kawnga kaihruai tûr te, venghim tûr leh chhawm nung zêl tûrin a ni.” (Fundamental Belief 8, The Great Controversy).
Sunday
Chhiar tûr: Marka 1:27.
Chângvawn kha chhiar la, chutah chuan Isua thuneihna lâi tak kha chhinchhiah bîk deuh ang che. Juda zirtîrtute khân an thuneihna nemngheh nân anmahni zirtîrtu hmingthang deuhte kha an sawi chhuak fo thîn a. Isua erawh kha chuan chutianga an zirtîrtute hming a chhâl ve a ngâi lo; amah kha Pathian lo ni tawh leh ni mêk chu a ni bawk si a. Chuvângin, a thuneihna khân a hmaa zirtîrtu dang zawng zawngte kha chu a khûm vek a ni. Chuvâng tak chuan, khâng Pharisai hote khân Isua thuneihna tobul chhuiin, an bei chiam mai rêng a. Nang, eng tiang kawngtein nge nangma nunah Isua thuneihna chu i lo pawm ve le?
Thawhtanni
Chhiar tûr: Johana 14:11–13
Hêng hi târ lang teh: Isua’n ramhuai zâwl chunga thuneihna a lantîr tâk ang kha thiltihtheihna kha kan nei ve em? Nei ta ila, engati nge kan tawngtâina tam tak hi chhân loh ang mai a nih fo si? Chu chunglam thiltihtheihna chu kan tâa chhâl thei kan ni rêng em? Ni ta se, engtin?
Thawhlehni
Chhiar tûr: Johana 8:31, 32
Tûn kâr zirlâia Thu Êng chhiar la. Pi Ellen White-in a târ lan: “Chhandamtu chênchilhna” kha êng hmanga thimna chhun tlangtu chu a ni tia a sawi kha chhinchhiah ang che. Engtin nge Pathian chênna hmuna awm nih chu ataka chan dân kan zir theih ang? Engtin nge chu chuan thlemna dodâl tûra min tanpui ang? Isua chênna hmuna awm zâra sual kan hneh theih dân tûr târ lang la. Engtin nge mite hi Isua chênna hmunah an awm theih ang?
Nilaini
Chhiar tûr: Rom 8:37–39
Thu Pawimawhte tih chhûnga thu pawimawh lâi deuh deuh kha la khâwmin thu hlâwm khatah siam ang che.
Ningani
Chhiar tûr: Philipi 4:8
Engtin nge ramhuai (Setana’n) ka thinlunga rawn luh a tum thin? A mi beihnate lo do lêt dân kawng tha ber chu eng nge ni?
Zirtawpni
Chhiar tûr: Sâm 139:23, 24
Pi Ellen White-in khâ ramhuai chêt dânah thu bengvâr thlâk tak min lo hrilh a: “Mi tinin tu thiltihtheihna hnuaia kun nge kan duh kan thlangthei theuh a, Krista’n a chhanchhuah theih loh khawpabawlhhlawh lutuk emaw, tluchhe nasa lutuk tawh emaw tumahan awm lo. Ramhuai man khân tawngtâi nachâng pawh a hretawh lo, Setana tawngkam sawi chhawng ve mai mai chauh a nitawh a; mahse a thinlung chhûngrila dilna a neih, a sawi chhuahtawh ngâi loh chu hriatin a awm ta a nih kha.”—Chatuan Nghahfâk (2nd Edition, 2014), p. 275. Vawiin châng thlana târ lan ang dîlna hi Pathian hnênah i thlen ve ngâi em? I thil dîl chu i hlawhtling ngei ang tih ring chungin tawngtâi ang che.