2025 2nd Quarter Teenager Zirlai-8-na
Zirlâi 8-na May 24, 2025
duh a, thei bawk
Chângvawn: “Isua’n a lo khawngaih êm êm a, a han ban a, a dek a, ‘Ka duh e, lo thianghlim tawh ang che,’ a ti a. Tichuan, chawplehchilhin a phâr chu a lo reh ta nghâl a, a lo thianghlim ta a,” (Marka 1:41, 42, NIV).
Chhiar Tûr: Matthaia 8:1–4; Marka 1:40–45; Luka 5:12–28.
Zir Zauna: Chatuan Nghahfâk, bung 27.
Thu Êng
“Isua’n dam lo a tihdam thenkhatte chu chawplehchilhin an dam nghâl lêm lo va, phâr hi erawh chu, ngenna a siam veleh a, dam viah nghâl mai a ni. Malsâwmna kan dîl thenkhat, chhân lawk lohte an awm thîn a, kan dîl taka min pe lova, thil dang Lalpa’n min pêk zâwk chângte a awm bawk thîn. Sual laka chhandamna kan dîlna erawh chu chhân nghâl a ni thîn. Sual atanga min tlenfai te, A faa min siam te, nun thianghlim min neihtîrte hi a duhzâwng leh lâwmzâwng tak a ni.”—Chatuan Nghahfâk (2nd Edition, 2014), pp. 284, 285.
Engtin Nge I Ngaih?
Pathianin thil min duhsak indawt dân anga i ngaih chuan nambar pe la, i chhânna sawi fiah tûrin inpeih sa ang che.
___ Thinlung inngâitlâwm taka mi dangte rawngbâwlsak
___ Mi fing leh hna zei tak ni tûrin
___ Mahni tihtûr rilru fîm taka hriatna nei rân
___ Ama thupêkte rema nung tûrin
___ Chhandamna thilthlâwnpêk chang nih inhriat chianna nei
___ Mahni hun leh theihnate hmanga thilphal tûrin.
Pathian ngaih pawimawh ber ni tûra i ngaih chu sawi fiah la. I thlan chhuah nêna in inlaichîn dân bâkah, thu dangte nêna in inlaichîn dân pawh chu eng ang nge ni?
I Hria Em?
Thumal pakhat ‘khawngaih’ tih sawina hi Grik tawngin splanknizomai a ni a (rang takin vawi thum han lam nawn teh). A awmze dik tak chu damdâwi lam tawngkam chuan pum emaw, kawchhûng/rîl sawina a ni. Dik tak chuan rilru chhûng ril taka veia, kawm chawl chawla auchhuahpui tâ a ni. Sual vânga thihna tuar tûr Krista’n a khawngaihna ang chî chu niin; rilrûa mite va khawngaih/lainat ngawt ni lo, eng emaw tak tihsak tûra chêt chhuahna a ni.
Bible Thawnthu
“Tlâng ata chu a lo chhuk hnuin mipui tam takin amah an zui ta a. Ngâi teh, a hnênah phâr a lo kal a, ‘Lalpa, i duh chuan mi tithianghlim thei e,’ tiin chibai a bûk a.
“Isua’n a han ban a, a dek a, ‘Ka duh e, lo thianghlim tawh ang che,’ a ti a. Chawplehchilhin a phâr chu a lo thianghlim ta nghâl a.
“Isua’n a hnênah, ‘Tu mah hrilh lo tûrin fîmkhur ang che; amaherawhchu, puithiam hnênah va inentîr la, Mosian thilpêk tûr a ruat kha hlân rawh, an hriat fiahna tûrin,’ a ti a.
“A hnênah phâr a lo kal a, ‘I duh chuan mi tithianghlim thei e,’ tiin a hmaah thingthi-in a ngên chiam a.
“Ani chuan a lo khawngaih êm êm a, a han ban a, a dek a, ‘Ka duh e, lo thianghlim tawh ang che,’ a ti a. Tichuan, chawplehchilhin a phâr chu a lo reh ta nghâl a, a lo thianghlim ta a.
“Isua chuan, ‘Tu ma hnêna eng mah sawi lo tûrin fîmkhur ang che; amaherawhchu, puithiam hnênah va inentîr la, i inthen nân Mosia’n thil a ruatte kha hlân rawh, an hriat fiahna tûrin,’ a ti tlat a, a kaltîr ta nghâl a.
“Nimahsela. ani chu a chhuak a, chu mi chanchin chu nasa taka tlângaupuiin a puang darh ta a; chutichuan, Isua chu alangin khuaah a lût thei ta lo va, thlalêr hmunahte a awm ta zâwk a; hmun tin ata a hnênah an lo kal thîn a.
“Heti hi a ni a, khaw pakhata a awm lâiin ngâi teh, mi pakhat phâr bawm hi a awm a, ani chuan Isua a lo hmu a, lei siin a bawkkhup a, ‘Lalpa, i duh chuan mi tithianghlim thei e,’ a ti a, a ngên chiam a.
“Ani chuan a han ban a, a dek a, ‘Ka duh e, lo thianghlim tawh ang che,’ a ti a. Chawplehchilhin a phâr chu a lo reh ta nghâl a. A hnênah, ‘Tu mah hrilh suh, amaherawhchu, puithiam va inentîr la, i inthen nân Mosia ruat angin hlân rawh, mite hriattîrna tûrin,’ a ti tlat a.
“Nimahsela, a chanchin thu chu a thang lehzual sauh va; mipui tam tak a thu hriat duh leh an nâte tihdam duhin an rawn inkhâwm chiam a.
“Nimahsela, ani chu thlalêrahte a kal hrang a, a tawngtâi thîn a.
(Matthaia 8:1–4; Marka 1:40–45; Luka 5:12–16, NIV)
Thawnthu ATangin
Thil thleng thuhmun reng thlîr dân inang lote khâikhin la. Matthaia’n tawngkam a hman loh Marka leh Luka te’n an hman chu engte nge ni?
Marka leh Matthaia te’n an hman loh tawngkam Luka’n a hman bîk chu eng nge ni?
Marka chauhin a hman bîk tawngkam chu eng nge ni?
Engtin nge phâr natna hi sual natna ang a nih?
Phâr hri vei khân ngenna ngaihnawm tak a auchhuahpui a, chu chu: “I duh chuan min tithianghlim thei e,” tih a ni. Kha pa thlîrna atang khân Isua’n a tihdam theih leh theih loh chungchângah zawhna a awm em? Thupui ber chu eng nge ni? Engati nge phâr hri vei tân chuan khatianga ngaihtuah kha thil tih âwm tak pawh a nih ve tho dân? (Chhiar tûr: Johana 9:1–3; 5:13, 14; Marka 2:3–5; Isaia 59:1, 2.)
He thawnthu Bible-a a chusn chhan chu eng ni tûrin nge i ngaih? Kan tân eng thuchah nge hetah hian Pathianin min neihsak?
Isua’n thurâwn a pêk zui nghâl: “Puithiam hnênah va inentîr la, i inthen nân Mosia’n thil a ruatte kha hlân rawh” tih kha sawifiah la. Eng vângin nge khatiang thil kha ti tûra Isua’n a hrilh?
He thawnthu hian Bible-a thil thleng dang eng nge a hriat chhuahtîr che?
Thu Pawimawhte
“‘Hei hi Pathian duhzâwng chu a ni, ani’n mi pêk zawng zawng eng mah hloh lo ila, ni kin ni-ah chuan kai tho zâwk ila. Hei hi ka Pa duhzâwng a ni, tu pawh Fapa hmu a, ring apiangin chatuana nunna nei sela; keiin ni kin ni-ah chuan ani chu ka kai tho vang,’ a ti a” (Johana 6:39, 40, NLT).
“‘Sual ka nei lo,’ kan tih chuan mahni leh mahni kan inbum a, thutak chu keimahniah a awm lo a ni. Kan sualte thupha kan chawi chuan, kan sualte ngâidam tûr leh, kan fel lohna zawng zawng tlêngfai tûrin amah chu a rinawmin a fel a ni” (1 Johana 1:8, 9, NASB).
“Mi thenkhatin muanga an ruat angin Pathian chu a thutiam kawngah chuan a tlâi ngâi lo ve; tu ms boral duh lova, mi zawng zawng lo sim duhin, nangmahni lamah a dawhthei a ni zâwk e” (2 Petera 3:9, The Message).
“Tichuan, Isua’n a khawngaih êm êm a, an mit a dek a; tichuan. an hmu thei ta nghâl a, amah chu an zui ta a” (Matthaia 20:34, NASB).
“Engtin nge in ngaih? Mi tu pawhin berâm za nei sela, an zînga pakhat vâk bo sela, sawmkua leh pakuate chu hnutchhiah a, tlânga han kalin, a bo chu a zawng lo vang em ni? Tih tak meuhvin ka hrilh a che u, a hmuh leh hlauh chuan, sawmkua leh pakua vâk bo lote chungah âi chuan, a chungah a lâwm zâwk ang. Chutiang bawkin hêng mi tê-te zînga pakhat boral pawh hi in Pa vâna mi duhzâwng a ni lo ve” (Matthaia 18:12–14, The Message).
Hriat Zui Atân
“Phârte leh zengte tuar hi chu, rinlohna leh mahni dinhmun sawh sawn duh lote natna âi chuan a râpthlâk nêp hle a ni.”—Ellen G. White, Chatuan Nghahfâk (2nd Edition, 2014), p. 291.
“Keimahni chaknaa hneh tûrin Pathianin min tîr lo, nêl taka a bul hnâia kal tûrin min sâwm zâwk a ni.”—Ellen G. White, Tihdam Rawngbâwlna (2nd Edition, 2014), p. 235.
Mahni Nun Nêna Dawh Zawm Tûr
Sabbath
Chhiar tûr: Marka 1:40; Matthaia 18:12–14
Engtin Nge I Ngaih? tiha zawhna kha chhâng nghâl la. Thil târ lan hrang hrang zîngah khân thil tha lo lam a tel lo va, phâr tihdamna chungchâng atanga Pathianin thil s ngaih pawimawh chungchâng ngaihtuah thiam nâna tih a ni. Phâr natna veituin ngenna a siam: “I duh chuan, min tithianghlim thei e,” (Marka 1:40, NIV) tih kha zawhna ni lo vin, thahnemngâi taka ngenna a ni zâwk. Kha ngenna thu leh vawiin zirlâia Isua thusawi Matthaia lo ziah chu khâikhin la. Chhandamtu khân a tih tûr leh Pathian thil tum a hre chiang a; phâr hrivei erawh kha chuan Isua’n a tidam thei nge thei lo tih lam âiin, Krista’n a tidam duh dâwn nge dâwn lo tih kha a vei zâwk a ni. Engati nge? Engtin nge chutianga ngaihngam zat lohna ang chî chuan Krista nêna kan inlaichînna a nghawng thin?
Phâr natna veituin Pathiana rinna a neih ang chi sâwizawi hi tûnlâi hunah pawh a la ngâi ve khawp mai. “He chhandamna thlen thei rinna ang chi hi, Pathian khawngaihna thilthlâwnpêk leh chunglam chhuak Thu thiltihtheihna a ni. Krista zâra thiamchantîr, sual lalna hnuai atanga chhanchhuah, Pathian fanu leh fapate lo ni tâte kan ni” (Fundamental Belief 10, The Experience of Salvation).
Sunday
Chhiar tûr: Matthaia 20:32
Bible Thawnthu kha chhiarin, Thawnthu Atangin tiha zawhna kha chîk taka zir nân hmang ang che. Tûn kâr zirlâi hmang hian thil thleng thuhmun thlîrna kawng thum (Matthaia, Marka leh Luka sawi dân) kan thlîr a. Chîk taka i chhiar chuan ziaktu hrangte hian sawi uar duhlâi an nei hrang tih i manthiam nghâl ang. Eng bengvârna thu tharte nge i chhar chhuah? Engtiang kawngin nge phâr hriveiin Isua a tawn dân kha sual leh chhandamna chungchânga ringtu tinte nuntawng pawh a ni ve dân? Engtin nge hei hian Krista hnên pan dân tûr min târ lansak a, engtin nge ama hnên pantute Krista’n a lo chhân dân pawh min hriattîr bawk? He thawnthua châng pawimawh lâi ber ni tûra i ngaih chu khawi hi nge ni a, engvâng nge?
Thawhtanni
Chhiar tûr: Marka 1:41, 42
Chângvawn thu hian “Isua’n a khawngaih a. A han ban a, a dek a, ‘Ka duh e, lo thianghlim tawh ang che!’ a ti a,” tiin min hrilh. Chanchin Tha Luka ziakah chuan “phâr bawm khah” (Luka 5:12, NKJV) a nih lâiin, Krista chu erawh chu “khawngaihnâin a khat” thung a. Heta Krista thusawi leh, phâr natna vei A tawh thu vawng tûra i beih lâiin, khâ thil thlen dân tûr kha suangtuah zui ang che.
Thawhlehni
Chhiar tûr: Hebrai 7:25
Thu Êng tiha Chatuan Nghahfâk bu thu lâk chhawn kha, tanpuina, tihdamna, chakna leh ngaihdamna dîl nân hmang ve ang che. He thutak auchhuahpuina atang hian, Pathianin thil min duhsak ber chu, ‘chhandam i nihna tûr’ a ni tih hre reng ang che. “Sual laka chhanchhuahna” dîla kan tawngtâi hian Pathian min chhânna thiltithei tak chu ngaihtuahin, mi tu emaw, Pathian ngaihdamna mamawh êm êm, tawngtâisak ngâi tûr chu ngaihtuah vang vang ang che. Chutiang mite hnênah chuan lehkhathawn i ziak emaw, message i thawn emaw hunah chhandamna hi dîla hmuh nghâl mai theih a ni tih fuihna thu i ziak dâwn nia. Bible thutak behchhanin fuihna thu chu i ziak bawk dâwn nia.
Nilaini
Thu Pawimawhte tih thute khân Pathianin min chhandam a duhzia an târ lang a. Chutiang chungchâng chu phâr natna vei tihdam thua chiang taka a lo lan dân chu ngaihtuah la. Hêng chângte fîmkhur leh chîk taka i chhiar pahin, mi dangte hnêna Bible zirtîrna pêk nâna hmang tûrin rem ruat lâwk nân i hmang dâwn nia. A khawi châng chu nge bultan nân i hman ang a, a indawt chho zêl tûr chu engtin nge ni ang, eng vâng nge?
Ningani
Chhiar tûr: Hebrai 4:16
Hmanlâi, Isua hun ang êm kha chuan phâr natna hi hlauhawm lutuk ta lo mah se, he thu erawh hi chu hun tina mite tân a ni theuh si a ni. Tawngtâi inthlahrun châng emaw, thil eng emaw tak i tihsual vânga Pathian hnêna ngaihdam dîl hrehawm tih chângte i nei tawh ngâi em? Sual vâng hian Pathian hlata awmte kan duh thîn a, tanpuina dîl pawh kan tîm deuh dui thîn. Mahse, chutianga inthlahrung chu ni lo tûrin Pathianin min duhsak a. Ani chuan “zahngaihna kan hmuh theihna tûr leh, puih kan ngaih huna tanpuina khawngaihna kan hmuh theihna tûrin, khawngaihna lalthutphah chu
huai taka hnâih,” (Hebrai 4:16) tûrin min duh a ni. Chuvângin, vawiin, tûnah ngei hian, A zahngaihna rinchhan chungin, chhandamna thilthlâwnpêk chu dîl nghâl rawh le. Kha phâr natna vei, Isua tihdamna chang ta pawh khân a kal vena apiangah, mi a tawh apiangte hnênah a chunga Isua thil tihsak chunga a lâwmzia chu a hrilh ta zêl a nih kha. Nang pawh chhanchhuah i nihna avânga Isua chunga i lâwmna chu i hrilh ve zêl dâwn nia.
Zirtawpni
Chhiar tûr: Sam 37:4 A chhe zâwng emaw, a tha zâwng emaw i nun lo inher danglam tâk hlauh lâi hun kha ngaihtuah la. Kha phâr natna veitu anga nun lo inher danglam thut theih dân ngaihtuah teh. Thinlung chhûng ril taka i thil duh ber chu eng nge ni? Chu tak chu engtin nge Pathianin tihsak che a duh a, rinna zâra Pathianin a pêk tâk che avângin eng lâwmthu nge i hrilh ve dâwn le?